អត្ថបទសិក្សា ២
«ចូរទទួលការកែប្រែទាំងស្រុង ដោយផ្លាស់ប្ដូរជាថ្មីនូវរបៀបគិតគូររបស់អ្នក»
«ចូរទទួលការកែប្រែទាំងស្រុង ដោយផ្លាស់ប្ដូរជាថ្មីនូវរបៀបគិតគូររបស់អ្នករាល់គ្នា ដើម្បីឲ្យអ្នករាល់គ្នាពិសោធមើលដោយខ្លួនអ្នកឲ្យដឹងនូវបំណងប្រាថ្នាដ៏ប្រសើរ សមរម្យ និងល្អឥតខ្ចោះរបស់ព្រះ»។—រ៉ូម ១២:២
ចម្រៀងលេខ៨៨ សូមឲ្យខ្ញុំស្គាល់ផ្លូវរបស់លោក
សេចក្ដីសង្ខេបa
១-២. តើយើងត្រូវបន្ដធ្វើអ្វីក្រោយពីទទួលការជ្រមុជទឹក? សូមពន្យល់។
តើអ្នកសម្អាតផ្ទះរបស់អ្នកញឹកញាប់ប៉ុនណា? ប្រហែលជាមុនពេលដែលអ្នករើទៅនៅជាលើកដំបូង អ្នកខំសម្អាតគ្រប់កន្លុកកន្លៀត។ ប៉ុន្តែ ចុះយ៉ាងណាបើអ្នកឈប់សម្អាត? ដូចអ្នកដឹងស្រាប់ហើយ ផ្ទះរបស់អ្នកនឹងឆាប់មានធូលីដីនិងកខ្វក់។ ដូច្នេះ ដើម្បីឲ្យផ្ទះរបស់អ្នកស្អាតបាត អ្នកត្រូវសម្អាតវាជាទៀងទាត់។
២ ស្រដៀងគ្នាដែរ យើងក៏ត្រូវបន្តកែតម្រូវរបៀបគិតគូរនិងបុគ្គលិកលក្ខណៈរបស់យើង។ ពិតមែនមុនទទួលការជ្រមុជទឹក យើងបានខំប្រឹងធ្វើការផ្លាស់ប្ដូរដែលចាំបាច់ក្នុងជីវិតរបស់យើងដើម្បី«សម្អាតចិត្តនិងកាយរបស់យើងឲ្យស្អាតពីអ្វីៗទាំងអស់ដែលនាំឲ្យស្មោកគ្រោក»។ (២កូ. ៧:១) ប៉ុន្តែឥឡូវ យើងត្រូវធ្វើតាមយោបល់របស់សាវ័កប៉ូលដែលឲ្យ«គំនិតថ្មីបន្តកាន់កាប់»យើង។ (អេភ. ៤:២៣) ហេតុអ្វីយើងត្រូវបន្ដកែតម្រង់ខ្លួន? ពីព្រោះឥទ្ធិពលរបស់ពិភពលោកនេះអាចងាយធ្វើឲ្យយើងមិនស្អាតស្អំចំពោះព្រះយេហូវ៉ា។ ដើម្បីបន្ដធ្វើឲ្យព្រះយេហូវ៉ាពេញចិត្ត យើងត្រូវពិនិត្យមើលរបៀបគិតគូរ បុគ្គលិកលក្ខណៈ និងសេចក្ដីប៉ងប្រាថ្នារបស់យើងជាទៀងទាត់។
ចូរ«ផ្លាស់ប្ដូរជាថ្មីនូវរបៀបគិតគូររបស់អ្នក»
៣. តើការ«ផ្លាស់ប្ដូរជាថ្មីនូវរបៀបគិតគូររបស់អ្នក»មានន័យយ៉ាងណា? (រ៉ូម ១២:២)
៣ តើយើងត្រូវធ្វើអ្វីដើម្បីផ្លាស់ប្ដូរជាថ្មីនូវរបៀបគិតគូររបស់យើង? (សូមអាន រ៉ូម ១២:២) ពាក្យភាសាក្រិចដែលបានត្រូវបកប្រែថា«ផ្លាស់ប្ដូរជាថ្មីនូវរបៀបគិតគូររបស់អ្នក»ក៏អាចត្រូវបកប្រែថា«ជួសជុលនិងកែលម្អរបៀបគិតគូររបស់អ្នក»។ ដូច្នេះ នេះមិនមានន័យថាយើងគ្រាន់តែគួរធ្វើអំពើល្អតិចតួចប៉ុណ្ណោះទេ។ ផ្ទុយទៅវិញ យើងត្រូវពិនិត្យមើលធាតុពិតរបស់យើង ហើយធ្វើការកែប្រែណាដែលចាំបាច់ដើម្បីយើងអាចធ្វើតាមខ្នាតតម្រារបស់ព្រះយេហូវ៉ាឲ្យបានដិតដល់តាមដែលអាចធ្វើទៅបាន។ យើងមិនគួរធ្វើដូច្នេះតែម្ដងហើយឈប់ទេ តែយើងគួរបន្ដធ្វើជានិច្ច។
តើការសម្រេចចិត្តរបស់អ្នកអំពីការអប់រំនិងការងារបង្ហាញថាអ្នកចាត់ទុករាជាណាចក្រព្រះថាសំខាន់បំផុតឬទេ? (សូមមើលវគ្គ៤-៥)c
៤. តើតាមរបៀបណាយើងអាចជៀសវាងមិនឲ្យរបៀបរបបពិភពលោកនេះមានឥទ្ធិពលលើរបៀបគិតគូររបស់យើង?
៤ ពេលយើងល្អឥតខ្ចោះ យើងនឹងតែងតែអាចធ្វើឲ្យព្រះយេហូវ៉ាពេញចិត្តក្នុងគ្រប់ការដែលយើងធ្វើ។ ទម្រាំដល់ពេលនោះ យើងត្រូវបន្ដខំប្រឹងធ្វើឲ្យព្រះពេញចិត្ត។ សូមកត់សម្គាល់ថានៅរ៉ូម ១២:២ ប៉ូលបានភ្ជាប់ទំនាក់ទំនងរវាងការផ្លាស់ប្ដូរជាថ្មីនូវរបៀបគិតគូររបស់យើងទៅនឹងការស្គាល់បំណងប្រាថ្នារបស់ព្រះ។ ជាជាងឲ្យពិភពលោកដ៏អាក្រក់នេះមានឥទ្ធិពលលើយើង ដំបូងយើងត្រូវពិចារណាខ្លួនឲ្យដឹងថាតើយើងឲ្យរបៀបគិតគូររបស់ព្រះ ឬទស្សនៈពិភពលោកនេះមានឥទ្ធិពលច្រើនប៉ុនណាលើគោលដៅនិងការសម្រេចចិត្តរបស់យើង។
៥. តើតាមរបៀបណាយើងអាចពិនិត្យមើលរបៀបគិតគូររបស់យើងអំពីការជិតមកដល់នៃថ្ងៃរបស់ព្រះយេហូវ៉ា? (សូមមើលរូបភាព)
៥ សូមគិតអំពីឧទាហរណ៍មួយ។ ព្រះយេហូវ៉ាចង់ឲ្យយើង«ចាំជាប់ជានិច្ចនូវការមកដល់នៃថ្ងៃរបស់ព្រះយេហូវ៉ា»។ (២ពេ. ៣:១២) សូមសួរខ្លួនអ្នកថា ‹តើរបៀបរស់នៅរបស់ខ្ញុំបង្ហាញថាខ្ញុំយល់ថាយើងនៅជិតទីបញ្ចប់នៃរបៀបរបបពិភពលោកនេះឬទេ? តើការសម្រេចចិត្តរបស់ខ្ញុំអំពីការអប់រំនិងការងារបង្ហាញថាការបម្រើព្រះយេហូវ៉ាសំខាន់បំផុតក្នុងជីវិតខ្ញុំឬ? តើខ្ញុំមានជំនឿថាព្រះយេហូវ៉ានឹងផ្គត់ផ្គង់ខ្ញុំនិងក្រុមគ្រួសាររបស់ខ្ញុំ ឬតើខ្ញុំច្រើនតែព្រួយបារម្ភអំពីទ្រព្យសម្បត្តិ?›។ សូមគិតថាព្រះយេហូវ៉ាពេញចិត្តយ៉ាងណាពេលលោកឃើញថាយើងកំពុងខំព្យាយាមធ្វើគ្រប់យ៉ាងដើម្បីបំណងប្រាថ្នារបស់លោក។—ម៉ាថ. ៦:២៥-២៧, ៣៣; ភី. ៤:១២, ១៣
៦. តើយើងត្រូវបន្ដធ្វើអ្វី?
៦ យើងត្រូវពិនិត្យមើលរបៀបគិតគូររបស់យើងជាទៀងទាត់ ហើយក្រោយមកធ្វើការកែប្រែដែលចាំបាច់។ ប៉ូលបានប្រាប់គ្រិស្តសាសនិកនៅក្រុងកូរិនថូសថា៖ «ចូរពិនិត្យពិចារណាអំពីខ្លួនឥតឈប់ ដើម្បីឲ្យដឹងថាអ្នកកំពុងកាន់ខ្ជាប់តាមជំនឿឬយ៉ាងណា។ ចូរសឲ្យឃើញជានិច្ចថាអ្នកជាមនុស្សបែបណា»។ (២កូ. ១៣:៥) ការ«កាន់ខ្ជាប់តាមជំនឿ»មិនគ្រាន់តែរួមបញ្ចូលការចូលរួមកិច្ចប្រជុំ និងការផ្សព្វផ្សាយម្ដងម្កាលប៉ុណ្ណោះទេ។ នេះក៏រួមបញ្ចូលរបៀបគិតគូរ ទំនោរចិត្ត និងបំណងចិត្តរបស់យើងផងដែរ។ ដូច្នេះ យើងត្រូវបន្ដផ្លាស់ប្ដូរជាថ្មីនូវរបៀបគិតគូររបស់យើងដោយអានបណ្ដាំរបស់ព្រះ រៀនឲ្យមានរបៀបគិតគូរដូចលោក ហើយក្រោយមកខំធ្វើអ្វីដែលចាំបាច់ដើម្បីឲ្យព្រះយេហូវ៉ាពេញចិត្ត។—១កូ. ២:១៤-១៦
ចូរ«ពាក់បុគ្គលិកលក្ខណៈថ្មី»
៧. យោងទៅតាមអេភេសូរ ៤:៣១, ៣២ តើយើងត្រូវធ្វើអ្វីទៀត ហើយហេតុអ្វីនេះពិបាក?
៧ សូមអាន អេភេសូរ ៤:៣១, ៣២។ ការផ្លាស់ប្ដូរសំខាន់មួយទៀតដែលយើងត្រូវធ្វើគឺ«ពាក់បុគ្គលិកលក្ខណៈថ្មី»។ (អេភ. ៤:២៤) នេះតម្រូវឲ្យយើងខំប្រឹង។ ក្នុងចំណោមគុណវិបត្តិផ្សេងៗដែលយើងត្រូវខំព្យាយាមលះចោលមានគំនុំ កំហឹង និងចិត្តក្ដៅក្រហាយ។ ហេតុអ្វីនេះប្រហែលជាមិនស្រួលធ្វើ? ពីព្រោះគុណវិបត្តិខ្លះចាក់ឫសជ្រៅ។ ជាឧទាហរណ៍ គម្ពីរចែងថាបុគ្គលខ្លះ«ឆាប់ខឹង» ហើយ«ងាយផ្ទុះកំហឹង»។ (សុភ. ២៩:២២) បុគ្គលដែលមានគុណវិបត្តិទាំងនេះ ទំនងជាត្រូវបន្ដខំព្យាយាមកែប្រែ សូម្បីតែក្រោយពីគាត់បានទទួលការជ្រមុជទឹកហើយក្ដី។ បទពិសោធន៍ដូចតទៅនេះនឹងបង្ហាញអំពីចំណុចនេះ។
៨-៩. តើបទពិសោធន៍របស់បងស្ទីវើនបង្ហាញយ៉ាងណាថាយើងត្រូវបន្ដដោះបុគ្គលិកលក្ខណៈចាស់ចេញ?
៨ បងប្រុសម្នាក់ឈ្មោះស្ទីវើនពិបាកគ្រប់គ្រងកំហឹងរបស់គាត់។ គាត់និយាយថា៖ «ទោះជាខ្ញុំជ្រមុជទឹកហើយក្ដី ខ្ញុំនៅតែត្រូវទប់កំហឹងរបស់ខ្ញុំ។ ជាឧទាហរណ៍ ពេលផ្សព្វផ្សាយពីផ្ទះមួយទៅផ្ទះមួយ ខ្ញុំបានដេញតាមចោរម្នាក់ដែលលួចវិទ្យុពីក្នុងឡានរបស់ខ្ញុំ។ ពេលដែលឃើញខ្ញុំដេញជិតទាន់ ចោរនោះក៏ទម្លាក់វិទ្យុចោលរត់បាត់ទៅ។ នៅពេលខ្ញុំរៀបរាប់ហេតុការណ៍នោះប្រាប់បងប្អូនឯទៀត អ្នកចាស់ទុំម្នាក់ដែលនៅទីនោះដែរបានសួរខ្ញុំថា៖ ‹ស្ទីវើន បើប្អូនចាប់គាត់បាន តើប្អូននឹងធ្វើអ្វី?›។ សំណួរនោះបាននាំឲ្យខ្ញុំពិចារណាខ្លួនឯងថា ខ្ញុំត្រូវព្យាយាមបង្កើតឲ្យមានសន្តិភាព»។b
៩ គំរូរបស់បងស្ទីវើនបង្ហាញថាគុណវិបត្តិខ្លះអាចលេចឡើងដោយមិនបានរំពឹងទុក ទោះជាយើងបានគិតថាយើងបានលះចោលវាហើយក្ដី។ បើនេះកើតឡើងចំពោះអ្នក សូមកុំធ្លាក់ទឹកចិត្ត ហើយគិតថាខ្លួនជាគ្រិស្តសាសនិកមិនល្អឡើយ។ សូម្បីតែសាវ័កប៉ូលក៏បានសារភាពថា៖ «ពេលខ្ញុំចង់ធ្វើអ្វីដែលត្រឹមត្រូវ នោះអ្វីដែលអាក្រក់នៅជាប់ជាមួយនឹងខ្ញុំ»។ (រ៉ូម ៧:២១-២៣) គ្រិស្តសាសនិកមិនល្អឥតខ្ចោះទាំងអស់មានគុណវិបត្តិខ្លះដែលចេះតែលេចមកម្ដងហើយម្ដងទៀត ដូចធូលីដីដែលធ្វើឲ្យផ្ទះរបស់យើងកខ្វក់។ ដូច្នេះយើងត្រូវបន្ដខំព្យាយាមថែវាឲ្យនៅស្អាតបាត។ តើយើងអាចធ្វើដូច្នេះយ៉ាងដូចម្ដេច?
១០. តើយើងអាចតយុទ្ធនឹងគុណវិបត្តិយ៉ាងដូចម្ដេច? (យ៉ូហានទី១ ៥:១៤, ១៥)
១០ សូមអធិដ្ឋានទៅព្រះយេហូវ៉ាអំពីគុណវិបត្តិដែលអ្នកពិបាកកែប្រែ ព្រមទាំងជឿជាក់ថាលោកនឹងស្ដាប់អ្នក ហើយជួយអ្នក។ (សូមអាន យ៉ូហានទី១ ៥:១៤, ១៥) ព្រះយេហូវ៉ានឹងមិនធ្វើអព្ភូតហេតុបំបាត់គុណវិបត្តិនោះចោលទេ ប៉ុន្តែលោកអាចពង្រឹងកម្លាំងអ្នកដើម្បីមិនឲ្យអ្នកចុះចាញ់វាឡើយ។ (១ពេ. ៥:១០) ទន្ទឹមនឹងនោះ ចូរខំប្រឹងធ្វើតាមសេចក្ដីអធិដ្ឋានរបស់អ្នកដោយមិនធ្វើអ្វីដែលបណ្ដាលឲ្យគុណវិបត្តិនោះលេចមកម្ដងទៀត។ ជាឧទាហរណ៍ ចូរប្រុងប្រយ័ត្នអំពីការមើលភាពយន្ត មើលកម្មវិធីទូរទស្សន៍ ឬអានរឿងដែលធ្វើឲ្យគុណវិបត្តិដែលអ្នកកំពុងព្យាយាមលះចោល មើលទៅគឺបែរជាល្អទៅវិញ។ ម្យ៉ាងទៀត សូមកុំបន្ដគិតអំពីសេចក្ដីប៉ងប្រាថ្នាមិនត្រឹមត្រូវឡើយ។—ភី. ៤:៨; កូឡ. ៣:២
១១. តើយើងអាចធ្វើអ្វីដើម្បីបន្ដពាក់បុគ្គលិកលក្ខណៈថ្មី?
១១ ទោះជាអ្នកបានដោះចេញបុគ្គលិកលក្ខណៈចាស់ក្ដី គឺសំខាន់ឲ្យអ្នកពាក់បុគ្គលិកលក្ខណៈថ្មី។ តើអ្នកអាចធ្វើដូច្នេះតាមរបៀបណា? សូមមានគោលដៅយកតម្រាប់ព្រះយេហូវ៉ាពេលដែលរៀនអំពីគុណសម្បត្តិផ្សេងៗរបស់លោក។ (អេភ. ៥:១, ២) ជាឧទាហរណ៍ ពេលអ្នកអានកំណត់ហេតុក្នុងគម្ពីរអំពីការអភ័យទោសរបស់ព្រះយេហូវ៉ា សូមសួរខ្លួនអ្នកថា ‹តើខ្ញុំអភ័យទោសឲ្យអ្នកឯទៀតឬទេ?›។ មួយវិញទៀត ពេលអ្នកអានកំណត់ហេតុអំពីចិត្តអាណិតអាសូររបស់ព្រះយេហូវ៉ាចំពោះបុគ្គលក្រីក្រ អ្នកក៏អាចសួរខ្លួនអ្នកថា ‹តើខ្ញុំព្រួយបារម្ភដូចលោកចំពោះបងប្អូនរួមជំនឿដែលខ្វះខាត ហើយបង្ហាញដោយការប្រព្រឹត្តថាខ្ញុំចង់ជួយពួកគេឬទេ?›។ ចូរបន្ដផ្លាស់ប្ដូរជាថ្មីនូវរបៀបគិតគូររបស់អ្នកដោយពាក់បុគ្គលិកលក្ខណៈថ្មី ហើយសូមមានចិត្តអត់ធ្មត់ចំពោះខ្លួនឯងកាលដែលធ្វើដូច្នេះ។
១២. តើបងស្ទីវើនបានពិសោធយ៉ាងដូចម្ដេចថាគម្ពីរកែប្រែជីវិតគាត់?
១២ បងស្ទីវើនដែលបានត្រូវរៀបរាប់ខាងលើ បានឃើញថាបន្តិចម្ដងៗគាត់អាចពាក់បុគ្គលិកលក្ខណៈថ្មី។ គាត់និយាយថា៖ «ចាប់តាំងពីជ្រមុជទឹក ខ្ញុំបានជួបនូវស្ថានភាពមួយចំនួនដែលអាចធ្វើឲ្យខ្ញុំផ្ទុះកំហឹង។ ប៉ុន្តែ ខ្ញុំបានព្យាយាមរក្សាចិត្តស្ងប់ ឬដើរចេញពីមនុស្សដែលខំបង្កហេតុ។ ប្រពន្ធខ្ញុំនិងអ្នកផ្សេងទៀតសរសើរខ្ញុំដែលបានអត់ធ្មត់ចំពោះស្ថានភាពទាំងនោះ។ ខ្ញុំមិនដែលគិតថាខ្ញុំអាចធ្វើបានទេ! នេះមិនមែនមកពីសមត្ថភាពរបស់ខ្ញុំឡើយ ផ្ទុយទៅវិញខ្ញុំជឿជាក់ថា គឺគម្ពីរមានឫទ្ធានុភាពកែប្រែជីវិតខ្ញុំ»។
ចូរបន្ដតយុទ្ធនឹងសេចក្ដីប៉ងប្រាថ្នាមិនត្រឹមត្រូវ
១៣. តើអ្វីនឹងជួយយើងឲ្យមានសេចក្ដីប៉ងប្រាថ្នាត្រឹមត្រូវ? (កាឡាទី ៥:១៦)
១៣ សូមអាន កាឡាទី ៥:១៦។ យើងត្រូវខំតយុទ្ធធ្វើអ្វីដែលត្រឹមត្រូវ។ ដើម្បីជួយយើងឲ្យយកឈ្នះក្នុងការតយុទ្ធនោះ ព្រះយេហូវ៉ាផ្ដល់ឫទ្ធានុភាពបរិសុទ្ធរបស់លោកដល់យើងដោយចិត្តទូលាយ។ ពេលយើងសិក្សាបណ្ដាំរបស់ព្រះ យើងអនុញ្ញាតឲ្យឫទ្ធានុភាពរបស់លោកមានឥទ្ធិពលមកលើយើង។ យើងក៏ទទួលឫទ្ធានុភាពបរិសុទ្ធរបស់លោកពេលយើងចូលរួមកិច្ចប្រជុំផងដែរ។ នៅកិច្ចប្រជុំទាំងនោះ យើងអាចចំណាយពេលជាមួយបងប្អូនដែលកំពុងព្យាយាមធ្វើអ្វីដែលត្រឹមត្រូវដូចយើង ហើយនោះលើកទឹកចិត្តយើង។ (ហេ. ១០:២៤, ២៥; ១៣:៧) ម្យ៉ាងទៀត ពេលយើងអធិដ្ឋានអស់ពីចិត្តទៅព្រះយេហូវ៉ា ហើយអង្វរសុំលោកជួយយើងឲ្យយកឈ្នះភាពទន់ខ្សោយណាមួយរបស់ខ្លួន លោកនឹងផ្ដល់ឲ្យយើងនូវឫទ្ធានុភាពបរិសុទ្ធរបស់លោកដើម្បីពង្រឹងកម្លាំងយើងឲ្យបន្តតស៊ូ។ ទោះជាសកម្មភាពទាំងនេះទំនងជានឹងមិនបំបាត់ចោលសេចក្ដីប៉ងប្រាថ្នាមិនត្រឹមត្រូវក្ដី នោះនឹងជួយយើងមិនឲ្យប្រព្រឹត្តតាមសេចក្ដីប៉ងប្រាថ្នាទាំងនោះ។ ដូចកាឡាទី ៥:១៦ចែង ពួកអ្នកដែលឲ្យឫទ្ធានុភាពរបស់ព្រះដឹកនាំនឹង«មិនបំពេញតាមសេចក្ដីប៉ងប្រាថ្នានៃរូបកាយឡើយ»។
១៤. ហេតុអ្វីគឺសំខាន់ឲ្យបន្ដបណ្ដុះឲ្យមានសេចក្ដីប៉ងប្រាថ្នាត្រឹមត្រូវ?
១៤ ពេលយើងបានចាប់ផ្ដើមធ្វើអ្វីផ្សេងៗដើម្បីជួយយើងឲ្យមានចំណងមិត្តភាពជាមួយព្រះយេហូវ៉ា គឺសំខាន់ចាំបាច់ឲ្យយើងរក្សាទម្លាប់នោះ ហើយបន្តបណ្ដុះឲ្យមានសេចក្ដីប៉ងប្រាថ្នាត្រឹមត្រូវ។ ហេតុអ្វី? ពីព្រោះសត្រូវមួយរបស់យើងមិនដែលដេកទេ។ សត្រូវនោះគឺការចង់ធ្វើអ្វីដែលខុស។ សូម្បីតែក្រោយពីយើងបានទទួលការជ្រមុជទឹកហើយ ក៏យើងនៅតែប្រហែលជាចង់ធ្វើអ្វីដែលយើងគួរជៀសវាងធ្វើ រួមមានការលេងល្បែងស៊ីសង ការផឹកស្រាហួសប្រមាណ ឬការមើលរូបអាសអាភាសជាដើម។ (អេភ. ៥:៣, ៤) ប្អូនប្រុសវ័យក្មេងគ្រិស្តសាសនិកម្នាក់សារភាពថា៖ «អ្វីមួយដែលពិបាកបំផុតសម្រាប់ខ្ញុំគឺការចាប់ចិត្តលើមនុស្សដែលមានភេទដូចគ្នា។ ខ្ញុំបានគិតថាអារម្មណ៍នោះមាន ហើយនៅទីបំផុតនឹងបាត់ទៅវិញ ប៉ុន្តែអារម្មណ៍នោះមិនទៅណាទេ»។ តើអ្វីអាចជួយអ្នកបើអ្នកមានសេចក្ដីប៉ងប្រាថ្នាមិនត្រឹមត្រូវយ៉ាងខ្លាំង?
បើអ្នកមានសេចក្ដីប៉ងប្រាថ្នាមិនត្រឹមត្រូវ សូមកុំអស់សង្ឃឹម! អ្នកឯទៀតធ្លាប់ជួបបញ្ហាដូចនេះដែរ ហើយបានយកឈ្នះវា (សូមមើលវគ្គ១៥-១៦)
១៥. ហេតុអ្វីយើងទទួលការលើកទឹកចិត្តដោយដឹងថាបំណងប្រាថ្នាមិនត្រឹមត្រូវក៏កើតឡើងដល់«មនុស្សឯទៀត»ដែរ? (សូមមើលរូបភាព)
១៥ ពេលអ្នកកំពុងតយុទ្ធនឹងសេចក្ដីប៉ងប្រាថ្នាមិនត្រឹមត្រូវដ៏ខ្លាំង សូមចាំថាមិនមែនមានតែអ្នកម្នាក់ទេ។ គម្ពីរចែងថា៖ «គ្មានសេចក្ដីល្បួងណាកើតមានដល់អ្នករាល់គ្នាដែលមនុស្សឯទៀតមិនធ្លាប់ជួបនោះឡើយ»។ (១កូ. ១០:១៣ក) ប្រយោគនេះបានត្រូវសរសេរទៅកាន់បុរសស្ត្រីគ្រិស្តសាសនិកដែលរស់នៅក្រុងកូរិនថូស។ អ្នកខ្លះធ្លាប់ជាអ្នកផិតក្បត់ មនុស្សដែលស្រឡាញ់ភេទដូចគ្នា និងអ្នកប្រមឹកស្រា។ (១កូ. ៦:៩-១១) តើអ្នកគិតថាក្រោយពីពួកគេទទួលការជ្រមុជទឹក ពួកគេមិនដែលមានសេចក្ដីប៉ងប្រាថ្នាមិនត្រឹមត្រូវទាល់តែសោះឬទេ? គឺមិនអាចដូច្នេះទេ។ ពិតមែនថា ពួកអ្នកទាំងនោះគឺជាគ្រិស្តសាសនិកដែលព្រះបានរើសតាំង ប៉ុន្តែពួកគេនៅតែជាមនុស្សមិនល្អឥតខ្ចោះ។ ពួកគេច្បាស់ជាត្រូវតយុទ្ធនឹងសេចក្ដីប៉ងប្រាថ្នាមិនត្រឹមត្រូវដែលកើតមានម្ដងម្កាល។ នេះគួរលើកទឹកចិត្តយើង។ ហេតុអ្វី? ដោយសារនេះបង្ហាញថាមិនថាអ្នកកំពុងតយុទ្ធនឹងសេចក្ដីប៉ងប្រាថ្នាមិនត្រឹមត្រូវណាក៏ដោយ អ្នកឯទៀតបានយកឈ្នះវា។ អ្នកអាចមានជំនឿមាំមួន‹ដោយដឹងថាបងប្អូនរបស់អ្នករាល់គ្នាកំពុងឆ្លងកាត់ទុក្ខលំបាកដូចគ្នាដែរ›។—១ពេ. ៥:៩
១៦. តើយើងគួរជៀសវាងពីអន្ទាក់អ្វី ហើយហេតុអ្វី?
១៦ សូមជៀសវាងពីការគិតថាគ្មានអ្នកណាអាចយល់អំពីភាពទន់ខ្សោយដែលអ្នកកំពុងតយុទ្ធ។ ព្រោះនេះជាអន្ទាក់មួយ។ ការគិតដូច្នេះ អាចនាំឲ្យអ្នកសន្និដ្ឋានថាស្ថានភាពរបស់អ្នកគឺអស់សង្ឃឹម ហើយថាអ្នកមិនអាចទប់ទល់នឹងសេចក្ដីប៉ងប្រាថ្នាមិនត្រឹមត្រូវទាំងនោះ។ គម្ពីរចែងផ្ទុយពីនេះ គឺថា៖ «ព្រះគឺស្មោះត្រង់ ហើយលោកនឹងមិនឲ្យអ្នករាល់គ្នារងការល្បួងហួសពីសមត្ថភាពស៊ូទ្រាំរបស់អ្នករាល់គ្នាឡើយ តែលោកនឹងរៀបចំផ្លូវចេញ ដើម្បីឲ្យអ្នករាល់គ្នាអាចស៊ូទ្រាំនៅពេលជួបសេចក្ដីល្បួងនោះ»។ (១កូ. ១០:១៣ខ) ដូច្នេះ សូម្បីតែពេលយើងមានសេចក្ដីប៉ងប្រាថ្នាមិនត្រឹមត្រូវយ៉ាងខ្លាំង ក៏យើងអាចរក្សាចិត្តស្មោះត្រង់ចំពោះព្រះយេហូវ៉ា។ ដោយមានជំនួយពីព្រះយេហូវ៉ា យើងអាចជៀសវាងពីការប្រព្រឹត្តតាមសេចក្ដីប៉ងប្រាថ្នាមិនត្រឹមត្រូវទាំងនោះ។
១៧. ទោះជាយើងប្រហែលជាមិនអាចជៀសវាងពីការមានសេចក្ដីប៉ងប្រាថ្នាមិនត្រឹមត្រូវទាល់តែសោះក្ដី តើយើងអាចធ្វើអ្វី?
១៧ សូមចាំជានិច្ចថា ដោយសារអ្នកជាមនុស្សមិនល្អឥតខ្ចោះ អ្នកមិនអាចជៀសវាងពីការមានសេចក្ដីប៉ងប្រាថ្នាមិនត្រឹមត្រូវទាល់តែសោះបាននោះទេ។ ប៉ុន្តែពេលវាលេចមក អ្នកអាចបដិសេធវាភ្លាមៗ ដូចយ៉ូសែបបានធ្វើពេលគាត់បានរត់ចេញយ៉ាងលឿនពីប្រពន្ធរបស់ប៉ូទីផារ។ (ដក. ៣៩:១២) អ្នកមិនត្រូវប្រព្រឹត្តតាមសេចក្ដីប៉ងប្រាថ្នាមិនត្រឹមត្រូវឡើយ!
ចូរបន្ដខំព្យាយាម
១៨-១៩. តើយើងអាចសួរខ្លួននូវសំណួរអ្វីខ្លះកាលដែលយើងខំព្យាយាមផ្លាស់ប្ដូរជាថ្មីនូវរបៀបគិតគូររបស់យើង?
១៨ ការផ្លាស់ប្ដូរជាថ្មីនូវរបៀបគិតគូររបស់យើង រួមបញ្ចូលការបន្ដខំព្យាយាមដើម្បីធ្វើឲ្យគំនិត និងការប្រព្រឹត្តរបស់យើងនាំឲ្យព្រះយេហូវ៉ាពេញចិត្ត។ ដូច្នេះ យើងគួរពិនិត្យមើលខ្លួនជាទៀងទាត់ ហើយសួរខ្លួនថា ‹តើខ្ញុំមានការប្រព្រឹត្តដែលបង្ហាញថាខ្ញុំទទួលស្គាល់ថាគ្រាដែលយើងកំពុងរស់នៅជាគ្រាបន្ទាន់ឬទេ? តើខ្ញុំកំពុងរីកចម្រើនក្នុងការពាក់បុគ្គលិកលក្ខណៈថ្មីឬ? តើខ្ញុំកំពុងអនុញ្ញាតឲ្យឫទ្ធានុភាពរបស់ព្រះយេហូវ៉ាដឹកនាំជីវិតរបស់ខ្ញុំដើម្បីខ្ញុំអាចទប់ទល់មិនប្រព្រឹត្តតាមសេចក្ដីប៉ងប្រាថ្នាខាងរូបកាយឬទេ?›។
១៩ ពេលអ្នកពិនិត្យមើលខ្លួនឯង សូមកុំតម្រូវឲ្យខ្លួនធ្វើជាមនុស្សល្អឥតខ្ចោះ ប៉ុន្តែសូមពេញចិត្តនឹងការរីកចម្រើនរបស់ខ្លួន។ បើអ្នកឃើញថាមានអ្វីដែលអ្នកត្រូវរីកចម្រើនថែមទៀត សូមកុំធ្លាក់ទឹកចិត្ត។ ផ្ទុយទៅវិញ សូមធ្វើតាមយោបល់នៅភីលីព ៣:១៦ដែលថា៖ «អ្វីដែលយើងបានធ្វើដើម្បីឲ្យជឿនទៅមុខដល់កម្រិតនេះ ចូរយើងបន្តជឿនទៅមុខដោយធ្វើដូច្នោះតទៅទៀត»។ ពេលអ្នកធ្វើដូច្នេះ សូមជឿជាក់ថាព្រះយេហូវ៉ានឹងឲ្យពរចំពោះការខំប្រឹងរបស់អ្នកដើម្បីបន្ដផ្លាស់ប្ដូរជាថ្មីនូវរបៀបគិតគូររបស់អ្នក។
ចម្រៀងលេខ៣៦ យើងការពារចិត្ត
a សាវ័កប៉ូលបានដាស់តឿនបងប្អូនរួមជំនឿឲ្យការពារខ្លួនមិនឲ្យទទួលឥទ្ធិពលពីរបៀបរបបពិភពលោកនេះ។ នេះពិតជាយោបល់ល្អសម្រាប់យើងនៅសព្វថ្ងៃនេះ។ យើងត្រូវធ្វើឲ្យប្រាកដថាយើងមិនទទួលឥទ្ធិពលពីពិភពលោកនេះទាល់តែសោះ។ ដើម្បីធ្វើដូច្នេះ យើងត្រូវបន្ដកែតម្រង់របៀបគិតគូររបស់យើងនៅពេលណាដែលយើងដឹងថាវាមិនសមស្របតាមបំណងប្រាថ្នារបស់ព្រះ។ ក្នុងអត្ថបទនេះ យើងនឹងពិចារណាអំពីរបៀបដែលយើងអាចធ្វើដូច្នេះ។
b សូមមើលអត្ថបទដែលមានចំណងជើងថា«ខ្ញុំធ្លាប់ជាមនុស្សអាក្រក់ខ្លាំងណាស់» ក្នុងសៀវភៅស្ដើងទស្សនាវដ្ដីប៉មយាម ថ្ងៃទី១ ខែកក្កដា ឆ្នាំ២០១៥។
c ការពណ៌នាអំពីរូបភាព: ប្អូនប្រុសវ័យក្មេងម្នាក់កំពុងគិតថាតើគាត់គួរទៅរៀននៅសកលវិទ្យាល័យឬចាប់ផ្ដើមត្រួសត្រាយ។