ចូររង់ចាំព្រះយេហូវ៉ា
១ ព្យាការីអេសាយបានសរសេរថា៖ «ព្រះយេហូវ៉ាទ្រង់ជាព្រះដ៏ប្រកបដោយយុត្ដិធម៌។ មានពរហើយ អស់អ្នកណាដែលរង់ចាំទ្រង់»។ (អេសា. ៣០:១៨ខ) មានកំណត់ហេតុព្រះគម្ពីរជាច្រើនស្តីអំពីការជំនុំជម្រះរបស់ព្រះចំពោះពួកសត្រូវរបស់ទ្រង់ និងការសង្គ្រោះអ្នកបម្រើដ៏ស្មោះត្រង់របស់ទ្រង់។ តើកំណត់ហេតុទាំងនេះបង្រៀនមេរៀនអ្វីដល់អ្នកបម្រើព្រះយេហូវ៉ាសព្វថ្ងៃនេះ? នៅពេលឥឡូវនេះតើយើងអាចធ្វើយ៉ាងណាដើម្បីត្រៀមខ្លួនសម្រាប់«ថ្ងៃធំគួរស្ញែងខ្លាចរបស់ព្រះយេហូវ៉ា»? (យ៉ូល. ២:៣១, ៣២) មហាសន្និបាតតាមតំបន់ខាងមុខនេះរបស់យើង ដែលមានប្រធានបទថា«សេចក្ដីសង្គ្រោះជិតណាស់ហើយ!» នឹងជំរុញចិត្តយើងឲ្យសញ្ជឹងគិតអំពីសំណួរទាំងនោះហើយពិនិត្យមើលចិត្តគំនិតរបស់ខ្លួន។ មហាសន្និបាតតាមតំបន់នេះនឹងជួយយើងឲ្យរង់ចាំព្រះយេហូវ៉ា។
២ តើអ្នកបានរៀបចំដើម្បីចូលរួមហើយទទួលប្រយោជន៍ពីគ្រប់ទាំងបីថ្ងៃនៃមហាសន្និបាតនេះឬទេ? ជាឧទាហរណ៍ តើអ្នកបានសុំច្បាប់និយោជករបស់អ្នកឈប់សម្រាកពីការងារដើម្បីចូលរួមមហាសន្និបាតឬទេ? សូមកុំបង្អែបង្អង់រហូតជិតដល់ពេលទើបសុំច្បាប់ ដោយសង្ឃឹមថានិយោជកគង់តែនឹងអនុញ្ញាតឲ្យឈប់សម្រាកនោះឡើយ។ ចូរអធិស្ឋានអំពីរឿងនេះ។ រួចទៅសុំច្បាប់និយោជករបស់អ្នក។ (នេ. ២:៤, ៥) ស្រដៀងគ្នាដែរ យើងគួររៀបចំកន្លែងស្នាក់នៅ យានជំនិះសម្រាប់ធ្វើដំណើរ នឹងកិច្ចការចាំបាច់ឯទៀតឲ្យស្រេច ជាជាងចាំជិតដល់ថ្ងៃសន្និបាត។ បើធ្វើដូច្នេះបង្ហាញថាយើងមានចិត្តកតញ្ញូដ៏ជ្រាលជ្រៅចំពោះព្រះយេហូវ៉ាដែលបានរៀបចំកម្មវិធីផ្ដល់អាហារខាងវិញ្ញាណសម្រាប់រាស្ត្រទ្រង់។ អ្នកចាស់ទុំគួរមើលឲ្យដឹងថាអ្នកណាខ្លះត្រូវការជំនួយដើម្បីធ្វើការរៀបចំដូចខាងលើនេះ ជាពិសេសបងប្អូនវ័យចាស់ក្នុងក្រុមជំនុំ។—កា. ៦:១០
៣ ចរិយាល្អលើកកិត្ដិយសព្រះ: ពេលដែលយើងមានប្រជុំធំនៅឯមហាសន្និបាត ចរិយាល្អរបស់យើងជាបន្ទាល់មួយដល់សហគមន៍។ តើនេះតម្រូវអ្វីពីយើង? ពេលនៅសណ្ឋាគារ ភោជនីយដ្ឋាន និងនៅកន្លែងផ្សេងទៀតក្នុងតំបន់ដែលមានមហាសន្និបាត នោះគុណសម្បត្ដិគ្រីស្ទានរបស់យើង ដូចជាចិត្តអត់ធ្មត់ ចិត្តសុភាព ដឹងខ្នាត ឬចេះទប់ចិត្ត និងសម្លូតជាដើម គួរធ្វើឲ្យអស់អ្នកដែលយើងប្រាស្រ័យទាក់ទងមានអារម្មណ៍ស្រួល។ (កា. ៥:២២, ២៣; ភី. ៤:៥) យើងទាំងអស់គ្នាគួរបង្ហាញនូវសេចក្ដីស្រឡាញ់ដែល‹មិនប្រព្រឹត្តបែបមិនគួរសម មិនរកប្រយោជន៍ផ្ទាល់ខ្លួន មិនរហ័សខឹង›។ សូម្បីតែមានការពិបាកឬអ្វីដែលនាំរំខានកើតមានឡើងក្ដី យើងចង់«ធ្វើទាំងអស់សំរាប់ចំរើនសិរីល្អដល់ព្រះ»។—១កូ. ១០:៣១; ១៣:៥
៤ ក្រោយពីមហាសន្និបាត អ្នកចាត់ការសណ្ឋាគារមួយបានចាប់អារម្មណ៍នឹងចរិយាព្រមទាំងអាការក្រៅរបស់ប្អូនៗយុវវ័យយើងដល់ម្ល៉េះ បានជាគាត់ចង់បាន«ស្មរបន្ទាល់ព្រះយេហូវ៉ាជាភ្ញៀវសណ្ឋាគាររបស់គាត់ជានិច្ច»។ យើងមានហេតុគួរឲ្យសប្បាយមែន! នេះបង្ហាញថាអ្នកទាំងឡាយដែលជាមាតាបិតាបានបង្ហាត់បង្រៀននិងមើលការខុសត្រូវកូនយ៉ាងល្អ។ មាតាបិតាមិនគួរទុកឲ្យកូននៅក្នុងបន្ទប់សណ្ឋាគារដោយឥតមើលការខុសត្រូវឡើយ។ ពួកគាត់គួរមើលការខុសត្រូវកូនឲ្យបានល្អជានិច្ច។ (សុ. ២៩:១៥) សូមឲ្យចរិយាដ៏ល្អរបស់ពួកគេនាំមកនូវសេចក្ដីសរសើរដល់ព្រះយេហូវ៉ាហើយធ្វើឲ្យព្រះហឫទ័យទ្រង់បានរីករាយ!—សុ. ២៧:១១
៥ ការស្លៀកពាក់និងសម្អិតសម្អាងខ្លួនដែលសមរម្យ: យើងម្នាក់ៗអាចរួមចំណែកធ្វើឲ្យមហាសន្និបាតយើងមានលក្ខណៈគួរឲ្យស្ងើចសរសើរ ដោយជៀសវាងរបៀបស្លៀកពាក់និងសម្អិតសម្អាងខ្លួនតាមម៉ូតពេញនិយមហួសហេតុ មិនសមរម្យ មិនថ្លៃថ្នូរ ឬក៏តុបតែងខ្លួនជ្រុលពេក ពេលធ្វើដំណើរទៅមកក្នុងក្រុងដែលមានមហាសន្និបាត ក្នុងកំលុងកម្មវិធីមហាសន្និបាត និងពេលយើងជួយរៀបចំកន្លែងមហាសន្និបាតជាដើម។ ជាអ្នកបម្រើព្រះ ព្រះនាមនិងកិត្ដិនាមរបស់ព្រះយេហូវ៉ាជាអ្វីដែលសំខាន់បំផុតចំពោះយើង មិនមែនចំណង់ចំណូលចិត្តឬភាពសុខស្រួលរបស់យើងទេ។ មេគ្រួសារមានភារកិច្ចធ្វើឲ្យប្រាកដថា អាការក្រៅរបស់ក្រុមគ្រួសារគាត់បង្ហាញនូវការចេះអៀនខ្លួន ហើយដឹងប្រមាណខ្លួនគ្រប់ពេលវេលា។—១ធី. ២:៩
៦ ការរក្សាអាការក្រៅដ៏ថ្លៃថ្នូរក្នុងកំលុងពេលសម្រាកនៅឯសណ្ឋាគារ ហាងទំនិញ និងនៅភោជនីយដ្ឋានក៏សំខាន់ដូចគ្នាដែរ។ បើយើងបរិភោគបាយល្ងាចនៅហាងណាមួយក្រោយកម្មវិធីចប់ ជាការសមរម្យបើយើងស្លៀកសម្លៀកបំពាក់ដែលយើងស្លៀកនៅឯមហាសន្និបាត។ ការពាក់នាមប័ណ្ណមហាសន្និបាត នាំឲ្យយើងមានឱកាសធ្វើបន្ទាល់ក្រៅផ្លូវការ។—២កូ. ៦:៣, ៤
៧ ព្យាការីអេសាយបានទាយថា៖ «គង់តែព្រះយេហូវ៉ាទ្រង់រង់ចាំឱកាស នឹងផ្ដល់ព្រះគុណដល់ឯងរាល់គ្នា . . . ទ្រង់មានសេចក្ដីអាណិតមេត្ដាដល់ឯង»។ (អេសា. ៣០:១៨ក) ចិត្តកតញ្ញូចំពោះព្រះទ័យមេត្ដាករុណារបស់ព្រះយេហូវ៉ាគួរជំរុញចិត្តយើងឲ្យលើកកិត្ដិយសទ្រង់តាមរយៈចរិយានិងអាការក្រៅរបស់យើង ពេលដែលយើងប្រជុំគ្នានៅឯមហាសន្និបាត។ សូមឲ្យមហាសន្និបាតតាមតំបន់ដែលមានប្រធានបទថា៖ «សេចក្ដីសង្គ្រោះជិតណាស់ហើយ!» សរសើរតម្កើងសិរីរុងរឿងព្រះរបស់យើងហើយជួយយើងឲ្យរង់ចាំទ្រង់!
[សំណួរសម្រាប់អត្ថបទសិក្សា]
១. តើមហាសន្និបាតខាងមុខនេះមានប្រធានបទអ្វី? ហើយហេតុអ្វីបានជាប្រធានបទនេះសមត្រឹមត្រូវ?
២. ដោយសារមហាសន្និបាតបានរៀបចំសម្រាប់យើង តើយើងអាចបង្ហាញចិត្តកតញ្ញូយ៉ាងដូចម្ដេច?
៣. តើរាស្ត្ររបស់ព្រះយេហូវ៉ាគួរបង្ហាញគុណសម្បត្ដិអ្វីខ្លះនៅក្នុងក្រុងដែលមានមហាសន្និបាត?
៤. តើតាមរបៀបណាដែលមាតាបិតាអាចជួយកូនៗឲ្យកាន់ចរិយាមារយាទដែលនាំមកនូវសេចក្ដីសរសើរដល់ព្រះយេហូវ៉ា?
៥. តើតាមរបៀបណាដែលយើងអាចលើកកិត្ដិយសព្រះយេហូវ៉ាតាមរយៈការស្លៀកពាក់និងសម្អិតសម្អាងខ្លួនរបស់យើង?
៦. ក្នុងពេលសម្រាកក៏ដូចក្នុងកំលុងកម្មវិធីមហាសន្និបាត តើហេតុអ្វីយើងនៅតែរក្សាឲ្យមានអាការក្រៅដ៏ថ្លៃថ្នូរ?
៧. តើយើងអាចរួមចំណែកធ្វើឲ្យមានរបៀបរៀបរយនិងឲ្យមានអំណរនៅឯមហាសន្និបាតយ៉ាងដូចម្ដេច? (សូមមើល«សេចក្ដីរំលឹកអំពីមហាសន្និបាត»)
[ប្រអប់នៅទំព័រ៥]
សេចក្ដីរំលឹកអំពីមហាសន្និបាត
◼ កម្មវិធី: កម្មវិធីនឹងចាប់ផ្ដើមនៅម៉ោង៩:០០ព្រឹកគ្រប់ទាំងបីថ្ងៃ។ ទ្វារនឹងបើកនៅម៉ោង៨:០០ព្រឹក។ បីបួននាទីមុននឹងកម្មវិធីចាប់ផ្ដើម អធិការីនឹងអង្គុយនៅលើវេទិកាពេលដែលមានបទភ្លេងព្រះរាជាណាចក្របើកកម្មវិធី។ នៅពេលនោះ យើងទាំងអស់គ្នាត្រូវទៅកាន់កន្លែងរៀងៗខ្លួនដើម្បីកម្មវិធីអាចចាប់ផ្ដើមប្រកបដោយភាពថ្លៃថ្នូរ។ កម្មវិធីនឹងបញ្ចប់នៅម៉ោង៤:១៥រសៀលនៅថ្ងៃសុក្រ ម៉ោង៥:០៥រសៀលនៅថ្ងៃសៅរ៍ ហើយនៅម៉ោង៣:៣០រសៀលនៅថ្ងៃអាទិត្យ។
◼ ការចតឡានឬម៉ូតូ: នៅគ្រប់កន្លែងមហាសន្និបាតដែលយើងចាត់ចែងនោះ អ្នកអាចចតឡានឬផ្ញើម៉ូតូនិងកង់នៅកន្លែងចតឡានឬកន្លែងផ្ញើម៉ូតូបានដោយឥតបង់ថ្លៃ។ នាមប័ណ្ណមហាសន្និបាតនឹងប្រើជាគ្រឿងសំគាល់សំរាប់ចតឡានឬផ្ញើម៉ូតូនិងកង់។
◼ ការទុកកន្លែងអង្គុយ: យើងអាចទុកកន្លែងអង្គុយសំរាប់តែអ្នកដែលធ្វើដំណើររួមជាមួយយើងឬក៏រស់នៅក្នុងផ្ទះជាមួយ។
◼ ពេលទទួលទានអាហារថ្ងៃត្រង់: សូមយកអាហារថ្ងៃត្រង់មកជាមួយ ជាជាងចេញពីកន្លែងមហាសន្និបាតទៅទិញអាហារនៅពេលសម្រាកថ្ងៃត្រង់។ អ្នកអាចយកធុងទឹកកកតូចមួយដែលអាចដាក់នៅក្រោមកៅអីបាន។ ធុងទឹកកកធំៗ វត្ថុដែលធ្វើពីកែវ និងភេសជ្ជៈដែលមានជាតិស្រាមិនអនុញ្ញាតឲ្យយកចូលទៅកន្លែងមហាសន្និបាតទេ។
◼ វិភាគទាន: ការរៀបចំមហាសន្និបាតតាមតំបន់នាំឲ្យមានការចំណាយជាច្រើន។ យើងអាចបង្ហាញចិត្តកតញ្ញូដោយធ្វើវិភាគទានស្ម័គ្រចិត្តសំរាប់កិច្ចការទូទាំងពិភពលោកនៅឯសាលប្រជុំយើងឬនៅកន្លែងមហាសន្និបាត។ វិភាគទានជាសែកឬមូលប្បទានប័ត្រត្រូវសរសេរថាបើកប្រាក់ឲ្យ«Watch Tower»។
◼ ពេលមានគ្រោះថ្នាក់ឬរឿងអាសន្ន: អ្នកធ្វើការខាងការសង្គ្រោះបន្ទាន់បានត្អូញត្អែរថាពួកគាត់បានទទួលការហៅទូរស័ព្ទជាច្រើនអំពីរឿងតូចតាច។ បើអ្នកឃើញមានគ្រោះថ្នាក់នៅឯកន្លែងមហាសន្និបាត សូមប្រាប់ឆ្មាំដែលនៅជិតនោះដើម្បីឲ្យគាត់អាចផ្ដល់ដំណឹងដល់ផ្នែកខាងសង្គ្រោះបន្ទាន់ដើម្បីឲ្យបុគ្គលិកខាងសង្គ្រោះបន្ទាន់របស់យើងអាចប៉ាន់មើលថាតើស្ថានភាពនោះធ្ងន់ធ្ងរប៉ុណ្ណាហើយអាចជួយសង្គ្រោះបាន។ បើសិនជាចាំបាច់ គេនឹងហៅរថយន្តសង្គ្រោះមួយមក។
◼ ការថតសំឡេង: ប្រដាប់ថតសំឡេងគ្រប់ធុនមិនត្រូវតភ្ជាប់ទៅនឹងប្រព័ន្ធសំឡេងនិងអគ្គិសនីនៃកន្លែងមហាសន្និបាតទេហើយអាចប្រើបានបើមិនរំខានដល់អ្នកឯទៀត។
◼ ការថតរូប: ប្រសិនបើអ្នកថតរូប សូមកុំប្រើពន្លឺភ្លឹបភ្លែតៗពេលដែលកម្មវិធីកំពុងដំណើរការឡើយ។
◼ ហ្វូនលីងនិងទូរស័ព្ទដៃ: ឧបករណ៍ទាំងនេះត្រូវបន្ថយសំឡេងឲ្យឮតិចៗឬក៏ដាក់ឲ្យញ័រប៉ុណ្ណោះដើម្បីកុំឲ្យរំខានដល់អ្នកដទៃ។
◼ ទឹកអប់: ពេលឥឡូវនេះ មហាសន្និបាតភាគច្រើនត្រូវបានធ្វើឡើងនៅកន្លែងបិទជិតដែលមានម៉ាស៊ីនស្រូបខ្យល់ចេញចូល។ ហេតុនេះ បើទឹកអប់មានក្លិនខ្លាំង សូមប្រើតែបន្ដិចបន្តួចបានហើយ ពីព្រោះទឹកអប់បែបនោះអាចបណ្ដាលឲ្យអស់អ្នកដែលមានបញ្ហាខាងផ្លូវដកដង្ហើមឬបញ្ហាឯទៀតដែលពាក់ព័ន្ធនឹងនេះមានប្រតិកម្ម។—១កូ. ១០:២៤
◼ ក្រដាសសុំរកជួប: ក្រដាសសូមរកជួប (S-43) គួរប្រើដើម្បីផ្ដល់ព័ត៌មានស្តីអំពីអ្នកណាម្នាក់ដែលបង្ហាញចំណាប់អារម្មណ៍ដោយសារយើងបានធ្វើបន្ទាល់ក្រៅផ្លូវការក្នុងកំលុងមហាសន្និបាត។ អ្នកផ្សាយគួរយកក្រដាសសូមរកជួបមួយឬពីរសន្លឹកមកជាមួយនៅឯមហាសន្និបាត។ ក្រដាសនេះក៏នឹងមាននៅឯមហាសន្និបាតដែរ ខាងផ្នែកទទួលខុសត្រូវប្រកាសនវត្ថុ។ ក្រដាសសូមរកជួបដែលបំពេញរួចហើយ អាចជូនដល់ផ្នែកទទួលខុសត្រូវខាងប្រកាសនវត្ថុឬដល់លេខានៃក្រុមជំនុំរបស់អ្នកពេលត្រឡប់ទៅក្រុមជំនុំវិញ។—សូមមើលកិច្ចបម្រើព្រះរាជាណាចក្រយើង ខែកុម្ភៈ ឆ្នាំ២០០៥ ទំព័រ៧
◼ នៅភោជនីយដ្ឋាន: នៅកន្លែងជាច្រើន គេមានទម្លាប់ឲ្យលុយបន្ដិចបន្តួចដល់អ្នកបម្រើ។
◼ នៅសណ្ឋាគារ: (១) សូមកុំកក់បន្ទប់លើសពីសេចក្ដីត្រូវការរបស់អ្នក ហើយកុំឲ្យមានមនុស្សស្នាក់នៅក្នុងបន្ទប់លើសចំនួនដែលសណ្ឋាគារបានកំណត់។ (២) បើអ្នកមិនត្រូវការបន្ទប់ដែលបានកក់នោះទេ សូមជូនដំណឹងដល់ម្ចាស់សណ្ឋាគារភ្លាមៗ។ (៣) រទេះដាក់អីវ៉ាន់អាចយកបានកាលណាអ្នកត្រូវការប្រើវាប៉ុណ្ណោះ។ (៤) កុំចម្អិនអាហារក្នុងបន្ទប់ដែលគេមិនអនុញ្ញាតឲ្យចម្អិនអាហារ។ (៥) សូមទុកលុយបន្ដិចបន្តួចឲ្យអ្នកបោសសម្អាតបន្ទប់រាល់ថ្ងៃ។ (៦) ជាគ្រីស្ទានពិត យើងមិនយកច្រើនហួសហេតុពេកនូវរបស់ដែលសណ្ឋាគារឲ្យដោយឥតគិតថ្លៃដូចជាអាហារពេលព្រឹក កាហ្វេ និងទឹកកកសំរាប់ភ្ញៀវក្នុងពេលដែលស្នាក់នៅសណ្ឋាគារនោះឡើយ។ (៧) សូមបង្ហាញផលផ្លែវិញ្ញាណបរិសុទ្ធពេលទាក់ទងនឹងអ្នកបម្រើក្នុងសណ្ឋាគារ ជាពិសេសក្នុងវេលារវល់ខ្លាំង ពោលគឺពេលចុះឈ្មោះជួលនិងពេលឈប់ជួលបន្ទប់ក្នុងសណ្ឋាគារ។