ការប្រព្រឹត្តដែលលើកតម្កើងព្រះ
១. ពេលយើងចូលរួមមហាសន្និបាតប្រចាំតំបន់ ហេតុអ្វីមនុស្សងាយកត់សម្គាល់ឃើញយើង?
១ ពេលយើងចូលរួមមហាសន្និបាតប្រចាំតំបន់ មនុស្សងាយកត់សម្គាល់ឃើញយើង។ នៅក្រុងជាច្រើនដែលមានមហាសន្និបាត ប្រព័ន្ធផ្សាយព័ត៌មានក្នុងស្រុកប្រាប់មនុស្សនៅតំបន់នោះអំពីវត្តមានរបស់សាក្សីព្រះយេហូវ៉ា។ នៅតាមសណ្ឋាគារនិងភោជនីយដ្ឋានច្រើនតែពេញទៅដោយអ្នកដែលមកចូលរួមមហាសន្និបាត។ មនុស្សនៅតំបន់នោះកត់សម្គាល់ឃើញថា ភ្ញៀវជាច្រើនមានពាក់នាមប័ណ្ណមហាសន្និបាត។ សេចក្ដីរំលឹកខ្លះៗដែលមាននៅខាងក្រោមនេះនឹងជួយយើងឲ្យលើកតម្កើងព្រះ តាមរយៈការប្រព្រឹត្តរបស់យើងពេលនៅក្នុងក្រុងដែលមានមហាសន្និបាត។—១ពេ. ២:១២
២. ពេលយើងនៅក្នុងក្រុងដែលមានមហាសន្និបាត តើយើងអាចលើកតម្កើងព្រះដោយស្លៀកពាក់សមរម្យយ៉ាងដូចម្ដេច?
២ ស្លៀកពាក់សមរម្យ: ពេលចូលរួមមហាសន្និបាត អ្នកមើលច្រើនតែកោតស្ងើចនឹងការស្លៀកពាក់សមរម្យរបស់យើង។ ប៉ុន្តែ របៀបយើងស្លៀកពាក់នៅកន្លែងផ្សេងទៀត ដូចជាពេលចុះឈ្មោះស្នាក់នៅសណ្ឋាគារ ពេលបរិភោគអាហារនៅភោជនីយដ្ឋាន និងពេលទៅផ្សារជាដើម ប្រហែលជាធ្វើឲ្យអ្នកមើលកោតស្ងើចខ្លាំងជាងនោះទៅទៀត។ ទោះជាយើងមិនចាំបាច់ស្លៀកពាក់ដូចទៅកិច្ចប្រជុំក្ដី តែយើងគួរស្លៀកពាក់សមរម្យ ថ្លៃថ្នូរ ហើយមិនសាមញ្ញជ្រុលពេកទេ។ ដូច្នេះអ្នកមើលគួរឆាប់ឃើញភាពខុសគ្នារវាងយើងនិងអ្នកដែលមិនមែនជាសាក្សី។ (រ៉ូម ១២:២) បន្ថែមទៅទៀត យើងគួរពាក់នាមប័ណ្ណមហាសន្និបាត ព្រោះនេះនឹងជួយគេឲ្យដឹងថាយើងមានមហាសន្និបាត ដែលបើកឱកាសឲ្យយើងផ្សព្វផ្សាយ ហើយក៏អាចធ្វើឲ្យអ្នកចូលរួមផ្សេងទៀតឃើញយើងដែរ។
៣. តើយើងអាចបង្ហាញចិត្តអត់ធ្មត់និងសុជីវធម៌យ៉ាងដូចម្ដេច?
៣ ចេះអត់ធ្មត់និងមានសុជីវធម៌: ក្នុងពិភពលោកសព្វថ្ងៃនេះ មនុស្សច្រើនតែគិតពីខ្លួនឯង ហើយរមិលគុណ។ ដូច្នេះការមានចិត្តអត់ធ្មត់និងមានសុជីវធម៌របស់យើងពិតជាផ្ដល់កម្លាំងចិត្តដល់អ្នកដែលមើលយើង ដូចជាបុគ្គលិកនៅសណ្ឋាគារនិងភោជនីយដ្ឋានជាដើម។ (២ធី. ៣:១-៥) ពេលយើងទុកកន្លែងអង្គុយ ឬពេលតម្រង់ជួរដើម្បីទទួលសៀវភៅដែលចេញថ្មីនៅមហាសន្និបាត យើងគួរចេះគិតអំពីប្រយោជន៍អ្នកឯទៀត មិនមែនប្រយោជន៍ខ្លួនយើងទេ។ (១កូ. ១០:២៣, ២៤) បុរសដែលមានចំណាប់អារម្មណ៍ម្នាក់ ក្រោយពីគាត់បានចូលរួមជាលើកទី១នៅមហាសន្និបាត គាត់បានប្រាប់ថា៖ «ខ្ញុំមិនបានចាំព័ត៌មានក្នុងសុន្ទរកថាណាមួយសោះនៅថ្ងៃនោះ ប៉ុន្តែអ្វីដែលធ្វើឲ្យខ្ញុំកោតស្ងើចហើយចាំមិនភ្លេច គឺការប្រព្រឹត្តរបស់សាក្សីព្រះយេហូវ៉ា»។
៤. បើកាលៈទេសៈយើងអនុញ្ញាត ហេតុអ្វីយើងគួរគិតអំពីការស្ម័គ្រចិត្តជួយនៅមហាសន្និបាត?
៤ ស្ម័គ្រចិត្តជួយ: ការស្ម័គ្រចិត្តជួយជាសញ្ញាសម្គាល់នៃគ្រិស្តសាសនិកពិត។ (ទំនុក. ១១០:៣) តើអ្នកអាចស្ម័គ្រចិត្តជួយនៅមហាសន្និបាតបានទេ? នៅកន្លែងមហាសន្និបាតមួយ មានបងប្អូនជិត៦០០នាក់បានស្ម័គ្រចិត្តជួយសម្អាតមុនមានមហាសន្និបាត។ បុគ្គលិកនៅទីនោះបានប្រាប់ថា៖ «យើងមិនធ្លាប់ឃើញអ្វីដ៏អស្ចារ្យដូចនេះពីមុនមកទេ! យើងពិបាកស្រមៃគិតថា ពួកគេទាំងអស់នោះជួយដោយស្ម័គ្រចិត្ត»។ យើងទន្ទឹងចាំយ៉ាងខ្លាំងដើម្បីចូលរួមមហាសន្និបាតប្រចាំតំបន់ឆ្នាំ២០១៣ ហើយនោះមិនគ្រាន់តែជាឱកាសដែលយើងស្ដាប់ហើយរៀនពីព្រះប៉ុណ្ណោះទេ តែក៏ដើម្បីលើកតម្កើងលោកដែរ។
[ប្រអប់នៅទំព័រ៦]
សេចក្ដីរំលឹកអំពីមហាសន្និបាតប្រចាំតំបន់ឆ្នាំ២០១៣
◼ កម្មវិធី: កម្មវិធីទាំងបីថ្ងៃនឹងចាប់ផ្ដើមនៅម៉ោង៨:២០ព្រឹក។ ទ្វារនឹងបើកនៅម៉ោង៧:០០ព្រឹក។ ពេលបទភ្លេងសម្រាប់បើកកម្មវិធីបានត្រូវប្រកាស យើងទាំងអស់គ្នាគួរតែទៅកន្លែងអង្គុយរៀងខ្លួន ដើម្បីឲ្យកម្មវិធីចាប់ផ្ដើមដោយថ្លៃថ្នូរ។ នៅថ្ងៃសុក្រនិងថ្ងៃសៅរ៍កម្មវិធីនឹងចប់នៅម៉ោង៣:៥០ ហើយថ្ងៃអាទិត្យនឹងចប់នៅម៉ោង២:៣៥។
◼ ការទុកកន្លែងអង្គុយ: យើងអាចទុកកន្លែងអង្គុយសម្រាប់តែអ្នកដែលរស់នៅផ្ទះរបស់យើង ឬអ្នកធ្វើដំណើរតាមយានជំនិះរបស់យើង ឬអ្នកដែលកំពុងរៀនគម្ពីរជាមួយនឹងយើងប៉ុណ្ណោះ។ កន្លែងអង្គុយសម្រាប់បងប្អូនវ័យចាស់និងបងប្អូនដែលឈឺមានកំណត់ ដូច្នេះប្រហែលមិនអាចឲ្យសមាជិកទាំងអស់ក្នុងក្រុមគ្រួសារអង្គុយជាមួយគាត់បានទេ។ សូមទុកកន្លែងអង្គុយទាំងនោះសម្រាប់បងប្អូនវ័យចាស់និងបងប្អូនដែលឈឺ ព្រមទាំងអ្នកដែលជួយពួកគាត់។—១កូ. ១៣:៥
◼ អាហារថ្ងៃត្រង់: សូមយកម្ហូបអាហារពេលថ្ងៃត្រង់ទៅជាមួយ ជាជាងចេញពីកន្លែងមហាសន្និបាតទៅទិញអាហារខាងក្រៅនៅពេលឈប់សម្រាកថ្ងៃត្រង់។ អ្នកអាចយកធុងទឹកកកតូចមួយដែលអាចដាក់ក្រោមកៅអីបាន។ ធុងទឹកកកធំៗនិងវត្ថុដែលធ្វើពីកែវបានត្រូវហាមយកចូលក្នុងកន្លែងមហាសន្និបាត។
◼ វិភាគទាន: នៅឯមហាសន្និបាត យើងអាចបង្ហាញថាយើងមានចិត្តកតញ្ញូចំពោះការរៀបចំមហាសន្និបាត ដោយធ្វើវិភាគទានស្ម័គ្រពីចិត្តដើម្បីគាំទ្រកិច្ចការទូទាំងពិភពលោក។ មូលប្បទានប័ត្រគួរសរសេរថាបង់ឲ្យ«ក្រុមជំនុំគ្រិស្តសាសនិករបស់សាក្សីព្រះយេហូវ៉ា» ហើយវិភាគទានក៏អាចឲ្យតាមរយៈប័ណ្ណឥណទានឬប័ណ្ណឥណពន្ធដែរ។
◼ ឱសថ: បើអ្នកត្រូវការឱសថដែលគ្រូពេទ្យបញ្ជា សូមកុំភ្លេចយកមកជាមួយនឹងអ្នកឲ្យបានគ្រប់គ្រាន់ ពីព្រោះគ្មានឱសថនោះនៅមហាសន្និបាតទេ។ ចំពោះអ្នកដែលមានជំងឺទឹកនោមផ្អែម ក្រោយពេលចាក់ថ្នាំហើយ សូមបោះចោលម្ជុលចាក់ថ្នាំក្នុងធុងសំរាមពិសេសសម្រាប់របស់របរបែបនេះ មិនមែនធុងសំរាមទូទៅនៅកន្លែងមហាសន្និបាតឬសណ្ឋាគារទេ។
◼ ស្បែកជើង: រៀងរាល់ឆ្នាំ មានមនុស្សមួយចំនួនរបួសដោយសារគ្រោះថ្នាក់ទាក់ទងនឹងស្បែកជើង ជាពិសេសស្បែកជើងមានកែងខ្ពស់។ ជាការល្អបំផុត បើជ្រើសរើសពាក់ស្បែកជើងសមរម្យ ហើយល្មមនឹងជើងដែលស្រួលដើរ ស្រួលឡើងចុះជណ្ដើរ និងនៅកន្លែងឥដ្ឋក្រឡាដែលមានប្រហោងតូចៗជាដើម។
◼ សម្រាប់មនុស្សអន់ត្រចៀក: កម្មវិធីនឹងត្រូវចាក់ផ្សាយតាមប៉ុស្តិ៍វិទ្យុFM។ ដើម្បីអាចស្ដាប់បាន អ្នកត្រូវការកូនវិទ្យុប្រើថ្មនិងកាសសម្រាប់ស្ដាប់។
◼ រទេះកូនក្មេងនិងប៉ៅអ៊ី: រទេះកូនក្មេងនិងប៉ៅអ៊ីមិនគួរយកទៅសាលមហាសន្និបាតទេ។ ក៏ប៉ុន្តែ កៅអីពិសេសសម្រាប់កូនក្មេងដែលអាចចងភ្ជាប់ជាមួយនឹងកៅអីដែលនៅក្បែរឪពុកម្ដាយអាចប្រើបាន។
◼ ទឹកអប់: មហាសន្និបាតភាគច្រើនត្រូវធ្វើឡើងនៅកន្លែងបិទជិតដែលមានម៉ាស៊ីនស្រូបខ្យល់ចេញចូល។ ដូច្នេះ បើយើងប្រើទឹកអប់ដែលមានក្លិនខ្លាំង យើងអាចបង្ហាញសេចក្ដីស្រឡាញ់ដោយប្រើទឹកអប់តែបន្ដិចបន្តួចប៉ុណ្ណោះ។ នោះដោយសារទឹកអប់ដែលមានក្លិនខ្លាំងអាចបណ្ដាលឲ្យមានប្រតិកម្មដល់អ្នកដែលមានបញ្ហាខាងផ្លូវដង្ហើមឬបញ្ហាផ្សេងទៀតដែលពាក់ព័ន្ធនឹងនេះ។—១កូ. ១០:២៤
◼ ក្រដាសសូមរកជួប (S-43): យើងគួរប្រើក្រដាសសូមរកជួប ដើម្បីផ្ដល់ព័ត៌មានស្តីអំពីអ្នកដែលបានបង្ហាញចំណាប់អារម្មណ៍ដោយសារយើងបានផ្សព្វផ្សាយក្រៅផ្លូវការក្នុងអំឡុងពេលមានមហាសន្និបាត។ ក្រដាសសូមរកជួបដែលបានបំពេញរួចហើយ អាចជូនដល់អ្នកទទួលខុសត្រូវខាងសៀវភៅនៅមហាសន្និបាត ឬដល់លេខាធិការនៃក្រុមជំនុំរបស់អ្នក ពេលអ្នកត្រឡប់ទៅផ្ទះវិញ។
◼ នៅភោជនីយដ្ឋាន: ចូរលើកតម្កើងនាមរបស់ព្រះយេហូវ៉ា ដោយការប្រព្រឹត្តល្អនៅឯភោជនីយដ្ឋាន។ សូមស្លៀកពាក់សមជាអ្នកបម្រើព្រះ។ សូមទុកលុយទឹកតែ បើជាទម្លាប់នៅក្នុងតំបន់របស់អ្នក។
◼ សណ្ឋាគារ:
(១) សូមកុំកក់ចំនួនបន្ទប់លើសពីសេចក្ដីត្រូវការរបស់អ្នក ហើយកុំឲ្យចំនួនអ្នកស្នាក់នៅក្នុងបន្ទប់លើសចំនួនដែលសណ្ឋាគារបានអនុញ្ញាត។
(២) បើគ្មានហេតុការណ៍អាសន្នទេ សូមកុំលុបការកក់បន្ទប់ចោលឡើយ ហើយសូមជូនដំណឹងដល់សណ្ឋាគារភ្លាមៗដើម្បីឲ្យអ្នកឯទៀតអាចកក់បន្ទប់នោះ។ (ម៉ាថ. ៥:៣៧) បើអ្នកត្រូវលុបចោលការកក់បន្ទប់ សូមប្រាកដថាអ្នកបានសុំលេខសម្រាប់លុបចោលការកក់បន្ទប់។ បើអ្នកលុបចោលការកក់បន្ទប់ តិចជាង៤៨ម៉ោងមុនត្រូវចូលស្នាក់នៅ លុយកក់របស់អ្នកមិនអាចទទួលវិញបានទេ។
(៣) បើអ្នកប្រើប័ណ្ណឥណទានឬប័ណ្ណឥណពន្ធពេលចុះឈ្មោះនៅសណ្ឋាគារ សូមប្រាកដថាក្នុងគណនីរបស់អ្នកមានទឹកប្រាក់គ្រប់គ្រាន់ ពីព្រោះជាធម្មតាពេលចុះឈ្មោះ សណ្ឋាគារនឹង«ដក»សាច់ប្រាក់ពីក្នុងគណនីរបស់អ្នកដើម្បីតម្កល់ទុកគ្រប់ចំនួននៃតម្លៃបន្ទប់និងសេវាផ្សេងៗពេលដែលអ្នកស្នាក់នៅ។ អ្នកមិនអាចប្រើសាច់ប្រាក់ក្នុងគណនីរបស់អ្នករហូតដល់ពីរបីថ្ងៃក្រោយពេលដែលសណ្ឋាគារទូទាត់រួច។
(៤) សូមយករទេះដាក់អីវ៉ាន់ នៅពេលដែលអ្នករៀបចំអីវ៉ាន់រួចហើយតែប៉ុណ្ណោះ ហើយទុករទេះនោះវិញភ្លាមៗដើម្បីឲ្យអ្នកឯទៀតអាចប្រើបាន។
(៥) បើជាទម្លាប់ក្នុងប្រទេសរបស់អ្នក សូមឲ្យលុយទឹកតែដល់អ្នកធ្វើការនៅសណ្ឋាគារ កាលណាគេជួយយួរអីវ៉ាន់អ្នក ហើយទុកលុយទឹកតែឲ្យអ្នកបោសសម្អាតបន្ទប់រាល់ថ្ងៃ។
(៦) កុំចម្អិនអាហារក្នុងបន្ទប់ បើវិន័យសណ្ឋាគារមិនអនុញ្ញាត។
(៧) យើងមិនគួរយកច្រើនហួសហេតុពេកនូវរបស់ដែលសណ្ឋាគារឲ្យដោយឥតគិតថ្លៃ ដូចជាអាហារពេលព្រឹក កាហ្វេ ឬទឹកកកសម្រាប់ភ្ញៀវក្នុងពេលដែលស្នាក់នៅសណ្ឋាគារនោះឡើយ។
(៨) សូមបង្ហាញផលដែលបង្កើតដោយសកម្មពលរបស់ព្រះរាល់ពេលដែលយើងទាក់ទងនឹងបុគ្គលិកសណ្ឋាគារ។ ពួកគេត្រូវថែរក្សាភ្ញៀវជាច្រើន ដូច្នេះពួកគេនឹងមានចិត្តដឹងគុណចំពោះចិត្តសប្បុរស ចិត្តអត់ធ្មត់ និងគំនិតសមហេតុផលរបស់យើង។
(៩) ពេលស្នាក់នៅសណ្ឋាគារ ឪពុកម្ដាយគួរមើលកូនឲ្យបានគ្រប់ពេល ហើយនេះរួមបញ្ចូលពេលជិះជណ្ដើរយន្ត នៅអាងហែលទឹក បន្ទប់ទទួលភ្ញៀវ និងបន្ទប់ហាត់ប្រាណជាដើម។
១០) តម្លៃដែលបង្ហាញក្នុងបញ្ជីណែនាំអំពីកន្លែងស្នាក់នៅ (Recommended Lodging List) គឺជាតម្លៃពេញសម្រាប់ស្នាក់នៅមួយថ្ងៃ ប៉ុន្តែមិនរួមបញ្ចូលតម្លៃពន្ធនោះទេ។ បើគេគិតថ្លៃលើសតម្លៃ ឬគេគិតតម្លៃអ្វីដែលអ្នកមិនបានសុំឬប្រើ សូមកុំបង់ថ្លៃទាំងនោះ ហើយប្រាប់បងប្អូនដែលទទួលខុសត្រូវខាងចាត់ចែងបន្ទប់ នៅឯមហាសន្និបាតភ្លាមៗ។
(១១) បើអ្នកមានបញ្ហាដែលទាក់ទងនឹងបន្ទប់នៅសណ្ឋាគារ សូមទាក់ទងបងប្អូនដែលទទួលខុសត្រូវខាងចាត់ចែងបន្ទប់ ក្នុងអំឡុងពេលមហាសន្និបាតដើម្បីពួកគាត់អាចជួយអ្នកបាន។
◼ កិច្ចបម្រើស្ម័គ្រចិត្ត: អ្នកដែលមានបំណងចង់ជួយកិច្ចការនេះ សូមប្រាប់បងប្អូនដែលទទួលខុសត្រូវខាងផ្នែកកិច្ចបម្រើស្ម័គ្រចិត្តនៅឯមហាសន្និបាត។ កូនក្មេងដែលមានអាយុក្រោម១៦ឆ្នាំអាចជួយធ្វើកិច្ចការនេះបានបើមានឪពុកម្ដាយ ឬអាណាព្យាបាលជួយមើលការខុសត្រូវ ឬមនុស្សពេញវ័យណាម្នាក់ដែលឪពុកម្ដាយ ឬអាណាព្យាបាលបានអនុញ្ញាតឲ្យជួយមើលការខុសត្រូវ។