កាលវិភាគក្រុមគ្រួសារសម្រាប់ពិនិត្យបទគម្ពីរប្រចាំថ្ងៃ
១ មាតាបិតាដែលប្រកបទៅដោយសេចក្ដីស្រឡាញ់ខំប្រឹងប្រែងជារៀងរាល់ថ្ងៃដើម្បីផ្ដល់អាហារដែលមានឱជារសដល់កូន។ ការផ្ដល់អាហារខាងវិញ្ញាណដែលមកពីព្រះបន្ទូលរបស់ព្រះដល់ពួកគេនោះ រឹតតែសំខាន់ជាងទៅទៀត។ (ម៉ាថ. ៤:៤) របៀបមួយដែលអ្នកអាចជួយឲ្យកូនអ្នកបណ្ដុះបណ្ដាលឲ្យមានចំណង់ទទួលអាហារខាងវិញ្ញាណឲ្យបានគ្រប់គ្រាន់ ហើយ«ចំរើនធំឡើងដរាបដល់បានសង្គ្រោះ»នោះ គឺដោយយកពេលរៀងរាល់ថ្ងៃដើម្បីពិនិត្យមើលជាក្រុមគ្រួសារនូវបទគម្ពីរប្រចាំថ្ងៃ និងការពន្យល់។ (១ពេ. ២:២) តើអ្នកអាចបញ្ចូលអ្វីទាំងនេះទៅក្នុងកាលវិភាគក្រុមគ្រួសារអ្នកនៅពេលណា?
២ នៅពេលបរិភោគអាហារ: ការពិភាក្សាបទគម្ពីរប្រចាំថ្ងៃពេលព្រឹកអាចជួយគ្រួសារអ្នកឲ្យចាំទុកព្រះយេហូវ៉ានៅក្នុងចិត្តពេញមួយថ្ងៃ។ (ទំនុក. ១៦:៨) ម្ដាយម្នាក់បានសំរេចចិត្តអាននិងពិភាក្សាបទគម្ពីរព្រមទាំងការពន្យល់ជាមួយកូនប្រុសរបស់គាត់ ពេលដែលគាត់ស្រស់ស្រូបអាហារពេលព្រឹកហើយអធិស្ឋានជាមួយកូនមុននឹងកូនចេញទៅសាលារៀន។ នេះបានពង្រឹងកូនគាត់ឲ្យប្រកាន់ជំហរដោយឥតសម្រុះសម្រួលទៅតាមបញ្ហានៅចំពោះមុខដូចជា ជាតិនិយម ការល្បួងលួងលោមឲ្យធ្វើអំពើអសីលធម៌ ហើយក៏បានពង្រឹងគាត់ឲ្យធ្វើបន្ទាល់យ៉ាងក្លាហានដល់សិស្សានុសិស្សនិងដល់បណ្ដាគ្រូបង្រៀនឯទៀតផងដែរ។ ទោះបីគាត់ជាស្មរបន្ទាល់តែម្នាក់គត់នៅឯសាលារៀនក៏ដោយ ក៏គាត់មិនដែលមានអារម្មណ៍ឯកកោតែឯងទេ។
៣ បើមិនអាចពិភាក្សាបទគម្ពីរប្រចាំថ្ងៃនៅពេលព្រឹកទេ អ្នកអាចពិនិត្យមើលបទគម្ពីរនោះជាក្រុមគ្រួសារក្នុងថ្ងៃនោះនៅពេលក្រោយវិញ ប្រហែលជាក្នុងកំឡុងពេលបរិភោគអាហារល្ងាច។ អ្នកខ្លះក៏ពិភាក្សាអំពីបទពិសោធន៍ក្នុងកិច្ចបំរើផ្សាយនិងគោលចំណុចដែលគេចូលចិត្តពីអំនានផ្ទាល់ខ្លួននៃព្រះគម្ពីរក្នុងកំឡុងពេលនេះ។ មនុស្សជាច្រើននឹកចាំដោយពេញចិត្តថាគឺក្នុងកំឡុងពេលបរិភោគអាហារល្ងាចនេះហើយ ដែលជាឱកាសដ៏សប្បាយរីករាយបំផុតសម្រាប់ជួបជុំគ្នាជាក្រុមគ្រួសារ។
៤ ពេលយប់: ចំពោះគ្រួសារខ្លះ ពេលវេលាដ៏ល្អបំផុតដើម្បីពិនិត្យបទគម្ពីរគឺមានតែពេលមុនទៅសំរាកនៅពេលយប់ប៉ុណ្ណោះ។ នេះក៏អាចជាឱកាសដ៏ល្អដើម្បីអធិស្ឋានជាមួយគ្នាដែរ។ កាលណាកូនរបស់អ្នកឮអ្នកនិយាយអំពីព្រះយេហូវ៉ារៀងរាល់ថ្ងៃហើយអធិស្ឋានទៅព្រះ នោះទ្រង់ក្លាយទៅជាបុគ្គលមួយអង្គយ៉ាងពិតប្រាកដសម្រាប់ពួកគេ។
៥ សូមព្រះយេហូវ៉ាប្រទានពរដល់ការខំប្រឹងប្រែងរបស់អ្នកដើម្បីបណ្ដុះសេចក្ដីពិតនៅក្នុងចិត្តកូនអ្នកកាលដែលអ្នកចេះប្រើយ៉ាងល្អនូវសៀវភៅការពិនិត្យមើលបទគម្ពីរប្រចាំថ្ងៃ។