តើអ្នកមានគំនិតធ្វើពលិកម្មទេ?
១ ការអបអរនឹងអ្វីដែលព្រះយេស៊ូគ្រីស្ទបានសម្រេចដើម្បីមនុស្សជាតិដោយគ្មានគំនិតអាត្មានិយមនោះ គួរជំរុញយើងទាំងអស់គ្នាឲ្យប្រើសមត្ថភាព កម្លាំង និងគុណភាពរបស់យើងតាមរបៀបដែលប្រកបដោយពលិកម្ម។ បទគម្ពីរអង្វរថា៖ «ថ្វាយរូបកាយទុកជាយញ្ញបូជារស់ ហើយបរិសុទ្ធ ដែលគាប់ព្រះហឫទ័យដល់ព្រះ ជាការគោរពនៃអ្នករាល់គ្នា ដែលមានទំនង»។ (រ៉ូម ១២:១) ការពិនិត្យមើលខ្លួនឯងម្ដងម្កាលនឹងជួយអ្នកឲ្យមើលឃើញថា តើខ្លួនកំពុងតែបង្ហាញគំនិតបែបនោះអស់ពីសមត្ថភាពតាមតែកាលៈទេសៈរបស់ខ្លួនផ្ទាល់ឬក៏អត់។
២ ក្នុងការរកចំណេះខាងព្រះគម្ពីរ: តើអ្នកបានកំណត់ពេលទៀងទាត់សំរាប់ការសិក្សាព្រះគម្ពីរផ្ទាល់ខ្លួនឬទេ? តើអ្នកធ្វើតាមកាលវិភាគនោះឬទេ? តើអ្នកមានទំលាប់រៀបចំបានល្អសំរាប់កិច្ចប្រជុំក្រុមជំនុំឬទេ? បើសិនជាអ្នកជាមេគ្រួសារ តើអ្នកសិក្សាព្រះគម្ពីរជាទៀងទាត់ជាមួយក្រុមគ្រួសាររបស់ខ្លួនឬទេ? ការធ្វើអ្វីៗទាំងនេះ ប្រហែលជានឹងតម្រូវឲ្យធ្វើពលិកម្មខាងពេលវេលាដែលត្រូវចំណាយដោយការអង្គុយមើលទូរទស្សន៍ អង្គុយចុចកុំព្យូទ័រ ឬក៏សកម្មភាពផ្សេងទៀត។ ក៏ប៉ុន្តែ នេះជាពលិកម្មដ៏តូចតាចមួយយ៉ាងណាទៅហ្ន៎! បើប្រៀបមើលដឹងថា ពេលដែលត្រូវចំណាយទៅលើព្រះបន្ទូលរបស់ព្រះនឹងជួយនាំយើងទៅដល់ជីវិតអស់កល្បជានិច្ច។—យ៉ូហាន ១៧:៣
៣ ក្នុងការបង្ហាត់បង្រៀនកូនរបស់អ្នក: ពេលដែលល្អបំផុតដើម្បីចាប់ផ្ដើមរៀនធ្វើពលិកម្មគឺពេលនៅក្មេងនៅឡើយ។ ចូរបង្រៀនកូនៗរបស់អ្នក ទោះបីមានពេលប្រលែងលេងក៏ដោយ នោះត្រូវតែមានពេលសំរាប់ធ្វើការនិងកិច្ចការខាងព្រះធិបតេយ្យផងដែរ។ (អេភេសូរ ៦:៤) ចូរឲ្យពួកគេធ្វើកិច្ចការផ្ទះខ្លះៗដែលមានប្រយោជន៍។ រៀបចំកាលវិភាគដ៏ទៀងទាត់មួយដើម្បីរួមចំណែកកិច្ចបំរើជាមួយពួកគេ។ ចូរពង្រឹងពាក្យណែនាំរបស់អ្នកដោយធ្វើជាគំរូល្អមួយ។
៤ ក្នុងកិច្ចការក្រុមជំនុំ: ក្រុមជំនុំមួយនឹងត្រូវធ្វើឲ្យប្រសើរឡើង ពេលដែលទាំងអស់គ្នាសុខចិត្តធ្វើពលិកម្មដើម្បីប្រយោជន៍ក្រុមជំនុំទាំងមូល។ (ហេព្រើរ ១៣:១៦) តើអ្នកមានសមត្ថភាពចំណាយពេលច្រើនជាងក្នុងកិច្ចផ្សព្វផ្សាយនិងកិច្ចការបញ្ចុះបញ្ចូលឲ្យមានសិស្សឬទេ? តើអ្នកអាចស្ម័គ្រចិត្តជួយអ្នកឈឺឬអ្នកវ័យចាស់ ដោយប្រហែលជាជួយដឹកគេទៅឯកិច្ចប្រជុំទេ?
៥ មុនពេលដែលព្រះយេស៊ូបានធ្វើពលិកម្មដ៏ឧឡារិកបំផុត ជាការបូជាព្រះជន្មរបស់ទ្រង់ជាមនុស្ស នោះទ្រង់បានជូនឱវាទដល់ពួកសិស្សទ្រង់ឲ្យផ្ដោតអារម្មណ៍គេទៅលើប្រយោជន៍ព្រះរាជាណាចក្រ ដោយចាត់ទុកអ្វីៗផ្សេងទៀតជាការបន្ទាប់បន្សំ។ (ម៉ាថាយ ៦:៣៣) ការតាមរកគំនិតធ្វើពលិកម្មបែបនេះ នឹងនាំឲ្យមានសុភមង្គលច្រើនជាងមកដល់យើង ពេលដែលយើងបន្តបំរើព្រះយេហូវ៉ាដោយអំណរ។