ការចែកសំបុត្រអញ្ជើញសម្រាប់ពិធីរំលឹកចាប់ផ្ដើមនៅថ្ងៃទី២ ខែមេសា
១. តើយើងនឹងចែកសំបុត្រអញ្ជើញឆ្នាំនេះនៅពេលណា? ហើយតើសកម្មភាពប្រចាំឆ្នាំនេះសំខាន់យ៉ាងណា?
១ ចាប់ពីថ្ងៃទី២ដល់ថ្ងៃទី១៧ ខែមេសា យើងនឹងចែកសំបុត្រអញ្ជើញឲ្យចូលរួមពិធីដ៏សំខាន់បំផុតក្នុងឆ្នាំនេះ ពោលគឺពិធីរំលឹកមរណភាពរបស់គ្រិស្ត។ នៅអតីតកាល អ្នកដែលមានចំណាប់អារម្មណ៍ចំពោះសេចក្ដីពិតបានធ្វើតាមការអញ្ជើញនេះ ដែលធ្វើឡើងជារៀងរាល់ឆ្នាំ។ ជាឧទាហរណ៍ នៅថ្ងៃដែលមានពិធីរំលឹក ស្ត្រីម្នាក់បានទូរស័ព្ទទៅការិយាល័យសាខាថា៖ «ខ្ញុំទើបនឹងមកដល់ផ្ទះ ហើយមានសំបុត្រអញ្ជើញមួយនៅក្រោមទ្វារខ្ញុំ។ ខ្ញុំចង់ទៅ ប៉ុន្តែខ្ញុំមិនដឹងច្បាស់អំពីម៉ោង»។ បងប្រុសនៅការិយាល័យសាខាបានប្រាប់គាត់អំពីកន្លែងណាក្នុងសំបុត្រអញ្ជើញនោះ ដែលប្រាប់អំពីម៉ោង។ ស្ត្រីនោះបានបញ្ចប់ការសន្ទនាដោយសន្យាថា៖ «ខ្ញុំនឹងទៅពិធីរបស់អ្នកនៅយប់នេះ!»។
២. តើយើងអាចនិយាយយ៉ាងណាពេលជូនសំបុត្រអញ្ជើញ?
២ របៀបដែលយើងនឹងចែកសំបុត្រអញ្ជើញ: ដោយហេតុថាពេលវេលាសម្រាប់ចែកសំបុត្រអញ្ជើញពេញតំបន់ផ្សាយរបស់យើងគឺមានកំណត់ នោះជាការល្អបំផុតដែលយើងនិយាយយ៉ាងខ្លី។ យើងអាចនិយាយថា «ជម្រាបសួរ។ យើងចង់ជូនក្រុមគ្រួសារលោកអ្នកនូវសំបុត្រអញ្ជើញឲ្យចូលរួមពិធីរំលឹកប្រចាំឆ្នាំ ដែលនឹងធ្វើឡើងនៅទូទាំងពិភពលោកនៅថ្ងៃអាទិត្យ ទី១៧ ខែមេសានេះ។ [ហុចសំបុត្រអញ្ជើញទៅម្ចាស់ផ្ទះ] ថ្ងៃនោះជាថ្ងៃខួបនៃមរណភាពរបស់លោកយេស៊ូ។ មានសុន្ទរកថាមួយដែលនឹងពន្យល់អំពីរបៀបដែលយើងអាចទទួលប្រយោជន៍ពីថ្លៃលោះរបស់គ្រិស្ត។ សេចក្ដីអញ្ជើញនេះប្រាប់អំពីអាសយដ្ឋាននិងពេលវេលានៃការប្រជុំដែលនឹងធ្វើឡើងនៅក្នុងសហគមន៍របស់យើង»។
៣. តើតាមរបៀបណាដែលយើងអាចអញ្ជើញមនុស្សឲ្យបានច្រើនបំផុត?
៣ បើក្រុមជំនុំមានតំបន់ផ្សាយធំ ពួកអ្នកចាស់ទុំប្រហែលជាណែនាំអ្នកឲ្យទុកសំបុត្រអញ្ជើញសម្រាប់អ្នកមិននៅផ្ទះ ឲ្យតែអាចដាក់វានៅកន្លែងណាដែលអ្នកឯទៀតមិនឃើញ។ កុំភ្លេចអញ្ជើញពួកអ្នកដែលអ្នកត្រឡប់ទៅជួប ញាតិសន្ដាន អ្នករួមការងារ មិត្តរួមថ្នាក់និងមនុស្សឯទៀតដែលអ្នកស្គាល់។ ពេលអ្នកចូលរួមចែកសំបុត្រអញ្ជើញនៅថ្ងៃសៅរ៍ ថ្ងៃអាទិត្យ សូមស្នើផ្ដល់ទស្សនាវដ្ដីពេលណាអ្នកឃើញថាគួរស្នើផ្ដល់។ តើអ្នកអាចធ្វើជាអ្នកត្រួសត្រាយជំនួយក្នុងខែមេសា ហើយចូលរួមឲ្យបានច្រើនជាងក្នុងសកម្មភាពដ៏សប្បាយរីករាយនេះឬទេ?
៤. ហេតុអ្វីយើងចង់ឲ្យពួកអ្នកដែលមានចំណាប់អារម្មណ៍ចូលរួមពិធីរំលឹក?
៤ អ្នកដែលមានចំណាប់អារម្មណ៍ដែលចូលរួមពិធីរំលឹកនេះនឹងឮការបញ្ជាក់ដែលមានឥទ្ធិពលយ៉ាងខ្លាំងលើចិត្តពួកគេមែន! ពួកគេនឹងឮអំពីសេចក្ដីស្រឡាញ់ដ៏ធំធេងរបស់ព្រះយេហូវ៉ាតាមរយៈការផ្ដល់ថ្លៃលោះ។ (យ៉ូន. ៣:១៦) ពួកគេនឹងដឹងអំពីប្រយោជន៍ដែលរាជាណាចក្រព្រះនឹងផ្ដល់ឲ្យមនុស្សជាតិ។ (អេ. ៦៥:២១-២៣) ពួកគេក៏នឹងត្រូវអញ្ជើញដែរឲ្យប្រាប់ឆ្មាំ ហើយសុំសិក្សាគម្ពីរដើម្បីយល់ដឹងថែមទៀត។ យើងអធិដ្ឋានសុំឲ្យមនុស្សជាច្រើនដែលចង់រៀនអំពីព្រះយេហូវ៉ាឆ្លើយតបនឹងការអញ្ជើញនេះ ហើយចូលរួមជាមួយនឹងយើងក្នុងពិធីរំលឹក!