ចូរបង្រៀនដោយស្រួលយល់
១. តើលក្ខណៈដ៏សំខាន់មួយចំពោះការបង្រៀនដែលច្បាស់ និងមានប្រសិទ្ធភាពជាអ្វី?
១ លក្ខណៈដ៏សំខាន់មួយចំពោះការបង្រៀនដែលច្បាស់និងមានប្រសិទ្ធភាព នោះគឺភាពស្រួលយល់។ ការគិតពិចារណានូវរបៀបដែលលោកយេស៊ូជាគ្រូដ៏ឧត្តមបង្រៀន អាចជួយយើងឲ្យបង្កើន«ការប៉ិនប្រសប់សព្វគ្រប់ក្នុងការបង្រៀន»របស់យើង។—២ធី. ៤:២; យ៉ូន. ១៣:១៣
២. តើការបង្រៀនដោយប្រើពាក្យស្រួលយល់រួមបញ្ចូលអ្វី? តើសេចក្ដីបង្រៀនបែបនេះមានឥទ្ធិពលយ៉ាងណា?
២ ចូរនិយាយដោយស្រួលយល់ : មិនដែលមាននរណាដែលបានពន្យល់សេចក្ដីពិតដ៏ជ្រាលជ្រៅបំផុតដោយស្រួលយល់ដូចសុន្ទរកថារបស់លោកយេស៊ូនៅលើភ្នំទេ។ (ម៉ាថ. ជំពូកទី៥-៧) បណ្ដាជនដែលកំពុងស្ដាប់លោកយេស៊ូ«បានកោតស្ងើចក្រៃលែងនឹងសេចក្ដីបង្រៀនរបស់លោក»។ ពួកអាជ្ញាធរដែលគេបានបញ្ជូនឲ្យទៅចាប់លោក បាននិយាយថា៖ «មិនដែលមានអ្នកណានិយាយដូចអ្នកនោះទេ»។ (ម៉ាថ. ៧:២៨, ២៩; យ៉ូន. ៧:៤៦) យើងមិនចាំបាច់ប្រើពាក្យជ្រៅៗ ឃ្លាស្មុគស្មាញ ឬឧទាហរណ៍ដែលមានព័ត៌មានល្អិតល្អន់ ដើម្បីឲ្យអ្នកឯទៀតជឿជាក់សេចក្ដីពិតនោះទេ។ យើងអាចពន្យល់យ៉ាងច្បាស់អំពីសេចក្ដីពិត ដោយប្រើពាក្យស្រួលយល់។
៣. ហេតុអ្វីក៏អ្នកខ្លះបង្រៀនគេច្រើនពេក? តើយើងអាចជៀសវាងពីបង្រៀនគេច្រើនពេកយ៉ាងណា?
៣ ត្រូវបង្រៀនប៉ុន្មាន? : លោកយេស៊ូបានគិតអំពីពួកអ្នកស្ដាប់ដើម្បីសម្រេចថាត្រូវបង្រៀនពួកគេម្ដងៗប៉ុន្មាន។ (យ៉ូន. ១៦:១២) យើងត្រូវចេះសង្កេតមើលនិងប្រែប្រួលតាមតម្រូវការនៃអស់អ្នកដែលយើងនិយាយជាមួយ ជាពិសេសពេលផ្សាយដល់ញាតិមិត្ត មនុស្សដែលចាប់អារម្មណ៍ថ្មី ឬកូនក្មេង។ យើងត្រូវប្រយ័ត្នមិនបង្រៀនច្រើនពេក សូម្បីតែមើលទៅពួកគេដូចជាយកចិត្តទុកដាក់ស្ដាប់ក៏ដោយ។ មនុស្សដែលមានចិត្តស្មោះត្រង់នឹងបន្តក្រេបយកចំណេះអំពីព្រះយេហូវ៉ា ដែលជាព្រះពិតតែមួយ។— យ៉ូន. ១៧:៣; ១កូ. ៣:៦
៤. ហេតុអ្វីការប្រមូលអារម្មណ៍លើគោលចំណុចមានប្រយោជន៍ជាងការប្រមូលអារម្មណ៍លើព័ត៌មានល្អិតល្អន់?
៤ ចូរប្រមូលអារម្មណ៍លើគោលចំណុច : លោកយេស៊ូមិនបានធ្វើឲ្យការបង្រៀនរបស់លោកទៅជាស្មុគស្មាញ ដោយពន្យល់ល្អិតល្អន់ពេកឡើយ។ នៅពេលលោកមានប្រសាសន៍ថា៖ «អស់អ្នកនៅក្នុងផ្នូរដែលសម្រាប់ជាទីរំលឹកនឹង . . . ចេញមក» នោះមិនមែនជាពេលឲ្យលោកពន្យល់បន្ថែមព័ត៌មានច្រើនស្តីអំពីអស់អ្នកដែលបានត្រូវប្រោសឲ្យរស់ឡើងវិញមានសេចក្ដីសង្ឃឹមពីរខុសគ្នានោះទេ។ (យ៉ូន. ៥:២៨, ២៩) ពេលដឹកនាំការសិក្សាក្នុងគម្ពីរ គប្បីឲ្យយើងប្រមូលអារម្មណ៍លើគោលចំណុច និងជៀសវាងពីការពន្យល់បន្ថែមព័ត៌មានផ្សេងទៀតដែលឥតចាំបាច់។
៥. ប្រសិនបើយើងបង្រៀនដោយស្រួលយល់ នោះយើងនឹងបានពរអ្វី?
៥ យើងមានការដឹងគុណមែន ដែលព្រះយេហូវ៉ាបង្រៀនយើងដោយប្រើពាក្យស្រួលយល់ ចំពោះអ្វីៗទាំងអស់ដែលយើងត្រូវដឹង! (ម៉ាថ. ១១:២៥) សូមឲ្យយើងខំបង្រៀនដោយប្រើពាក្យស្រួលយល់ បើធ្វើដូច្នេះយើងនឹងបានអំណរក្នុងកិច្ចបម្រើផ្សាយដែលបង្កើតផល។