តើអ្នកសុខចិត្តប្រែប្រួលទេ?
១. តើការប្រែប្រួលក្នុងពិភពលោកតម្រូវឲ្យយើងចេះប្រែប្រួលអ្វីខ្លះ?
១ យោងទៅតាមកូរិនថូសទី១ ៧:៣១ គម្ពីរប្រាប់ថាស្ថានភាពពិភពលោកតែងប្រែប្រួលជានិច្ច។ ហេតុនេះហើយយើងត្រូវចេះប្រែប្រួលម្ដងម្កាលស្តីអំពីវិធីផ្សព្វផ្សាយ កាលវិភាគ និងពាក្យផ្ដើមក្នុងកិច្ចផ្សព្វផ្សាយរបស់យើង។ តើអ្នកសុខចិត្តប្រែប្រួលទេ?
២. ហេតុអ្វីយើងត្រូវចេះកែប្រែដើម្បីជឿនទៅមុខឲ្យទាន់អង្គការរបស់ព្រះ?
២ វិធីផ្សព្វផ្សាយរបស់អ្នក: ក្រុមជំនុំគ្រិស្តសាសនិកតែងតែមានការកែប្រែ។ ពេលលោកយេស៊ូចាត់អ្នកកាន់តាមឲ្យចេញទៅផ្សព្វផ្សាយជាលើកដំបូង លោកបានប្រាប់ពួកគេថាកុំឲ្យយកថង់យាមឬថង់សៀតចង្កេះសម្រាប់ដាក់ប្រាក់ទៅជាមួយឡើយ។ (ម៉ាថ. ១០:៩, ១០) ក៏ប៉ុន្តែ លោកបានកែប្រែការណែនាំនេះនៅពេលក្រោយមក ដោយគិតអំពីការពង្រីកកិច្ចផ្សព្វផ្សាយនៅតំបន់ផ្សេងៗ និងការប្រឆាំងដែលពួកអ្នកកាន់តាមលោកនឹងមាននៅអនាគត។ (លូក. ២២:៣៦) ក្នុងសតវត្សរ៍មុន អង្គការរបស់ព្រះយេហូវ៉ាធ្លាប់ប្រើវិធីផ្សព្វផ្សាយផ្សេងៗស្របទៅតាមតម្រូវការនៅពេលនោះ ដូចជាផ្សព្វផ្សាយដោយពាក់ស្លាកធំៗ ផ្សាយតាមវិទ្យុ និងផ្សាយតាមឡានដែលមានប្រដាប់បំពងសំឡេង។ សព្វថ្ងៃនេះ ដោយសារនៅកន្លែងជាច្រើន មនុស្សមិនសូវនៅផ្ទះ នោះយើងបានត្រូវលើកទឹកចិត្តឲ្យផ្សព្វផ្សាយនៅកន្លែងសាធារណៈនិងផ្សព្វផ្សាយក្រៅផ្លូវការ ដើម្បីបន្ថែមលើកិច្ចផ្សព្វផ្សាយពីផ្ទះមួយទៅផ្ទះមួយ។ យើងក៏បានត្រូវលើកទឹកចិត្តឲ្យផ្សព្វផ្សាយពីផ្ទះមួយទៅផ្ទះមួយនៅពេលព្រលប់ដែរ បើនៅពេលថ្ងៃមនុស្សទៅធ្វើការ។ កាលដែលរទេះស្ថានសួគ៌របស់ព្រះយេហូវ៉ាបែរទៅទិសផ្សេងៗ តើអ្នកកំពុងតែជឿនទៅមុខឲ្យទាន់រទេះនោះឬទេ?—អេស. ១:២០, ២១
៣. តើតាមរបៀបណាដែលការចេះកែប្រែពាក្យផ្សាយជួយយើងឲ្យកាន់តែមានប្រសិទ្ធភាពក្នុងតំបន់ផ្សាយរបស់យើង?
៣ ពាក្យផ្សាយរបស់អ្នក: ថ្មីៗនេះ តើមនុស្សក្នុងតំបន់របស់អ្នកចាប់អារម្មណ៍រឿងអ្វីខ្លះ? រឿងខាងសេដ្ឋកិច្ច ក្រុមគ្រួសារ ឬសង្គ្រាម? គឺមានប្រយោជន៍បើយើងដឹងអំពីបញ្ហានិងកាលៈទេសៈរបស់មនុស្សក្នុងតំបន់របស់យើង ដើម្បីរៀបចំពាក្យផ្សាយស្របទៅតាមនោះ។ (១កូ. ៩:២០-២៣) ពេលម្ចាស់ផ្ទះប្រាប់ទស្សនៈរបស់គាត់ ជាជាងឆ្លើយដដែលៗនិងបន្តនិយាយពាក្យផ្សាយដែលយើងបានរៀបចំ គឺល្អជាងបើយើងកែប្រែពាក្យផ្សាយតាមអ្វីដែលគាត់ចាប់អារម្មណ៍វិញ។
៤. ហេតុអ្វីយើងគួរឆាប់ចេះប្រែប្រួលតាមកាលៈទេសៈ?
៤ នៅពេលឆាប់ៗខាងមុខនេះ គ្រាវេទនាយ៉ាងខ្លាំងនឹងចាប់ផ្ដើម ហើយពិភពលោកនេះនឹងមកដល់ទីបញ្ចប់។ តាមពិត«នៅសល់ពេលវេលាតែបន្ដិចទេ»។ (១កូ. ៧:២៩) បើដូច្នេះ គឺជាការសំខាន់ណាស់ដែលយើងចេះប្រែប្រួលតាមកាលៈទេសៈ ហើយធ្វើដូច្នេះដោយមិនបង្អែបង្អង់ ដើម្បីឲ្យយើងសម្រេចកិច្ចការច្រើនបំផុតក្នុងវេលាដែលមានកំណត់នេះ!