កិច្ចការសាងសង់សាលព្រះរាជាណាចក្រមានដំណើរការឈានទៅមុខ
១ មហាសន្និបាតតាមតំបន់នានានៅសហរដ្ឋអាមេរិចក្នុងឆ្នាំ១៩៨៣ មានចំណងជើងថា «ព្រះរាជាណាចក្ររបស់ព្រះនាំឲ្យយើងមានសាមគ្គីភាព»។ ក្នុងកម្មវិធីនោះមានសេចក្ដីជូនដំណឹងថា មានបេឡាពិសេសមួយបានរៀបចំឡើងដើម្បីជួយធ្វើការសាងសង់និងជួសជុលសាលព្រះរាជាណាចក្រឡើងជាថ្មី ទូទាំងសហរដ្ឋអាមេរិចនិងនៅប្រទេសកាណាដាដែរ។ ពេលចាប់ផ្ដើមកម្មវិធីនោះ យើងនឹកស្មានមិនដល់ទេ ថាប្រសិទ្ធពរអ្វីខ្លះនឹងមកពីកម្មវិធីថ្មីនោះ។ ចាប់ពីពេលនោះមក យើងបានពិសោធកាន់តែច្រើនឡើងៗនូវអ្វីដែលចែងទុកយ៉ាងត្រឹមត្រូវនៅទំនុកដំកើង ៩២:៤ ដែលថា៖ «ដ្បិត ឱព្រះយេហូវ៉ាអើយ! ទ្រង់បានឲ្យទូលបង្គំមានសេចក្ដីអំណរ ដោយកិច្ចការរបស់ទ្រង់ ទូលបង្គំនឹងបន្លឺឡើង ដោយអំណរ ចំពោះការនៃព្រះហស្តទ្រង់»។
២ នាបច្ចុប្បន្នកាលនេះ យើងត្រេកអរយ៉ាងខ្លាំងចំពោះអ្វីៗដែលកំពុងតែសម្រេចឡើង។ សព្វថ្ងៃនេះមានកម្មវិធីសាងសង់សាលព្រះរាជាណាចក្រកាន់តែច្រើនឡើងទូទាំងផែនដី។ តាមរបៀបផ្សេងៗយើងរាល់គ្នាមានឯកសិទ្ធិរួមចំណែកកិច្ចការនេះផងដែរ។ យើងអាចរួមចំណែកបាន ដោយធ្វើវិភាគទានបន្ដិចបន្តួចឬច្រើន ដើម្បីជួយក្នុងការចំណាយដើម្បីសាងសង់ទីកន្លែងថ្វាយបង្គំបន្ថែមទៀតទូទាំងផែនដី។ បងប្អូនជាច្រើនក៏ស្ម័គ្រចិត្តចំណាយពេល បំនិន និងសមត្ថភាពផ្សេងៗ ព្រមជាមួយគ្រឿងបរិក្ខាររបស់ខ្លួន ដើម្បីសម្រេចកិច្ចការនេះ។ ការរៀបចំទាំងមូលនេះបានជោគជ័យមែន ពីព្រោះព្រះយេហូវ៉ាជួយគាំទ្រយើង ហើយទ្រង់ណែនាំផ្លូវយើង និងប្រទានពរយ៉ាងវិសេសលើយើងរាល់គ្នាឲ្យមានសាមគ្គីភាពគ្នាដើម្បីធ្វើការនេះ។—ទំនុក. ១២៧:១
៣ ថ្វីបើការរៀបចំនេះគឺសំរាប់ក្រុមជំនុំនានានៅសហរដ្ឋអាមេរិចក៏ដោយ នោះការិយាល័យសាខាជាច្រើនទៀតបានធ្វើតាមគំរូរបស់ពួកគេ។ នៅសាលព្រះរាជាណាចក្រក្នុងប្រទេសជាច្រើន មានប្រអប់មួយដែលបងប្អូនអាចដាក់វិភាគទានបាន ជាបេឡាសំរាប់ការសាងសង់សាលព្រះរាជាណាចក្រ។ នៅសហរដ្ឋអាមេរិក កិច្ចបំរើព្រះរាជាណាចក្រយើងសំរាប់ខែមីនា ឆ្នាំ១៩៩៧ បានជូនដំណឹងអំពីកំណែមួយក្នុងកម្មវិធីនេះ។ ឯកសារនោះរៀបរាប់ថា៖ «តាំងពីបេឡាសំរាប់ការសាងសង់សាលព្រះរាជាណាចក្របានរៀបចំឡើងនៅឆ្នាំ១៩៨៣ បងប្អូនយើងបានធ្វើវិភាគទានដោយចិត្តសទ្ធាណាស់ ដែលអនុញ្ញាតឲ្យក្រុមជំនុំនានាខ្ចីលុយបាន ដើម្បីសាងសង់សាលព្រះរាជាណាចក្រ។ រហូតមកដល់ពេលនេះ ប្រមាណ២.៧០០ក្រុមជំនុំនៅ[សហរដ្ឋអាមេរិច] បានទទួលប្រយោជន៍ពីកម្មវិធីនេះ។ បើមិនមានកម្មវិធីនេះទេ ក្រុមជំនុំជាច្រើនមិនអាចសាងសង់ឬជួសជុលសាលព្រះរាជាណាចក្ររបស់គេបាននោះទេ។ ឥឡូវមានភាពបន្ទាន់ឲ្យយើងប្រើប្រាក់ខ្លះៗដែលបានមកពីវិភាគទាននេះ ដើម្បីឲ្យក្រុមជំនុំនានានៅប្រទេសក្រីក្រអាចខ្ចីលុយបាន។ សមាគមយើងពិតជាត្រេកអរណាស់ពេលបងប្អូនបន្តជួយគាំទ្រនូវកម្មវិធីនេះ ហើយក្រុមជំនុំនានាដែលនឹងទទួលប្រយោជន៍ពីវិភាគទានរបស់អ្នករាល់គ្នាក៏មានកតញ្ញូធម៌ផងដែរ»។
៤ សេចក្ដីជូនដំណឹងនេះបានទុកជាការអញ្ជើញឲ្យបងប្អូនរួមចំណែកក្នុងកម្មវិធីសាងសង់សាលព្រះរាជាណាចក្រឲ្យកាន់តែលឿនជាងទៅទៀត។ បេឡាសំរាប់ការសាងសង់សាលព្រះរាជាណាចក្រត្រូវប្រើជាជំនួយដល់បងប្អូននៅប្រទេសឯទៀត ហើយដំណាលគ្នានោះអាចធ្វើជាប្រាក់កំចីសំរាប់ការសាងសង់សាលព្រះរាជាណាចក្រនៅសហរដ្ឋអាមេរិចផងដែរ។ អត្ថបទមួយទៀតក្នុងកិច្ចបំរើព្រះរាជាណាចក្រយើងសំរាប់ខែសីហា ឆ្នាំ១៩៩៧ បានរៀបរាប់ថា៖ «ទូទាំងផែនដីនេះ យើងនៅតែត្រូវសាងសង់សាលព្រះរាជាណាចក្រថែមទៀត។ ក្នុងកំឡុងឆ្នាំកិច្ចបំរើកន្លងទៅនេះ មាន៣.២៨៨ក្រុមជំនុំថ្មីបានរៀបចំឡើង។ ក្រុមជំនុំភាគច្រើននេះ គឺនៅទ្វីបអាព្រិច អាស៊ី អាមេរិកកណ្ដាលនិងខាងត្បូង ហើយនៅអឺរ៉ុបប៉ែកខាងកើតផងដែរ»។
៥ តាំងពីពេលនោះមក តើបានលទ្ធផលអ្វី? សៀវភៅប្រចាំឆ្នាំ សំរាប់ឆ្នាំ២០០១បានរាយការណ៍ថា៖ «ដោយសារកម្មវិធីនេះ ៤៥៣សាលព្រះរាជាណាចក្របានត្រូវសាងសង់រួចហើយ នៅ៣០ប្រទេស និង៧២៧សាលព្រះរាជាណាចក្រផ្សេងទៀតកំពុងតែសាងសង់ឡើងដែរ។ ឥឡូវយើងខំរៀបចំប្លង់សាលព្រះរាជាណាចក្រ ឲ្យសមស្របនឹងសម្ភារៈសំណង់ និងមធ្យោបាយសាងសង់តាមតំបន់ប្រទេសនោះ។ នៅប្រទេសគេនយ៉ា គេនិយមប្រើដុំថ្ម នៅប្រទេសតូហ្គោ គេនិយមប្រើដីឥដ្ឋ ហើយនៅប្រទេសកាមេរូន គេប្រើដីឥដ្ឋធ្វើពីស៊ីម៉ង់ព្រមទាំងបូកផង។ ដោយប្រើសម្ភារៈនិងមធ្យោបាយដែលនិយមតាមតំបន់និមួយៗនោះ បងប្អូនយើងអាចរៀនបានបំនិនយ៉ាងឆាប់ ដើម្បីធ្វើការដ៏សំខាន់ៗតាមកម្មវិធីរបស់ប្រទេសនិមួយៗ»។
៦ នៅទ្វីបអាព្រិចដ៏ធំនោះ យើងអាចឃើញទីសំអាងថាព្រះយេហូវ៉ាកំពុងតែប្រទានពរលើកម្មវិធីសាងសង់នេះ។ ពេលអ្នកមើលរូបថតពីសាលព្រះរាជាណាចក្រខ្លះៗនេះដែលបានត្រូវសាងសង់រួចហើយ សូមគិតទៅមើលអំពីឥទ្ធិពលដែលសំណង់ទាំងនេះមានមកលើកិច្ចការរបស់ពួកស្មរបន្ទាល់ព្រះយេហូវ៉ា! កិច្ចការសាងសង់នេះមានឥទ្ធិពលមែន ត្រង់ចំណុចបីយ៉ាង គឺមានឥទ្ធិពលលើសាមគ្គីភាពរបស់យើងជាភាតរភាពអន្តរជាតិ ក៏មានឥទ្ធិពលលើសហគមន៍តាមតំបន់នានា និងបានបណ្ដាលឲ្យចំនួនពួកអ្នកចូលរួមកិច្ចប្រជុំក្រុមជំនុំមានការរីកចំរើនកាន់តែច្រើនឡើងៗ។ សន្លឹកបន្ថែមក្នុងច្បាប់នេះដៅបញ្ជាក់អំពីសាលព្រះរាជាណាចក្រដែលសាងសង់នៅទ្វីបអាព្រិច ប៉ុន្តែកិច្ចបំរើព្រះរាជាណាចក្រយើងនឹងមានអត្ថបទនៅពេលខាងមុខទៀតដែលនឹងបង្ហាញអំពីដំណើរការសាងសង់សាលព្រះរាជាណាចក្រ ដែលកំពុងតែឈានទៅមុខនៅប្រទេសផ្សេងៗទៀតក្នុងលោកីយ៍នេះ។
[រូបភាពនៅទំព័រ៣]
តំបន់ប៊ីមបូ ទីក្រុងបុងហ្គី
សាធារណរដ្ឋអាព្រិចកណ្ដាល
តំបន់បេហ្គួ ទីក្រុងបុងហ្គី
[រូបភាពនៅទំព័រ៤]
តំបន់អ៊ូខង្អរ ប្រទេសតង់ហ្សានី
ទីក្រុងអក្រា ប្រទេសហ្គាណា
តំបន់សាឡាឡា ប្រទេសលីបេរីយ៉ា
អតីតសាលព្រះរាជាណាចក្រនៅអាឡាដា ប្រទេសបេណាំង
សាលព្រះរាជាណាចក្រថ្មីនៅទីក្រុងអឡរដរ ប្រទេសបេណាំង
តំបន់ការូយ ប្រទេសហ្សីមបាបវ៉េ
[រូបភាពនៅទំព័រ៥]
តំបន់ផេមី ប្រទេសតូហ្គោ
ទីក្រុងសូកូដេ ប្រទេសតូហ្គោ
តំបន់ហ្វីច្រូស ប្រទេសបេណាំង
[រូបភាពនៅទំព័រ៦]
អតីតសាលព្រះរាជាណាចក្រនៅឡែយិនកា ប្រទេសហ្សំប៊ី
សាលព្រះរាជាណាចក្រថ្មីនៅឡែយិនកា ប្រទេសហ្សំប៊ី
ទីក្រុងឃីនសាសា ប្រទេសកុងហ្គោ
មូសាមប៊ីរ៉ា ប្រទេសរ្វ៉ាន់ដា