«ចូរប្រព្រឹត្តល្អប្រសើរជានិច្ចក្នុងចំណោមមនុស្សខាងពិភពលោកនេះ»
១. ហេតុអ្វីជាការសំខាន់ដែលយើងមានការប្រព្រឹត្តល្អជានិច្ច ក្នុងអំឡុងពេលមហាសន្និបាតខាងមុខនេះ?
១ ជារៀងរាល់ឆ្នាំក្នុងអំឡុងពេលមហាសន្និបាត យើងទាក់ទាញអារម្មណ៍របស់មនុស្សជាច្រើន។ ដូច្នេះ ជាការសំខាន់ដែលការប្រព្រឹត្តរបស់យើងសមជាអ្នកដែលគោរពប្រណិប័តន៍ព្រះ។ (លេវី. ២០:២៦) មនុស្សនឹងឃើញយ៉ាងច្បាស់ថាយើងជាអ្នកកាន់តាមពិតរបស់គ្រិស្ត បើយើងមានសុជីវធម៌ សម្លៀកបំពាក់និងការសម្អិតសម្អាងខ្លួនសមរម្យ។ នៅពេលយើងចូលរួមមហាសន្និបាតតាមភូមិភាគឬមហាសន្និបាតអន្តរជាតិនាពេលខាងមុខនេះ តើតាមរបៀបណាយើងអាច«ប្រព្រឹត្តល្អប្រសើរជានិច្ចក្នុងចំណោមមនុស្សខាងពិភពលោកនេះ»? ហើយតើការប្រព្រឹត្តល្អនោះនាំឲ្យបិតាដែលនៅស្ថានសួគ៌របស់យើងទទួលការសរសើតម្កើងយ៉ាងដូចម្ដេច?—១ពេ. ២:១២
២. ក្នុងអំឡុងពេលមហាសន្និបាត តើយើងមានឱកាសអ្វីខ្លះដើម្បីបង្ហាញបុគ្គលិកលក្ខណៈជាគ្រិស្តសាសនិកពិត?
២ បង្ហាញបុគ្គលិកលក្ខណៈជាគ្រិស្តសាសនិកពិត: សេចក្ដីស្រឡាញ់ដែលយើងបង្ហាញចំពោះគ្នាទៅវិញទៅមកនិងរបៀបដែលយើងប្រព្រឹត្តទៅលើ«អ្នកក្រៅ» គឺមានភាពខុសគ្នាឆ្ងាយពីការប្រព្រឹត្តរបស់មនុស្សជាទូទៅក្នុងពិភពលោកនេះ។ (កូឡ. ៣:១០; ៤:៥; ២ធី. ៣:១-៥) យើងគួរមានចិត្តសប្បុរសនិងចិត្តអត់ធ្មត់ពេលយើងប្រព្រឹត្តទៅលើបុគ្គលិកសណ្ឋាគារនិងភោជនីយដ្ឋាន ទោះបីជាមានបញ្ហាកើតឡើងក៏ដោយ។ បន្ថែមទៀត យើងបង្ហាញសុជីវធម៌ដោយឲ្យលុយទឹកតែដល់បុគ្គលិកដែលជួយយើង បើរឿងនេះជាទម្លាប់ក្នុងតំបន់យើង។
៣. តើមានសេចក្ដីរំលឹកអ្វីដែលឪពុកម្ដាយត្រូវធ្វើ ហើយហេតុអ្វី?
៣ ឪពុកម្ដាយគួរមើលកូនឲ្យបានដិតដល់នៅកន្លែងមហាសន្និបាត ភោជនីយដ្ឋាន និងសណ្ឋាគារ។ (សុភ. ២៩:១៥) អ្នកគ្រប់គ្រងភោជនីយដ្ឋានមួយបាននិយាយទៅកាន់ប្ដីប្រពន្ធមួយគូថា៖ «យើងពិតជាចូលចិត្តអ្នកទាំងអស់គ្នាណាស់។ ក្រុមគ្រួសារនិងកូនៗរបស់អ្នកពិតជាមានសុជីវធម៌មែន។ បុគ្គលិកទាំងអស់បាននិយាយល្អអំពីអ្នក ហើយបើអ្នកទាំងអស់គ្នាអាចស្នាក់នៅទីនេះជារៀងរាល់ចុងសប្ដាហ៍ នោះគឺល្អមែន»។
៤. ពេលយើងស្នាក់នៅទីក្រុងដែលមានមហាសន្និបាត តើយើងគួរគិតអ្វីខ្លះអំពីសម្លៀកបំពាក់របស់យើង?
៤ ស្លៀកពាក់សមរម្យ: ក្នុងអំឡុងពេលមហាសន្និបាត សម្លៀកបំពាក់របស់យើងគួរមានភាពសមរម្យ និងមិនគួរជាម៉ូដហួសហេតុពេកដែលពេញនិយមរបស់ពិភពលោកនេះឡើយ។ (១ធី. ២:៩) ទោះបីនៅពេលយើងចុះឈ្មោះចូលនិងចេញពីសណ្ឋាគារ ហើយនៅពេលយើងសម្រាកលម្ហែកាយមុននិងក្រោយកម្មវិធីមហាសន្និបាតចាប់ផ្ដើមក៏ដោយ យើងមិនចង់ស្លៀកពាក់សាមញ្ញជ្រុលពេកទេ។ ដូច្នេះ បើយើងស្លៀកពាក់សមរម្យ យើងនឹងមានមោទនភាពពាក់នាមប័ណ្ណមហាសន្និបាត ហើយមិនខ្មាសពេលមានឱកាសផ្សព្វផ្សាយទេ។ ក្នុងអំឡុងពេលចូលរួមមហាសន្និបាត សម្លៀកបំពាក់និងការប្រព្រឹត្តរបស់យើងនឹងមិនគ្រាន់តែទាក់ទាញចិត្តរបស់មនុស្សស្មោះត្រង់ឲ្យស្ដាប់ដំណឹងក្នុងគម្ពីរដែលសង្គ្រោះជីវិតប៉ុណ្ណោះទេ តែសម្លៀកបំពាក់និងការប្រព្រឹត្តរបស់យើងនឹងនាំឲ្យព្រះយេហូវ៉ារីករាយ។—សេផ. ៣:១៧
[ប្រអប់នៅទំព័រ២-៦]
សេចក្ដីរំលឹកអំពីមហាសន្និបាតប្រចាំតំបន់ឆ្នាំ២០១៤
◼ កម្មវិធី: កម្មវិធីទាំងបីថ្ងៃនឹងចាប់ផ្ដើមនៅម៉ោង៨:២០ព្រឹក។ ទ្វារនឹងបើកនៅម៉ោង៧:០០ព្រឹក។ ពេលបទភ្លេងសម្រាប់បើកកម្មវិធីបានត្រូវប្រកាស យើងទាំងអស់គ្នាគួរតែទៅកន្លែងអង្គុយរៀងខ្លួន ដើម្បីឲ្យកម្មវិធីចាប់ផ្ដើមដោយថ្លៃថ្នូរ។ នៅថ្ងៃសុក្រនិងថ្ងៃសៅរ៍កម្មវិធីនឹងចប់នៅម៉ោង៣:៥៥ ហើយថ្ងៃអាទិត្យនឹងចប់នៅម៉ោង២:៥០រសៀល។
◼ ការទុកកន្លែងអង្គុយ: នៅព្រឹកនីមួយៗពេលឆ្មាំបើកទ្វារនៅកន្លែងមហាសន្និបាត សូមកុំប្រញាប់ទៅចាប់យកកន្លែងអង្គុយដែលអ្នកចូលចិត្ត ដូចជាចង់ដណ្ដើមជាមួយបងប្អូនឯទៀតនោះឡើយ។ ស្មារតីលះបង់ប្រយោជន៍ខ្លួនគួរជំរុញចិត្តយើងទាំងអស់គ្នាឲ្យចេះគិតពីប្រយោជន៍របស់បងប្អូនឯទៀត ព្រោះនេះជាសញ្ញាសម្គាល់យើងជាគ្រិស្តសាសនិកពិត ហើយនោះជំរុញអ្នកដែលមើលយើងឲ្យសរសើរព្រះ។ (យ៉ូន. ១៣:៣៤, ៣៥; ១កូ. ១៣:៤, ៥; ១ពេ. ២:១២) យើងអាចទុកកន្លែងអង្គុយសម្រាប់តែអ្នកដែលរស់នៅផ្ទះរបស់យើង ឬអ្នកធ្វើដំណើរតាមយានជំនិះរបស់យើង ឬអ្នកដែលកំពុងរៀនគម្ពីរជាមួយនឹងយើងប៉ុណ្ណោះ។ មានកន្លែងអង្គុយពិសេសមួយសម្រាប់បងប្អូនវ័យចាស់និងបងប្អូនដែលឈឺ។ ដោយសារកន្លែងនោះមានកំណត់ សូមទុកកន្លែងអង្គុយទាំងនោះសម្រាប់បងប្អូនវ័យចាស់និងបងប្អូនដែលឈឺ ព្រមទាំងអ្នកដែលជួយពួកគាត់ម្នាក់ឬពីរនាក់។
◼ អាហារថ្ងៃត្រង់: សូមយកម្ហូបអាហារពេលថ្ងៃត្រង់ទៅជាមួយ ជាជាងចេញពីកន្លែងមហាសន្និបាតទៅទិញអាហារខាងក្រៅនៅពេលឈប់សម្រាកថ្ងៃត្រង់។ អ្នកអាចយកធុងទឹកកកតូចមួយដែលអាចដាក់ក្រោមកៅអីបាន។ ធុងទឹកកកធំៗនិងវត្ថុដែលធ្វើពីកែវបានត្រូវហាមយកចូលក្នុងកន្លែងមហាសន្និបាត។
◼ វិភាគទាន: នៅឯមហាសន្និបាត យើងអាចបង្ហាញថាយើងមានចិត្តកតញ្ញូចំពោះការរៀបចំមហាសន្និបាត ដោយធ្វើវិភាគទានស្ម័គ្រពីចិត្តដើម្បីគាំទ្រកិច្ចការទូទាំងពិភពលោក។
◼ ឱសថ: បើអ្នកត្រូវការឱសថដែលគ្រូពេទ្យបញ្ជា សូមកុំភ្លេចយកមកជាមួយនឹងអ្នកឲ្យបានគ្រប់គ្រាន់ ពីព្រោះគ្មានឱសថនោះនៅមហាសន្និបាតទេ។ ចំពោះអ្នកដែលមានជំងឺទឹកនោមផ្អែម ក្រោយពេលចាក់ថ្នាំហើយ សូមបោះចោលសារ៉ាងចាក់ថ្នាំក្នុងធុងសំរាមពិសេសសម្រាប់របស់របរបែបនេះ មិនមែនធុងសំរាមទូទៅនៅកន្លែងមហាសន្និបាតឬសណ្ឋាគារទេ។
◼ ការប្រុងប្រយ័ត្នជាមុនអំពីសុវត្ថិភាព: សូមយកចិត្តទុកដាក់នឹងគ្រោះថ្នាក់ដែលអាចកើតឡើងមកពីការរអិលដួលនិងជំពប់ជើង។ រៀងរាល់ឆ្នាំ មានមនុស្សមួយចំនួនរបួសដោយសារគ្រោះថ្នាក់ទាក់ទងនឹងស្បែកជើង ជាពិសេសស្បែកជើងមានកែងខ្ពស់។ ជាការល្អបំផុត បើជ្រើសរើសពាក់ស្បែកជើងសមរម្យ ហើយល្មមនឹងជើងដែលស្រួលដើរ ស្រួលឡើងចុះជណ្ដើរ និងនៅកន្លែងឥដ្ឋក្រឡាដែលមានប្រហោងតូចៗជាដើម។
◼ សម្រាប់មនុស្សអន់ត្រចៀក: កម្មវិធីនឹងត្រូវចាក់ផ្សាយតាមប៉ុស្តិ៍វិទ្យុFM។ ដើម្បីអាចស្ដាប់បាន អ្នកត្រូវការកូនវិទ្យុប្រើថ្មនិងកាសសម្រាប់ស្ដាប់។
◼ រទេះកូនក្មេងនិងប៉ៅអ៊ី: រទេះកូនក្មេងនិងប៉ៅអ៊ីមិនគួរយកទៅសាលមហាសន្និបាតទេ។ ក៏ប៉ុន្តែ កៅអីពិសេសសម្រាប់កូនក្មេងដែលអាចចងភ្ជាប់ជាមួយនឹងកៅអីដែលនៅក្បែរឪពុកម្ដាយអាចប្រើបាន។
◼ ទឹកអប់: មហាសន្និបាតភាគច្រើនត្រូវធ្វើឡើងនៅកន្លែងបិទជិតដែលមានម៉ាស៊ីនស្រូបខ្យល់ចេញចូល។ ដូច្នេះ បើយើងប្រើទឹកអប់ដែលមានក្លិនខ្លាំង យើងអាចបង្ហាញសេចក្ដីស្រឡាញ់ដោយប្រើទឹកអប់តែបន្ដិចបន្តួចប៉ុណ្ណោះ។ នោះដោយសារទឹកអប់ដែលមានក្លិនខ្លាំងអាចបណ្ដាលឲ្យមានប្រតិកម្មដល់អ្នកដែលមានបញ្ហាខាងផ្លូវដង្ហើមឬបញ្ហាផ្សេងទៀតដែលពាក់ព័ន្ធនឹងនេះ។—១កូ. ១០:២៤
◼ ក្រដាសសូមរកជួប (S-43): យើងគួរប្រើក្រដាសសូមរកជួប ដើម្បីផ្ដល់ព័ត៌មានស្តីអំពីអ្នកដែលបានបង្ហាញចំណាប់អារម្មណ៍ដោយសារយើងបានផ្សព្វផ្សាយក្រៅផ្លូវការក្នុងអំឡុងពេលមានមហាសន្និបាត។ ក្រដាសសូមរកជួបដែលបានបំពេញរួចហើយ អាចជូនដល់អ្នកទទួលខុសត្រូវខាងសៀវភៅនៅមហាសន្និបាត ឬដល់លេខាធិការនៃក្រុមជំនុំរបស់អ្នក ពេលអ្នកត្រឡប់ទៅផ្ទះវិញ។
◼ នៅភោជនីយដ្ឋាន: ចូរលើកតម្កើងនាមរបស់ព្រះយេហូវ៉ា ដោយការប្រព្រឹត្តល្អនៅឯភោជនីយដ្ឋាន។ សូមស្លៀកពាក់សមជាអ្នកបម្រើព្រះ។ សូមទុកលុយទឹកតែ បើជាទម្លាប់នៅក្នុងតំបន់របស់អ្នក។
◼ សណ្ឋាគារ:
(១) សូមកុំកក់ចំនួនបន្ទប់លើសពីសេចក្ដីត្រូវការរបស់អ្នក ហើយកុំឲ្យចំនួនអ្នកស្នាក់នៅក្នុងបន្ទប់លើសចំនួនដែលសណ្ឋាគារបានអនុញ្ញាត។
(២) បើគ្មានហេតុការណ៍អាសន្នទេ សូមកុំលុបការកក់បន្ទប់ចោលឡើយ ហើយសូមជូនដំណឹងដល់សណ្ឋាគារភ្លាមៗដើម្បីឲ្យអ្នកឯទៀតអាចកក់បន្ទប់នោះ។—ម៉ាថ. ៥:៣៧
(៣) សូមយករទេះដាក់អីវ៉ាន់ នៅពេលដែលអ្នករៀបចំអីវ៉ាន់រួចហើយតែប៉ុណ្ណោះ ហើយទុករទេះនោះវិញភ្លាមៗដើម្បីឲ្យអ្នកឯទៀតអាចប្រើបាន។
(៤) បើជាទម្លាប់ក្នុងប្រទេសរបស់អ្នក សូមឲ្យលុយទឹកតែដល់អ្នកធ្វើការនៅសណ្ឋាគារ កាលណាគេជួយយួរអីវ៉ាន់អ្នក ហើយទុកលុយទឹកតែឲ្យអ្នកបោសសម្អាតបន្ទប់រាល់ថ្ងៃ។
(៥) កុំចម្អិនអាហារក្នុងបន្ទប់ បើវិន័យសណ្ឋាគារមិនអនុញ្ញាត។
(៦) យើងមិនគួរយកច្រើនហួសហេតុពេកនូវរបស់ដែលសណ្ឋាគារឲ្យដោយឥតគិតថ្លៃ ដូចជាអាហារពេលព្រឹក កាហ្វេ ឬទឹកកកសម្រាប់ភ្ញៀវក្នុងពេលដែលស្នាក់នៅសណ្ឋាគារនោះឡើយ។
(៧) សូមបង្ហាញផលដែលបង្កើតដោយសកម្មពលរបស់ព្រះរាល់ពេលដែលយើងទាក់ទងនឹងបុគ្គលិកសណ្ឋាគារ។ ពួកគេត្រូវថែរក្សាភ្ញៀវជាច្រើន ដូច្នេះពួកគេនឹងមានចិត្តដឹងគុណចំពោះចិត្តសប្បុរស ចិត្តអត់ធ្មត់ និងគំនិតសមហេតុផលរបស់យើង។
(៨) ពេលស្នាក់នៅសណ្ឋាគារ ឪពុកម្ដាយគួរមើលកូនឲ្យបានគ្រប់ពេល ហើយនេះរួមបញ្ចូលពេលជិះជណ្ដើរយន្ត នៅអាងហែលទឹក បន្ទប់ទទួលភ្ញៀវ និងបន្ទប់ហាត់ប្រាណជាដើម។
(៩) តម្លៃដែលបង្ហាញក្នុងបញ្ជីណែនាំអំពីកន្លែងស្នាក់នៅ (Recommended Lodging List) គឺជាតម្លៃពេញសម្រាប់ស្នាក់នៅមួយថ្ងៃ ប៉ុន្តែមិនរួមបញ្ចូលតម្លៃពន្ធនោះទេ។ បើគេគិតថ្លៃលើសតម្លៃ ឬគេគិតតម្លៃអ្វីដែលអ្នកមិនបានសុំឬប្រើ សូមកុំបង់ថ្លៃទាំងនោះ ហើយប្រាប់បងប្អូនដែលទទួលខុសត្រូវខាងចាត់ចែងបន្ទប់ នៅឯមហាសន្និបាតភ្លាមៗ។
(១០) បើអ្នកមានបញ្ហាដែលទាក់ទងនឹងបន្ទប់នៅសណ្ឋាគារ សូមទាក់ទងបងប្អូនដែលទទួលខុសត្រូវខាងចាត់ចែងបន្ទប់ ក្នុងអំឡុងពេលមហាសន្និបាតដើម្បីពួកគាត់អាចជួយអ្នកបាន។
◼ កិច្ចបម្រើស្ម័គ្រចិត្ត: អ្នកដែលមានបំណងចង់ជួយកិច្ចការនេះ សូមប្រាប់បងប្អូនដែលទទួលខុសត្រូវខាងផ្នែកកិច្ចបម្រើស្ម័គ្រចិត្តនៅឯមហាសន្និបាត។ កូនក្មេងដែលមានអាយុក្រោម១៦ឆ្នាំអាចជួយធ្វើកិច្ចការនេះបានបើមានឪពុកម្ដាយ ឬអាណាព្យាបាលជួយមើលការខុសត្រូវ ឬមនុស្សពេញវ័យណាម្នាក់ដែលឪពុកម្ដាយ ឬអាណាព្យាបាលបានអនុញ្ញាតឲ្យជួយមើលការខុសត្រូវ។