ចូរឲ្យមានចិត្តចង់រៀននៅឯការសិក្សាសៀវភៅតាមក្រុមជំនុំជានិច្ច!
១ សមាជិកក្រុមជំនុំ និងអ្នកឯទៀតដែលចូលរួមជាមួយក្រុមជំនុំ ទទួលអត្ថប្រយោជន៍ជាច្រើនពីការសិក្សាសៀវភៅតាមក្រុមជំនុំ ដែលធម្មតាត្រូវរៀបចំឲ្យមានមនុស្សតិចជាងការប្រជុំឯទៀត។ តាមរបៀបផ្សេងៗ ការសិក្សាជាក្រុមបែបនេះ មានប្រយោជន៍ច្រើនយ៉ាង ដែលយើងមិនអាចទទួលពីសំវិធានការឯទៀតពីក្រុមជំនុំ។ ហេតុអ្វី? ដោយសារការសិក្សាសៀវភៅតាមក្រុមជំនុំជាក្រុមតូចៗ នោះបើកផ្លូវឲ្យមានការសិក្សាយ៉ាងល្អិតល្អន់នូវប្រធានព្រះគម្ពីរផ្សេងៗ ថែមទាំងអាចមានការថែរក្សាមនុស្សម្នាក់ៗដើម្បីឲ្យមានភាពរីកចំរើនខាងវិញ្ញាណ។ តើអ្នកចូលរួមរៀងរាល់សប្ដាហ៍ទេ? ហេតុអ្វីយើងគួរចូលរួមរៀងរាល់សប្ដាហ៍?
២ នៅអេសាយ ៣០:២០ ព្រះយេហូវ៉ាត្រូវហៅជា‹គ្រូដ៏ឧត្តមរបស់យើង›។ គ្រីស្ទានម្នាក់ៗគួរស្ដាប់ពេលព្រះយេហូវ៉ាបង្រៀនយើងតាមរយៈព្រះបន្ទូលរបស់ទ្រង់ និងតាមប្រកាសនវត្ថុដែល‹អ្នកបំរើស្មោះត្រង់ដែលមានវិនិច្ឆ័យល្អ›ផ្ដល់ឲ្យ។ (ម៉ាថាយ ២៤:៤៥; អេសាយ ៤៨:១៧, ១៨) ព្រះយេហូវ៉ាពិតជាបង្រៀនយើងតាមរយៈសៀវភៅដែលយើងប្រើនៅការសិក្សាតាមក្រុមមែន។ តើអ្នកអាចបានប្រយោជន៍ច្រើនបំផុតពីសៀវភៅទាំងនោះយ៉ាងដូចម្ដេច?
៣ រៀបចំដើម្បីចូលរួម: ឆ្លៀតពេលជារៀងរាល់សប្ដាហ៍ដើម្បីរៀបចំសំរាប់ការសិក្សាតាមក្រុម។ អានវគ្គនិមួយៗដែលបានត្រូវកំណត់នោះ។ ចូរគិតអំពីសំនួរនិមួយៗ។ គូសចម្លើយក្នុងសៀវភៅរបស់អ្នក។ អានយ៉ាងហ្មត់ចត់នូវខគម្ពីរណាដែលមានក្នុងវគ្គទាំងនោះ។ រីឯខគម្ពីរឯទៀតដែលត្រូវសំដៅក្នុងវគ្គនោះ ចូរបើកអានដើម្បីដឹងថានោះទាក់ទងនឹងពត៌មានសិក្សាយ៉ាងដូចម្ដេច។ ចូររំពឹងគិតអំពីអ្វីដែលអ្នកកំពុងតែរៀន។ ក្រោយនោះ ប្រាប់នូវអ្វីដែលអ្នកបានវិភាគជាមុនដល់ក្រុមសិក្សារបស់អ្នក។
៤ បងប្រុសដែលដឹកនាំការសិក្សាសៀវភៅតាមក្រុម គួរជួយទាំងអស់គ្នាឲ្យប្រើព្រះគម្ពីរនិងយល់តម្លៃនៃពត៌មានដែលកំពុងតែត្រូវសិក្សា។ បើសិនជាអ្នកឆ្លើយមុនគេ សូមឆ្លើយយ៉ាងខ្លីនិងចំៗ។ បើសិនជាគេបានឆ្លើយរួចហើយ អ្នកអាចពន្យល់ថែមទៀតអំពីចំណុចនោះ។ ប្រហែលជាអ្នកអាចពន្យល់នូវរបៀបខគម្ពីរសំខាន់មួយគាំទ្ររឿងនោះ។ សូមខំឆ្លើយដោយរៀបចំពាក្យខ្លួនឯង និងអរសប្បាយនឹងការចូលរួមនោះ។
៥ ចូរឲ្យយើងពិនិត្យមើលជាមួយគ្នានូវម្ហូបអាហារយ៉ាងវិសេសខាងវិញ្ញាណ ដែលត្រូវពិគ្រោះនៅឯការសិក្សាសៀវភៅតាមក្រុមជំនុំ។ នេះនឹងលើកទឹកចិត្តយើងឲ្យរស់ជារៀងរាល់ថ្ងៃដោយទន្ទឹងចាំទាំងចិត្តសប្បាយនូវសេចក្ដីសង្គ្រោះពីព្រះយេហូវ៉ា!—អេសាយ ២៥:៩