របៀបរស់នៅជាគ្រិស្តសាសនិក
ប្អូនៗវ័យក្មេង ចូរ«ខ្នះខ្នែងធ្វើការដ៏ល្អប្រសើរ»
សាវ័កប៉ូលបានសរសេរសំបុត្រក្រោមការដឹកនាំរបស់ព្រះទៅកាន់ទីតុស។ ក្នុងសំបុត្រនោះ គាត់បានសរសេរថាបុរសវ័យក្មេង រួមមានទីតុសដែរ គួរខំប្រឹងអស់ពីសមត្ថភាពដើម្បី«ធ្វើជាគំរូក្នុងការប្រព្រឹត្តល្អគ្រប់ការទាំងអស់»។ (ទីត. ២:៦, ៧) ក្រោយមកក្នុងជំពូកដដែលនោះ គាត់បានបញ្ជាក់ថារាស្ត្ររបស់ព្រះយេហូវ៉ាបានត្រូវសម្អាតដើម្បីឲ្យពួកគេអាច«ខ្នះខ្នែងធ្វើការដ៏ល្អប្រសើរ»។ (ទីត. ២:១៤) កិច្ចការមួយក្នុងចំណោមការដ៏ល្អប្រសើរនោះគឺ ការផ្សព្វផ្សាយនិងបង្រៀនអំពីរាជាណាចក្រព្រះ។ បើប្អូនជាមនុស្សវ័យក្មេង តើប្អូនអាចប្រើកម្លាំងរបស់ប្អូនដើម្បីធ្វើជាអ្នកត្រួសត្រាយជំនួយ ឬជាអ្នកផ្សព្វផ្សាយពេញពេលឬទេ?—សុភ. ២០:២៩
បើប្អូនចង់បម្រើជាអ្នកត្រួសត្រាយ សូមមានគោលដៅដែលប្អូនអាចសម្រេចបានដើម្បីទៅជាអ្នកត្រួសត្រាយម្នាក់។ (លូក. ១៤:២៨-៣០) ជាឧទាហរណ៍ ពេលដែលប្អូនបំពេញកិច្ចបម្រើពេញពេល តើប្អូននឹងផ្គត់ផ្គង់ខ្លួនប្អូនយ៉ាងដូចម្ដេច? តើតាមរបៀបណាប្អូនអាចបំពេញម៉ោងផ្សាយ? សូមអធិដ្ឋានទៅព្រះយេហូវ៉ា សុំលោកឲ្យជួយប្អូន។ (ទំនុក. ៣៧:៥) សូមពិភាក្សាគម្រោងរបស់ប្អូនជាមួយនឹងឪពុកម្ដាយ និងអ្នកត្រួសត្រាយដែលមានបទពិសោធន៍។ បន្ទាប់មក សូមចាត់វិធានការដើម្បីសម្រេចគោលដៅរបស់ប្អូន។ ព្រះយេហូវ៉ាប្រាកដជានឹងផ្ដល់ពរដល់ប្អូនចំពោះការខំប្រឹងបម្រើលោក!
សូមទស្សនាវីដេអូប្អូនៗវ័យក្មេងលើកកិត្ដិយសព្រះយេហូវ៉ា រួចឆ្លើយសំណួរដូចតទៅ៖
ដើម្បីបម្រើជាអ្នកត្រួសត្រាយ តើអ្នកខ្លះជួបការពិបាកអ្វីខ្លះ ហើយតើពួកគេបានយកឈ្នះការពិបាកទាំងនោះតាមរបៀបណា?
តើឪពុកម្ដាយអាចជួយកូនរបស់ពួកគេឲ្យក្លាយជាអ្នកត្រួសត្រាយពេញពេលយ៉ាងដូចម្ដេច?
ហេតុអ្វីការមានកាលវិភាគផ្សព្វផ្សាយគឺសំខាន់ម្ល៉េះ?
តើបងប្អូននៅក្នុងក្រុមជំនុំអាចលើកទឹកចិត្តនិងជួយអ្នកត្រួសត្រាយយ៉ាងដូចម្ដេច?
តើអ្នកត្រួសត្រាយទទួលពរអ្វីខ្លះ?
តើខ្ញុំអាចសម្រេចគោលដៅធ្វើជាអ្នកត្រួសត្រាយយ៉ាងដូចម្ដេច?