មានចិត្តសប្បាយរីករាយជាលទ្ធផល!
១ ក្រុមគ្រួសារគ្រីស្ទានទូទៅមានចិត្តសប្បាយរីករាយនឹងបង្ហាញកតញ្ញូធម៌សំរាប់កាសែតវីដេអូ ពួកយុវជនសួរថា៖ តើខ្ញុំអាចរកមិត្តភក្ដិពិតប្រាកដបានយ៉ាងដូចម្ដេច? បិតាម្នាក់នៅសហរដ្ឋអាមេរិកប្រាប់ថា ក្រោយពីកូនប្រុសៗរបស់គាត់មើលវីដេអូនោះចប់ហើយ ពួកគេបានអង្គុយស្ងៀម ដ្បិតពួកគេយល់ស្របនឹងគំនិតទាំងអស់ក្នុងរឿងនោះ! របាយការណ៍ពីប្រទេសម៉ាឡាវីចែងថា ប្អូនៗប្រុសស្រីនៅទីនោះក៏យល់ស្របនឹងគំនិតនោះផងដែរ ពីព្រោះពួកគេក៏មានការគាបសង្កត់ដូចនោះដែរពីមិត្តក្នុងសាលារៀន។ បិតាម្នាក់នៅប្រទេសអាល្លឺម៉ង់ក៏រៀបរាប់អំពីកាសែតវីដេអូនេះថា៖ «ខ្ញុំចាត់ទុកវីដេអូនេះជាជំនូនពីព្រះ ដែលទ្រង់តបឆ្លើយសេចក្ដីអធិស្ឋានរបស់ខ្ញុំ»។ យុវនារីម្នាក់ស្រដីថា៖ «សូមអរគុណជាអនេកកប្បការ សំរាប់ការរំឭកឲ្យខ្ញុំដឹងថា ព្រះយេហូវ៉ាពិតជាយកព្រះទ័យទុកដាក់នឹងខ្ញុំ»។ អ្នកចាស់ទុំម្នាក់នៅប្រទេសនូវ៉ែលហ្សេឡង់ក៏រៀបរាប់ថា៖ «វីដេអូនេះបានជួយក្មេងជំទង់ម្នាក់ក្នុងចំណោមយើង ឲ្យត្រឡប់មកដើរតាមមាគ៌ាឆ្ពោះទៅឯជីវិតវិញ»។ អ្នកពេញវ័យម្នាក់ដែលមានស្វាមីហើយ បានមើលវីដេអូនេះទាំងស្រដីថា៖ «គឺល្អណាស់ហ្ន៎! បើយុវជននិមួយៗក្នុងសាសនាពិតអាចមើលវីដេអូនេះ ហើយមានចិត្តជំរុញឲ្យកាន់ខ្ជាប់តាមសេចក្ដីពិតជានិច្ចនោះ!»។ ក្រុមគ្រួសារទាំងឡាយអើយ! សូមមើលវីដេអូនេះម្ដងទៀតចុះ! រួចមក សូមពិគ្រោះគ្នានូវសំនួរដូចតទៅនេះ។
២ សេចក្ដីផ្ដើម: តើមិត្តភក្ដិពិតម្នាក់ជាមនុស្សបែបណា?—សុ. ១៨:២៤
៣ ឧបសគ្គដែលអាចរារាំងមិនឲ្យមានមិត្តភាពពិត: តើអ្នកអាចធ្វើយ៉ាងណាដើម្បីឈ្នះលើអារម្មណ៍ដែលថា អ្នកដទៃមិនហៅអ្នកឲ្យចូលរួមជាមួយគេ? (ភី. ២:៤) ហេតុអ្វីអ្នកត្រូវបណ្ដុះឲ្យមានបុគ្គលិកលក្ខណៈប្រសើរជាង? ហើយតើអ្នកណាអាចជួយអ្នកកែប្រែលក្ខណៈមិនល្អរបស់អ្នកបាន? តើអ្វីទៅអាចបើកឱកាសឲ្យអ្នកមានមិត្តភក្ដិថែមទៀត? ហើយតើអ្នកអាចរកមិត្តភក្ដិថែមទៀតនៅទីណា?—២កូ. ៦:១៣
៤ មិត្តភាពជាមួយនឹងព្រះ: តើអ្នកអាចធ្វើយ៉ាងណា ដើម្បីបណ្ដុះឲ្យមានទំនាក់ទំនងជាមួយព្រះយេហូវ៉ាបាន? ហើយហេតុអ្វីបានជាការព្យាយាមធ្វើដូច្នេះមានប្រយោជន៍? (ទំនុក. ៣៤:៨) បើអ្នកចង់ពង្រឹងទំនាក់ទំនងរបស់អ្នកជាមួយនឹងព្រះ តើអ្នកណាអាចជួយអ្នកបានច្រើនបំផុត?
៥ មិត្តមិនល្អ: តើមនុស្សបែបណាដែលត្រូវរាប់ទុកជាពួកម៉ាកអាក្រក់? (១កូ. ១៥:៣៣) តើដោយដូចម្ដេចដែលមិត្តមិនល្អអាចនាំឲ្យអន្តរាយដល់ភាពខាងវិញ្ញាណរបស់យើង? តើកំណត់ហេតុព្រះគម្ពីរអំពីនាងឌីណានោះ បង្រៀនអ្នកអំពីអ្វីខ្លះ?—លោ. ៣៤:១, ២, ៧, ១៩
៦ ឈុតសម្ដែងសម័យទំនើប: តើអារម្មណ៍ឯកកោរបស់ប្អូនស្រីថារ៉ា បានមានអានុភាពអ្វីលើនាង? តើនាងបានដោះសាយ៉ាងណា អំពីហេតុដែលនាងសេពគប់នឹងយុវជនក្នុងលោកីយ៍នោះ? តើការសេពគប់បែបនោះនាំឲ្យនាងប្រឈមមុខនឹងអ្វីខ្លះ ដែលអាចបណ្ដាលឲ្យមានគ្រោះថ្នាក់? ហេតុដូចម្ដេចបានជាមាតាបិតារបស់នាងមិនដឹងអំពីគ្រោះថ្នាក់ ដែលមាននៅខាងមុខកូនដូច្នេះ? ហើយតើពួកគាត់មានអាកប្បកិរិយាបែបណាក្នុងការជួយនាងស្ដារភាពខាងវិញ្ញាណឡើងវិញ? តើអ្នកត្រួសត្រាយម្នាក់បានប្រព្រឹត្តយ៉ាងណា ដែលបញ្ជាក់ថាខ្លួនជាមិត្តសំឡាញ់ពិតរបស់ប្អូនស្រីថារ៉ា? ហេតុដូចម្ដេចបានជាបណ្ដាគ្រីស្ទានត្រូវធ្វើតាមសុភាសិត ១៣:២០ និងយេរេមា ១៧:៩? តើប្អូនស្រីថារ៉ាបានរៀនមេរៀនដ៏សំខាន់អ្វី?
៧ សេចក្ដីបញ្ចប់: តើអ្នកបានរៀនមេរៀនអ្វីខ្លះពីកាសែតវីដេអូនេះ? តើអ្នកអាចប្រើវីដេអូនេះយ៉ាងណា ដើម្បីជួយអ្នកដទៃ?—ទំនុក. ៧១:១៧