សំបុត្រពីការិយាល័យសាខា
សូមជម្រាបជូនបងប្អូនជាអ្នកផ្សាយព្រះរាជាណាចក្រជាទីស្រឡាញ់ :
យើងពិតជាមានឯកសិទ្ធិអស្ចារ្យណាស់! ដ្បិតយើងជាស្មរបន្ទាល់ព្រះយេហូវ៉ា យើងមិនត្រឹមតែស្គាល់ព្រះយេហូវ៉ាដែលជាព្រះពិតតែមួយប៉ុណ្ណោះទេ តែក៏ជាអ្នកតំណាងព្រះនាមទ្រង់និងបម្រើទ្រង់ទៀត។ គ្មានពរអ្វីប្រសើរជាងនេះឡើយ!—អេសា. ៤៣:១២; ហេ. ៨:១១
មកដល់ពេលដែលសរសេរសំបុត្រនេះ ការិយាល័យសាខាបានទទួលសេចក្ដីរាយការណ៍របស់បងប្អូន អំពីកិច្ចផ្សព្វផ្សាយក្នុងកំលុង៩ខែដំបូងនៃឆ្នាំកិច្ចបម្រើ២០០៦។ ក្នុងកំលុង៩ខែនោះ ជាមធ្យមមានអ្នកផ្សាយ២០២នាក់បានជូនសេចក្ដីរាយការណ៍រាល់ខែ។ ចំនួននេះគឺ១១ភាគរយច្រើនជាងចំនួនអ្នកផ្សាយនៅក្នុងឆ្នាំកិច្ចបម្រើ២០០៥។ ម្យ៉ាងទៀត ជាមធ្យមមានសិស្សព្រះគម្ពីរ៥៩២នាក់រាល់ខែ ហើយនេះបង្ហើបឲ្យដឹងថាចំនួនបងប្អូនអាចមានលទ្ធភាពរីកចម្រើនយ៉ាងច្រើនថែមទៀត។ ព្រះយេហូវ៉ាពិតជាកំពុងតែប្រទានពរទៅលើការខំប្រឹងទាំងនឿយទាំងហត់របស់បងប្អូន ពេលទ្រង់បញ្ជឿនកិច្ចការរបស់ទ្រង់នៅប្រទេសកម្ពុជា។—អេសា. ៦០:២២
ប៉ុន្មានខែមុនពេលបងប្អូនទទួលជាភាសាខ្មែរនូវសៀវភៅតើព្រះគម្ពីរពិតជាបង្រៀនយ៉ាងណា? បងប្អូនច្បាស់ជាបានរំភើបចិត្តណាស់! ប្រាកដជាបងប្អូនយល់ស្របនឹងអ្នកផ្សាយម្នាក់ដែលបានសរសេរថា «សៀវភៅនេះប្រៀបដូចជាត្បូងដ៏ល្អកាត់ថ្លៃពុំបានមួយ ហើយជាឧបករណ៍ប្រសើរណាស់សម្រាប់ជួយយើងបង្រៀនសិស្សថ្មី»។ ស្តីអំពីរឿងនេះ បងប្អូនប្រហែលជាចង់នឹកចាំពីការខំប្រឹងរបស់បងប្អូនប្រុសស្រីដែលធ្វើការនៅការិយាល័យបកប្រែនៅប្រទេសកម្ពុជា ក្នុងការបកប្រែនិងរៀបចំសៀវភៅនេះ។ ចូរឲ្យយើងតាំងចិត្តប្រើសៀវភៅថ្មីនេះដែលព្រះយេហូវ៉ាបានផ្ដល់ ដើម្បីសម្រេចការច្រើនបំផុត។
យើងដឹងគុណអ្នកផ្សាយទាំងអស់ ដែលរួមបញ្ចូលអ្នកបម្រើពេញពេលនិងអ្នកត្រួសត្រាយដែលបានចាកចេញពីក្រុមគ្រួសារនិងប្រទេសកំណើតខ្លួន ដើម្បីមកជួយបម្រើនៅប្រទេសកម្ពុជា។ យើងតែងនឹករឭកដល់បងប្អូនជានិច្ច។ ដោយជំនឿជឿជាក់ យើងអធិស្ឋានទូលសូមព្រះយេហូវ៉ាឲ្យជួយបងប្អូនពេលដែលរួមធ្វើការជាមួយទ្រង់ក្នុងការសម្រេចគោលបំណងរបស់ទ្រង់។
ពីបងប្អូនរបស់អ្នក
ការិយាល័យសាខាប្រចាំប្រទេសជប៉ុន