ចូរអញ្ជើញអ្នកឯទៀតឲ្យចូលរួម
១. តើសកម្មភាពពិសេសចែកលិខិតអញ្ជើញសម្រាប់មហាសន្និបាត នឹងចាប់ផ្ដើមនៅពេលណា?
១ បើអ្នកបានចំណាយកម្លាំងនិងធនធានជាច្រើនដើម្បីធ្វើពិធីពិសេសមួយសម្រាប់ក្រុមគ្រួសារឬមិត្តភក្ដិរបស់អ្នក អ្នកទំនងជាមានចិត្តរំភើបនៅពេលអ្នកអញ្ជើញពួកគេមកបរិភោគ។ ស្រដៀងគ្នាដែរ នៅមហាសន្និបាតដែលមាននាខែក្រោយ យើងនឹងទទួលការអប់រំជាច្រើនពីព្រះដែលប្រៀបដូចជាពិធីជប់លៀង។ មហាសន្និបាតនេះបានត្រូវរៀបចំឡើងដោយចំណាយពេលវេលា កម្លាំង និងធនធានជាច្រើន។ អស់បីសប្ដាហ៍មុនមហាសន្និបាតចាប់ផ្ដើម ព្រះយេហូវ៉ាផ្ដល់ឯកសិទ្ធិឲ្យយើងអញ្ជើញអ្នកឯទៀតឲ្យមកចូលរួម។ តើអ្វីនឹងជួយឲ្យយើងមានចិត្តរំភើបនៅពេលយើងអញ្ជើញអ្នកឯទៀត?
២. តើអ្វីនឹងជំរុញចិត្តយើងឲ្យចូលរួមយ៉ាងពេញលេញក្នុងសកម្មភាពពិសេសនេះ?
២ យើងនឹងមានចិត្តចង់ចូលរួមក្នុងសកម្មភាពពិសេសនោះយ៉ាងពេញលេញ បើយើងគិតអំពីរបៀបដែលយើងផ្ទាល់នឹងទទួលប្រយោជន៍ជាច្រើនពីការអប់រំដែលព្រះយេហូវ៉ាផ្ដល់ឲ្យនៅមហាសន្និបាតនេះ។ (អេ. ៦៥:១៣, ១៤) យើងគួរចាំដែរថាសកម្មភាពពិសេសប្រចាំឆ្នាំនេះច្បាស់ជានាំឲ្យមានលទ្ធផលល្អមិនខាន (សូមមើលប្រអប់«ការចែកលិខិតអញ្ជើញនាំឲ្យមានលទ្ធផលល្អ»)។ មនុស្សខ្លះដែលយើងបានអញ្ជើញនឹងមកចូលរួមមហាសន្និបាតរបស់យើង តែអ្នកខ្លះទៀតមិនមកទេ។ ទោះជាមានមនុស្សប៉ុន្មាននាក់ចូលរួមក៏ដោយ ក៏យើងខំព្យាយាមអស់ពីសមត្ថភាពក្នុងសកម្មភាពពិសេសនេះដែរ ព្រោះសកម្មភាពនេះនាំឲ្យព្រះយេហូវ៉ាទទួលការសរសើរ និងបង្ហាញឲ្យមនុស្សឃើញនូវចិត្តទូលាយរបស់លោក។—ទំនុក. ១៤៥:៣, ៧; បប. ២២:១៧
៣. តើយើងនឹងចែកចាយលិខិតអញ្ជើញយ៉ាងដូចម្ដេច?
៣ ក្រុមអ្នកចាស់ទុំនីមួយៗគួរសម្រេចថា បងប្អូនក្នុងក្រុមជំនុំអាចចែកចាយលិខិតអញ្ជើញតាមវិធីណាដើម្បីឲ្យបានច្រើនបំផុត រួមបញ្ចូលការទុកលិខិតអញ្ជើញនៅផ្ទះដែលម្ចាស់អត់នៅ ឬចែកជូនតាមរយៈការផ្សព្វផ្សាយជាសាធារណៈដែលមានក្នុងតំបន់ផ្សាយរបស់ក្រុមជំនុំ។ បើឱកាសសមរម្យ នៅចុងសប្ដាហ៍បងប្អូនគួរស្នើផ្ដល់ទស្សនាវដ្ដីជាមួយនឹងលិខិតអញ្ជើញ។ ក្រោយពីសកម្មភាពពិសេសបញ្ចប់ យើងពិតជាមានចិត្តរីករាយណាស់ដោយសារយើងដឹងថាយើងបានចូលរួមដោយចិត្តរំភើប ហើយដឹងថាយើងបានអញ្ជើញមនុស្សច្រើនបំផុតតាមដែលអាចធ្វើទៅបាន ឲ្យចូលរួមទទួលការអប់រំដែលព្រះយេហូវ៉ាផ្ដល់ឲ្យនៅមហាសន្និបាតនេះ!