ប្រាជ្ញាពីបុរាណមានប្រយោជន៍សម្រាប់សម័យយើង
ចូរអភ័យទោសឲ្យដោយគ្មានល័ក្ខខ័ណ្ឌ
គោលការណ៍គម្ពីរ: «ចូរ . . . អភ័យទោសឲ្យគ្នាទៅវិញទៅមកដោយគ្មានល័ក្ខខ័ណ្ឌ បើអ្នកណាមានហេតុត្អូញត្អែរអំពីអ្នកណាម្នាក់។ ព្រះយេហូវ៉ាបានអភ័យទោសឲ្យអ្នករាល់គ្នាដោយគ្មានល័ក្ខខ័ណ្ឌ ម្ល៉ោះហើយ ចូរអ្នករាល់គ្នាធ្វើដូច្នោះដែរ»។—កូឡុស ៣:១៣
តើនេះមានន័យយ៉ាងណា? ក្នុងគម្ពីរ អំពើខុសឆ្គងបានត្រូវប្រដូចទៅនឹងបំណុល ហើយការអភ័យទោសឲ្យអ្នកឯទៀតបានត្រូវប្រដូចនឹងការលុបចោលបំណុល។ (លូកា ១១:៤) ឯកសារយោងមួយពន្យល់ថា ពាក្យភាសាក្រិចក្នុងគម្ពីរដែលបានត្រូវបកប្រែថា«អភ័យទោស» មានន័យថា«ឲ្យរួចបំណុល ដោយមិនទាមទារយកមកវិញទេ»។ ហេតុនេះ ពេលយើងសម្រេចចិត្តអភ័យទោសឲ្យនរណាម្នាក់ដែលធ្វើខុសចំពោះយើង យើងមិនរំពឹងឲ្យបុគ្គលនោះឲ្យអ្វីមួយមកយើងវិញទេ។ ការសុខចិត្តអភ័យទោសឲ្យមិនមានន័យថាយើងពេញចិត្តនឹងការប្រព្រឹត្តអាក្រក់ ឬចាត់ទុកថាការដែលគេធ្វើឲ្យយើងឈឺចិត្តមិនសូវសំខាន់នោះទេ។ ផ្ទុយទៅវិញ យើងសម្រេចចិត្តលែងប្រកាន់ទោសទៀត ទោះជាយើងប្រហែលជាមាន«ហេតុត្អូញត្អែរ»ក៏ដោយ។
តើមានប្រយោជន៍នៅសព្វថ្ងៃនេះឬទេ? ជាមនុស្សមិនល្អឥតខ្ចោះ យើងទាំងអស់គ្នាចេះធ្វើខុស។ (រ៉ូម ៣:២៣) ហេតុនេះ ជាការប្រកបដោយប្រាជ្ញា បើយើងចេះអភ័យទោសឲ្យអ្នកឯទៀត ព្រោះមិនយូរមិនឆាប់យើងក៏ត្រូវការឲ្យអ្នកឯទៀតអភ័យទោសឲ្យយើងវិញដែរ។ មិនត្រឹមតែប៉ុណ្ណោះ ពេលយើងសម្រេចចិត្តអភ័យទោសឲ្យអ្នកឯទៀត យើងផ្ទាល់ក៏ទទួលប្រយោជន៍ដែរ។ ហេតុអ្វីយើងនិយាយដូច្នេះ?
ពេលយើងខឹងងំ ចងគំនុំ និងមិនព្រមអភ័យទោសឲ្យអ្នកឯទៀត នោះយើងធ្វើទុក្ខខ្លួនយើង។ អារម្មណ៍មិនល្អបែបនេះអាចឆក់យកសុភមង្គលរបស់យើង ដាក់កម្រិតលើជីវិតយើង ហើយធ្វើឲ្យជីវិតយើងគ្មានភាពស្រស់ស្រាយ។ ការមានអារម្មណ៍បែបនោះក៏អាចនាំឲ្យមានបញ្ហាសុខភាពធ្ងន់ធ្ងរទៀតផង។ ទស្សនាវដ្ដីមួយដែលសរសេរដោយវេជ្ជបណ្ឌិតយ៉ូអ៊ីឈី ឈីដា និងសាស្ដ្រាចារ្យខាងចិត្តវិទ្យាឈ្មោះអេនទ្រូ ស្ទែបថូ បានរៀបរាប់ថា៖ «តាមការស្រាវជ្រាវថ្មីៗនេះបានរកឃើញថា ការមានកំហឹង និងការស្អប់ មានផលប៉ះពាល់ធ្ងន់ធ្ងរដែលអាចនាំឲ្យកើតជំងឺបេះដូង» (Journal of the American College of Cardiology)។
ផ្ទុយទៅវិញ សូមពិចារណាអំពីប្រយោជន៍នៃការអភ័យទោសឲ្យអ្នកឯទៀត។ ពេលយើងអភ័យទោសឲ្យដោយគ្មានល័ក្ខខ័ណ្ឌ យើងរក្សាឲ្យមានសាមគ្គីភាពនិងភាពសុខសាន្ត ហើយនោះការពារចំណងមិត្តភាពរវាងយើងនិងអ្នកឯទៀត។ សំខាន់ជាងនោះទៅទៀត យើងបង្ហាញថាយើងយកតម្រាប់តាមព្រះ ដែលអភ័យទោសឲ្យអ្នកធ្វើខុសដែលប្រែចិត្ត ហើយលោកធ្វើដូច្នោះដោយគ្មានល័ក្ខខ័ណ្ឌ។ លោកក៏តម្រូវឲ្យយើងធ្វើដូច្នោះដែរ។—ម៉ាកុស ១១:២៥; អេភេសូរ ៤:៣២; ៥:១