មហាសន្និបាតប្រចាំតំបន់របស់យើងបញ្ជាក់យ៉ាងច្បាស់អំពីសេចក្ដីពិត
១. តើបុណ្យដែលធ្វើឡើងជាទៀងទាត់ផ្ដល់ឱកាសដល់បណ្ដាជនអ៊ីស្រាអែលឲ្យសញ្ជឹងគិតនិងពិភាក្សាគ្នាអំពីសេចក្ដីពិតសំខាន់ៗអ្វី?
១ នៅសម័យបុរាណបណ្ដាជនអ៊ីស្រាអែលបានជួបជុំគ្នានៅពេលបុណ្យដែលធ្វើឡើងជាទៀងទាត់បីដងក្នុងមួយឆ្នាំ។ ទោះជាមានតែប្រុសៗប៉ុណ្ណោះដែលតម្រូវឲ្យចូលរួមបុណ្យនោះ តែជារឿយៗក្រុមគ្រួសារទាំងមូលបានធ្វើដំណើរជាមួយគ្នាទៅក្រុងយេរូសាឡិមដើម្បីចូលរួមបុណ្យឬមហាសន្និបាតដ៏រីករាយទាំងនេះ។ (ចោ. ១៦:១៥, ១៦) មហាសន្និបាតបែបនោះផ្ដល់ឱកាសឲ្យយើងរំពឹងគិតនិងពិភាក្សាគ្នាអំពីសេចក្ដីពិតសំខាន់ៗ។ តើសេចក្ដីពិតសំខាន់ៗមានអ្វីខ្លះ? មួយគឺព្រះយេហូវ៉ាជាអ្នកផ្គត់ផ្គង់ដែលមានចិត្តទូលាយនិងសេចក្ដីស្រឡាញ់។ (ចោ. ១៥:៤, ៥) មួយទៀត លោកជួយការពារនិងផ្ដល់ការណែនាំដែលអាចទុកចិត្តបាន។ (ចោ. ៣២:៩, ១០) បណ្ដាជនអ៊ីស្រាអែលក៏អាចសញ្ជឹងគិតដែរថា ពួកគេជារាស្ត្រតំណាងនាមព្រះយេហូវ៉ា ដូច្នេះពួកគេត្រូវបង្ហាញភាពសុចរិតរបស់លោកក្នុងជីវិតប្រចាំថ្ងៃ។ (ចោ. ៧:៦, ១១) នៅសព្វថ្ងៃនេះ ស្រដៀងគ្នាដែរយើងក៏ទទួលប្រយោជន៍ពីមហាសន្និបាតប្រចាំតំបន់ដែលមានជារៀងរាល់ឆ្នាំដែរ។
២. តើកម្មវិធីនៃមហាសន្និបាតប្រចាំតំបន់នឹងជួយយើងឲ្យយល់ច្បាស់ជាងហើយធ្វើតាមសេចក្ដីពិតក្នុងគម្ពីរយ៉ាងដូចម្ដេច?
២ កម្មវិធីជួយយើងឲ្យយល់ច្បាស់ជាងនិងធ្វើតាមសេចក្ដីពិត: នៅឯមហាសន្និបាតរបស់យើង មានសុន្ទរកថា ឈុតសម្ដែង ការសម្ដែង និងការសម្ភាសដែលជួយយើងឲ្យយល់ច្បាស់ជាង ព្រមទាំងជួយយើងឲ្យធ្វើតាមសេចក្ដីពិតក្នុងគម្ពីរ។ (យ៉ូន. ១៧:១៧) កិច្ចការជាច្រើនបានត្រូវរៀបចំរួចហើយសម្រាប់មហាសន្និបាតដែលនឹងមានខាងមុខនេះ។ អង្គការព្រះយេហូវ៉ាកំពុងរៀបចំកម្មវិធីយ៉ាងពិសេសដែលស្របតាមសេចក្ដីត្រូវការរបស់មនុស្សទូទាំងពិភពលោកនៅសព្វថ្ងៃនេះ។ (ម៉ាថ. ២៤:៤៥-៤៧) តើអ្នកចង់ស្ដាប់និងចង់ឃើញអ្វីដែលនឹងមាននៅមហាសន្និបាតឬទេ?
៣. តើយើងត្រូវធ្វើអ្វីដើម្បីទទួលប្រយោជន៍ពីកម្មវិធីមហាសន្និបាត?
៣ តាមពិតយើងអាចទទួលប្រយោជន៍បាន លុះត្រាតែយើងចូលរួមនិងយកចិត្តទុកដាក់ស្ដាប់កម្មវិធីទាំងបីថ្ងៃ។ បើអ្នកមិនទាន់បានត្រៀមខ្លួនទេ សូមនិយាយជាមួយនឹងនាយកនៅកន្លែងធ្វើការដើម្បីសុំច្បាប់។ រាល់យប់សូមទទួលទានដំណេកឲ្យបានគ្រប់គ្រាន់ ដើម្បីអ្នកអាចផ្ចង់អារម្មណ៍ក្នុងអំឡុងកម្មវិធីនោះ។ បងប្អូនខ្លះយល់ឃើញថាការមើលចំទៅអ្នកថ្លែងសុន្ទរកថា និងកត់កំណត់ខ្លីៗ នោះអាចជួយពួកគេឲ្យផ្ចង់អារម្មណ៍បាន។ កុំឲ្យសំឡេងទូរស័ព្ទរបស់អ្នករំខានអ្នកនិងអ្នកឯទៀត។ សូមជៀសវាងការនិយាយគ្នា ផ្ញើសារ ពិសាឬផឹកក្នុងអំឡុងកម្មវិធី។
៤. តើឪពុកម្ដាយអាចជួយកូនរបស់ខ្លួនឲ្យទទួលប្រយោជន៍ក្នុងអំឡុងមហាសន្និបាតយ៉ាងដូចម្ដេច?
៤ ក្នុងឆ្នាំឈប់សម្រាក ពេលក្រុមគ្រួសាររបស់បណ្ដាជនអ៊ីស្រាអែលប្រមូលគ្នាដើម្បីស្ដាប់ក្រិត្យវិន័យក្នុងអំឡុងបុណ្យបារាំ ពួកគេបានយក«កូនក្មេង»ទៅជាមួយ«ដើម្បីឲ្យគេស្ដាប់ ហើយបានរៀន»។ (ចោ. ៣១:១២) ពិតជាលើកទឹកចិត្តយើងមែន! កាលដែលឃើញក្រុមគ្រួសារអង្គុយជាមួយគ្នា ហើយប្អូនៗក៏ខំយកចិត្តទុកដាក់ស្ដាប់ក្នុងអំឡុងកម្មវិធីមហាសន្និបាត។ ជារៀងរាល់ល្ងាច សូមមើលកំណត់របស់អ្នក ហើយលើកចំណុចដែលអ្នកចូលចិត្តជាងគេមកពិភាក្សា។ ដោយសារ«សេចក្ដីចំកួតរមែងនៅជាប់ក្នុងចិត្តរបស់កូន» ដូច្នេះនៅពេលសម្រាកថ្ងៃត្រង់ និងពេលស្នាក់នៅសណ្ឋាគារ ជាជាង«បណ្ដោយ»តាមចិត្តកូន នោះឪពុកម្ដាយគួរមើលកូនរបស់ខ្លួនឲ្យបានល្អ ហើយនេះក៏រួមទាំងកូនវ័យជំទង់ដែរ។—សុភ. ២២:១៥; ២៩:១៥
៥. តើការប្រព្រឹត្តល្អរបស់យើងពេលស្នាក់នៅសណ្ឋាគារនឹងធ្វើឲ្យសេចក្ដីពិតមានលម្អយ៉ាងដូចម្ដេច?
៥ ការប្រព្រឹត្តល្អធ្វើឲ្យសេចក្ដីពិតមានលម្អ: ការប្រព្រឹត្តល្អរបស់យើងក្នុងក្រុងដែលមានមហាសន្និបាត នោះនឹងធ្វើឲ្យសេចក្ដីពិតមានលម្អ។ (ទីត. ២:១០) កាលដែលបងប្អូនស្នាក់នៅហើយធ្វើតាមច្បាប់របស់សណ្ឋាគារ ព្រមទាំងបង្ហាញចិត្តអត់ធ្មត់និងសប្បុរសចំពោះបុគ្គលិកក្នុងសណ្ឋាគារ នោះនាំឲ្យពួកគេកត់សម្គាល់ការប្រព្រឹត្តរបស់បងប្អូន។ (កូឡ. ៤:៦) ឆ្នាំមុន ពេលតំណាងការិយាល័យសាខាទាក់ទងសណ្ឋាគារដើម្បីឲ្យបងប្អូនស្នាក់នៅ នោះអ្នកគ្រប់គ្រងផ្នែកលក់បានប្រាប់ពួកគាត់ថា៖ «យើងចង់ឲ្យគ្នីគ្នារបស់អ្នកមកស្នាក់នៅសណ្ឋាគារយើង ពីព្រោះពួកគេជាមនុស្សល្អ។ ពួកគេចេះគួរសម និងចិត្តល្អ ហើយចេះបង្ហាញការគោរពចំពោះបុគ្គលិកយើង ថែមទាំងចេះថែទាំអគារនិងគ្រឿងប្រើប្រាស់ក្នុងសណ្ឋាគារ»។
៦. តើការស្លៀកពាក់របស់យើងក្នុងក្រុងដែលមានមហាសន្និបាតអាចធ្វើឲ្យសេចក្ដីពិតមានលម្អយ៉ាងដូចម្ដេច?
៦ ពេលយើងពាក់នាមប័ណ្ណមហាសន្និបាត នេះមិនគ្រាន់តែបង្ហាញគេឲ្យដឹងអំពីមហាសន្និបាតនិងជួយអ្នកចូលរួមឯទៀតឲ្យសម្គាល់យើងប៉ុណ្ណោះទេ តែយើងក៏ធ្វើជាសាក្សីបញ្ជាក់ចំពោះអ្នកដែលមើលយើងដែរ។ អ្នកដែលនៅក្នុងក្រុងដែលមានមហាសន្និបាតនឹងឃើញថា អ្នកដែលពាក់នាមប័ណ្ណមហាសន្និបាតនោះស្លៀកពាក់ស្អាតបាតហើយរមទម មិនមែនគ្មានសណ្ដាប់ធ្នាប់និងធ្វើឲ្យអ្នកឯទៀតស្រើបស្រាលដូចពិភពលោកនេះទេ។ (១ធី. ២:៩, ១០) ដូច្នេះហើយ យើងគួរយកចិត្តទុកដាក់ចំពោះការស្លៀកពាក់និងសម្អិតសម្អាងខ្លួនរបស់យើងក្នុងក្រុងដែលមានមហាសន្និបាត នេះក៏រួមទាំងពេលយើងចុះឈ្មោះស្នាក់នៅសណ្ឋាគារដែរ។ ការចូលទៅស្នាក់នៅសណ្ឋាគារដោយស្លៀកខោខ្លីនិងពាក់អាវយឺតមិនបង្ហាញភាពថ្លៃថ្នូរទេ។ ទោះបីជាមហាសន្និបាតធ្វើនៅកន្លែងដែលគ្មានដំបូលក៏ដោយ ក៏យើងត្រូវស្លៀកពាក់ថ្លៃថ្នូរដែរ។ ក្រោយចប់កម្មវិធី បើយើងចង់ប្ដូរខោអាវដើម្បីទៅភោជនីយដ្ឋាន យើងគួរចាំថា យើងនៅតែជាអ្នកចូលរួមមហាសន្និបាត ហើយយើងមិនគួរស្លៀកពាក់សាមញ្ញជ្រុលពេកទេ។
៧. ក្នុងពេលមហាសន្និបាត តើវិធីម្យ៉ាងអ្វីដែលជួយយើងឲ្យមានសាមគ្គីភាពជាគ្រិស្តសាសនិក?
៧ នៅបុណ្យដែលធ្វើឡើងជាទៀងទាត់ បណ្ដាជនអ៊ីស្រាអែលបានទទួលការលើកទឹកចិត្តពីការសេពគប់បងប្អូនរួមជំនឿដែលមកពីកន្លែងផ្សេងៗនិងប្រទេសផ្សេងៗ ហើយនេះជួយពួកគេឲ្យមានសាមគ្គីភាព។ (សកម្ម. ២:១, ៥) សាមគ្គីភាពពិសេសដែលយើងមានជាគ្រិស្តសាសនិកទូទាំងពិភពលោកតែងតែលេចធ្លោក្នុងអំឡុងមហាសន្និបាតប្រចាំតំបន់។ ជារឿយៗ អ្នកសង្កេតមើលយើងកោតស្ងើចនឹងសាមគ្គីភាពរបស់យើង ដែលធ្វើឲ្យមានស្ថានភាពសុខសាន្តប្រៀបដូចជាសួនឧទ្យាន។ (ទំនុក. ១៣៣:១) ដូច្នេះហើយ ក្នុងពេលបរិភាគអាហារថ្ងៃត្រង់ ជាជាងចេញទៅខាងក្រៅដើម្បីទិញចំណីអាហារ នោះជាការប្រសើរជាងបើយើងយកម្ហូបបន្ដិចបន្តួចមកជាមួយ ដើម្បីយើងមានពេលជួបនិងសំណេះសំណាលជាមួយបងប្អូនដែលអង្គុយក្បែរយើង!
៨. បើអាចធ្វើបាន តើមានមូលហេតុអ្វីខ្លះដែលធ្វើឲ្យអ្នកស្ម័គ្រចិត្តជួយនៅឯមហាសន្និបាត?
៨ អ្នកសង្កេតមើលតែងកោតស្ងើចនឹងមហាសន្និបាតរបស់យើងដែលមានការរៀបចំល្អនិងមានរបៀបរៀបរយ ជាពិសេសពេលពួកគេដឹងថាកិច្ចការទាំងអស់នេះធ្វើឡើងដោយស្ម័គ្រចិត្ត។ តើអ្នកអាចចូលរួមដោយ«ស្ម័គ្រពីចិត្ត»ធ្វើកិច្ចការនៅឯមហាសន្និបាតបានទេ? (ទំនុក. ១១០:៣) ជាញឹកញយក្រុមគ្រួសារទាំងមូលស្ម័គ្រចិត្តធ្វើកិច្ចការនៅមហាសន្និបាត នេះជារបៀបមួយដើម្បីបង្ហាត់បង្រៀនកូនឲ្យចេះជួយអ្នកឯទៀត។ បើអ្នកខ្មាសអៀន ការជួយធ្វើកិច្ចការនៅមហាសន្និបាតគឺជាវិធីដ៏ល្អដែលជួយអ្នកឲ្យស្គាល់បងប្អូនផ្សេងទៀត។ ប្អូនស្រីម្នាក់បានស្រដីថា៖ «ក្រៅពីក្រុមគ្រួសារ និងមិត្តភក្ដិតែប៉ុន្មាននាក់ ខ្ញុំមិនស្គាល់អ្នកណាច្រើនទៀតនៅទីនោះទេ។ តែពេលដែលខ្ញុំទៅជួយសម្អាត ខ្ញុំបានស្គាល់បងប្អូនច្រើននាក់។ ខ្ញុំសប្បាយចិត្តខ្លាំងណាស់!»។ ដូច្នេះការបើកចិត្តឲ្យទូលាយដើម្បីមានមិត្តភក្ដិថែមទៀតដោយជួយធ្វើកិច្ចការនៅឯមហាសន្និបាតនឹងនាំឲ្យយើងមានអំណរក្រៃលែង។ (២កូ. ៦:១២, ១៣) បើអ្នកមិនធ្លាប់ស្ម័គ្រចិត្តធ្វើកិច្ចការនៅមហាសន្និបាតទេ សូមសួរពួកអ្នកចាស់ទុំឲ្យដឹងថាអ្នកត្រូវបំពេញតម្រូវការអ្វីដើម្បីអាចចូលរួមបាន។
៩. តើយើងនឹងអញ្ជើញអ្នកឯទៀតឲ្យចូលរួមមហាសន្និបាតយ៉ាងដូចម្ដេច?
៩ អញ្ជើញអ្នកឯទៀតឲ្យស្ដាប់សេចក្ដីពិត: នៅឆ្នាំមុនៗ បីសប្ដាហ៍មុនពេលមហាសន្និបាតចាប់ផ្ដើម យើងនឹងរួមចំណែកក្នុងសកម្មភាពពិសេសដើម្បីអញ្ជើញអ្នកឯទៀតឲ្យចូលរួមមហាសន្និបាត។ ក្រុមជំនុំចង់ចែកលិខិតអញ្ជើញក្នុងតំបន់ផ្សាយឲ្យបានច្រើនបំផុត។ (សូមមើលប្រអប់ «តើយើងនឹងចែកលិខិតអញ្ជើញយ៉ាងដូចម្ដេច?») លិខិតអញ្ជើញដែលនៅសល់គួរយកមកមហាសន្និបាត ដើម្បីបងប្អូនអាចប្រើលិខិតនោះនៅពេលផ្សព្វផ្សាយក្រៅផ្លូវការក្នុងក្រុងដែលមានមហាសន្និបាត។
១០. សូមប្រាប់បទពិសោធន៍ដែលបញ្ជាក់ថា យើងទទួលលទ្ធផលដែលមកពីការចែកលិខិតអញ្ជើញក្នុងសកម្មភាពពិសេសប្រចាំឆ្នាំ។
១០ តើអ្នកឯទៀតនឹងឆ្លើយតបយ៉ាងណាចំពោះសកម្មភាពពិសេសប្រចាំឆ្នាំនេះ? នៅមហាសន្និបាតមួយ ឆ្មាំម្នាក់បានជួយប្ដីប្រពន្ធមួយគូឲ្យរកកន្លែងអង្គុយ។ ពួកគេបានប្រាប់ឆ្មាំថា ពួកគេបានទទួលលិខិតអញ្ជើញហើយ«គិតថានោះគួរឲ្យចាប់អារម្មណ៍»។ ដូច្នេះពួកគេបានបើកឡានជាង៣២០គីឡូម៉ែត្រដើម្បីមកចូលរួម! មានករណីមួយទៀត បងស្រីម្នាក់កំពុងផ្សាយពីផ្ទះមួយទៅផ្ទះមួយ ហើយបានជូនលិខិតអញ្ជើញដល់បុរសម្នាក់ដែលហាក់ដូចជាចង់ដឹងអំពីមហាសន្និបាត។ ដូច្នេះ បងស្រីបានចំណាយពេលពិគ្រោះជាមួយគាត់អំពីលិខិតអញ្ជើញនោះ។ ពីរបីថ្ងៃក្រោយមកកាលដែលបងស្រីកំពុងចូលរួមមហាសន្និបាត បងស្រីបានជួបបុរសនោះដែលមកជាមួយមិត្តភក្ដិគាត់ ហើយពួកគាត់ក៏បានយកសៀវភៅម្នាក់មួយដែលទើបនឹងចេញនៅមហាសន្និបាត!
១១. ហេតុអ្វីការចូលរួមមហាសន្និបាតប្រចាំតំបន់ដែលមានជារៀងរាល់ឆ្នាំជាអ្វីដែលសំខាន់?
១១ ព្រះយេហូវ៉ាបង្ហាញក្ដីស្រឡាញ់ដល់បណ្ដាជនអ៊ីស្រាអែលដោយរៀបចំឲ្យមានបុណ្យជាទៀងទាត់ ដើម្បីឲ្យ‹គោរពប្រតិបត្ដិដល់លោកដោយចិត្តស្មោះត្រង់ ហើយពិតប្រាកដ›។ (យ៉ូស. ២៤:១៤) ស្រដៀងគ្នាដែរ ការដែលយើងចូលរួមមហាសន្និបាតប្រចាំតំបន់ដែលមានជារៀងរាល់ឆ្នាំជួយយើងឲ្យ«កាន់ខ្ជាប់តាមសេចក្ដីពិត» ហើយនេះជាផ្នែកដ៏សំខាន់មួយនៃការគោរពប្រណិប័តន៍ព្រះ។ (៣យ៉ូន. ៣) សូមឲ្យព្រះយេហូវ៉ាផ្ដល់ពរដល់ការខំប្រឹងរបស់បងប្អូនដែលស្រឡាញ់សេចក្ដីពិតក្នុងការរៀបចំដើម្បីទៅនិងទទួលប្រយោជន៍យ៉ាងពេញលេញពីកម្មវិធីមហាសន្និបាត!
[ឃ្លាអក្សរធំនៅទំព័រ៤]
ការប្រព្រឹត្តល្អរបស់យើងក្នុងក្រុងដែលមានមហាសន្និបាតធ្វើឲ្យសេចក្ដីពិតមានលម្អ
[ឃ្លាអក្សរធំនៅទំព័រ៥]
យើងនឹងចែកលិខិតអញ្ជើញបីសប្ដាហ៍មុនពេលមហាសន្និបាតចាប់ផ្ដើម ហើយយើងនឹងចូលរួមសកម្មភាពពិសេសដើម្បីអញ្ជើញអ្នកឯទៀត
[ប្រអប់នៅទំព័រ៣]
សេចក្ដីរំលឹកអំពីមហាសន្និបាតប្រចាំតំបន់ឆ្នាំ២០១២
◼ កម្មវិធី: កម្មវិធីទាំងបីថ្ងៃនឹងចាប់ផ្ដើមនៅម៉ោង៨:២០ព្រឹក។ ទ្វារនឹងបើកនៅម៉ោង៧:០០ព្រឹក។ ពេលបទភ្លេងសម្រាប់បើកកម្មវិធីបានត្រូវប្រកាស យើងទាំងអស់គ្នាគួរតែទៅកន្លែងអង្គុយរៀងខ្លួន ដើម្បីឲ្យកម្មវិធីចាប់ផ្ដើមដោយថ្លៃថ្នូរ។ នៅថ្ងៃសុក្រនិងថ្ងៃសៅរ៍កម្មវិធីនឹងចប់នៅម៉ោង៣:៥៥ល្ងាច ហើយថ្ងៃអាទិត្យនឹងចប់នៅម៉ោង២:៤០រសៀល។
◼ ការទុកកន្លែងអង្គុយ: យើងអាចទុកកន្លែងអង្គុយសម្រាប់តែអ្នកដែលរស់នៅផ្ទះរបស់យើង ឬអ្នកធ្វើដំណើរតាមយានជំនិះរបស់យើង ឬអ្នកដែលកំពុងរៀនគម្ពីរជាមួយនឹងយើង។—១កូ. ១៣:៥
◼ អាហារថ្ងៃត្រង់: សូមយកម្ហូបអាហារពេលថ្ងៃត្រង់ទៅជាមួយ ជាជាងចេញពីកន្លែងមហាសន្និបាតទៅទិញអាហារខាងក្រៅនៅពេលឈប់សម្រាកថ្ងៃត្រង់។ អ្នកអាចយកធុងទឹកកកតូចមួយដែលអាចដាក់ក្រោមកៅអីបាន។ ធុងទឹកកកធំៗនិងវត្ថុដែលធ្វើពីកែវបានត្រូវហាមយកចូលក្នុងកន្លែងមហាសន្និបាត។
◼ វិភាគទាន: នៅឯមហាសន្និបាត យើងអាចបង្ហាញថាយើងមានចិត្តកតញ្ញូចំពោះការរៀបចំមហាសន្និបាត ដោយធ្វើវិភាគទានស្ម័គ្រពីចិត្តដើម្បីគាំទ្រកិច្ចការទូទាំងពិភពលោក។
◼ គ្រោះថ្នាក់និងការសង្គ្រោះបន្ទាន់: បើអ្នកឃើញថាមានគ្រោះថ្នាក់នៅកន្លែងមហាសន្និបាត សូមប្រាប់បងប្រុសជាឆ្មាំដែលនៅជិតនោះ ហើយគាត់នឹងផ្ដល់ដំណឹងដល់ផ្នែកខាងសង្គ្រោះបន្ទាន់ភ្លាម ដើម្បីឲ្យបុគ្គលិកខាងសង្គ្រោះបន្ទាន់របស់យើងអាចវិភាគមើលថា ស្ថានភាពនោះធ្ងន់ធ្ងរយ៉ាងណា រួចអាចផ្ដល់ជំនួយ។ បើករណីចាំបាច់ឆ្មាំត្រូវហៅឡានពេទ្យ ជៀសវាងមិនឲ្យមានការរំខានដោយសារទូរស័ព្ទចូលច្រើនពេកទៅផ្នែកសង្គ្រោះបន្ទាន់។
◼ ឱសថ: បើអ្នកត្រូវការឱសថដែលគ្រូពេទ្យបញ្ជា សូមកុំភ្លេចយកមកជាមួយនឹងអ្នកឲ្យបានគ្រប់គ្រាន់ ពីព្រោះគ្មានឱសថនោះនៅមហាសន្និបាតទេ។ ចំពោះអ្នកដែលមានជំងឺទឹកនោមផ្អែម ក្រោយពេលចាក់ថ្នាំហើយ សូមបោះចោលសារាំងចាក់ថ្នាំក្នុងធុងសម្រាមពិសេសសម្រាប់អ្នកជំងឺ មិនមែនធុងសម្រាមទូទៅទេ។
◼ ស្បែកជើង: រៀងរាល់ឆ្នាំ មានមនុស្សមួយចំនួនរបួសដោយសារគ្រោះថ្នាក់ទាក់ទងនឹងស្បែកជើង។ ជាការល្អបំផុត បើជ្រើសរើសពាក់ស្បែកជើងសមរម្យ ហើយល្មមនឹងជើងដែលស្រួលដើរ ស្រួលឡើងចុះជណ្ដើរ និងនៅកន្លែងឥដ្ឋក្រឡាដែលមានប្រហោងតូចៗជាដើម។
◼ សម្រាប់មនុស្សអន់ត្រចៀក: កម្មវិធីនឹងត្រូវចាក់ផ្សាយតាមប៉ុស្តិ៍វិទ្យុFM។ ដើម្បីអាចស្ដាប់បាន អ្នកត្រូវការកូនវិទ្យុប្រើថ្មនិងកាសសម្រាប់ស្ដាប់។
◼ រទេះកូនក្មេងនិងប៉ៅអ៊ី: រទេះកូនក្មេងនិងប៉ៅអ៊ីមិនគួរយកទៅសាលមហាសន្និបាតទេ។ ក៏ប៉ុន្តែ កៅអីពិសេសសម្រាប់កូនក្មេងដែលអាចចងភ្ជាប់ជាមួយនឹងកៅអីដែលនៅក្បែរឪពុកម្ដាយអាចប្រើបាន។
◼ ទឹកអប់: មហាសន្និបាតភាគច្រើនត្រូវធ្វើឡើងនៅកន្លែងបិទជិតដែលមានម៉ាស៊ីនស្រូបខ្យល់ចេញចូល។ ដូច្នេះ បើយើងប្រើទឹកអប់ដែលមានក្លិនខ្លាំង យើងអាចបង្ហាញសេចក្ដីស្រឡាញ់ដោយប្រើទឹកអប់តែបន្ដិចបន្តួចប៉ុណ្ណោះ។ នោះដោយសារទឹកអប់ដែលមានក្លិនខ្លាំងអាចបណ្ដាលឲ្យមានប្រតិកម្មដល់អ្នកដែលមានបញ្ហាខាងផ្លូវដង្ហើមឬបញ្ហាផ្សេងទៀតដែលពាក់ព័ន្ធនឹងនេះ។—១កូ. ១០:២៤
◼ ក្រដាសសូមរកជួប (S-43): យើងគួរប្រើក្រដាសសូមរកជួប ដើម្បីផ្ដល់ព័ត៌មានស្តីអំពីអ្នកដែលបានបង្ហាញចំណាប់អារម្មណ៍ដោយសារយើងបានផ្សព្វផ្សាយក្រៅផ្លូវការក្នុងអំឡុងពេលមានមហាសន្និបាត។ អ្នកផ្សាយគួរយកក្រដាសសូមរកជួបនេះមួយឬពីរសន្លឹកមកជាមួយនៅឯមហាសន្និបាត។ ក្រដាសសូមរកជួបដែលបានបំពេញរួចហើយ អាចជូនដល់អ្នកទទួលខុសត្រូវខាងសៀវភៅនៅមហាសន្និបាត ឬដល់លេខាធិការនៃក្រុមជំនុំរបស់អ្នក ពេលត្រឡប់ទៅក្រុមជំនុំវិញក៏បាន (សូមមើលកិច្ចបម្រើព្រះ ខែឧសភា ឆ្នាំ២០១១ ទំព័រ៣)។
◼ នៅភោជនីយដ្ឋាន: ចូរលើកតម្កើងនាមរបស់ព្រះយេហូវ៉ា ដោយការប្រព្រឹត្តល្អនៅឯភោជនីយដ្ឋាន។ សូមទុកលុយទឹកតែ បើជាទម្លាប់នៅក្នុងតំបន់របស់អ្នក។
◼ សណ្ឋាគារ:
(១) សូមកុំកក់ចំនួនបន្ទប់លើសពីសេចក្ដីត្រូវការរបស់អ្នក ហើយកុំឲ្យចំនួនអ្នកស្នាក់នៅក្នុងបន្ទប់លើសចំនួនដែលសណ្ឋាគារបានអនុញ្ញាត។
(២) បើគ្មានហេតុការណ៍អាសន្នទេ សូមកុំលុបការកក់បន្ទប់ចោលឡើយ ហើយសូមជូនដំណឹងដល់សណ្ឋាគារភ្លាមៗ កាលណាអ្នកដឹងថា អ្នកត្រូវលុបចោល។—ម៉ាថ. ៥:៣៧
(៣) បើអ្នកពេលប្រើប័ណ្ណឥណទានឬប័ណ្ណឥណពន្ធពេលចុះឈ្មោះនៅសណ្ឋាគារ សូមប្រាកដថាក្នុងគណនីរបស់អ្នកមានទឹកប្រាក់គ្រប់គ្រាន់ ពីព្រោះជាធម្មតាពេលចុះឈ្មោះ សណ្ឋាគារនឹងដកសាច់ប្រាក់របស់អ្នកតម្កល់ទុកគ្រប់ចំនួននៃតម្លៃបន្ទប់និងសេវាផ្សេងៗពេលដែលអ្នកស្នាក់នៅ។ អ្នកមិនអាចប្រើសាច់ប្រាក់ក្នុងគណនីរបស់អ្នករហូតដល់ពីរបីថ្ងៃក្រោយពេលដែលសណ្ឋាគារទូទាត់រួច។
(៤) សូមយករទេះដាក់អីវ៉ាន់ នៅពេលដែលអ្នករៀបចំអីវ៉ាន់រួចហើយតែប៉ុណ្ណោះ ហើយទុករទេះនោះវិញភ្លាមៗដើម្បីឲ្យអ្នកឯទៀតអាចប្រើបាន។
(៥) សូមឲ្យលុយទឹកតែដល់អ្នកធ្វើការនៅសណ្ឋាគារ កាលណាគេជួយយួរអីវ៉ាន់អ្នក ហើយទុកលុយទឹកតែឲ្យអ្នកបោសសម្អាតបន្ទប់រាល់ថ្ងៃ។
(៦) កុំចម្អិនអាហារក្នុងបន្ទប់បើវិន័យសណ្ឋាគារមិនអនុញ្ញាត។
(៧) យើងមិនគួរយកច្រើនហួសហេតុពេកនូវរបស់ដែលសណ្ឋាគារឲ្យដោយឥតគិតថ្លៃ ដូចជាអាហារពេលព្រឹក កាហ្វេ ឬទឹកកកសម្រាប់ភ្ញៀវក្នុងពេលដែលស្នាក់នៅសណ្ឋាគារនោះឡើយ។
(៨) សូមបង្ហាញផលដែលបង្កើតដោយសកម្មពលរបស់ព្រះរាល់ពេលដែលយើងទាក់ទងនឹងបុគ្គលិកសណ្ឋាគារ។ ពួកគេត្រូវថែរក្សាភ្ញៀវជាច្រើន ដូច្នេះពួកគេនឹងមានចិត្តដឹងគុណចំពោះចិត្តសប្បុរស ចិត្តអត់ធ្មត់ និងគំនិតសមហេតុផលរបស់យើង។
(៩) ពេលស្នាក់នៅសណ្ឋាគារ ឪពុកម្ដាយគួរមើលកូនឲ្យបានគ្រប់ពេល ហើយនេះរួមបញ្ចូលពេលនៅអាងហែលទឹក បន្ទប់ទទួលភ្ញៀវ បន្ទប់ហាត់ប្រាណជាដើម។
(១០) តម្លៃដែលបង្ហាញក្នុងបញ្ជីណែនាំអំពីកន្លែងស្នាក់នៅ (Recommended Lodging List) គឺជាតម្លៃពេញសម្រាប់ស្នាក់នៅមួយថ្ងៃ ប៉ុន្តែមិនរួមបញ្ចូលតម្លៃពន្ធនោះទេ។ បើគេគិតថ្លៃលើសតម្លៃ ឬគេគិតតម្លៃអ្វីដែលអ្នកមិនបានសុំឬប្រើ សូមកុំបង់ថ្លៃទាំងនោះ ហើយប្រាប់បងប្អូនដែលទទួលខុសត្រូវខាងចាត់ចែងបន្ទប់ នៅឯមហាសន្និបាតភ្លាមៗ។
(១១) បើអ្នកមានបញ្ហាដែលទាក់ទងនឹងបន្ទប់នៅសណ្ឋាគារ សូមទាក់ទងបងប្អូនដែលទទួលខុសត្រូវខាងចាត់ចែងបន្ទប់ ក្នុងអំឡុងពេលមហាសន្និបាតដើម្បីពួកគាត់អាចជួយអ្នកបាន។
◼ កិច្ចបម្រើស្ម័គ្រចិត្ត: អ្នកដែលមានបំណងចង់ជួយកិច្ចការនេះ សូមប្រាប់បងប្អូនដែលទទួលខុសត្រូវខាងផ្នែកកិច្ចបម្រើស្ម័គ្រចិត្តនៅឯមហាសន្និបាត។ កូនក្មេងដែលមានអាយុក្រោម១៦ឆ្នាំអាចជួយធ្វើកិច្ចការនេះបានបើមានឪពុកម្ដាយ ឬអាណាព្យាបាលជួយមើលការខុសត្រូវ ឬមនុស្សពេញវ័យណាម្នាក់ដែលឪពុកម្ដាយ ឬអាណាព្យាបាលបានអនុញ្ញាតឲ្យជួយមើលការខុសត្រូវ។
[ប្រអប់នៅទំព័រ៦]
តើយើងនឹងចែកលិខិតអញ្ជើញយ៉ាងដូចម្ដេច?
ដើម្បីចែកឲ្យពេញតំបន់ផ្សាយរបស់យើង យើងគួរនិយាយយ៉ាងខ្លី។ យើងប្រហែលជានិយាយថា «ជម្រាបសួរ។ យើងកំពុងរួមចំណែកក្នុងការចែកលិខិតអញ្ជើញទូទាំងពិភពលោក។ សូមជូនមួយសន្លឹក។ ព័ត៌មានថែមទៀតមាននៅក្នុងលិខិតអញ្ជើញនេះ»។ ចូរបង្ហាញចិត្តរំភើប។ ពេលរួមចំណែកក្នុងការចែកលិខិតអញ្ជើញនៅចុងសប្ដាហ៍ អ្នកក៏គួរចែកទស្សនាវដ្ដីដែរ បើឃើញថាជាការគួរ។