ប្រអប់សំណួរ
◼ តើអ្នកណាគួរបំពេញប័ណ្ណស្នើសុំសៀវភៅនិងពាក្យស្នើសុំតាមទំព័រអ៊ីនធឺណិត?
ជារឿយៗ សៀវភៅរបស់យើងមានប័ណ្ណដែលគេអាចបំពេញ ហើយផ្ញើទៅការិយាល័យសាខាដើម្បីស្នើសុំសៀវភៅឬសុំសាក្សីព្រះយេហូវ៉ាម្នាក់ទៅជួបគេ។ ម្យ៉ាងទៀត គេអាចប្រើគេហទំព័ររបស់យើង www.watchtower.org ដើម្បីសុំសិក្សាគម្ពីរ។ ការរៀបចំទាំងនេះកំពុងជួយមនុស្សជាច្រើនឲ្យរៀនអំពីសេចក្ដីពិត។ ក៏ប៉ុន្តែ មានបញ្ហាកើតឡើង កាលណាអ្នកផ្សាយប្រើអ្វីទាំងនេះដើម្បីស្នើសុំជំនួសញាតិសន្ដានឬអ្នកឯទៀតដើម្បីឲ្យពួកគេអាចទទួលសៀវភៅឬដើម្បីឲ្យសាក្សីណាម្នាក់ទៅជួបពួកគេ។
អ្នកខ្លះដែលបានទទួលសៀវភៅដែលពួកគេមិនបានស្នើសុំពីការិយាល័យសាខាបានត្អូញត្អែរថា អង្គការយើងរុកកួនរំខានពួកគេ ហើយចុះឈ្មោះពួកគេក្នុងបញ្ជីឈ្មោះអ្នកដែលទទួលសៀវភៅជាទៀងទាត់។ អ្នកផ្សាយដែលបានទទួលសំបុត្រសុំឲ្យទៅជួបបុគ្គលណាម្នាក់ដែលមិនបានសុំដោយផ្ទាល់ឲ្យពួកគាត់ទៅជួប បានស្ថិតក្នុងស្ថានភាពពិបាក កាលណាបុគ្គលនោះខឹង។ ហេតុនេះ ពាក្យស្នើសុំតាមរយៈគេហទំព័ររបស់យើងឬប័ណ្ណស្នើសុំសៀវភៅគួរចេញមកពីអ្នកចាប់អារម្មណ៍ដោយផ្ទាល់ មិនមែនមកពីអ្នកផ្សាយដែលចង់ឲ្យញាតិមិត្តទទួលសៀវភៅឬឲ្យសាក្សីណាម្នាក់ទៅជួបពួកគេទេ។ កាលណាការិយាល័យសាខាដឹងថាអ្នកផ្សាយម្នាក់បានផ្ញើពាក្យសុំឲ្យទាក់ទងបុគ្គលម្នាក់ទៀត ជាទូទៅពាក្យស្នើសុំនោះនឹងត្រូវទុកចោល។
បើដូច្នេះ តើតាមរបៀបណាយើងអាចជួយញាតិសន្ដានឬអ្នកដែលយើងស្គាល់ឲ្យដឹងសេចក្ដីពិតក្នុងគម្ពីរ? បើអ្នកចង់ឲ្យគាត់ទទួលសៀវភៅ សូមផ្ញើសៀវភៅនោះដោយផ្ទាល់ជាអំណោយដល់គាត់។ បើគាត់ចាប់អារម្មណ៍ ហើយចង់ឲ្យសាក្សីមកជួបគាត់ តែអ្នកមិនដឹងទាក់ទងអ្នកចាស់ទុំក្នុងតំបន់របស់គាត់តាមរបៀបណាទេ នោះអ្នកគួរបំពេញក្រដាសសូមរកជួប (S-43) រួចជូនទៅលេខាធិការនៃក្រុមជំនុំរបស់អ្នក ដែលនឹងពិនិត្យមើល ហើយបញ្ជូនទៅការិយាល័យសាខា។ ក៏ប៉ុន្តែ បើអ្នកដែលចាប់អារម្មណ៍ត្រូវជាប់ឃុំឃាំងក្នុងគុក ត្រូវបង្ខាំងក្នុងអគារដាក់អ្នកប្រើគ្រឿងញៀន ឬក្នុងមន្ទីរពេទ្យរដ្ឋ អ្នកមិនត្រូវទាក់ទងការិយាល័យសាខាជំនួសគាត់ឡើយ។ ផ្ទុយទៅវិញ សូមលើកទឹកចិត្តគាត់ឲ្យទាក់ទងបងប្រុសដែលទៅផ្សព្វផ្សាយនៅអគារនោះ ឬឲ្យគាត់សរសេរដោយផ្ទាល់ទៅការិយាល័យសាខា។