បង្ហាញការខ្វល់ខ្វាយដ៏ស្មោះដល់មនុស្សដែលមានចំណូលចិត្ត
១ ពួកអ្នកដែលនៅក្នុងអង្គការរបស់ព្រះយេហូវ៉ា ធ្វើកិច្ចបំរើដោយដឹងនូវភាពបន្ទាន់។ សេចក្ដីប្រកាសព្រះរាជាណាចក្រពាសពេញពិភពលោក មិនយូរប៉ុន្មានទៀតនឹងចប់ ក្រោយមកពួកទាំងអស់ ‹ដែលមិនស្គាល់ព្រះ› នឹងទទួលសេចក្ដីហិនវិនាស។ (ថែស្សាឡូនីចទី២ ១:៧-៩) ដូច្នេះ សេចក្ដីខ្វល់ខ្វាយដ៏ស្មោះដល់ជីវិតអ្នកដទៃ កំពុងតែជំរុញឲ្យប្រជារាស្ត្ររបស់ព្រះយេហូវ៉ា នាំសារនៃព្រះរាជាណាចក្រឲ្យបានដល់មនុស្សជាច្រើន។—សេផានា ២:៣
២ រៀងរាល់ខែ រាប់លានម៉ោងបានត្រូវចំណាយ ដើម្បីស្វែងរកពួកអ្នកដែលចង់ស្ដាប់«ដំណឹងល្អពីការប្រសើរមក»។ (អេសាយ ៥២:៧) ក្នុងការតបឆ្លើយនឹងឧបករណ៍ផ្សាយថ្មីៗនេះ ពួកបុគ្គលជាច្រើនទទួលយកទស្សនាវដ្ដីប៉មយាម និងទស្សនាវដ្ដីភ្ញាក់រឭក! ឬក៏សៀវភៅស្តើងតើព្រះតម្រូវអ្វីពីយើង? ការខ្វល់ខ្វាយដ៏ស្មោះចំពោះមនុស្សទាំងអស់នេះ គួរតែជំរុញឲ្យយើងត្រឡប់ទៅរកមនុស្សដែលមានចំណូលចិត្ត។—សុភាសិត ៣:២៧
៣ សូមកត់ទុកឲ្យបានត្រឹមត្រូវ៖ កិច្ចផ្សាយនឹងបានសម្រេចច្រើនថែមទៀត ពេលដែលមានការកត់ទុកឲ្យបានត្រឹមត្រូវ នូវអ្នកណាដែលមានចំណូលចិត្ត ហើយនិងអ្វីដែលយើងបានផ្ដល់ទៅគេ។ ពត៌មានដូចជាឈ្មោះរបស់អ្នកផ្ទះ ហើយនិងអាស័យដ្ឋាន ថ្ងៃនិងពេលវេលាដែលអ្នកបានទៅជួប ឧបករណ៍ផ្សាយដែលបានផ្ដល់ឲ្យអ្នកផ្ទះ ហើយនិងចំណុចដែលបានពិគ្រោះ នឹងធ្វើឲ្យអ្នកមានប្រសិទ្ធិភាពច្រើនពេលត្រឡប់ទៅជួបម្ដងទៀត។ ម្យ៉ាងទៀត បើសិនជាអ្នកសរសេរអ្វីដែលអ្នកផ្ទះបាននិយាយ ក្នុងលើកទីមួយ នោះអ្នកនឹងអាចយកមកមើល កាលដែលអ្នកពិភាក្សាក្នុងពេលត្រឡប់ទៅជួបវិញ។
៤ សូមឲ្យរហ័សក្នុងការត្រឡប់ទៅជួបម្ដងទៀត៖ តើមានប៉ុន្មាននាក់ក្នុងខែមុននេះ ដែលបានទទួលឧបករណ៍ផ្សាយពីអ្នក ដែលអ្នកបានទៅជួបគេវិញ? ប្រហែលជាច្រើនអាទិត្យកន្លងទៅហើយមើលទៅ ដែលមិនបានទៅជួបគេទៀត? សេចក្ដីខ្វល់ខ្វាយដ៏ស្មោះដល់សុខុមាលភាពដ៏អស់កល្បជានិច្ចរបស់គេ នឹងជំរុញអ្នកឲ្យរហ័សត្រឡប់ទៅរកគេវិញ ជាពិសេសនៅក្នុងរយៈពីរបីថ្ងៃប៉ុណ្ណោះ ដើម្បីឲ្យការសន្ទនាមានថ្មីៗក្នុងគំនិតគេនៅឡើយ។ ដោយរហ័សត្រឡប់ទៅជួបវិញ ដើម្បីពង្រីកចំណូលចិត្តរបស់គេ នោះអ្នកប្រហែលជាអាចបង្ការការខំប្រឹងរបស់អារក្សសាតាំងមុនវានឹង «មកលួចឆក់យកព្រះបន្ទូល ដែលព្រោះក្នុងចិត្តគេ»។—ម៉ាកុស ៤:១៥
៥ ការរៀបចំគឺសំខាន់ណាស់៖ ប្រសិទ្ធិភាពរបស់អ្នកក្នុងការត្រឡប់ទៅជួបម្ដងទៀត គឺពឹងពាក់ទៅលើរបៀបដែលអ្នករៀបចំ។ ត្រូវឲ្យមានគម្រោងការណ៍និយាយមុននឹងត្រឡប់ទៅជួបម្ដងទៀត។ នៅខាងក្រោយទំព័រកិច្ចបំរើព្រះរាជាណាចក្រយើង ខែមេសា ១៩៩៧ ផ្ដល់នូវរបៀបនិយាយខ្លះៗដែលអ្នកអាចប្រើឲ្យបានលទ្ធផលល្អ ពេលដែលអ្នកប្រើទស្សនាវដ្ដី ឬក៏សៀវភៅស្តើងតម្រូវ។ បន្ទាប់មក គឺត្រូវមានអ្វីមួយដែលអ្នកចង់ចែកប្រាប់ ពេលដែលអ្នកត្រឡប់ទៅវិញ។ តើនឹងនិយាយអ្វី ពេលដែលអ្នកត្រឡប់ទៅជួបមនុស្សដែលមានចំណូលចិត្ត? តើការសិក្សាព្រះគម្ពីរអាចចាប់ផ្ដើមរបៀបណា? អ្នកប្រហែលជាអាចធ្វើតាមយោបល់ទាំងនេះ។
៦ ពេលដែលទៅបន្តការពិគ្រោះគ្នាអំពីអ្វីដែលត្រូវការដើម្បីសំអាតផែនដី ហើយនិងធ្វើឲ្យទៅជាកន្លែងរស់នៅដ៏ប្រសើរនោះ អ្នកប្រហែលជាអាចនិយាយថា៖
◼ «ពេលដែលខ្ញុំមកពីលើកមុន យើងបានយល់ព្រមថា ត្រូវមានការចាត់វិធានការដ៏ធំមុននឹងផែនដីអាចត្រឡប់ទៅជាទីមនោរម្យដ៏ក្សេមក្សាន្តបាន។ តើអ្នកគិតថា មនុស្សជាតិអាចបំពេញកិច្ចការនេះបានទេ? [អនុញ្ញាតឲ្យគេឆ្លើយ]។ សូមកត់សម្គាល់មើល នូវមូលហេតុដែលព្រះត្រូវធ្វើអន្តរាគមន៍ក្នុងកិច្ចការរបស់មនុស្ស»។ សូមអានទំនុកដំកើង ៣៧:៣៨។ រួចមក សូមបើកទៅឯមេរៀនទី៥ក្នុងសៀវភៅស្តើងតម្រូវ ហើយប្រើចំណុចខ្លះៗនៃវគ្គ៤-៥ដើម្បីបង្ហាញនូវរបៀបដែលព្រះនឹងបំពេញទំនាយនេះ។ បន្ទាប់មកផ្ដល់ការសិក្សាព្រះគម្ពីរ ដោយប្រើសៀវភៅស្តើងនេះ។
៧ បើសិនជាអ្នកបានពិគ្រោះព្រះរាជាណាចក្រនៃព្រះ ហើយបានឲ្យសៀវភៅស្តើង«តម្រូវ»នៅលើកដំបូង ពេលដែលអ្នកត្រឡប់ទៅជួបម្ដងទៀត អ្នកអាចនិយាយដូចនេះ៖
◼ «ពេលដែលយើងបាននិយាយគ្នានៅលើកមុន យើងបានសម្គាល់ឃើញថា ព្រះរាជាណាចក្រនៃព្រះគឺជារដ្ឋាភិបាលពិត ដែលនឹងគ្រប់គ្រងទៅលើពិភពលោកទាំងមូលនេះ។ ព្រះគម្ពីរបង្ហាញថា ព្រះយេស៊ូគ្រីស្ទទ្រង់នឹងគ្រប់គ្រង។ តើអ្នកអាចឃើញនូវផលប្រយោជន៍ណាខ្លះ ដោយមានរដ្ឋាភិបាលនិងមេដឹកនាំដូចនេះ»? អនុញ្ញាតឲ្យគេឆ្លើយ។ សូមបើកសៀវភៅស្តើងតម្រូវទៅមេរៀនទី៦។ ដោយប្រើចំណុចខ្លះៗក្នុងវគ្គ៦-៧ ហើយនិងរូបភាពនៅទំព័រ ១៣ សូមពន្យល់នូវអ្វីដែលព្រះរាជាណាចក្រនៃព្រះនឹងធ្វើសំរាប់មនុស្សជាតិក្នុងអនាគត។ សូមអានដានីយ៉ែល ២:៤៤ ហើយបើសិនជាអាចធ្វើទៅបាន សូមបង្ហាញសៀវភៅចំណេះ ហើយផ្ដល់ការសិក្សាព្រះគម្ពីរ។
៨ បើសិនជាអ្នករកឃើញអ្នកណាម្នាក់ ដែលទទួលស្គាល់ថា សាសនាពិភពលោកបានបង្កើតបញ្ហាដល់មនុស្សជាតិ អ្នកអាចសួរដូច្នេះ ពេលត្រឡប់ទៅជួបម្ដងទៀត៖
◼ «តើអ្នកមានដែលឆ្ងល់ថា ដូចម្ដេចដែលយើងអាចដឹងថា សាសនាមួយណាដែលព្រះសព្វព្រះហឫទ័យទេ? [អនុញ្ញាតឲ្យគេឆ្លើយ]។ សៀវភៅស្តើងនេះតើព្រះតម្រូវអ្វីពីយើង? ផ្ដល់នូវសញ្ញាសម្គាល់នៃសាសនាពិត»។ សូមបើកទៅមេរៀនទី១៣ ហើយបង្ហាញចំណុចសំខាន់ទាំងប្រាំក្នុងវគ្គ៣-៧។ អ្នកអាចបន្តនិយាយថា៖ «ថែមពីលើការស្វែងរកសាសនាពិត នោះយើងត្រូវស្វែងរកអ្វីដែលព្រះតម្រូវពីយើងម្នាក់ៗ»។ សូមអានយ៉ូហាន ៤:២៣, ២៤។ សូមផ្ដល់នូវការពិគ្រោះរឿងនេះថែមទៀត។ សូមបើកទៅមេរៀនទី១ក្នុងសៀវភៅស្តើង ហើយបង្ហាញនូវរបៀបដែលយើងបង្រៀន។
៩ ពេលដែលអ្នកត្រឡប់ទៅជួបម្ដងទៀតដើម្បីបន្តការពិគ្រោះអំពីរឿងសុភមង្គលក្នុងគ្រួសារ អ្នកអាចនិយាយស្រដៀងនេះ៖
◼ «ពេលដែលយើងបានជួបលើកមុន ខ្ញុំបានពិគ្រោះជាមួយអ្នកអំពីកូនសោនៃសុភមង្គលក្នុងគ្រួសារ ហើយនោះគឺត្រូវអនុវត្តតាមព្រះបន្ទូលរបស់ព្រះ ព្រះគម្ពីរ។ បើនិយាយអំពីសេចក្ដីត្រូវការនៃគ្រួសារនៅសម័យនេះ តើអ្នកជឿថាព្រះគម្ពីរទាន់សម័យ ឬក៏មិនទាន់សម័យ»? អនុញ្ញាតឲ្យគេឆ្លើយ។ បង្ហាញសៀវភៅចំណេះ។ សូមបើកទៅជំពូក២ ហើយសូមអានសំនួរនៅក្នុងវគ្គ១៣។ ដោយប្រើចំណុចក្នុងវគ្គ៣ សូមផ្ដល់ការសិក្សាព្រះគម្ពីរជាគ្រួសារ។
១០ សៀវភៅស្តើងតម្រូវ បានបង្ហាញភស្តុតាងថា ជាឧបករណ៍ធំល្អមួយ ក្នុងការជួយអ្នកដទៃឲ្យរៀនពីសេចក្ដីតម្រូវរបស់ព្រះ។ ភាពខ្លីនិងសេចក្ដីច្បាស់លាស់នៃសារ ហើយនិងភាពមិនស្មុគស្មាញនិងសោភ័ណភាពដ៏ល្អ ធ្វើឲ្យស្រួលចាប់ផ្ដើមបង្រៀន។ នៅពេលធ្វើទៅបាន យោងទៅតាមការយកចិត្តទុកដាក់និងសមត្ថភាពរបស់សិស្ស ការសិក្សាអាចផ្លាស់ប្ដូរទៅរៀនសៀវភៅចំណេះ។ ការផ្លាស់ប្ដូរដ៏ស្រួលអាចបញ្ចូលយ៉ូហាន ១៧:៣ ដើម្បីពន្យល់អំពីសេចក្ដីត្រូវការយកចំណេះខ្ពស់នៃព្រះឲ្យបានច្រើនទៀត ដែលសៀវភៅនេះនឹងអាចផ្ដល់ឲ្យ។
១១ ចូរឲ្យយើងឆ្លៀតយកប្រយោជន៍គ្រប់ពេលវេលា ដើម្បីបង្ហាញនូវសេចក្ដីខ្វល់ខ្វាយដ៏ស្មោះ ចំពោះអ្នកណាដែលមានចំណូលចិត្ត ដែលយើងបានជួបក្នុងតំបន់ផ្សាយរបស់យើង។ ដោយកត់ទុកឲ្យបានត្រឹមត្រូវ រៀបចំទុកជាមុន ហើយដោយត្រឡប់ឲ្យបានឆាប់រហ័សទៅពង្រីកចំណូលចិត្តនោះថែមទៀត នោះយើងអាចបង្ហាញនូវសេចក្ដីស្រឡាញ់នៃអ្នកជិតខាង ដែលនឹងទាក់ទាញចិត្តគេឲ្យមកផ្លូវនៃសេចក្ដីសង្គ្រោះនេះដែរ។—ម៉ាថាយ ២២:៣៩; កាឡាទី ៦:១០