សៀវភៅព្រះគម្ពីរបង្រៀន ជាសៀវភៅសំខាន់បំផុតសម្រាប់ការសិក្សាព្រះគម្ពីរ
១ យើងមានចិត្តរំភើបមែន! ដោយបានទទួលសៀវភៅតើព្រះគម្ពីរពិតជាបង្រៀនយ៉ាងណា? នៅឯមហាសន្និបាត«ចូរស្ដាប់បង្គាប់ព្រះ»។ តើយើងនឹងប្រើសៀវភៅសិក្សាថ្មីនេះយ៉ាងដូចម្ដេច? សៀវភៅនេះត្រូវបានរៀបចំឡើងជាឧបករណ៍សំខាន់បំផុតរបស់យើងសម្រាប់ការសិក្សាព្រះគម្ពីរ។ ទោះបីយើងនឹងចាប់ផ្ដើមស្នើផ្ដល់សៀវភៅនេះនៅខែកញ្ញាក៏ដោយ អ្នកផ្សព្វផ្សាយបានត្រូវលើកទឹកចិត្តឲ្យប្រើសៀវភៅនេះភ្លាមដើម្បីចាប់ផ្ដើមនិងដឹកនាំការសិក្សាព្រះគម្ពីរ កាលណាសៀវភៅនេះមាននៅតាមក្រុមជំនុំ។
២ សិស្សព្រះគម្ពីរដែលអ្នកកំពុងបង្រៀន: អ្នកផ្សព្វផ្សាយដែលដឹកនាំការសិក្សាព្រះគម្ពីរក្នុងសៀវភៅចំណេះឬសៀវភៅស្តើងតម្រូវ គួរពិចារណាឲ្យបានល្អិតល្អន់ មុននឹងសម្រេចចិត្តអំពីពេលនិងរបៀបប្រើសៀវភៅថ្មីនេះក្នុងកំលុងការសិក្សា។ ប្រសិនបើមានការសិក្សាមួយដែលទើបចាប់ផ្ដើមពេលថ្មីៗនេះ អ្នកអាចប្ដូរទៅសិក្សាសៀវភៅថ្មីនេះវិញ។ បើសិស្សនោះបានសិក្សាសៀវភៅចំណេះច្រើនហើយ អ្នកអាចបន្តការសិក្សានៅក្នុងជំពូកនៃសៀវភៅព្រះគម្ពីរបង្រៀនដែលស្របគ្នានឹងជំពូកដែលកំពុងតែសិក្សាក្នុងសៀវភៅចំណេះ។ បើសិស្សរៀនជិតចប់សៀវភៅចំណេះហើយ អ្នកអាចបង្រៀនបញ្ចប់តែម្ដង។
៣ យើងទាំងអស់គ្នាដឹងថាច្បាស់ជាមានមនុស្សជាច្រើននឹងទទួលប្រយោជន៍ពីការសិក្សាសៀវភៅព្រះគម្ពីរបង្រៀន។ ចូរផ្ដល់ឱកាសដល់មនុស្សគ្រប់រូបដោយស្នើការសិក្សាព្រះគម្ពីរជាមួយពួកគេតាមសៀវភៅនេះជាលំដាប់លំដោយ។ ជាឧទាហរណ៍ អ្នកដែលបានសិក្សាសៀវភៅចំណេះឬសៀវភៅស្តើងតម្រូវរួចហើយ ប៉ុន្តែមិនទាន់រីកចម្រើនរហូតដល់ឧទ្ទិសថ្វាយខ្លួនហើយធ្វើបុណ្យជ្រមុជទឹក ប្រហែលជាអាចសិក្សាតទៅទៀតដោយប្រើសៀវភៅថ្មីនេះ។ មាតាបិតាអាចប្រើសៀវភៅនេះ ពេលដែលគេបង្រៀនចំណេះពិតអំពីបំណងព្រះហឫទ័យរបស់ព្រះដល់កូន។—កូល. ១:៩, ១០
៤ ការសិក្សាសៀវភៅទីពីរ: បន្ទាប់ពីបានបញ្ចប់សៀវភៅតើព្រះគម្ពីរពិតជាបង្រៀនយ៉ាងណា? តើមានការរៀបចំឲ្យសិស្សព្រះគម្ពីររៀនសៀវភៅទីពីរឬទេ? ពិតជាមាន។ បើយើងឃើញថាសិស្សមានការរីកចម្រើន ទោះយឺតក្ដី ព្រមទាំងបានបង្ហាញនូវចិត្តកតញ្ញូចំពោះអ្វីដែលគាត់កំពុងតែរៀននោះ ការសិក្សាព្រះគម្ពីរអាចបន្តទៅទៀតបាន ដោយប្រើសៀវភៅចូរថ្វាយបង្គំព្រះពិតតែមួយ។ យើងមានទំនុកចិត្តថាសៀវភៅព្រះគម្ពីរបង្រៀន នឹងក្លាយជាឧបករណ៍ផ្សាយដ៏មានប្រសិទ្ធភាពដែលយើងអាចប្រើក្នុងកិច្ចការបញ្ចុះបញ្ចូលឲ្យមានសិស្ស។—ម៉ាថ. ២៨:១៩, ២០