ដឹកនាំការសិក្សាព្រះគម្ពីរដែលរីកចម្រើននៅមាត់ទ្វារផ្ទះនិងតាមទូរស័ព្ទ
១ បើយើងអាចចាប់ផ្ដើមការសិក្សាព្រះគម្ពីរមួយ នោះពិតជានាំឲ្យមានអំណរមែន! ក៏ប៉ុន្តែការរកបាននរណាម្នាក់ដែលចង់រៀនព្រះគម្ពីរ គឺគ្រាន់តែជាទីចាប់ផ្ដើមប៉ុណ្ណោះ។ គោលដៅនៃការសិក្សានេះគឺដើម្បីជួយមនុស្សឲ្យក្លាយជាសិស្សពិតរបស់ព្រះគ្រីស្ទ។ (ម៉ាថ. ២៨:១៩, ២០) តើអ្វីអាចជួយយើងឲ្យសម្រេចគោលដៅនោះ?
២ មនុស្សតែងរវល់: សព្វថ្ងៃនេះ មនុស្សកាន់តែរវល់ឡើងៗ។ នៅកន្លែងខ្លះ មនុស្សតិចណាស់ប្រហែលសុខចិត្តចំណាយពេលពេញមួយម៉ោងដើម្បីសិក្សាព្រះគម្ពីរពេលដំបូងដែលយើងជួបគាត់។ ដើម្បីជួយមនុស្សបែបនេះ យើងត្រូវបានលើកទឹកចិត្តឲ្យចាប់ផ្ដើមសិក្សាព្រះគម្ពីរនៅមាត់ទ្វារផ្ទះឬតាមទូរស័ព្ទ។ នៅដើមដំបូង ការសិក្សាទាំងនេះប្រហែលជាខ្លីបន្ដិច ហើយអាចរួមបញ្ចូលការពិភាក្សាបទគម្ពីរតែបីបួនប៉ុណ្ណោះ ដោយប្រើមួយឬពីរវគ្គក្នុងប្រកាសនវត្ថុដូចជាសៀវភៅចំណេះជាដើម។ គួរឲ្យសរសើរមែន! ដែលឥឡូវនេះអ្នកផ្សាយជាច្រើនកំពុងតែដឹកនាំការសិក្សាបែបនេះនៅមាត់ទ្វារផ្ទះឬតាមទូរស័ព្ទ។
៣ ក៏ប៉ុន្តែ តើយើងចង់បន្តដឹកនាំការសិក្សានៅមាត់ទ្វារផ្ទះរហូតឬ? មិនមែនទេ! ទោះបីជាការល្អដែលយើងមិននិយាយយូរពេកពេលសិក្សាពីរបីដងដំបូងក៏ពិតមែន តែកិច្ចបម្រើព្រះរាជាណាចក្រយើង ជាភាសាអង់គ្លេស ខែឧសភា ឆ្នាំ១៩៩០ ទំព័រ៨ រៀបរាប់ថា៖ «នៅពេលដែលការសិក្សាបានធ្វើឡើងយ៉ាងទៀងទាត់ ហើយម្ចាស់ផ្ទះកាន់តែមានចំណាប់អារម្មណ៍ នោះយើងអាចចំណាយពេលច្រើនជាងក្នុងការសិក្សា»។ នេះគឺសំខាន់ណាស់។ ជាឧទាហរណ៍ កុមារដែលអត់អាហារយូរ ប្រហែលជាមុនដំបូងត្រូវឲ្យអាហារតែបន្ដិចសិនទំរាំកុមារនោះមានចំណង់ចង់បរិភោគអាហារឡើងវិញ។ ប៉ុន្តែយើងមិនអាចរំពឹងថាគាត់នឹងមានកម្លាំងឡើងវិញហើយធំធាត់ដូចធម្មតាឡើយ បើគេឲ្យអាហារគាត់តែបន្ដិចបន្តួចបែបនេះរាប់ខែនោះ។ ស្រដៀងគ្នាដែរ យើងត្រូវការរៀបចំការសិក្សាឲ្យបានត្រឹមត្រូវនិងជាទៀងទាត់ដើម្បីសិស្សលូតលាស់ទៅជាមនុស្សធំឬមនុស្សដែលមានគំនិតចាស់ទុំខាងវិញ្ញាណ។—ហេ. ៥:១៣, ១៤
៤ ការសិក្សាព្រះគម្ពីរនៅក្នុងផ្ទះ: យកល្អយើងគួរដឹកនាំការសិក្សានៅកន្លែងស្ងាត់ ពោលគឺនៅក្នុងផ្ទះឬនៅកន្លែងឯទៀតដែលសមរម្យ។ នេះនឹងធ្វើឲ្យការសិក្សាបានងាយស្រួលជាង ហើយនឹងជួយសិស្សយល់ព្រះបន្ទូលរបស់ព្រះ។ (ម៉ាថ. ១៣:២៣) នេះក៏នឹងជួយអ្នកបង្រៀនឲ្យរើសយកចំណុចដែលសមស្របទៅតាមតម្រូវការរបស់សិស្ស។ ម្យ៉ាងទៀត ការសិក្សាមានរយៈពេលវែងជាង នឹងនាំឲ្យយើងអាចពន្យល់ព្រះបន្ទូលរបស់ព្រះបានស៊ីជម្រៅជាងហើយពង្រឹងជំនឿសិស្សផងដែរ។—រ៉ូម ១០:១៧
៥ តើតាមរបៀបណាដែលយើងអាចប្ដូរការសិក្សានៅមាត់ទ្វារមកក្នុងផ្ទះ? បន្ទាប់ពីបានសិក្សាខ្លីៗជាច្រើនលើកមក សូមស្នើសិស្សសិក្សាយូរជាងមុន។ ឬមួយក៏ប្រហែលអ្នកនិយាយជាប្រយោលដោយសួរបុគ្គលនោះថា៖ «តើថ្ងៃនេះអ្នកមានពេលអង្គុយហើយពិភាក្សារឿងនេះជាមួយគ្នាទេ?»។ ឬ«តើថ្ងៃនេះអ្នកអាចចំណាយពេលបានប៉ុន្មានដើម្បីពិភាក្សារឿងនេះ?»។ បើការព្យាយាមរបស់អ្នកមិនបានជោគជ័យទេ នោះអ្នកគួរធ្វើការសិក្សាខ្លីៗនៅមាត់ទ្វារផ្ទះតទៅទៀត។ នៅពេលសមត្រឹមត្រូវ សូមសាកប្ដូរការសិក្សានៅមាត់ទ្វារមកក្នុងផ្ទះម្ដងទៀត។
៦ ពេលដែលយើងស្វែងរកអ្នកដែលសមគួរ សូមកុំភ្លេចគោលដៅរបស់យើងក្នុងការចាប់ផ្ដើមនិងដឹកនាំការសិក្សាព្រះគម្ពីរ។ គោលដៅរបស់យើងគឺ ជួយអស់អ្នកដែលមានចិត្តស្មោះឲ្យក្លាយជាអ្នកបម្រើព្រះយេហូវ៉ា ដែលឧទ្ទិសថ្វាយខ្លួននិងធ្វើបុណ្យជ្រមុជទឹក។ សូមព្រះយេហូវ៉ាប្រទានពរដល់ការព្យាយាមរបស់យើង ពេលដែលយើងបំពេញកិច្ចបម្រើផ្សាយដោយមានគោលដៅនេះ។—២ធី. ៤:៥
[សំណួរសម្រាប់អត្ថបទសិក្សា]
១. តើគោលដៅរបស់យើងក្នុងការដឹកនាំការសិក្សាព្រះគម្ពីរជាអ្វី?
២. តើការសិក្សាព្រះគម្ពីរនៅមាត់ទ្វារផ្ទះឬតាមទូរស័ព្ទប្រព្រឹត្តទៅយ៉ាងដូចម្ដេច? ហើយហេតុអ្វីបានជាការសិក្សាបែបនេះមានប្រសិទ្ធភាព?
៣. ហេតុអ្វីបានជាយើងគួរព្យាយាមចំណាយពេលឲ្យបានច្រើនជាងពេលបង្រៀនសិស្សនៅមាត់ទ្វារផ្ទះ?
៤. តើដឹកនាំការសិក្សានៅក្នុងផ្ទះនាំឲ្យមានប្រយោជន៍អ្វីខ្លះ?
៥. តើយើងអាចប្ដូរការសិក្សានៅមាត់ទ្វារមកក្នុងផ្ទះបានយ៉ាងដូចម្ដេច?
៦. តើយើងបំពេញកិច្ចបម្រើផ្សាយដោយមានគោលដៅអ្វី? ហើយតើតាមរបៀបណាដែលការណែនាំក្នុងអត្ថបទនេះជួយយើងឲ្យសម្រេចគោលដៅនោះ?