ការធ្វើបន្ទាល់រឹតតែខ្លាំងឡើងពេលទីបញ្ចប់កំពុងតែមកជិតឡើងៗ
១ រដូវចំរូត គឺជាពេលដែលប្រកបដោយអំណរ។ នោះក៏ជាពេលធ្វើការនឿយហត់ដែរ។ ពេលសំរាប់ប្រមូលផល នោះមានកំណត់។ អ្នកធ្វើការមិនត្រូវហ៊ានត្រេតត្រតនឹងការងារគេនោះឡើយ។
២ ដោយនិយាយប្រៀបធៀប នោះព្រះយេស៊ូបានប្រៀប«បំផុតកល្ប»នៃរបបមួយ នឹងកាលចំរូត។ (ម៉ាថាយ ១៣:៣៩) យើងកំពុងតែរស់ នៅបំផុតកល្បនៃរបបនេះ ដែលមានតែមួយរយៈកំណត់ សំរាប់ការធ្វើបន្ទាល់«ទួទៅគ្រប់ក្នុងលោកីយ៍»។ (ម៉ាថាយ ២៤:១៤) ក្នុងកាលដែលទីបញ្ចប់ឆ្ពោះមកជិតឡើងៗ យើងក៏ត្រូវតែធ្វើឲ្យចំណែករបស់យើងក្នុងកិច្ចការនេះ ឲ្យរឹតតែខ្លាំងឡើងៗ។ ហេតុអ្វី? ព្រះយេស៊ូបានពន្យល់ថា៖ «ចំរូតធំណាស់ តែមានអ្នកច្រូតតិចទេ»។—ម៉ាថាយ ៩:៣៧, ៣៨; រ៉ូម ១២:១១
៣ ធ្វើនោះឡើង ដោយភាពបន្ទាន់: នៅពេលដែលព្រះយេស៊ូបានចាប់ផ្ដើមកិច្ចផ្សព្វផ្សាយដ៏ឧត្តមរបស់ទ្រង់ នោះទ្រង់មានតែបីឆ្នាំកន្លះដើម្បីសម្រេចអ្វីដែលបានត្រូវកំណត់ឲ្យទ្រង់នោះ។ ទ្រង់បានប្រកាសដោយភាពបន្ទាន់ ទាំងមានបន្ទូលថា៖ «ខ្ញុំត្រូវប្រាប់ដំណឹងល្អពីនគរព្រះ . . . គឺហេតុនោះបានជាព្រះវរបិតាចាត់ឲ្យខ្ញុំមក»។—លូកា ៤:៤៣
៤ ព្រះយេស៊ូបានបណ្ដុះនូវភាពបន្ទាន់នោះ ក្នុងពួកសិស្សរបស់ទ្រង់ដូច្នេះដែរ។ (ម៉ាកុស ១៣:៣២-៣៧) ហេតុនេះហើយ ដែល«អ្នកទាំងនោះចេះតែបង្រៀន ព្រមទាំងប្រាប់ដំណឹងល្អពីព្រះយេស៊ូវគ្រីស្ទ នៅក្នុងព្រះវិហារ ហើយនៅអស់ទាំងផ្ទះរាល់តែថ្ងៃជានិច្ច»។ (កិច្ចការ ៥:៤២) សកម្មភាពដែលមានសារៈសំខាន់តិចជាង នោះគ្មានអាទិភាពក្នុងជីវិតរបស់គេឡើយ។ ទោះបីពួកគេមានចំនួនតិចក៏ដោយ នោះគេបានជោគជ័យក្នុងការប្រកាសដំណឹងល្អ «ដល់គ្រប់ទាំងមនុស្ស ដែលកើតក្រោមមេឃផង»។—កូល៉ុស ១:២៣
៥ ឥឡូវនេះក៏មានហេតុដ៏កាន់តែសំខាន់ ឲ្យយើងបណ្ដុះបណ្ដាលឲ្យមានភាពបន្ទាន់ដូច្នេះដែរ កាលដែលគ្រា«ចុងបំផុតនៃរបស់ទាំងអស់ នោះជិតដល់ហើយ»។ (ពេត្រុសទី១ ៤:៧) ព្រះយេហូវ៉ាមានថ្ងៃនិងម៉ោងដែលបានត្រូវកំណត់ សំរាប់ទីបញ្ចប់នៃរបបនេះ។ (ម៉ាថាយ ២៤:៣៦) កិច្ចការផ្សព្វផ្សាយនឹងត្រូវបង្ហើយក្នុងពេលដែលនៅសល់។ ហេតុនេះហើយ យើងបន្តបង្កើននូវការប្រឹងប្រែងរបស់យើង ដើម្បីជូនចំពោះមនុស្សឲ្យរឹតតែច្រើនឡើង នូវដំណឹងល្អ។
៦ ដោយការធ្វើឲ្យរឹតតែខ្លាំងឡើង នូវចំណែករបស់យើងក្នុងកិច្ចផ្សាយកាលដែលទីបញ្ចប់កំពុងតែឆ្ពោះមកជិតឡើងៗ នោះយើងនឹងពេញចិត្ត ដោយទូលថ្វាយព្រះយេហូវ៉ាដូចព្រះយេស៊ូបានមានបន្ទូលថា៖ ‹យើងបានបង្ហើយការ ដែលទ្រង់បានប្រគល់ឲ្យយើងធ្វើ›។—យ៉ូហាន ១៧:៤