តើយើងមានគោលដៅអ្វី?
១ ហេតុអ្វីបានជាយើងដឹកនាំការសិក្សាព្រះគម្ពីរតាមផ្ទះដូច្នេះ? តើយើងគ្រាន់តែចង់ផ្ដល់ចំណេះ ឬជួយគេមានជីវិតរីកចំរើនឡើង ឬក៏ជួយបំភ្លឺឲ្យគេមានសេចក្ដីសង្ឃឹមចំពោះពេលអនាគតប៉ុណ្ណោះឬ? មិនមែនទេ! យើងមានគោលដៅចំបង គឺចង់បញ្ចុះបញ្ចូលឲ្យមានសិស្សថែមទៀតឲ្យកាន់តាមព្រះយេស៊ូគ្រីស្ទ! (ម៉ាថាយ ២៨:១៩; កិច្ចការ ១៤:២១) ហេតុនោះហើយបានជាអស់អ្នកដែលយើងសិក្សាជាមួយនោះ ត្រូវតែមានទំនាក់ទំនងជាមួយក្រុមជំនុំដែរ។ ការរីកចំរើនរបស់គេខាងវិញ្ញាណ នោះជាប់ទាក់ទងយ៉ាងចំៗនឹងការយល់ដឹងអំពីអង្គការគ្រីស្ទាននេះអស់ពីដួងចិត្ត។
២ របៀបសម្រេចការនោះ: ចាប់ពីដំបូងទៅ ចូរជំរុញទឹកចិត្តសិស្សជាបន្ត ឲ្យចូលរួមកិច្ចប្រជុំក្រុមជំនុំ។ (ហេព្រើរ ១០:២៤, ២៥) ជួយពន្យល់ថា កិច្ចប្រជុំទាំងនេះនឹងពង្រឹងជំនឿរបស់គាត់ ក៏ជួយគាត់ធ្វើតាមព្រះហឫទ័យរបស់ព្រះ និងបើកឱកាសឲ្យគាត់រាប់អានមនុស្សល្អៗ ជាមួយអ្នកដទៃដែលចង់សរសើរព្រះយេហូវ៉ាដែរ។ (ទំនុកដំកើង ២៧:១៣; ៣២:៨; ៣៥:១៨) សំដីសំដៅរបស់អ្នកផ្ទាល់អំពីសេចក្ដីស្រឡាញ់និងចិត្តអបអរចំពោះក្រុមជំនុំនិងកិច្ចប្រជុំនិមួយៗនោះ នឹងដាស់អារម្មណ៍របស់សិស្សដែលសិក្សាឲ្យចង់ចូលរួមផងដែរ។
៣ អ្នកថ្មីត្រូវយល់ដឹងថា អង្គការរបស់ព្រះយេហូវ៉ាមានភាតរភាពអន្តរជាតិ។ សូមបង្ហាញកាសែតវីដេអូស្មរបន្ទាល់ព្រះយេហូវ៉ា អង្គការដែលគាំទ្រឈ្មោះនោះ និងភាតរភាពរបស់បងប្អូនយើង។ សូមជួយគេយល់ដឹងថា ព្រះយេហូវ៉ាកំពុងតែប្រើមនុស្សរាប់លាននាក់ទូទាំងពិភពលោកដែលបានឧទ្ទិសថ្វាយខ្លួនហើយ ដើម្បីសម្រេចនូវព្រះហឫទ័យរបស់ទ្រង់។ ចូរឲ្យអ្នកថ្មីទាំងនេះដឹងថា គេក៏បានត្រូវអញ្ជើញឲ្យមកបំរើព្រះដែរ។—អេសាយ ២:២, ៣
៤ ការឃើញសិស្សព្រះគម្ពីរម្នាក់ក្លាយជាអ្នកដែលពិតជាកាន់តាមព្រះយេស៊ូ ពិតជាហេតុដែលនាំឲ្យមានអំណរយ៉ាងណាទៅហ្ន៎! នេះហើយជាគោលដៅរបស់យើង!—យ៉ូហានទី៣ ៤