អត្ថបទសិក្សា ៩
ចម្រៀងលេខ៧៥ ‹ខ្ញុំនៅនេះហើយ! សូមលោកចាត់ខ្ញុំ!›
តើអ្នកត្រៀមខ្លួនដើម្បីប្រគល់ខ្លួនជូនព្រះយេហូវ៉ាហើយឬនៅ?
«តើខ្ញុំនឹងយកអ្វីដើម្បីតបស្នងព្រះយេហូវ៉ា ចំពោះអ្វីល្អទាំងអស់ដែលលោកបានធ្វើសម្រាប់ខ្ញុំ?»។—ចសព. ១១៦:១២
ចំណុចផ្ដោត
អត្ថបទនេះអាចជួយអ្នកឲ្យបណ្ដុះចំណងមិត្តភាពជិតស្និទ្ធជាមួយព្រះយេហូវ៉ា។ យ៉ាងនេះ អ្នកនឹងចង់ប្រគល់ខ្លួនជូនលោក ហើយទទួលការជ្រមុជទឹក។
១-២. តើបុគ្គលណាម្នាក់ត្រូវធ្វើអ្វីមុនទទួលការជ្រមុជទឹក?
ក្នុងអំឡុងប្រាំឆ្នាំកន្លងទៅនេះ មនុស្សជាង១លាននាក់បានទទួលការជ្រមុជទឹកជាសាក្សីព្រះយេហូវ៉ា។ ពួកគេជាច្រើននាក់គឺដូចធីម៉ូថេដែលជាអ្នកកាន់តាមនៅសតវត្សរ៍ទី១ ដែលបានត្រូវបង្រៀនអំពីសេចក្ដីពិត‹តាំងពីនៅជាទារកនៅឡើយ›។ (២ធី. ៣:១៤, ១៥) អ្នកឯទៀតបានរៀនអំពីព្រះយេហូវ៉ាកាលដែលពេញវ័យ ហើយអ្នកខ្លះរៀនពេលដែលពួកគេមានវ័យចាស់។ ជាឧទាហរណ៍ប៉ុន្មានឆ្នាំមុន ស្ត្រីម្នាក់ដែលបានសិក្សាគម្ពីរជាមួយសាក្សីព្រះយេហូវ៉ាបានទទួលការជ្រមុជទឹកពេលអាយុ៩៧ឆ្នាំ។
២ បើអ្នកជាសិស្សគម្ពីរ ឬបើអ្នកបានត្រូវចិញ្ចឹមអប់រំដោយឪពុកម្ដាយដែលជាសាក្សី តើអ្នកកំពុងគិតអំពីការទទួលការជ្រមុជទឹកឬទេ? នេះគឺជាគោលដៅល្អណាស់! ប៉ុន្តែមុនទទួលការជ្រមុជទឹក អ្នកនឹងត្រូវប្រគល់ខ្លួនជូនព្រះយេហូវ៉ា។ អត្ថបទនេះនឹងពន្យល់ថាតើការប្រគល់ខ្លួនរួមបញ្ចូលអ្វី? អត្ថបទនេះក៏នឹងជួយអ្នកឲ្យឃើញអំពីមូលហេតុដែលអ្នកមិនគួរស្ទាក់ស្ទើរប្រគល់ខ្លួនជូនព្រះ ហើយទទួលការជ្រមុជទឹកពេលអ្នកអាចធ្វើដូច្នេះបាន។
តើការប្រគល់ខ្លួនគឺជាអ្វី?
៣. សូមលើកឧទាហរណ៍ខ្លះពីគម្ពីរអំពីបុគ្គលដែលបានត្រូវប្រគល់ខ្លួនជូនព្រះយេហូវ៉ា។
៣ ក្នុងគម្ពីរ បុគ្គលដែលប្រគល់ខ្លួនជូនព្រះយេហូវ៉ាបានត្រូវញែកចេញសម្រាប់គោលបំណងដ៏ពិសិដ្ឋមួយ។ ជនជាតិអ៊ីស្រាអែលជាប្រជាជាតិមួយដែលបានប្រគល់ខ្លួនជូនព្រះយេហូវ៉ា។ ប៉ុន្តែ បុគ្គលខ្លះក្នុងចំណោមប្រជាជាតិនោះបានប្រគល់ខ្លួនជូនព្រះយេហូវ៉ាតាមរបៀបពិសេស។ ជាឧទាហរណ៍ អេរ៉ុនបានពាក់«ស្លាកសញ្ញានៃការប្រគល់ខ្លួនជូនព្រះ» ពោលគឺស្លាកមាសដែលខាត់យ៉ាងភ្លឺលើមុខឈ្នួតរបស់គាត់។ ស្លាកមាសនោះបញ្ជាក់ថាគាត់បានត្រូវញែកចេញឲ្យបម្រើតាមរបៀបពិសេស ពោលគឺជាសម្ដេចសង្ឃរបស់ជនជាតិអ៊ីស្រាអែល។ (ចល. ៨:៩, កំ.ស.) ពួកណាសារីតក៏បានប្រគល់ខ្លួនជូនព្រះយេហូវ៉ាតាមរបៀបពិសេសដែរ។ ពាក្យ«ណាសារីត»ដែលជាពាក្យមកពីភាសាហេប្រឺណាសៀ មានន័យថា«អ្នកដែលបានត្រូវញែកចេញ» ឬ«អ្នកដែលបានប្រគល់ខ្លួន»។ ពួកណាសារីតត្រូវធ្វើតាមបង្គាប់ពិសេសដែលបានត្រូវកត់ទុកសម្រាប់ពួកគេក្នុងច្បាប់ម៉ូសេ។—ជប. ៦:២-៨
៤. (ក) តើតាមរបៀបណាពួកអ្នកដែលបានប្រគល់ខ្លួនជូនព្រះយេហូវ៉ាបានត្រូវញែកចេញសម្រាប់គោលបំណងពិសិដ្ឋ? (ខ) តើការ«ប្រគល់ខ្លួនជូនព្រះ»មានន័យយ៉ាងណា? (សូមមើលរូបភាពផងដែរ)
៤ ពេលអ្នកប្រគល់ខ្លួនជូនព្រះយេហូវ៉ា អ្នកសម្រេចចិត្តធ្វើជាអ្នកកាន់តាមរបស់លោកយេស៊ូគ្រិស្ត ហើយចាត់ទុកការធ្វើតាមបំណងប្រាថ្នារបស់ព្រះថាសំខាន់បំផុតក្នុងជីវិតអ្នក។ តើការប្រគល់ខ្លួនជាគ្រិស្តសាសនិកតម្រូវឲ្យអ្នកធ្វើអ្វី? លោកយេស៊ូបានមានប្រសាសន៍ថា៖ «បើអ្នកណាចង់មកតាមខ្ញុំ អ្នកនោះត្រូវប្រគល់ខ្លួនជូនព្រះ»។ (ម៉ាថ. ១៦:២៤) ពាក្យភាសាក្រិចដែលបកប្រែថា«ត្រូវប្រគល់ខ្លួនជូនព្រះ» ក៏អាចបកប្រែថា«គាត់ត្រូវនិយាយថាទេចំពោះខ្លួនឯង»។ ក្នុងនាមជាអ្នកបម្រើដែលបានប្រគល់ខ្លួនជូនព្រះយេហូវ៉ា អ្នកនឹងត្រូវនិយាយថាទេចំពោះអ្វីណាក៏ដោយដែលប្រឆាំងនឹងបំណងប្រាថ្នារបស់លោក។ (២កូ. ៥:១៤, ១៥) នេះរួមបញ្ចូល«ការប្រព្រឹត្តដែលផុសចេញពីភាពខុសឆ្គង»ដូចជាការប្រព្រឹត្តអំពើប្រាសចាកសីលធម៌ខាងផ្លូវភេទ។ (កាឡ. ៥:១៩-២១; ១កូ. ៦:១៨) តើបង្គាប់បែបនេះនឹងធ្វើឲ្យជីវិតរបស់អ្នកពិបាកឬទេ? មិនមែនទេ ព្រោះអ្នកស្រឡាញ់ព្រះយេហូវ៉ា ហើយជឿជាក់ថាច្បាប់របស់លោកមានប្រយោជន៍ចំពោះអ្នក។ (ចសព. ១១៩:៩៧; អេ. ៤៨:១៧, ១៨) បងប្រុសម្នាក់ឈ្មោះនីកូឡាសនិយាយថា៖ «អ្នកអាចចាត់ទុកខ្នាតតម្រារបស់ព្រះយេហូវ៉ាដូចជារនាំងគុកដែលរារាំងអ្នកមិនឲ្យធ្វើអ្វីដែលអ្នកចង់ធ្វើ ឬដូចរនាំងទ្រុងតោដែលការពារអ្នកពីគ្រោះថ្នាក់»។
តើអ្នកចាត់ទុកខ្នាតតម្រារបស់ព្រះយេហូវ៉ាដូចជារនាំងគុកដែលរារាំងអ្នកមិនឲ្យធ្វើអ្វីដែលអ្នកចង់ធ្វើឬដូចរនាំងទ្រុងតោដែលការពារអ្នកពីគ្រោះថ្នាក់? (សូមមើលវគ្គ៤)
៥. (ក) តើអ្នកអាចប្រគល់ខ្លួនជូនព្រះយេហូវ៉ាយ៉ាងដូចម្ដេច? (ខ) តើការប្រគល់ខ្លួនជូនព្រះនិងការជ្រមុជទឹកខុសគ្នាយ៉ាងណា? (សូមមើលរូបភាពផងដែរ)
៥ តើអ្នកអាចប្រគល់ខ្លួនជូនព្រះយេហូវ៉ាយ៉ាងដូចម្ដេច? អ្នកសន្យានឹងលោកក្នុងសេចក្ដីអធិដ្ឋានថាអ្នកនឹងគោរពប្រណិប័តន៍តែលោកប៉ុណ្ណោះ ហើយថាអ្នកនឹងចាត់ទុកបំណងប្រាថ្នារបស់លោកថាសំខាន់បំផុតក្នុងជីវិតរបស់អ្នក។ យ៉ាងនេះ អ្នកកំពុងសន្យានឹងព្រះយេហូវ៉ាថាអ្នកនឹងបន្ដស្រឡាញ់លោក«ឲ្យអស់ពីដួងចិត្ត អស់ពីជីវិត អស់ពីសមត្ថភាពរិះគិត និងអស់ពីកម្លាំងកាយ»។ (ម៉ាក. ១២:៣០) ការប្រគល់ខ្លួនជូនព្រះគឺជាអ្វីដែលអ្នកធ្វើម្នាក់ឯង គឺរវាងអ្នកនិងព្រះយេហូវ៉ា។ រីឯការជ្រមុជទឹកគឺធ្វើឡើងជាសាធារណៈ ហើយនោះបង្ហាញអ្នកឯទៀតថាអ្នកបានប្រគល់ខ្លួនជូនព្រះរួចហើយ។ ការប្រគល់ខ្លួនជូនព្រះគឺជាពាក្យសម្បថដ៏ពិសិដ្ឋមួយ ហើយព្រះយេហូវ៉ាតម្រូវឲ្យអ្នករស់នៅស្របតាមពាក្យសម្បថនោះ ដូចអ្នកតម្រូវពីខ្លួនឯងដែរ។—អទ. ៥:៤, ៥
ការប្រគល់ខ្លួនជូនព្រះយេហូវ៉ាមានន័យថាអ្នកសន្យានឹងលោកថាអ្នកនឹងគោរពប្រណិប័តន៍តែលោកប៉ុណ្ណោះ ហើយថានឹងចាត់ទុកបំណងប្រាថ្នារបស់លោកថាសំខាន់បំផុតក្នុងជីវិតរបស់អ្នក (សូមមើលវគ្គ៥)
ហេតុអ្វីប្រគល់ខ្លួនជូនព្រះយេហូវ៉ា?
៦. តើអ្វីជំរុញចិត្តបុគ្គលណាម្នាក់ឲ្យប្រគល់ខ្លួនជូនព្រះយេហូវ៉ា?
៦ មូលហេតុសំខាន់ចម្បងដែលអ្នកប្រគល់ខ្លួនជូនព្រះយេហូវ៉ាគឺថាអ្នកស្រឡាញ់លោក។ សេចក្ដីស្រឡាញ់របស់អ្នកមិនមានមូលដ្ឋានលើអារម្មណ៍ប៉ុណ្ណោះទេ។ ផ្ទុយទៅវិញ គឺមានមូលដ្ឋានលើ«ចំណេះត្រឹមត្រូវ» និង«ការយល់ដឹងដែលឫទ្ធានុភាពរបស់លោកផ្ដល់ឲ្យ» ពោលគឺអ្វីដែលអ្នកបានរៀនអំពីព្រះយេហូវ៉ាដែលនាំឲ្យសេចក្ដីស្រឡាញ់របស់អ្នកចំពោះលោកកើនឡើង។ (កូឡ. ១:៩) ការសិក្សាបទគម្ពីរបានធ្វើឲ្យអ្នកជឿជាក់ថា (១) ព្រះយេហូវ៉ាគឺជាបុគ្គលពិត (២) គម្ពីរជាបណ្ដាំរបស់លោកដែលបានត្រូវសរសេរក្រោមការដឹកនាំរបស់លោក និង(៣) លោកប្រើអង្គការលោកដើម្បីសម្រេចបំណងប្រាថ្នារបស់លោក។
៧. តើយើងគួរធ្វើអ្វីខ្លះមុនយើងប្រគល់ខ្លួនជូនព្រះ?
៧ ពួកអ្នកដែលប្រគល់ខ្លួនជូនព្រះយេហូវ៉ាគួរស្គាល់សេចក្ដីបង្រៀនបឋមក្នុងបណ្ដាំរបស់លោក ហើយរស់នៅស្របតាមខ្នាតតម្រាពីគម្ពីរ។ ពួកគេខំអស់ពីសមត្ថភាពដើម្បីប្រាប់អ្នកឯទៀតអំពីអ្វីដែលពួកគេបានរៀន។ (ម៉ាថ. ២៨:១៩, ២០) សេចក្ដីស្រឡាញ់របស់ពួកគេចំពោះព្រះយេហូវ៉ាបានកើនឡើង ហើយពួកគេចង់ជូនភក្ដីភាពផ្ដាច់មុខដល់លោក។ តើអ្វីទាំងអស់នេះរៀបរាប់អំពីអ្នកឬទេ? ដោយសារអ្នកមានសេចក្ដីស្រឡាញ់បែបនេះ អ្នកនឹងមិនចាត់ទុកការប្រគល់ខ្លួននិងការជ្រមុជទឹកថាជាអ្វីដែលអ្នកធ្វើដោយសារតែអ្នកចង់ផ្គាប់ចិត្តអ្នកបង្រៀនគម្ពីរឬឪពុកម្ដាយរបស់អ្នក ហើយក៏មិនមែនជាអ្វីដែលអ្នកធ្វើដើម្បីឲ្យដូចមិត្តភក្ដិរបស់អ្នកដែរ។
៨. តើតាមរបៀបណាការមានចិត្តកតញ្ញូជួយអ្នកឲ្យធ្វើការសម្រេចចិត្តប្រគល់ខ្លួនជូនព្រះយេហូវ៉ា? (ចម្រៀងសរសើរព្រះ ១១៦:១២-១៤)
៨ ពេលអ្នកគិតអំពីអ្វីទាំងអស់ដែលព្រះយេហូវ៉ាបានធ្វើសម្រាប់អ្នក អ្នកនឹងដឹងគុណលោក ហើយចង់ប្រគល់ខ្លួនជូនលោក។ (សូមអាន ចម្រៀងសរសើរព្រះ ១១៦:១២-១៤) គម្ពីរហៅព្រះយេហូវ៉ាយ៉ាងត្រឹមត្រូវថាជាអ្នកឲ្យ«គ្រប់ទាំងរបស់ល្អនិងអំណោយដ៏ល្អឥតខ្ចោះ»។ (យ៉ា. ១:១៧) អំណោយដ៏ធំជាងគេបំផុតគឺគ្រឿងបូជារបស់លោកយេស៊ូដែលជាបុត្រលោក។ សូមគិតអំពីភាពដ៏អស្ចារ្យនៃអំណោយនោះ! ថ្លៃលោះបានបើកឱកាសឲ្យអ្នកមានចំណងមិត្តភាពជិតស្និទ្ធជាមួយព្រះយេហូវ៉ា។ ម្យ៉ាងទៀត លោកបានឲ្យអ្នកនូវសេចក្ដីសង្ឃឹមរស់ជារៀងរហូត។ (១យ៉ូន. ៤:៩, ១០, ១៩) ការប្រគល់ខ្លួនជូនព្រះយេហូវ៉ាគឺជារបៀបមួយដើម្បីបង្ហាញថាអ្នកមានចិត្តកតញ្ញូចំពោះការប្រព្រឹត្តដែលបង្ហាញអំពីសេចក្ដីស្រឡាញ់ដ៏ធំធេងបំផុត ព្រមទាំងចំពោះពរទាំងអស់ទៀតដែលព្រះយេហូវ៉ាបានផ្ដល់ឲ្យអ្នក។ (បច. ១៦:១៧; ២កូ. ៥:១៥) ការមានចិត្តកតញ្ញូបែបនេះបានត្រូវលើកបញ្ជាក់ក្នុងមេរៀនទី៤៦ ចំណុចទី៤ ក្នុងសៀវភៅសប្បាយនឹងជីវិតដែលគ្មានទីបញ្ចប់! រួមមានវីដេអូបីនាទីជាងដែលមានចំណងជើងថា ចូរជូនអំណោយដល់ព្រះ។
តើអ្នកត្រៀមខ្លួនដើម្បីប្រគល់ខ្លួនជូនព្រះនិងទទួលការជ្រមុជទឹកឬទេ?
៩. ហេតុអ្វីបុគ្គលណាម្នាក់មិនគួរមានសម្ពាធដើម្បីប្រគល់ខ្លួនជូនព្រះ?
៩ អ្នកប្រហែលជាមានអារម្មណ៍ថាអ្នកមិនទាន់ត្រៀមខ្លួនដើម្បីប្រគល់ខ្លួនជូនព្រះនិងទទួលការជ្រមុជទឹកទេ។ ប្រហែលជាអ្នកនៅតែត្រូវធ្វើការផ្លាស់ប្ដូរផ្សេងៗក្នុងជីវិតដើម្បីឲ្យស្របតាមខ្នាតតម្រារបស់ព្រះយេហូវ៉ា ឬប្រហែលជាអ្នកត្រូវការពេលថែមទៀតដើម្បីពង្រឹងជំនឿរបស់អ្នក។ (កូឡ. ២:៦, ៧) ពិតណាស់ មិនមែនសិស្សគម្ពីរទាំងអស់រីកចម្រើននៅពេលដូចគ្នាទេ ហើយមិនមែនប្អូនៗវ័យក្មេងទាំងអស់ត្រៀមខ្លួនដើម្បីប្រគល់ខ្លួនជូនព្រះនិងទទួលការជ្រមុជទឹកនៅអាយុដូចគ្នាដែរ។ សូមព្យាយាមយល់ថា តើអ្នកត្រូវធ្វើការផ្លាស់ប្ដូរអ្វីខ្លះ ហើយក្រោយមកធ្វើអ្វីដែលអ្នកអាចធ្វើបានដោយមិនប្រៀបធៀបខ្លួននឹងអ្នកឯទៀត។—កាឡ. ៦:៤, ៥
១០. តើអ្នកអាចធ្វើអ្វីបើអ្នកគិតថាអ្នកមិនទាន់ត្រៀមខ្លួនដើម្បីប្រគល់ខ្លួនជូនព្រះនិងទទួលការជ្រមុជទឹក? (សូមមើលផងដែរនូវប្រអប់ដែលមានចំណងជើងថា «សម្រាប់ពួកអ្នកដែលធំឡើងក្នុងសេចក្ដីពិត»)
១០ ទោះជាអ្នកទទួលស្គាល់ថាអ្នកមិនទាន់ត្រៀមខ្លួនដើម្បីប្រគល់ខ្លួនជូនព្រះយេហូវ៉ាក្ដី សូមបន្ដទុកនេះជាគោលដៅរបស់អ្នក។ សូមសុំព្រះយេហូវ៉ាឲ្យជួយអ្នកធ្វើការកែប្រែណាក៏ដោយដែលចាំបាច់ក្នុងជីវិតរបស់អ្នក។ (ភី. ២:១៣; ៣:១៦) អ្នកអាចប្រាកដថាលោកនឹងស្ដាប់សេចក្ដីអធិដ្ឋានរបស់អ្នក ហើយតបឆ្លើយ។—១យ៉ូន. ៥:១៤
មូលហេតុដែលអ្នកខ្លះស្ទាក់ស្ទើរ
១១. តើព្រះយេហូវ៉ានឹងជួយយើងឲ្យរក្សាភាពស្មោះត្រង់ចំពោះលោកយ៉ាងដូចម្ដេច?
១១ អ្នកខ្លះដែលបានត្រៀមខ្លួនដើម្បីប្រគល់ខ្លួនជូនព្រះនិងទទួលការជ្រមុជទឹកនៅតែស្ទាក់ស្ទើរ។ ពួកគេប្រហែលជាឆ្ងល់ថា ‹ចុះបើក្រោយមកខ្ញុំប្រព្រឹត្តអំពើខុសឆ្គងធ្ងន់ធ្ងរ ហើយបានត្រូវបណ្ដាច់មិត្តភាព?›។ បើអ្នកមានការភ័យខ្លាចបែបនេះ សូមជឿជាក់ថាព្រះយេហូវ៉ានឹងផ្ដល់អ្វីទាំងអស់ដែលអ្នកត្រូវការ ប្រយោជន៍ឲ្យអ្នក«ប្រព្រឹត្តសមជាអ្នកបម្រើរបស់[លោក] ដើម្បីធ្វើឲ្យលោកពេញចិត្តទាំងស្រុង»។ (កូឡ. ១:១០) លោកក៏នឹងផ្ដល់កម្លាំងឲ្យអ្នកដើម្បីធ្វើអ្វីដែលត្រឹមត្រូវ។ លោកបានបង្ហាញរួចហើយថាលោកអាចធ្វើដូច្នេះតាមរបៀបដែលលោកប្រព្រឹត្តចំពោះបុគ្គលជាច្រើននាក់។ (១កូ. ១០:១៣) នេះគឺជាមូលហេតុមួយដែលមិនសូវមានមនុស្សបណ្ដាច់មិត្តភាពចេញពីក្រុមជំនុំគ្រិស្តសាសនិក។ ព្រះយេហូវ៉ាជួយរាស្ត្រលោកឲ្យរក្សាភាពស្មោះត្រង់។
១២. តើយើងអាចជៀសវាងពីការប្រព្រឹត្តអំពើខុសឆ្គងធ្ងន់ធ្ងរយ៉ាងដូចម្ដេច?
១២ មនុស្សមិនល្អឥតខ្ចោះម្នាក់ៗបានត្រូវល្បងលឲ្យធ្វើអ្វីដែលខុស។ (យ៉ា. ១:១៤) ប៉ុន្តែអ្នកត្រូវសម្រេចចិត្តថាអ្នកនឹងប្រព្រឹត្តយ៉ាងណាពេលអ្នកបានត្រូវល្បងល។ តាមការពិត គឺអ្នកដែលជាអ្នកទទួលខុសត្រូវចំពោះរបៀបរស់នៅរបស់អ្នក។ អ្នកខ្លះអះអាងថាយើងមិនអាចគ្រប់គ្រងអារម្មណ៍និងការប្រព្រឹត្តរបស់យើងបានទេ។ ប៉ុន្តែ នេះមិនមែនជាការពិតឡើយ។ អ្នកអាចរៀនឲ្យចេះគ្រប់គ្រងសេចក្ដីប៉ងប្រាថ្នាមិនត្រឹមត្រូវរបស់អ្នក។ ដូច្នេះសូម្បីតែពេលអ្នកបានត្រូវល្បងល ក៏អ្នកអាចសម្រេចចិត្តមិនធ្វើអ្វីដែលអាក្រក់។ យ៉ាងនេះ សូមអធិដ្ឋានរាល់ថ្ងៃ រក្សាទម្លាប់ល្អក្នុងការសិក្សាផ្ទាល់ខ្លួន ចូលរួមកិច្ចប្រជុំគ្រិស្តសាសនិក និងប្រាប់អ្នកឯទៀតអំពីជំនឿរបស់អ្នក។ ការធ្វើអ្វីទាំងនេះជាទៀងទាត់នឹងផ្ដល់កម្លាំងដល់អ្នកដើម្បីរស់នៅស្របតាមពាក្យសម្បថរបស់អ្នកអំពីការប្រគល់ខ្លួនជូនព្រះ។ ម្យ៉ាងទៀត សូមចាំជានិច្ចថាព្រះយេហូវ៉ានឹងជួយអ្នកឲ្យធ្វើដូច្នេះ។—កាឡ. ៥:១៦
១៣. តើយ៉ូសែបបានទុកគំរូល្អអ្វីឲ្យយើង?
១៣ អ្នកនឹងងាយស្រួលជាងឲ្យរស់នៅស្របតាមការប្រគល់ខ្លួនរបស់អ្នកបើអ្នកសម្រេចចិត្តទុកជាមុនថាអ្នកនឹងធ្វើអ្វីបើជួបការល្បួង។ គម្ពីរប្រាប់យើងអំពីបុគ្គលមួយចំនួនដែលទំនងជាបានធ្វើដូច្នេះ ទោះជាពួកគេក៏ជាមនុស្សមិនល្អឥតខ្ចោះក្ដី។ ជាឧទាហរណ៍ ប្រពន្ធរបស់ប៉ូទីផាបានព្យាយាមល្បួងលួងលោមយ៉ូសែបម្ដងហើយម្ដងទៀត ប៉ុន្តែយ៉ូសែបដឹងច្បាស់រួចហើយថាគាត់នឹងធ្វើអ្វីក្នុងករណីនេះ។ គម្ពីរប្រាប់យើងថា«យ៉ូសែបបានបដិសេធ» ហើយគាត់បាននិយាយថា៖ «តើខ្ញុំអាចប្រព្រឹត្តអំពើខុសឆ្គងចំពោះព្រះ ដោយធ្វើអំពើដ៏អាក្រក់ក្រៃលែងដូចនេះម្ដេចបាន?»។ (ដក. ៣៩:៨-១០) យ៉ូសែបច្បាស់ជាបានដឹងថាគាត់នឹងមានប្រតិកម្មយ៉ាងណាមុននាងព្យាយាមល្បួងគាត់ទៅទៀត។ នេះបានធ្វើឲ្យគាត់ងាយស្រួលជាងពេលគាត់ជួបការល្បួង។
១៤. តើតាមរបៀបណាយើងអាចរៀនឲ្យចេះនិយាយថាទេចំពោះអំពើខុសឆ្គង?
១៤ តើអ្នកអាចបង្ហាញការតាំងចិត្តស្រដៀងនឹងយ៉ូសែបយ៉ាងដូចម្ដេច? អ្នកអាចសម្រេចចិត្តនៅឥឡូវនេះថាអ្នកនឹងធ្វើអ្វីបើជួបការល្បួង។ សូមរៀនឲ្យចេះនិយាយថាទេភ្លាមៗចំពោះអ្វីដែលព្រះយេហូវ៉ាស្អប់ ហើយមិនថែមទាំងគិតអំពីអ្វីទាំងនោះឡើយ។ (ចសព. ៩៧:១០; ១១៩:១៦៥) យ៉ាងនេះ អ្នកនឹងមិនប្រព្រឹត្តអំពើខុសឆ្គងពេលជួបការល្បួង។ អ្នកនឹងដឹងរួចហើយថាអ្នកនឹងមានប្រតិកម្មយ៉ាងណា ហើយតាំងចិត្តធ្វើអ្វីនោះ។
១៥. តើបុគ្គលណាម្នាក់អាចបង្ហាញយ៉ាងដូចម្ដេចថាគាត់កំពុង«ខំស្វែងរក[ព្រះយេហូវ៉ា]អស់ពីចិត្ត»? (ហេប្រឺ ១១:៦)
១៥ អ្នកប្រហែលជាដឹងថាអ្នកបានរកឃើញសេចក្ដីពិត ហើយថាអ្នកចង់បម្រើព្រះយេហូវ៉ាឲ្យអស់ពីដួងចិត្ត។ ប៉ុន្តែ មានអ្វីមួយនៅតែរារាំងអ្នកមិនឲ្យប្រគល់ខ្លួនជូនព្រះនិងទទួលការជ្រមុជទឹក។ ដូច្នេះ តើអ្នកអាចធ្វើអ្វី? អ្នកអាចធ្វើដូចស្ដេចដាវីឌ។ អ្នកអាចអង្វរព្រះយេហូវ៉ាថា៖ «ឱព្រះអើយ សូមស្វែងយល់អំពីខ្ញុំយ៉ាងល្អិតល្អន់ ហើយសូមស្គាល់ចិត្តខ្ញុំយ៉ាងច្បាស់ផង។ សូមពិនិត្យមើលខ្ញុំ ដើម្បីដឹងថាខ្ញុំខ្វល់ខ្វាយអំពីរឿងអ្វីខ្លះ។ សូមលោកមើលខ្ញុំឲ្យដឹងថា ក្នុងចិត្តគំនិតខ្ញុំមានអ្វីដែលមិនល្អឬយ៉ាងណា ហើយសូមមេត្តានាំខ្ញុំដើរលើផ្លូវទៅកាន់ជីវិតដែលគ្មានទីបញ្ចប់»។ (ចសព. ១៣៩:២៣, ២៤) ព្រះយេហូវ៉ាឲ្យពរដល់ពួកអ្នកដែល«ខំស្វែងរកលោកអស់ពីចិត្ត»។ ការខំប្រឹងរបស់អ្នកដើម្បីឈានទៅដល់គោលដៅអំពីការប្រគល់ខ្លួនជូនព្រះនិងទទួលការជ្រមុជទឹកបង្ហាញលោកថាអ្នកកំពុងធ្វើដូច្នេះ។—សូមអាន ហេប្រឺ ១១:៦
ចូរបន្ដចូលទៅជិតព្រះយេហូវ៉ា
១៦-១៧. តើពួកអ្នកដែលបានធំឡើងក្នុងសេចក្ដីពិតបានត្រូវទាញនាំដោយព្រះយេហូវ៉ាយ៉ាងដូចម្ដេច? (យ៉ូហាន ៦:៤៤)
១៦ លោកយេស៊ូបានមានប្រសាសន៍ថាពួកអ្នកកាន់តាមលោកបានត្រូវទាញនាំដោយព្រះយេហូវ៉ា។ (សូមអាន យ៉ូហាន ៦:៤៤) សូមគិតថាតើនោះគឺអស្ចារ្យយ៉ាងណា ហើយតើនោះជាប់ទាក់ទងនឹងអ្នកយ៉ាងដូចម្ដេច? ព្រះយេហូវ៉ាឃើញអ្វីល្អក្នុងបុគ្គលម្នាក់ៗដែលលោកទាញនាំមកឯលោក។ លោកចាត់ទុកម្នាក់ៗថាជា«ទ្រព្យវិសេសរបស់លោក»។ (បច. ៧:៦) លោកមានទស្សនៈដូចនេះចំពោះអ្នកដែរ។
១៧ ប៉ុន្តែ អ្នកប្រហែលជាបុគ្គលវ័យក្មេងដែលបានត្រូវចិញ្ចឹមអប់រំក្នុងសេចក្ដីពិត។ អ្នកប្រហែលជាមានអារម្មណ៍ថាអ្នកបម្រើព្រះយេហូវ៉ាដោយសារតែឪពុកម្ដាយរបស់អ្នកបម្រើលោក មិនមែនដោយសារព្រះយេហូវ៉ាបានទាញនាំអ្នកមកឯលោកទេ។ ទោះជាយ៉ាងនោះក៏ដោយ គម្ពីរចែងថា៖ «ចូរចូលទៅជិតព្រះ នោះលោកនឹងចូលមកជិតអ្នករាល់គ្នា»។ (យ៉ា. ៤:៨; ១ប្រ. ២៨:៩) ពេលអ្នកចាត់វិធានការដើម្បីចូលទៅជិតព្រះយេហូវ៉ា លោកក៏ចូលមកជិតអ្នកវិញ។ ព្រះយេហូវ៉ាមិនចាត់ទុកថាអ្នកគ្រាន់តែជាសមាជិកម្នាក់នៃក្រុមគ្រួសារណាមួយទេ។ លោកទាញនាំបុគ្គលម្នាក់ៗ រួមទាំងអ្នកដែលធំឡើងក្នុងសេចក្ដីពិតផងដែរ។ ពេលបុគ្គលបែបនេះចាត់វិធានការចូលទៅជិតព្រះយេហូវ៉ា លោកប្រព្រឹត្តតបដូចដែលយើងបានកត់សម្គាល់នៅយ៉ាកុប ៤:៨។ —សូមពិនិត្យបន្ថែម ថែស្សាឡូនិចទី២ ២:១៣
១៨. តើយើងនឹងពិចារណាអ្វីក្នុងអត្ថបទបន្ទាប់? (ចម្រៀងសរសើរព្រះ ៤០:៨)
១៨ ពេលអ្នកប្រគល់ខ្លួនជូនព្រះយេហូវ៉ា ហើយទទួលការជ្រមុជទឹក អ្នកបង្ហាញចិត្តគំនិតដូចលោកយេស៊ូ។ លោកបានបង្ហាញដល់បិតាលោកថាលោកចង់ធ្វើអ្វីណាក៏ដោយដែលបិតាលោកសុំឲ្យធ្វើ។ (សូមអាន ចម្រៀងសរសើរព្រះ ៤០:៨; ហេ. ១០:៧) ក្នុងអត្ថបទបន្ទាប់ យើងនឹងពិចារណាអំពីអ្វីដែលនឹងជួយអ្នកឲ្យបន្ដបម្រើព្រះយេហូវ៉ាដោយស្មោះត្រង់ក្រោយពីអ្នកទទួលការជ្រមុជទឹក។
តើអ្នកនឹងឆ្លើយយ៉ាងណា?
តើការប្រគល់ខ្លួនជូនព្រះយេហូវ៉ាមានន័យយ៉ាងណា?
តើតាមរបៀបណាចិត្តកតញ្ញូចំពោះព្រះយេហូវ៉ានឹងជួយអ្នកឲ្យប្រគល់ខ្លួនជូនលោក?
តើអ្វីនឹងជួយអ្នកឲ្យជៀសវាងពីការប្រព្រឹត្តអំពើខុសឆ្គងធ្ងន់ធ្ងរ?
ចម្រៀងលេខ៣៨ លោកនឹងធ្វើឲ្យអ្នកខ្លាំងក្លា