ប្អូនៗយុវវ័យអើយ! ចូរស្ថាបនាគ្រឹះដ៏ល្អសំរាប់ពេលអនាគតចុះ!
១ តើអ្វីទៅជារឿងចំបងក្នុងជីវិតរបស់ប្អូន? តើប្អូនច្រើនតែគិតអំពីរឿងណាខ្លះ? តើប្អូនយកចិត្តទុកដាក់ទៅលើរឿងនៅបច្ចុប្បន្នកាលឬរឿងអនាគត ឬក៏ផ្ដោតអារម្មណ៍ទៅលើអ្វីដែលព្រះបានសន្យាមកនោះ? (ម៉ាថ. ៦:២៤, ៣១-៣៣; លូ. ៨:១៤) យើងត្រូវមានជំនឿយ៉ាងមាំ ដើម្បីអនុវត្តតាមការសន្យារបស់ព្រះ ដូចយើងឃើញពីគំរូរបស់អ័ប្រាហាំនិងម៉ូសេ។ (ហេ. ១១:៨-១០, ២៤-២៦) តើតាមរបៀបណាដែលប្អូនៗអាចបណ្ដុះឲ្យមានជំនឿមាំនោះ ហើយស្ថាបនាគ្រឹះឬ«គោលយ៉ាងល្អសំរាប់ខ្លួន ដល់ថ្ងៃក្រោយ»នោះ?—១ធី. ៦:១៩
២ ស្វែងរកព្រះយេហូវ៉ា: ជាអ្វីដែលគួរឲ្យសរសើរមែន បើសិនជាប្អូនមានកម្មវិធីខាងវិញ្ញាណជាទៀងទាត់ជាមួយនឹងក្រុមគ្រួសារ។ ប៉ុន្តែ កុំឲ្យគិតស្មានថា កម្មវិធីបែបនោះនឹងបណ្ដាលឲ្យប្អូនមានជំនឿយ៉ាងមាំដោយស្វ័យប្រវត្ដិនោះឡើយ។ ដើម្បីស្វែងរក«ចំណេះពីព្រះ» អ្នកត្រូវស្វែងរកព្រះយេហូវ៉ាដោយខ្លួនឯងផ្ទាល់។ (សុ. ២:៣-៥, ព.ថ.; ១របា. ២៨:៩) ស្តេចយ៉ូសៀសបានស្វែងរកព្រះយេហូវ៉ាពេលដែលនៅក្មេង។ ទោះបីជាទ្រង់បានធំឡើងក្នុងបរិយាកាសមួយដែលមិនជួយទ្រង់លូតលាស់ខាងវិញ្ញាណសោះក៏ដោយ «ទ្រង់ក៏ចាប់តាំងស្វែងរកតាមព្រះនៃដាវីឌ ជាឰយុកោទ្រង់» ពេលដែលទ្រង់មានព្រះជន្មាយុ១៥ឆ្នាំនៅឡើយ។—២របា. ៣៤:៣
៣ តើតាមរបៀបណាដែលប្អូនអាចស្វែងរកព្រះយេហូវ៉ា? គឺដោយពិនិត្យមើលយ៉ាងផ្ចិតផ្ចង់នូវអ្វីដែលអ្នកជឿ ‹ដើម្បីឲ្យខ្លួនអ្នកអាចយល់ច្បាស់ហើយបញ្ជាក់ថា› នោះជាសេចក្ដីពិត។ (រ៉ូម ១២:២) ជាឧទាហរណ៍ តើប្អូនអាចពន្យល់នូវអ្វីដែលព្រះគម្ពីរប្រាប់អំពីឈាម ឬក៏បង្ហាញភស្តុតាងដែលថា ព្រះរាជាណាចក្ររបស់ព្រះចាប់ផ្ដើមគ្រប់គ្រងនៅស្ថានសួគ៌នៅឆ្នាំ១៩១៤ទេ? ការក្រេបជញ្ជក់យកចំណេះអំពី«សេចក្ដីពិត» គឺផ្នែកដ៏សំខាន់ក្នុងការស្ថាបនាគ្រឹះដ៏ល្អសំរាប់ពេលអនាគត។—១ធី. ២:៣, ៤
៤ ការស្វែងរករបស់យ៉ូសៀសចំពោះព្រះ បានផ្ដល់ឲ្យផលល្អ។ មុនពេលដែលទ្រង់មានព្រះជន្មាយុ២០ឆ្នាំ ទ្រង់បានមានព្រះទ័យក្លាហានដើម្បីសំអាតស្រុកឲ្យរួចផុតពីការថ្វាយបង្គំមិនពិត។ (២របា. ៣៤:៣-៧) ស្រដៀងគ្នាដែរ ការលូតលាស់ខាងវិញ្ញាណនឹងសឲ្យឃើញដោយសារការប្រព្រឹត្តរបស់ប្អូន។ (១ធី. ៤:១៥) បើសិនជាប្អូនជាអ្នកផ្សាយដែលមិនទាន់ទទួលពិធីជ្រមុជទឹក ចូរខំប្រឹងបង្កើននូវគុណភាពនៃកិច្ចបំរើរបស់ប្អូនទៅ។ កុំឲ្យពេញចិត្តនឹងគ្រាន់តែផ្ដល់នូវឧបករណ៍ផ្សាយប៉ុណ្ណោះ។ ចូរមានគោលដៅប្រើព្រះគម្ពីរ វែកញែកជាមួយនឹងមនុស្ស ហើយបណ្ដុះនូវចំណាប់អារម្មណ៍ចំពោះអ្នកណាដែលប្អូនបានជួប។ (រ៉ូម ១២:៧) បើសិនជាប្អូនៗធ្វើដូច្នេះ នឹងជួយឲ្យប្អូនលូតលាស់ខាងវិញ្ញាណ។
៥ បំរើព្រះយេហូវ៉ាអស់ពីសមត្ថភាពរបស់អ្នក: នៅពេលដែលអ្នកសម្ដែងការឧទ្ទិសថ្វាយខ្លួនចំពោះព្រះយេហូវ៉ាដោយទទួលពិធីជ្រមុជទឹក អ្នកបានត្រូវតែងតាំងឡើងជាអ្នកបំរើរបស់ព្រះ។ (២កូ. ៣:៥, ៦) នេះក៏បើកឱកាសឲ្យប្អូនបំរើព្រះយេហូវ៉ាយ៉ាងពេញពេលបាន។ ឱកាសទាំងនេះរួមបញ្ចូលការបំរើជាអ្នកត្រួសត្រាយ បំរើនៅឯបេតអែល បំរើជាសាសនទូតនិងកិច្ចបំរើឆ្លងប្រទេសជាដើម។ វិធីផ្សេងទៀតដែលប្អូនអាចចំរើនកិច្ចបំរើនោះ គឺដោយរៀនភាសាមួយទៀត ឬក៏ដោយរើទៅបំរើនៅកន្លែងដែលមានតម្រូវការច្រើនជាង។
៦ ប្រាកដហើយ មិនមែនប្អូនៗយុវវ័យទាំងអស់ដែលអាចចូលរួមក្នុងឯកសិទ្ធិខាងកិច្ចបំរើទាំងនេះទេ តែយើងម្នាក់ៗអាចបំរើព្រះយេហូវ៉ាអស់ពីសមត្ថភាពរបស់យើងបាន។ (ម៉ាថ. ២២:៣៧) ទោះបីជាប្អូនៗមានកាលៈទេសៈណាក្ដី ចូរធ្វើឲ្យការបំរើព្រះយេហូវ៉ាមានអាទិភាពក្នុងជីវិតរបស់អ្នកចុះ! (ទំនុក. ១៦:៥) បើធ្វើដូច្នេះ អ្នកនឹងស្ថាបនាគ្រឹះដ៏ល្អប្រៀបដូចជារតនសម្បត្ដិសំរាប់ពេលអនាគត។
[Study Questions]
១. ហេតុអ្វីក៏ប្អូនៗយុវវ័យគ្រីស្ទានត្រូវបណ្ដុះឲ្យមានជំនឿយ៉ាងមាំ?
២. តើយើងរៀនអ្វីពីគំរូរបស់ស្តេចយ៉ូសៀស?
៣. តើប្អូនៗយុវវ័យគ្រីស្ទានសព្វថ្ងៃនេះអាចស្វែងរកព្រះយេហូវ៉ាបានយ៉ាងណា?
៤. តើអ្នកផ្សាយដែលមិនទាន់ទទួលពិធីជ្រមុជទឹក អាចឲ្យមនុស្សទាំងឡាយឃើញសេចក្ដីជំនឿនរបស់ខ្លួនយ៉ាងដូចម្ដេច?
៥. ចំពោះពួកគ្រីស្ទានដែលបានទទួលពិធីជ្រមុជទឹកហើយ តើមានឱកាសអ្វីឲ្យគេចំរើនកិច្ចបំរើរបស់គេឡើង?
៦. តើតាមរបៀបណាដែលយើងគ្រប់គ្នាអាចស្ថាបនាគ្រឹះដ៏ល្អសំរាប់ពេលអនាគត?