របៀបដែលសមាជិកគ្រួសារជួយគ្នាដើម្បីមានចំណែកពេញលេញ—ក្នុងកិច្ចប្រជុំតាមក្រុមជំនុំ
១ គ្រួសារគ្រីស្ទានទាំងឡាយ ត្រូវតែប្រព្រឹត្តតាមបញ្ជាដែលថាត្រូវរួបរួមគ្នានៅកិច្ចប្រជុំតាមក្រុមជំនុំ។ (ហេព្រើរ ១០:២៤, ២៥) ដោយការសហការយ៉ាងល្អ នោះសមាជិកទាំងអស់អាចជោគជ័យក្នុងការរៀបចំសំរាប់កិច្ចប្រជុំ និងចូលរួមក្នុងប្រជុំផងដែរ។ កាលៈទេសៈគ្រួសារគឺខុសពីគ្នា ប៉ុន្តែ មានអ្វីខ្លះដែលប្ដីគ្រីស្ទាន ប្រពន្ធដែលជាអ្នកជឿ ឬក៏ឪពុកឬម្ដាយដែលគ្មានគូអាចធ្វើទៅបានដើម្បីបង្កើតឲ្យមានសាមគ្គីភាពក្នុងរឿងខាងវិញ្ញាណ ទោះជាមានកូនចៅចំនួនប៉ុន្មានឬក៏អាយុប៉ុន្មានក៏ដោយក្នុងផ្ទះនោះ។—សុភាសិត ១:៨
២ ឆ្លៀតពេលដើម្បីរៀបចំ៖ សមាជិកគ្រួសារជួយគ្នាដើម្បីដឹងថា សមាជិកនិមួយៗបានរៀបចំយ៉ាងត្រឹមត្រូវសំរាប់កិច្ចប្រជុំក្រុមជំនុំ ហើយឬនៅ។ គ្រួសារជាច្រើនពិចារណាមើលជាមួយគ្នា នូវអត្ថបទសំរាប់ការសិក្សាទស្សនាវដ្ដីប៉មយាម ប្រចាំសប្ដាហ៍។ គ្រួសារខ្លះរៀបចំសំរាប់ការសិក្សាសៀវភៅតាមក្រុមជំនុំ ឬក៏អានជាមួយគ្នានូវអំនានព្រះគម្ពីរសំរាប់សប្ដាហ៍នោះ។ គោលបំណងក្នុងនោះ គឺជាការចងចាំចំណុចសំខាន់ៗមុននឹងទៅឯកិច្ចប្រជុំ។ តាមរបៀបដូចនោះដែរ សមាជិកទាំងអស់គ្នានឹងទទួលប្រយោជន៍ច្រើនជាងពីអ្វីដែលត្រូវឮ ហើយនឹងបានត្រូវប្រដាប់ឲ្យចូលរួមពេលមានឱកាសធ្វើដូច្នោះ។—ធីម៉ូថេទី១ ៤:១៥
៣ គម្រោងនឹងចូលរួម៖ សមាជិកនិមួយក្នុងគ្រួសារគួរមានគោលដៅថ្លែងពីសេចក្ដីសង្ឃឹមរបស់ខ្លួននៅមុខអ្នកដទៃ ដោយការឆ្លើយនៅកិច្ចប្រជុំ។ (ហេព្រើរ ១០:២៣) តើសមាជិកគ្រួសារម្នាក់ត្រូវការជំនួយឬក៏សេចក្ដីលើកទឹកចិត្តដើម្បីធ្វើដូច្នេះទេ? តើសមាជិកម្នាក់ៗត្រូវការជំនួយបែបណាដើម្បីរៀបចំចំណែកក្នុងសាលាកិច្ចបំរើព្រះធិបតេយ្យ? ប្រពន្ធទាំងឡាយអបអរពេលដែលប្ដីរបស់ខ្លួនយកចិត្តទុកដាក់ ហើយប្រហែលជាជូនគំនិតអំពីពាក្យប្រៀបប្រដូចដ៏សមរម្យមួយ ឬក៏លំដាប់រៀបចំមួយដ៏មានប្រយោជន៍។ ឪពុកម្ដាយទាំងអស់មិនចាំបាច់មានអារម្មណ៍ថា គេត្រូវតែរៀបចំនូវចំណែកសំរាប់ពួកកូនរបស់គេទេ។ ការធ្វើដូច្នេះអាចបង្អាក់ការផ្ដើមគំនិតរបស់កូនវិញ។ ក៏ប៉ុន្តែ អស់អ្នកដែលជាឪពុកម្ដាយអាចជួយកូនរបស់ខ្លួនបាន ហើយស្ដាប់ពេល ដែលកូនហាត់ឆ្លើយឮៗ។—អេភេសូរ ៦:៤
៤ រៀបចំដើម្បីឲ្យមានវត្តមាន៖ កូនក្មេងៗអាចត្រូវបង្រៀនពីតូចមកឲ្យរៀបចំស្លៀកពាក់ដោយខ្លួនឯង និងរៀបចំខ្លួនដើម្បីចេញទៅប្រជុំតាមម៉ោងដែលត្រូវកំណត់។ សមាជិកគ្រួសារគួរជួយគ្នាក្នុងការបង្ហើយកិច្ចការផ្ទះ ដើម្បីកុំឲ្យមានការបង្អែបង្អង់។—មើលយោបល់ក្នុងសៀវភៅ សុភមង្គលគ្រួសារ ទំព័រ១១២ និងសៀវភៅ យុវជនសួរ ទំព័រ៣១៦-៣១៧ (ភាសាអង់គ្លេស)
៥ ឪពុកម្ដាយព្រមទាំងពួកកូនៗ អាចផ្ដោតអារម្មណ៍ទៅលើពាក្យសំដីរបស់លោកយ៉ូស្វេពីបុរាណ ដែលថា៖ «ឯអញនឹងពួកគ្រួអញ យើងទាំងអស់គ្នានឹងគោរពប្រតិបត្ដិដល់ព្រះយេហូវ៉ាតែមួយប៉ុណ្ណោះ»។ រួចមក ចូរតាំងចិត្តដើម្បីជួយគ្នាឲ្យមានចំណែកពេញលេញក្នុងកិច្ចប្រជុំតាមក្រុមជំនុំ។—យ៉ូស្វេ ២៤:១៥