«ពាក្យសំដីដែលនិយាយចំពេល»
១ តើការប្រាប់សារពីជីវិតជូនដល់អ្នកដទៃ ជាការពិបាកសំរាប់អ្នកឬទេ? តើអ្នកមានអារម្មណ៍ថា អ្នកត្រូវនិយាយអ្វីដ៏ជ្រៅជ្រះជានិច្ច ដើម្បីធ្វើឲ្យអស់អ្នកស្ដាប់កោតស្ងើចឬ? នៅពេលដែលព្រះយេស៊ូបានចាត់ពួកសិស្សរបស់ទ្រង់ឲ្យទៅ នោះទ្រង់បានមានបន្ទូលប្រាប់គេថា៖ «កំពុងដែលទៅ នោះចូរប្រកាសប្រាប់ថា ‹នគរស្ថានសួគ៌ជិតដល់ហើយ› »។ (ម៉ាថាយ ១០:៧) សារនោះមិនស្មុគស្មាញទេ តែស្រួលប្រាប់វិញ។ សព្វថ្ងៃនេះក៏មិនខុសគ្នាទេ។
២ តាមធម្មតា យើងត្រូវការពាក្យតែប៉ុន្មានម៉ាត់ទេ ដើម្បីចាប់ផ្ដើមនូវការពិគ្រោះ។ នៅពេលដែលភីលីពបានជួបនឹងមនុស្សកំរៀវជនជាតិអេធីយ៉ូពី ភីលីពបានសួរគាត់ថា៖ តើ«លោកមើលយល់ឬទេ?»។ (កិច្ចការ ៨:៣០) ជាលទ្ធផលនោះ មានការពិគ្រោះដ៏មានប្រយោជន៍មែនទែន! ពី«ពាក្យសំដីដែលនិយាយចំពេល»។—សុភាសិត ២៥:១១
៣ អ្នកក៏អាចប្រើវិធីស្រដៀងគ្នានេះដែរ ក្នុងកិច្ចបំរើផ្សាយរបស់អ្នក។ តើដោយរបៀបណាទៅ? ដោយប្រុងស្មារតី និងជ្រើសរើសពាក្យណាដែលសមស្របនឹងកាលៈទេសៈ។ សួរសំនួរមួយ និងប្រុងស្ដាប់នូវការតបឆ្លើយ។
៤ សំនួរបឋមខ្លះៗ: ដើម្បីផ្ដើមនូវការសន្ទនាមួយ អ្នកប្រហែលជាអាចសាកប្រើសំនួរណាមួយដូចតទៅនេះ:
◼ «តើអ្នកទូលថ្វាយសេចក្ដីអធិស្ឋានរបស់ព្រះអង្គម្ចាស់ (ឬ‹ឱ! ព្រះវរបិតា›) ក្នុងការថ្វាយបង្គំរបស់អ្នកទេ?»។ (ម៉ាថាយ ៦:៩, ១០) សូមសូត្រផ្នែកណាមួយនោះ និងក្រោយមកនិយាយថា៖ «អ្នកខ្លះសួរថា ‹តើព្រះមានព្រះនាមអ្វី ដែលព្រះយេស៊ូបានមានបន្ទូលថានឹងត្រូវលើកឲ្យបានបរិសុទ្ធ (ឬពិសិដ្ឋ) នោះ?› អ្នកឯទៀតសួរថា៖ ‹តើរាជ្យ ដែលព្រះយេស៊ូបានឲ្យយើងបន់សុំឲ្យមកដល់នោះជាអ្វីទៅ?› តើអ្នកបានរកឃើញចម្លើយដែលស្កប់ស្កល់ចិត្តទេ ចំពោះសំនួរទាំងនេះ?»។
◼ «តើអ្នកធ្លាប់ឆ្ងល់ទេ ថា‹ជីវិតមានខ្លឹមសារយ៉ាងណា›នោះ?»។ សូមបង្ហាញថា ខ្លឹមសារនោះទាក់ទងនឹងចំណេះអំពីព្រះ។—សាស្ដា ១២:១៣; យ៉ូហាន ១៧:៣
◼ «តើអ្នកគិតថា នឹងលែងមានសេចក្ដីស្លាប់នៅខាងមុខឬទេ?»។ សូមប្រើបទគម្ពីរអេសាយ ២៥:៨ និងវិវរណៈ ២១:៤ ដើម្បីជូនចម្លើយដ៏គួរឲ្យទុកចិត្ត។
◼ «តើមានរបៀបដោះស្រាយយ៉ាងស្រួល នូវការច្របូកច្របល់ក្នុងលោកីយ៍នេះឬទេ?»។ សូមបង្ហាញថា ព្រះទ្រង់បង្រៀនឲ្យយើង«ស្រឡាញ់អ្នកជិតខាង»។—ម៉ាថាយ ២២:៣៩
◼ «នៅថ្ងៃមួយខាងមុខនេះ តើនឹងមានមហន្តរាយសកលលោក ដែលនឹងបំផ្លាញផែនដីយើងនេះអស់ទៅឬ?»។ បង្ហាញនូវសេចក្ដីសន្យាពីព្រះគម្ពីរដែលថា ផែនដីនឹងស្ថិតស្ថេរជាដរាប។—ទំនុកដំកើង ១០៤:៥
៥ ចូរថ្លែងដំណឹងល្អតាមរបៀបដែលស្រួលយល់ ចំៗ និងដោយវិធីដ៏សប្បុរស។ ព្រះយេហូវ៉ានឹងប្រទានពរមកលើការខំប្រឹងរបស់អ្នក សូម្បីតែអ្នកប្រាប់‹ពាក្យតែមួយម៉ាត់›ខាងសេចក្ដីពិតដល់អ្នកដទៃ។