ប្រអប់សំណួរ
◼ បើអ្នកផ្សាយស្រីបង្រៀនគម្ពីរនៅមាត់ទ្វារផ្ទះពេលមានអ្នកផ្សាយប្រុសចូលរួមជាមួយ តើគាត់គួរពាក់អ្វីនៅលើក្បាលឬទេ?
ពេលអ្នកផ្សាយស្រីដឹកនាំការសិក្សាគម្ពីរមួយជាទៀងទាត់ ហើយអ្នកផ្សាយប្រុសចូលរួមជាមួយ នាងគួរពាក់អ្វីនៅលើក្បាល។ (១កូ. ១១:៣-១០) ទស្សនាវដ្ដីប៉មយាម ថ្ងៃទី១៥ ខែកក្កដា ឆ្នាំ២០០២ ទំព័រ២៧ ជាភាសាអង់គ្លេសពន្យល់ថា៖ «ការបង្រៀនគម្ពីរគឺជាវគ្គសិក្សាមួយដែលបានត្រូវគ្រោងទុកជាមុន។ ក្នុងវគ្គសិក្សានេះ អ្នកបង្រៀនគឺជាអ្នកដឹកនាំ។ ដូច្នេះវគ្គសិក្សានោះក្លាយទៅជាការរៀបចំមួយរបស់ក្រុមជំនុំ។ បើសាក្សីព្រះយេហូវ៉ាដែលជាស្ត្រីបង្រៀនគម្ពីរដូចនោះដោយមានសាក្សីព្រះយេហូវ៉ាជាបុរសចូលរួមជាមួយ ជាការសមត្រឹមត្រូវដែលគាត់ពាក់អ្វីនៅលើក្បាល»។ ដូច្នេះ មិនថាការសិក្សានោះបានត្រូវដឹកនាំនៅផ្ទះ នៅមាត់ទ្វារផ្ទះ នៅកន្លែងផ្សេងឬតាមវិធីផ្សេងទៀតក៏ដោយ គាត់គួរតែធ្វើតាមការណែនាំនោះដូចគ្នា។
ផ្ទុយទៅវិញ បើមិនទាន់ក្លាយទៅជាការបង្រៀនគម្ពីរនៅមាត់ផ្ទះទេ បងស្រីមិនចាំបាច់ពាក់អ្វីនៅលើក្បាលឡើយ ទោះជាមានអ្នកផ្សាយប្រុសចូលរួមជាមួយក៏ដោយ។ ការរៀបចំនេះក៏រួមបញ្ចូលការត្រឡប់ទៅជួបដើម្បីបង្ហាញរបៀបសិក្សាគម្ពីរ ឬដើម្បីពន្យល់ព័ត៌មានដែលមកពីសៀវភៅណាមួយដែលប្រើសម្រាប់សិក្សាគម្ពីរដែរ។ តាមធម្មតាក្រោយពីត្រឡប់ទៅជួបច្រើនដង ទើបការត្រឡប់ទៅជួបនោះក្លាយទៅជាការសិក្សាគម្ពីរ។ ហេតុនេះអ្នកផ្សាយស្រីត្រូវគិតពិចារណានិងមានគំនិតសមហេតុផលថា ពេលណាឬស្ថានភាពបែបណាដែលគាត់គួរពាក់អ្វីនៅលើក្បាល។