ចូររីករាយនឹងការសិក្សាសៀវភៅតើព្រះគម្ពីរពិតជាបង្រៀនយ៉ាងណា?
១ នៅឯមហាសន្និបាតដែលមានចំណងជើងថា «ចូរស្ដាប់បង្គាប់ព្រះ» យើងបានរំភើបចិត្តទទួលដំណឹងអំពីការចេញសៀវភៅថ្មីដែលមានចំណងជើងថាតើព្រះគម្ពីរពិតជាបង្រៀនយ៉ាងណា? នៅពេលឆាប់ៗខាងមុខនេះ យើងនឹងចាប់ផ្ដើមប្រើសៀវភៅថ្មីនេះជាញឹកញយណាស់ក្នុងកិច្ចផ្សព្វផ្សាយ ជាពិសេសពេលបង្រៀនសិស្សព្រះគម្ពីរ។ ហេតុដូច្នេះហើយ យើងត្រូវតែស្គាល់សៀវភៅថ្មីនេះច្បាស់សិន។ យើងនឹងមានឱកាសស្គាល់សៀវភៅថ្មីនេះមែន ពីព្រោះយើងសិក្សាសៀវភៅនេះនៅឯការសិក្សាសៀវភៅតាមក្រុមជំនុំ ចាប់ផ្ដើមសប្ដាហ៍ថ្ងៃទី៣១ ខែកក្កដា ឆ្នាំ២០០៦។
២ អ្នកត្រួតពិនិត្យក្រុមសិក្សានឹងលើកបញ្ជាក់សំណួរនៅក្រោមចំណងជើងជំពូកនីមួយៗ។ រួចមក គាត់នឹងដឹកនាំការសិក្សានោះ ដោយសួរសំណួរនៅខាងក្រោមទំព័រនីមួយៗ។ បទគម្ពីរដែលបញ្ជាក់ចំណុចសំខាន់ៗនឹងត្រូវអាននិងពិភាក្សា។ នៅចុងជំពូកនីមួយៗ ប្រអប់ចំណងជើងថា «អ្វីដែលព្រះគម្ពីរបង្រៀន»នឹងជួយឲ្យបញ្ជាក់ចំណុចសំខាន់ៗឡើងវិញ ពីព្រោះប្រអប់នោះមានចម្លើយពីបទគម្ពីរសម្រាប់សំណួរដែលនៅក្រោមចំណងជើងជំពូកនោះ។ អ្នកនឹងរីករាយនឹងការឆ្លើយសំណួរសម្រាប់វគ្គនីមួយៗ ពីព្រោះសៀវភៅនេះពន្យល់ប្រធានផ្សេងៗតាមរបៀបដែលច្បាស់ ស្រួលយល់ និងគួរឲ្យចាប់អារម្មណ៍។
៣ នៅខាងក្រោយមានផ្នែកមួយហៅថាការពន្យល់បន្ថែម ហើយទីនោះមានព័ត៌មានល្អិតល្អន់អំពីប្រធានផ្សេងៗ។ យើងនឹងប្រើការពន្យល់បន្ថែមនោះពេលសិស្សព្រះគម្ពីរត្រូវការព័ត៌មានថែមទៀតអំពីប្រធានណាមួយ។ ជួនកាលព័ត៌មានខ្លះពីការពន្យល់បន្ថែមនឹងត្រូវពិភាក្សានៅឯការសិក្សាសៀវភៅតាមក្រុមជំនុំ។ អ្នកដែលអានវគ្គនីមួយៗនៅឯក្រុមសិក្សាសៀវភៅ នឹងអានព័ត៌មានទាំងអស់ក្នុងការពន្យល់បន្ថែមអំពីប្រធានដែលត្រូវកំណត់។ អត្ថបទដែលវែង អាចត្រូវបំបែកជាពីរបីផ្នែកបាន។ គ្មានសំណួរក្នុងការពន្យល់បន្ថែមឡើយ។ ប៉ុន្តែអ្នកត្រួតពិនិត្យការសិក្សាអាចសួរសំណួរអំពីចំណុចសំខាន់ៗក្នុងនោះដើម្បីលើកទឹកចិត្តឲ្យអ្នកចូលរួមបញ្ចេញយោបល់។
៤ ការសិក្សាសៀវភៅព្រះគម្ពីរបង្រៀនតាមក្រុមនឹងមានដំណើរការលឿនបន្ដិច។ តែពេលបង្រៀនអ្នកឯទៀតដោយប្រើសៀវភៅនោះ ជាពិសេសអ្នកដែលមិនសូវស្គាល់ឬមិនធ្លាប់ស្គាល់អ្វីសោះអំពីព្រះគម្ពីរ យើងមិនបានតម្រូវឲ្យសិក្សាលឿននោះទេ។ (កិច្ច. ២៦:២៨, ២៩) ពេលបង្រៀនសិស្សព្រះគម្ពីរតាមផ្ទះ យើងត្រូវចំណាយពេលពិភាក្សាបទគម្ពីរដោយស៊ីជម្រៅជាង ហើយត្រូវពន្យល់ឧទាហរណ៍ផ្សេងៗក្នុងសៀវភៅនោះនិងចំណុចផ្សេងៗទៀត។ ដូច្នេះចូរមានគោលដៅចូលរួមជារៀងរាល់សប្ដាហ៍ ដើម្បីរួមចំណែកច្រើនបំផុតក្នុងការសិក្សាសៀវភៅតើព្រះគម្ពីរពិតជាបង្រៀនយ៉ាងណា?