ប្រអប់សំណួរ
◼ តើអ្នកផ្សាយគួរប្រើអ៊ីនធឺណិតច្រើនប៉ុនណា ក្នុងការផ្សព្វផ្សាយឬបង្រៀនគម្ពីរដល់មនុស្សដែលរស់នៅប្រទេសផ្សេង?
អ្នកផ្សាយខ្លះបានប្រើអ៊ីនធឺណិតដើម្បីបង្រៀនគម្ពីរដល់មនុស្សនៅប្រទេសផ្សេង ដែលនៅទីនោះកិច្ចការរបស់យើងបានត្រូវដាក់កម្រិត ឬមានតែអ្នកផ្សាយតិចតួចប៉ុណ្ណោះ។ ក្នុងករណីខ្លះ ការធ្វើដូច្នោះទទួលបានលទ្ធផលល្អ។ ទោះជាយ៉ាងនោះក៏ដោយ នេះអាចនាំឲ្យមានគ្រោះថ្នាក់ ពេលដែលអ្នកផ្សាយផ្ញើអ៊ីមែលទៅវិញទៅមក ឬទាក់ទងជាមួយអ្នកដែលខ្លួនមិនស្គាល់តាមរយៈការឆ្លើយឆ្លងគ្នា(Chat room) (សូមមើលកិច្ចបម្រើព្រះ ខែកក្កដា ឆ្នាំ២០០៧ ទំ. ៥)។ ទោះជាអ្នកផ្សាយមានបំណងផ្សព្វផ្សាយដំណឹងអំពីរាជាណាចក្រព្រះដល់អ្នកដែលមានចិត្តស្មោះក៏ដោយ ការទាក់ទងបែបនេះអាចនាំឲ្យបងប្អូនធ្លាក់ទៅក្នុងការសេពគប់អាក្រក់ ដែលក្នុងនោះរួមមានអ្នកក្បត់ជំនឿផងដែរ។ (១កូ. ១:១៩-២៥; កូឡ. ២:៨) បន្ថែមទៅទៀត នៅប្រទេសខ្លះដែលកិច្ចបម្រើរបស់យើងបានត្រូវដាក់កម្រិតឬបម្រាម ការសរសេរទៅវិញទៅមកតាមប្រព័ន្ធអ៊ីនធឺណិត អាចនឹងត្រូវពួកអាជ្ញាធរក្នុងប្រទេសនោះតាមដានមើល។ ការទាក់ទងបែបនេះអាចបង្កគ្រោះថ្នាក់ដល់បងប្អូននៅប្រទេសនោះ។ ដូច្នេះ អ្នកផ្សាយមិនគួរប្រើអ៊ីនធឺណិតក្នុងការផ្សព្វផ្សាយដំណឹងល្អដល់មនុស្សដែលរស់នៅប្រទេសផ្សេងឡើយ។
បើយើងផ្សព្វផ្សាយក្រៅផ្លូវការដល់បុគ្គលណាម្នាក់ដែលមកលេងពីប្រទេសផ្សេង យើងមិនគួរទាក់ទងគាត់ដើម្បីបណ្ដុះចំណាប់អារម្មណ៍របស់គាត់ថែមទៀត ពេលគាត់ត្រឡប់ទៅប្រទេសគាត់វិញទេ លុះត្រាតែមានការណែនាំពីការិយាល័យសាខាឲ្យយើងទាក់ទងគាត់។ ផ្ទុយទៅវិញ យើងអាចបង្ហាញគាត់អំពីរបៀបប្រើគេហទំព័រjw.org ដើម្បីឲ្យគាត់ទទួលព័ត៌មានថែមទៀត ឬបង្ហាញគាត់អំពីរបៀបទាក់ទងនឹងការិយាល័យសាខាដែលមើលខុសត្រូវកិច្ចការក្នុងប្រទេសគាត់។ យើងក៏អាចលើកទឹកចិត្តគាត់ឲ្យទៅសាលប្រជុំដែលនៅជិតតំបន់ដែលគាត់រស់នៅដែរ។ ទោះជានៅប្រទេសខ្លះមិនមានសាលប្រជុំក៏ពិតមែន ប៉ុន្តែបើគាត់ចង់ឲ្យសាក្សីណាម្នាក់ដែលនៅក្នុងតំបន់នោះទៅជួបគាត់ យើងគួរបំពេញក្រដាសសូមរកជួប (S-43) រួចឲ្យលេខាធិការនៃក្រុមជំនុំ។ លេខាធិការនឹងផ្ញើព័ត៌មានរបស់បុគ្គលនោះទៅការិយាល័យសាខា ដោយចូលគេហទំព័រjw.org។ ការិយាល័យសាខាដែលមើលខុសត្រូវកិច្ចការក្នុងប្រទេសនោះ ស្គាល់ច្បាស់នូវកាលៈទេសៈនៅប្រទេសនោះ ហើយអាចជួយបុគ្គលដែលបង្ហាញចំណាប់អារម្មណ៍នោះឲ្យរៀនគម្ពីរ (សូមមើលកិច្ចបម្រើព្រះ ខែមិថុនា ឆ្នាំ២០១៤ ទំ. ៧ និងកិច្ចបម្រើព្រះ ខែវិច្ឆិកា ឆ្នាំ២០១១ ទំ. ២)។
បើយើងកំពុងពិគ្រោះឬបង្រៀនគម្ពីរ ដល់បុគ្គលម្នាក់តាមអ៊ីនធឺណិត ហើយគាត់បានរើទៅប្រទេសផ្សេង ក្នុងករណីនេះ យើងគួរធ្វើតាមការណែនាំដូចខាងលើ។ ទោះជាយ៉ាងនោះក៏ដោយ យើងនៅតែទាក់ទងគាត់បាន តាមអ៊ីនធឺណិតដើម្បីជួយគាត់មានចំណាប់អារម្មណ៍ថែមទៀត រហូតដល់មានអ្នកផ្សាយណាម្នាក់ទៅជួបគាត់។ បើគាត់រស់នៅក្នុងប្រទេសដែលដាក់កម្រិតឬបម្រាមចំពោះកិច្ចការយើង ជាការល្អឲ្យយើងប្រុងប្រយ័ត្ន ពេលយើងពិគ្រោះជាមួយនឹងបុគ្គលនោះនូវប្រធានបទណាមួយក្នុងគម្ពីរតាមសំបុត្រ តាមទូរស័ព្ទ ឬគ្រឿងអេឡិចត្រូនិកផ្សេងៗ។—ម៉ាថ. ១០:១៦