សកម្មភាពពិសេសដែលមានលទ្ធផលល្អ
បីសប្ដាហ៍មុនមហាសន្និបាត ក្រុមជំនុំទាំងឡាយនឹងចូលរួមសកម្មភាពពិសេសម្ដងទៀត ដើម្បីអញ្ជើញអ្នកចាប់អារម្មណ៍ពីតំបន់ផ្សាយឲ្យចូលរួមមហាសន្និបាត។ ដូច្នេះ មានមូលហេតុត្រឹមត្រូវឲ្យយើងចូលរួមសកម្មភាពពិសេសប្រចាំឆ្នាំនេះ។ ជាច្រើនដង អ្នកដែលទទួលលិខិតអញ្ជើញមកចូលរួមមហាសន្និបាតបានកោតស្ងើច ដោយសារសុន្ទរកថាទាំងអស់នៅមហាសន្និបាតមានមូលដ្ឋានលើគម្ពីរ និងផ្នែកផ្សេងៗបានត្រូវរៀបចំយ៉ាងល្អ ហើយមហាសន្និបាតទាំងមូលបានបម្រើដោយអ្នកស្ម័គ្រចិត្ត។ ពួកគេក៏ស្ងើចសរសើរចំពោះសាមគ្គីភាពនិងការប្រព្រឹត្តល្អរបស់យើងដែរ។ (ទំនុក. ១១០:៣; ១៣៣:១; អេ. ៦៥:១៣, ១៤) ទោះជាដូច្នោះក៏ដោយ ជាពិសេសនៅតំបន់ដែលមានអ្នកចាប់អារម្មណ៍ត្រូវធ្វើដំណើរឆ្ងាយដើម្បីចូលរួមមហាសន្និបាត តើសកម្មភាពពិសេសរបស់យើងមានលទ្ធផលល្អឬទេ?
ក្រោយមហាសន្និបាតប្រចាំតំបន់ឆ្នាំ២០១១ ការិយាល័យសាខាបានទទួលសំបុត្រមួយច្បាប់ពីស្ត្រីម្នាក់ដែលបានឃើញលិខិតអញ្ជើញនៅទ្វារផ្ទះរបស់គាត់។ តាមធម្មតា គាត់បានលាក់ខ្លួនពេលសាក្សីព្រះយេហូវ៉ាគោះទ្វារផ្ទះគាត់។ គាត់បានសរសេរថា៖ «ខ្ញុំមានផ្ទះស្អាត មានប្ដីល្អ ហើយខ្ញុំគិតថាខ្ញុំមានអ្វីៗសព្វគ្រប់ដែលធ្វើឲ្យខ្ញុំសប្បាយចិត្ត។ តែគួរឲ្យស្ដាយណាស់ ខ្ញុំនៅតែមិនសប្បាយចិត្ត ហើយជីវិតរបស់ខ្ញុំពិតជាគ្មានគោលបំណងទេ។ ដូច្នេះខ្ញុំបានសម្រេចចិត្តបើកឡានចម្ងាយ៣២០គីឡូម៉ែត្រ (២០០ម៉ែល៍) ដើម្បីទៅចូលរួមកម្មវិធីមហាសន្និបាតនៅថ្ងៃសៅរ៍»។ គាត់សប្បាយចិត្តស្ដាប់កម្មវិធីមហាសន្និបាតនោះខ្លាំងដល់ម្ល៉េះ រហូតដល់គាត់ទូរស័ព្ទប្រាប់ប្ដីគាត់ថា គាត់នឹងស្នាក់នៅមួយយប់ដើម្បីចូលរួមមហាសន្និបាតនៅថ្ងៃអាទិត្យទៀត។ គាត់និយាយថា៖ «ខ្ញុំបានស្ដាប់សុន្ទរកថាទាំងអស់ ខ្ញុំបានជួបសាក្សីព្រះយេហូវ៉ាច្រើននាក់ ពេលនោះខ្ញុំបានសម្រេចចិត្តថា ខ្ញុំចង់នៅក្នុងបរិយាកាសបែបនោះរហូត»។ ក្រោយគាត់ត្រឡប់ទៅផ្ទះវិញ គាត់បានចាប់ផ្ដើមសិក្សាគម្ពីរ ហើយបួនខែក្រោយមកគាត់បានក្លាយជាអ្នកផ្សាយដែលមិនទាន់ទទួលការជ្រមុជទឹក។ គាត់ប្រាប់ទៀតថា៖ «ខ្ញុំសប្បាយចិត្តណាស់ដែលខ្ញុំបានឃើញលិខិតអញ្ជើញនោះនៅទ្វារផ្ទះរបស់ខ្ញុំ ដោយសារលិខិតអញ្ជើញនោះ ឥឡូវជីវិតរបស់ខ្ញុំពិតជាមានគោលបំណងមែន!»។
អ្នកខ្លះដែលទទួលលិខិតអញ្ជើញនឹងមកចូលរួម។ ដូច្នេះ យើងគួរមានចិត្តខ្នះខ្នែងចូលរួមក្នុងសកម្មភាពពិសេសនេះ។ សូមយកលិខិតអញ្ជើញដែលនៅសល់មកក្រុងដែលមានមហាសន្និបាត ហើយសូមប្រើដើម្បីផ្សព្វផ្សាយក្រៅផ្លូវការ។
[ប្រអប់នៅទំព័រ៥]
តើយើងនឹងចែកលិខិតអញ្ជើញយ៉ាងដូចម្ដេច?
ដើម្បីចែកឲ្យពេញតំបន់ផ្សាយរបស់យើង យើងគួរនិយាយយ៉ាងខ្លី។ យើងប្រហែលជានិយាយថា «ជម្រាបសួរ។ យើងកំពុងរួមចំណែកក្នុងការចែកលិខិតអញ្ជើញទូទាំងពិភពលោក។ សូមជូនមួយសន្លឹក។ ក្នុងលិខិតអញ្ជើញនេះមានព័ត៌មានថែមទៀត»។ ចូរបង្ហាញចិត្តរំភើប។ ពេលរួមចំណែកក្នុងការចែកលិខិតអញ្ជើញនៅចុងសប្ដាហ៍ អ្នកក៏គួរចែកទស្សនាវដ្ដីដែរ បើឃើញថាជាការគួរ។