របៀបបំបាត់ចោលការស្អប់គ្នា
២ | កុំសងសឹក
សេចក្ដីបង្រៀនក្នុងគម្ពីរ:
«កុំតបស្នងការអាក្រក់ដល់អ្នកណាដែលធ្វើអាក្រក់ចំពោះអ្នក . . . ចូរខំអស់ពីសមត្ថភាពដើម្បីធ្វើឲ្យមានសន្តិភាពជាមួយនឹងមនុស្សទាំងអស់ ប្រសិនបើអាចធ្វើទៅបាន . . . កុំសងសឹកដោយខ្លួនអ្នកឡើយ . . . ព្រោះបទគម្ពីរចែងថា៖ ‹ព្រះយេហូវ៉ាមានប្រសាសន៍ថា៖ «ការសងសឹកជារបស់ខ្ញុំ ខ្ញុំនឹងសងគេវិញ»›»។—រ៉ូម ១២:១៧-១៩
នេះមានន័យថា:
យើងខឹងគឺជារឿងធម្មតាពេលដែលបុគ្គលណាម្នាក់ធ្វើខុសចំពោះយើង។ ប៉ុន្តែព្រះមិនចង់ឲ្យយើងសងសឹកឡើយ។ ផ្ទុយទៅវិញ លោកលើកទឹកចិត្តយើងឲ្យរង់ចាំលោកពីព្រោះមិនយូរទៀតលោកនឹងបំបាត់ចោលអំពើអយុត្តិធម៌ទាំងអស់។—ចម្រៀងសរសើរព្រះ ៣៧:៧, ១០
របៀបដែលខគម្ពីរនេះអាចជួយអ្នក:
ពេលមនុស្សមិនល្អឥតខ្ចោះសងសឹក នេះនាំឲ្យមានការស្អប់គ្នាទៅវិញទៅមកឥតឈប់។ ដូច្នេះបើបុគ្គលណាម្នាក់ធ្វើឲ្យអ្នកទើសចិត្តឬធ្វើខុសចំពោះអ្នក សូមកុំសងសឹក។ សូមព្យាយាមគ្រប់គ្រងអារម្មណ៍របស់អ្នកហើយព្យាយាមធ្វើឲ្យមានសន្តិភាព។ ក្នុងករណីខ្លះប្រហែលជាប្រសើរជាង បើយើងមិនគុំកួននឹងអ្នកឯទៀត។ (សុភាសិត ១៩:១១) ប៉ុន្តែជួនកាលគឺល្អប្រសើរជាង បើយើងរាយការណ៍អំពីអ្វីដែលបានកើតឡើង។ ជាឧទាហរណ៍ បើអ្នកជាជនរងគ្រោះដោយសារឧក្រិដ្ឋកម្ម អ្នកអាចរាយការណ៍ប្រាប់ទៅប៉ូលីសឬអាជ្ញាធរឯទៀតបាន។
ការសងសឹកគ្នានាំឲ្យជួបផលវិបាកទាំងសងខាង
ចុះបើមើលទៅមិនមានវិធីដោះស្រាយបញ្ហាដោយសន្តិភាព? ឬចុះបើអ្នកបានធ្វើអ្វីៗទាំងអស់ដែលអ្នកអាចធ្វើបានរួចហើយដើម្បីដោះស្រាយបញ្ហាដោយសន្តិភាព? សូមកុំសងសឹក។ ពីព្រោះនេះអាចធ្វើឲ្យស្ថានភាពកាន់តែអាក្រក់ទៅ។ ផ្ទុយទៅវិញ សូមបំបាត់ចោលការស្អប់គ្នា។ អ្នកអាចរៀនឲ្យចេះទុកចិត្តរបៀបដែលព្រះដោះស្រាយបញ្ហា។ «ចូរពឹងផ្អែកលោក នោះលោកនឹងជួយអ្នក»។—ចម្រៀងសរសើរព្រះ ៣៧:៣-៥