ប្រអប់សំណួរ
◼ តើបងប្អូនដែលបម្រើជាឆ្មាំនៅកិច្ចប្រជុំក្រុមជំនុំមានភារកិច្ចអ្វីខ្លះ?
ពួកឆ្មាំមានភារកិច្ចទទួលស្វាគមន៍យ៉ាងកក់ក្ដៅចំពោះអស់អ្នកដែលមកចូលរួមកិច្ចប្រជុំ។ ពួកគាត់ក៏មានភារកិច្ចរកកន្លែងអង្គុយសម្រាប់អស់អ្នកដែលមកយឺត រាប់ចំនួនមនុស្សដែលមកកិច្ចប្រជុំ រក្សាឲ្យមានសណ្ដាប់ធ្នាប់និងសន្ដិសុខ ហើយធ្វើយ៉ាងណាឲ្យមានខ្យល់ចេញចូលសាលប្រជុំជាដើម។ ពួកគាត់គួរជាមនុស្សដែលមានភាពរួសរាយរាក់ទាក់ ហើយចាត់វិធានការបំពេញភារកិច្ចរបស់ខ្លួនដោយមិនចាំបាច់មានអ្នកណាប្រាប់ (km ១១/០៧ ទំព័រ៤ វគ្គ៣-៤)។
ពួកឆ្មាំគួរយកចិត្តទុកដាក់នឹងសេចក្ដីត្រូវការរបស់អ្នកថ្មី ធ្វើឲ្យពួកគាត់មានអារម្មណ៍ស្រួល និងជួយពួកគាត់រកកន្លែងអង្គុយផងដែរ។ យើងទាំងអស់គ្នានៅក្នុងក្រុមជំនុំគួរប្រុងប្រៀបដើម្បីជួយអ្នកថ្មី ដោយទៅសំណេះសំណាលជាមួយពួកគាត់ ហើយឲ្យពួកគាត់មានអារម្មណ៍ស្រួល។ ពេលរកកន្លែងអង្គុយសម្រាប់អ្នកដែលមកយឺត ឆ្មាំគួរព្យាយាមយ៉ាងណាកុំឲ្យរំខានដល់អ្នកដែលកំពុងអង្គុយហើយ។ ជួនកាលពួកគាត់ក៏ចែកទស្សនាវដ្ដីដែលក្រុមជំនុំកំពុងសិក្សាដល់អ្នកថ្មីដែរ។
ការរក្សារបៀបរៀបរយក្នុងអំឡុងកិច្ចប្រជុំគឺសំខាន់ណាស់។ យើងលើកទឹកចិត្តឪពុកម្ដាយឲ្យនាំកូនៗរបស់ពួកខ្លួនមកប្រជុំ ដូច្នេះជួនកាលនឹងមានការរំខានខ្លះៗ។ ប៉ុន្តែ ពេលដែលកូនក្មេងនៅតែរពឹស ឬមិនស្ដាប់បង្គាប់ នោះឆ្មាំម្នាក់គួរសុំផ្ដល់ជំនួយដោយចិត្តសប្បុរស។ ប្រហែលជាគាត់អាចឲ្យយោបល់ឪពុកឬម្ដាយថា គាត់អាចយកកូនចេញទៅក្រៅបន្ដិចសិន។ ប្រសិនបើឪពុកម្ដាយមានកូនតូចជាមួយអង្គុយនៅកន្លែងដែលពួកគាត់ស្រួលយកកូនចេញបើចាំបាច់ នោះពួកគាត់នឹងអាចយកចិត្តទុកដាក់ចំពោះសេចក្ដីត្រូវការនៃកូនតូចរបស់ពួកគាត់ដោយមិនសូវរំខានដល់អ្នកឯទៀតទេ។
នៅតំបន់ខ្លះមានបញ្ហាខាងសន្ដិសុខ ពួកឆ្មាំត្រូវការពារពីពួកអ្នកដែលបំផ្លិចបំផ្លាញទ្រព្យសម្បត្ដិ ឬពីពួកអ្នកប្រឆាំងដែលចង់រំខានដល់កិច្ចប្រជុំ។ ប្រសិនបើមាននរណាម្នាក់ក្នុងសាលប្រជុំព្យាយាមរំខានឬបញ្ឈប់កិច្ចប្រជុំ នោះឆ្មាំគួរសុំឲ្យគាត់ចេញទៅ។ ប្រសិនបើគាត់មិនព្រមចេញហើយបន្តរំខានដល់កិច្ចប្រជុំ នោះពួកអ្នកចាស់ទុំអាចហៅពួកអាជ្ញាធរបាន។ (ពួកអ្នកចាស់ទុំមានសេចក្ដីណែនាំលាយលក្ខណ៍អក្សរ ថែមទៀតដែលនឹងជួយពួកគាត់ក្នុងស្ថានការណ៍នេះ) នៅតំបន់ខ្លះ ពួកឆ្មាំប្រហែលជាត្រូវមើលកន្លែងចតយានយន្ត ក្នុងអំឡុងកិច្ចប្រជុំ។
ពេលឆ្មាំរាប់ចំនួនអ្នកចូលរួម ចូររាប់ទាំងមនុស្សពេញវ័យនិងកូនក្មេងដែលកំពុងស្ដាប់និងទទួលប្រយោជន៍ សូម្បីតែបន្ដិចបន្តួចក៏ដោយ។