អញ្ជើញពួកគេមក
១ សេចក្ដីអញ្ជើញមួយដែលបានត្រូវជូនឡើងអស់រាប់សតវត្សមុន ឥឡូវកំពុងតែត្រូវបន្លឺឡើង ក្នុងជាង២៣៣ប្រទេសទូទាំងពិភពលោកថា៖ «ចូរយើងឡើងទៅឯភ្នំនៃព្រះយេហូវ៉ា . . . ទ្រង់នឹងបង្រៀនយើងពីផ្លូវរបស់ទ្រង់ នោះយើងនឹងដើរតាមផ្លូវទាំងនោះ»។ (អេសាយ ២:៣) ការណែនាំមនុស្សមកដល់អង្គការរបស់ព្រះយេហូវ៉ាគឺជារបៀបមួយដ៏ល្អបំផុតដែលយើងអាចជួយពួកគេលូតលាស់ខាងវិញ្ញាណដែលនាំទៅដល់ជីវិតអស់កល្បជានិច្ច។
២ អ្នកផ្សព្វផ្សាយខ្លះ ប្រហែលជាស្ទាក់ស្ទើរក្នុងការអញ្ជើញមនុស្សមកកិច្ចប្រជុំទាល់តែក្រោយពួកគេបានបង្ហាញការលូតលាស់ច្រើនល្មមក្នុងការសិក្សាព្រះគម្ពីរតាមផ្ទះ។ ក៏ប៉ុន្តែ ជួនកាលមនុស្សចាប់ផ្ដើមមកប្រជុំសូម្បីតែពីមុនការសិក្សាអាចត្រូវចាប់ផ្ដើមជាមួយនឹងគេ។ យើងមិនគួរបង្អង់ក្នុងការអញ្ជើញយ៉ាងកក់ក្ដៅនិងការលើកទឹកចិត្តមនុស្សមកប្រជុំទេ។
៣ អ្វីដែលគួរធ្វើ៖ ប្រើប័ណ្ណកម្មវិធីប្រជុំដើម្បីប្រាប់ឲ្យមនុស្សដឹងអំពីកិច្ចប្រជុំតាមតំបន់របស់យើង។ ប្រាប់ថាកិច្ចប្រជុំទាំងនោះគឺឥតគិតថ្លៃទេ ហើយក៏គ្មានការរៃលុយដែរ។ សូមពន្យល់នូវរបៀបកិច្ចប្រជុំនោះត្រូវបានដឹកនាំ។ បញ្ជាក់ថា តាមការពិតប្រជុំនោះគឺជាកម្មវិធីសិក្សាព្រះគម្ពីរ ហើយពត៌មានសិក្សានោះត្រូវផ្ដល់ដើម្បីឲ្យមនុស្សទាំងអស់មើលតាម។ និយាយអំពីជីវប្រវត្ដិនិងឋានៈផ្សេងៗនៃពួកអ្នកដែលចូលរួម។ ប្រាប់ថាពួកគេជាមនុស្សពីតំបន់នោះ ហើយពួកក្មេងអាយុប៉ុណ្ណា ក៏ត្រូវស្វាគមន៍ដែរ។ យើងគួរអញ្ជើញអ្នកសិក្សារបស់យើង ទាំងស្នើជួយគេតាមមធ្យោបាយណាក៏ដោយដើម្បីឲ្យគេបានមក។
៤ អ្វីមួយដែលបានត្រូវសរសេរក្រោយបង្អស់ក្នុងព្រះគម្ពីរ គឺជាសេចក្ដីអញ្ជើញដ៏កក់ក្ដៅមួយ ដើម្បីទទួលនូវសំវិធានការរបស់ព្រះយេហូវ៉ាសំរាប់ជីវិត៖ «ព្រះវិញ្ញាណ នឹងប្រពន្ធថ្មោងថ្មីពោលថា អញ្ជើញមក . . . អ្នកណាដែលស្រេក នោះមានតែមក ហើយអ្នកណាដែលចង់បាន មានតែយកទឹកជីវិតនោះចុះ ឥតចេញថ្លៃទេ»។ (វិវរណៈ ២២:១៧) គ្មានអ្វីល្អជាងដែលអាចជំនួសការអញ្ជើញអ្នកដទៃមកកិច្ចប្រជុំនោះទេ។
៥ អេសាយ ៦០:៨ ពណ៌នាតាមបទទំនាយ អំពីពួកអ្នកសរសើរថ្មីរាប់សែននាក់ដែលកំពុងតែចូលក្នុងក្រុមជំនុំនៃព្រះ ជាព្រាបដែល«រសាត់មកដូចជាពពក ហើយហើរមកឯបង្អួចរបស់ខ្លួនគ្រប់គ្នា ដូចជាព្រាបនោះ»។ យើងទាំងអស់គ្នាអាចអញ្ជើញអ្នកថ្មីមកឯកិច្ចប្រជុំយើងហើយស្វាគមន៍គេ។ តាមរបៀបនេះ យើងសហការជាមួយនឹងព្រះយេហូវ៉ា ពេលដែលទ្រង់បង្កើនល្បឿននៃកិច្ចការប្រមូលនេះ។—អេសាយ ៦០:២២