របៀបរកឃើញ សេចក្ដីសុខសាន្តទោះជាមានសង្គ្រាមនិងជម្លោះហិង្សា
ហ្គារីដែលជាអតីតទាហានបានរៀបរាប់ថា៖ «មុនរៀនគម្ពីរ ខ្ញុំមិនដឹងទាល់តែសោះអំពីមូលហេតុដែលនាំឲ្យមានអំពើឃោរឃៅ អំពើអយុត្តិធម៌ និងបញ្ហាផ្សេងៗក្នុងពិភពលោក។ ប៉ុន្តែ ឥឡូវខ្ញុំមានសេចក្ដីសុខសាន្តក្នុងចិត្ត ដោយសារខ្ញុំដឹងថាព្រះយេហូវ៉ានឹងធ្វើឲ្យពិភពលោកក្លាយទៅជាកន្លែងដែលមានសុវត្ថិភាព»។
ហ្គារីមិនមែនជាបុគ្គលតែម្នាក់ដែលមានអារម្មណ៍បែបនេះទេ។ សូមពិចារណាអំពីរបៀបដែលគម្ពីរបានជួយអ្នកឯទៀត។
គម្ពីរចែងថា៖ «ឱព្រះយេហូវ៉ា លោកល្អពិតមែន ហើយលោកបម្រុងតែនឹងអភ័យទោស»។—ចម្រៀងសរសើរព្រះ ៨៦:៥
របៀបដែលគម្ពីរជួយ៖ វីលម៉ាពីប្រទេសកូឡុំប៊ីបាននិយាយថា៖ «ខនេះពង្រឹងទំនុកចិត្តខ្ញុំថាព្រះយេហូវ៉ាគឺពោរពេញទៅដោយសេចក្ដីមេត្តាករុណា។ ខ្ញុំដឹងថាលោកនឹងអភ័យទោសឲ្យខ្ញុំចំពោះអ្វីដែលខ្ញុំធ្លាប់ធ្វើនៅអតីតកាល ពេលដែលខ្ញុំចូលរួមធ្វើសង្គ្រាម»។
គម្ពីរចែងថា៖ «ខ្ញុំកំពុងបង្កើតមេឃថ្មីនិងផែនដីថ្មី ហើយអ្វីៗដែលធ្លាប់កើតឡើងពីមុន នឹងគ្មាននរណានឹកឃើញទៀតទេ ហើយក៏មិនចងចាំនៅក្នុងចិត្តទៀតដែរ»។—អេសាយ ៦៥:១៧
របៀបដែលគម្ពីរជួយ៖ ហ្សាហ្វីរ៉ាពីសហរដ្ឋអាម៉េរិកបាននិយាយថា៖ «ខ្ញុំមានជំងឺបាក់ស្បាតនិងជំងឺធ្លាក់ទឹកចិត្តដោយសារបទពិសោធន៍ពេលដែលខ្ញុំធ្វើទាហានក្នុងសង្គ្រាម។ ប៉ុន្តែបទគម្ពីរនេះរំលឹកខ្ញុំថា បន្តិចទៀតព្រះយេហូវ៉ានឹងបំបាត់ចោលការចងចាំអាក្រក់ដែលតែងតែតាមយាយីចិត្តខ្ញុំ ហើយខ្ញុំនឹងលែងមានសុបិនអាក្រក់ទៀត។ ការចងចាំទាំងនោះនឹងលែងមានក្នុងចិត្តខ្ញុំទៀតហើយ។ នេះពិតជាអំណោយដ៏អស្ចារ្យណាស់!»។
គម្ពីរចែងថា៖ «នៅគ្រារបស់គាត់ នោះសេចក្ដីសុចរិតនឹងមានកាន់តែច្រើនឡើង ហើយសេចក្ដីសុខនឹងមានជាបរិបូរ រហូតដល់ដួងចន្ទលែងមានទៀត»។—ចម្រៀងសរសើរព្រះ ៧២:៧
របៀបដែលគម្ពីរជួយ៖ អូឡិកសាន់ដ្រាពីប្រទេសអ៊ុយក្រែនបាននិយាយថា៖ «ខ្ញុំច្រើនតែគិតអំពីពាក្យទាំងនេះ។ បន្តិចទៀតសង្គ្រាមនិងរឿងខ្លោចផ្សាដែលបណ្ដាលមកពីសង្គ្រាមនឹងលែងមានទៀត ហើយយើងនឹងមិនចាំបាច់បារម្ភអំពីសុវត្ថិភាពរបស់មនុស្សជាទីស្រឡាញ់របស់យើងទៀតទេ»។
គម្ពីរចែងថា៖ «ពួកអ្នកស្លាប់របស់អ្នកនឹងរស់ឡើងវិញ . . . ឱពួកអ្នកដែលនៅក្នុងដីអើយ! ចូរភ្ញាក់ឡើង ហើយស្រែកដោយអំណរចុះ!»។—អេសាយ ២៦:១៩
របៀបដែលគម្ពីរជួយ៖ ម៉ារីពីប្រទេសរវ៉ាន់ដាបាននិយាយថា៖ «សមាជិកគ្រួសាររបស់ខ្ញុំស្ទើរតែទាំងអស់បានត្រូវគេសម្លាប់ក្នុងអំឡុងរបបប្រល័យពូជសាសន៍ធុត្សី ប៉ុន្តែ ខគម្ពីរនេះធានាថាខ្ញុំនឹងជួបពួកគេម្ដងទៀត។ ខ្ញុំទន្ទឹងរង់ចាំស្ដាប់សំឡេងក្អាកក្អាយរបស់ពួកគេ ពេលពួកគេត្រូវប្រោសឲ្យរស់ឡើងវិញ!»។
គម្ពីរចែងថា៖ «បន្តិចទៀត នឹងលែងមានមនុស្សអាក្រក់ទៀត . . . ប៉ុន្តែ មនុស្សដែលមានចិត្តសុភាពនឹងបានផែនដីជាមត៌ក ពួកគេនឹងសប្បាយរីករាយយ៉ាងខ្លាំង ដោយសារមាន សេចក្ដីសុខសាន្តជាបរិបូរ»។—ចម្រៀងសរសើរព្រះ ៣៧:១០, ១១
របៀបដែលគម្ពីរជួយ៖ ដេឡឺពីប្រទេសតាហ្ស៊ីគីស្ថានបានរៀបរាប់ថា៖ «ទោះជាសង្គ្រាមបានបញ្ចប់ក៏ដោយ ក៏នៅតែមានភាពអយុត្តិធម៌ និងមនុស្សអាក្រក់ដែរ។ ខគម្ពីរទាំងនេះពិតជាបានផ្ដល់កម្លាំងចិត្តដល់ខ្ញុំច្រើនណាស់។ ព្រះយេហូវ៉ាឃើញអ្វីៗទាំងអស់ ហើយយល់ពីស្ថានភាពរបស់ខ្ញុំ។ បន្តិចទៀតរឿងខ្លោចផ្សានឹងត្រូវបញ្ចប់ ហើយយើងនឹងមិននឹកចាំអំពីអ្វីទាំងនេះទៀតទេ»។
បុគ្គលដែលបានត្រូវរៀបរាប់នៅក្នុងទស្សនាវដ្ដីនេះ គឺនៅក្នុងចំណោមសាក្សីព្រះយេហូវ៉ារាប់លាននាក់ ដែលបានទទួលជំនួយពីគម្ពីរដើម្បីរកឃើញសេចក្ដីសុខសាន្ត។ ពួកគេបានរៀនឲ្យយកឈ្នះការរើសអើងពូជសាសន៍ ជាតិសាសន៍ កុលសម្ព័ន្ធ និងការស្អប់គ្នា។ (អេភេសូរ ៤:៣១, ៣២) សាក្សីព្រះយេហូវ៉ារក្សាអព្យាក្រឹតភាពខាងរឿងនយោបាយ ហើយមិនចូលរួមធ្វើអំពើហិង្សាទេ។—យ៉ូហាន ១៨:៣៦
សាក្សីព្រះយេហូវ៉ាក៏ទទួលជំនួយពីបងប្អូនរួមជំនឿដែលប្រកបទៅដោយសេចក្ដីស្រឡាញ់នៅទូទាំងពិភពលោកដែរ។ (យ៉ូហាន ១៣:៣៥) ជាឧទាហរណ៍ អូឡិកសាន់ដ្រាដែលបានរៀបរាប់នៅខាងលើ បានភៀសខ្លួនជាមួយបងស្រីរបស់គាត់ទៅប្រទេសផ្សេងដោយសារសង្គ្រាម។ គាត់បាននិយាយថា៖ «ពេលយើងឆ្លងកាត់ព្រំដែន ភ្លាមៗយើងបានឃើញសាក្សីព្រះយេហូវ៉ាដែលនៅតំបន់នោះឈរចាំស្វាគមន៍យើង។ ការគាំទ្ររបស់ពួកគេបានជួយយើងឲ្យសម្របខ្លួនទៅនឹងការរស់នៅក្នុងប្រទេសថ្មីជាជនភៀសខ្លួន»។
យើងសូមអញ្ជើញលោកអ្នកឲ្យចូលរួមកិច្ចប្រជុំរបស់យើងជាកន្លែងដែលលោកអ្នកអាចរៀនថែមទៀតអំពីរបៀបដែលលោកអ្នកអាចរកឃើញសន្តិភាពនៅឥឡូវនេះ និងសេចក្ដីសន្យាពីគម្ពីរស្ដីអំពីពិភពលោកពោរពេញទៅដោយសន្តិភាពដែលនឹងមកដល់ឆាប់ៗ។ សូមចូលគេហទំព័រjw.org ដើម្បីស្វែងរកទីតាំងដែលនៅជិតលោកអ្នក ឬស្នើសុំរៀនគម្ពីរដោយឥតគិតថ្លៃជាមួយសាក្សីព្រះយេហូវ៉ាណាម្នាក់ ដោយប្រើសៀវភៅសប្បាយនឹងជីវិតដែលគ្មានទីបញ្ចប់!