ចូរចាត់ទុកឯកសិទ្ធិក្នុងកិច្ចផ្សព្វផ្សាយជាអ្វីដែលមានតម្លៃ
១. តើមនុស្សជាច្រើននៅក្នុងពិភពលោកនេះមានទស្សនៈយ៉ាងណាចំពោះកិច្ចការផ្សព្វផ្សាយរបស់យើង?
១ មនុស្សជាច្រើននៅក្នុងពិភពលោករបស់សាថានចាត់ទុកកិច្ចការផ្សព្វផ្សាយរបស់យើងជា«អ្វីដែលផ្ដេសផ្ដាស»។ (១កូ. ១:១៨-២១) បើយើងមិនប្រយ័ត្នទេ ទស្សនៈមិនត្រឹមត្រូវនេះអាចបណ្ដាលឲ្យកម្លាំងចិត្តយើងអន់ថយឬធ្លាក់ទឹកចិត្ត ហើយធ្វើឲ្យយើងលែងមានចិត្តខ្នះខ្នែងទៀត។ (សុភ. ២៤:១០; អេ. ៥:២០) តើមានមូលហេតុអ្វីដែលយើងគួរចាត់ទុកឯកសិទ្ធិធ្វើជាសាក្សីព្រះយេហូវ៉ាថាមានតម្លៃ?—អេ. ៤៣:១០
២. ហេតុអ្វីកិច្ចបម្រើផ្សាយអាចហៅថាជា«កិច្ចការដ៏បរិសុទ្ធ»?
២ «កិច្ចការដ៏បរិសុទ្ធ»: សាវ័កប៉ូលបានហៅកិច្ចបម្រើផ្សាយថាជា«កិច្ចការដ៏បរិសុទ្ធ»។ (រ៉ូម ១៥:១៥, ១៦) តើតាមរបៀបណាដែលកិច្ចបម្រើផ្សាយជា«កិច្ចការដ៏បរិសុទ្ធ»? ការចូលរួមក្នុងកិច្ចការនេះ ធ្វើឲ្យយើងទៅជា«អ្នករួមការងារ»ជាមួយនឹង«ព្រះដ៏បរិសុទ្ធ»ពោលគឺព្រះយេហូវ៉ា ហើយជួយធ្វើឲ្យនាមរបស់លោកបានបរិសុទ្ធ។ (១កូ. ៣:៩; ១ពេ. ១:១៥) ព្រះយេហូវ៉ាមានទស្សនៈថាកិច្ចផ្សព្វផ្សាយរបស់យើងជា«សេចក្ដីសរសើរជាគ្រឿងបូជា» ហេតុនេះកិច្ចបម្រើផ្សាយគឺជាអ្វីដែលសំខាន់ចាំបាច់ក្នុងការគោរពប្រណិប័តន៍របស់យើង។—ហេ. ១៣:១៥
៣. តើអ្វីធ្វើឲ្យការផ្សព្វផ្សាយដំណឹងល្អជាកិត្ដិយសដ៏ខ្ពង់ខ្ពស់?
៣ ការផ្សព្វផ្សាយដំណឹងល្អគឺជាកិត្ដិយសដ៏ខ្ពង់ខ្ពស់ដែលមនុស្សតិចណាស់មាន។ បើបណ្ដាទេវតាមានឯកសិទ្ធិបែបនេះ នោះពួកគេនឹងសប្បាយចិត្តធ្វើកិច្ចការនេះ ហើយធ្វើបានយ៉ាងល្អបំផុតទៀតផង។ (១ពេ. ១:១២) ក៏ប៉ុន្តែព្រះយេហូវ៉ាបានជ្រើសរើសយើងជាមនុស្សមិនល្អឥតខ្ចោះដែលប្រៀបដូចជា«ភាជនៈដី» ឲ្យមានឯកសិទ្ធិដ៏អស្ចារ្យនេះ!—២កូ. ៤:៧
៤. តើតាមរបៀបណាដែលយើងអាចបង្ហាញថាយើងឲ្យតម្លៃចំពោះកិច្ចបម្រើផ្សាយ?
៤ អាទិភាព: ដោយសារយើងពិតជាឲ្យតម្លៃខ្ពស់ចំពោះឯកសិទ្ធិរបស់យើង នោះយើងចាត់ទុកកិច្ចបម្រើផ្សាយជាកិច្ចការមួយក្នុងចំណោម«ការអ្វីដែលសំខាន់ជាង»ក្នុងជីវិតរបស់យើង។ (ភី. ១:១០) ដូច្នេះ យើងលៃពេលរាល់សប្ដាហ៍ដើម្បីចូលរួមក្នុងកិច្ចការនេះ។ បើតន្ត្រីករម្នាក់ឲ្យតម្លៃចំពោះឯកសិទ្ធិរបស់គាត់ក្នុងការលេងភ្លេងក្នុងវង់តន្ត្រីដ៏ល្បីទូទាំងពិភពលោក នោះគាត់នឹងខំប្រឹងហាត់លេងមុនពេលទៅប្រគំភ្លេងម្ដងៗ ហើយខំធ្វើឲ្យការលេងភ្លេងរបស់គាត់កាន់តែពីរោះថែមទៀត។ ស្រដៀងគ្នាដែរ យើងនឹងរៀបចំឲ្យបានល្អមុននឹងទៅផ្សព្វផ្សាយ ដើម្បីយើងអាច«បង្រៀននិងពន្យល់បណ្ដាំនៃសេចក្ដីពិតយ៉ាងត្រឹមត្រូវ» ហើយយើងខំបង្កើន‹ការប៉ិនប្រសប់ក្នុងការបង្រៀន›។—២ធី. ២:១៥; ៤:២
៥. តើអ្នកណាឲ្យតម្លៃចំពោះកិច្ចបម្រើផ្សាយរបស់យើង?
៥ កុំឲ្យទស្សនៈរបស់មនុស្សភាគច្រើនធ្វើឲ្យយើងធ្លាក់ទឹកចិត្តឡើយ។ សូមចាំថានៅមានមនុស្សជាច្រើនក្នុងតំបន់ផ្សាយដែលឲ្យតម្លៃចំពោះកិច្ចបម្រើផ្សាយរបស់យើង។ ក៏ប៉ុន្តែ យើងមិនមែនខំធ្វើឲ្យមនុស្សពេញចិត្តនឹងយើងទេ។ អ្វីដែលសំខាន់បំផុតគឺ ទស្សនៈរបស់ព្រះយេហូវ៉ាចំពោះកិច្ចការរបស់យើង ហើយយើងដឹងថាលោកពិតជាឲ្យតម្លៃខ្ពស់ចំពោះការខំព្យាយាមរបស់យើង។—អេ. ៥២:៧