ចូរស្វែងរកហើយដេញតាមសន្ដិភាពពិតចុះ!
«អ្នកណាដែលចូលចិត្តចង់ស្រឡាញ់ជីវិត ហើយចង់ឃើញគ្រាដ៏ល្អនោះ . . . ត្រូវឲ្យអ្នកនោះបែរចេញពីការអាក្រក់ ប្រយោជន៍ឲ្យបានធ្វើការល្អវិញ ត្រូវស្វែងរកហើយដេញតាមសេចក្ដីមេត្រីភាព»។—ពេត្រុសទី១ ៣:១០, ១១
១. តើអ្វីជាពាក្យដ៏ល្បីនៃអេសាយដែលនឹងបានសម្រេចជាមិនខាន?
«គេនឹងយកដាវរបស់ខ្លួនដំធ្វើជាផាលនង្គ័ល ហើយលំពែងគេធ្វើជាដង្កាវវិញ។ នគរ១នឹងមិនលើកដាវទាស់នឹងនគរ១ទៀតឡើយ ក៏មិនហាត់រៀនធ្វើសឹកសង្គ្រាមទៀតដែរ»។ (អេសាយ ២:៤) ថ្វីបើបទគម្ពីរដ៏ល្បីនេះ ត្រូវបានដាក់តាំងជិតមន្ទីរចាត់ការពិភពលោកនៃអង្គការសហប្រជាជាតិនៃទីក្រុងញូវយ៉កក៏ដោយ អង្គការនេះមិនបានបំពេញតាមពាក្យនោះឡើយ។ ប៉ុន្តែ ជាផ្នែកនៃបន្ទូលរបស់ព្រះយេហូវ៉ា សេចក្ដីប្រកាសនោះនឹងបានសម្រេចជាមិនខាន។—អេសាយ ៥៥:១០, ១១
២. តើអ្វីនឹង‹កើតឡើងក្នុងគ្រាជាន់ក្រោយបង្អស់› នៃអេសាយ ២:២, ៣?
២ ពាក្យនៅក្នុងអេសាយ ២:៤ គឺជាផ្នែកនៃទំនាយដ៏អស្ចារ្យ អំពីសន្ដិភាពពិត—ហើយទំនាយនេះគឺកំពុងតែសម្រេចក្នុងសម័យយើងនេះ។ មុននឹងប្រកាសប្រាប់អនាគតដ៏អស្ចារ្យនៃការឥតមានសង្គ្រាម និងគ្រឿងអាវុធទៀតនោះ ទំនាយនេះចែងថា៖ «នៅជាន់ក្រោយបង្អស់ នោះភ្នំ ជាទីស្អាងព្រះវិហារនៃព្រះយេហូវ៉ា នឹងបានតាំងឡើងខ្ពស់លើសជាងអស់ទាំងភ្នំធំៗ ហើយនឹងបានដំកើងឡើងជាប្រសើរជាងអស់ទាំងភ្នំតូចៗដែរ។ អស់ទាំងសាសន៍នឹងចូលហូរហែទៅក្នុងទីនោះ។ ឯប្រជាជាតិជាច្រើន គេនឹងទៅដោយពោលថា៖ ‹ចូរយើងឡើងទៅឯភ្នំនៃព្រះយេហូវ៉ា ដល់ព្រះវិហារនៃព្រះរបស់ពួកយ៉ាកុបចុះ។ ទ្រង់នឹងបង្រៀនយើងពីផ្លូវរបស់ទ្រង់ នោះយើងនឹងដើរតាមផ្លូវទាំងនោះ›។ ដ្បិតក្រិត្យវិន័យនឹងចេញពីក្រុងស៊ីយ៉ុនទៅ ហើយព្រះបន្ទូលនៃព្រះយេហូវ៉ាពីក្រុងយេរូសាឡិមដែរ»។—អេសាយ ២:២, ៣
មនុស្សអាចក្លាយទៅជាសុខសាន្ត
៣. តើតាមរបៀបណាដែលបុគ្គលម្នាក់អាចកែប្រែពីបុគ្គលដែលរករឿងប្រទូស ឲ្យក្លាយទៅជាអ្នកសុខសាន្ត?
៣ ចូរកត់សម្គាល់ថា មុននឹងមនុស្សអាចដេញតាមសេចក្ដីសុខសាន្ត ពួកគេត្រូវតែរៀនអំពីផ្លូវរបស់ព្រះយេហូវ៉ា។ ការគោរពដល់សេចក្ដីបង្រៀនរបស់ព្រះយេហូវ៉ា អាចកែប្រែគំនិតនិងការប្រព្រឹត្តរបស់បុគ្គលម្នាក់ ដើម្បីឲ្យបុគ្គលនោះ ដែលធ្លាប់ជាអ្នករករឿងឲ្យក្លាយទៅជាសុខសាន្តវិញ។ តើការផ្លាស់ប្រែនេះអាចសម្រេចបានយ៉ាងណា? រ៉ូម ១២:២ ចែងថា៖ «កុំឲ្យត្រាប់តាមសម័យនេះឡើយ ចូរឲ្យអ្នករាល់គ្នាបានផ្លាស់ប្រែវិញ ដោយគំនិតបានកែជាថ្មីឡើង ដើម្បីនឹងអាចលមើលឲ្យបានស្គាល់បំណងព្រះហឫទ័យនៃព្រះ ដែលល្អ ស្រួលទទួល ហើយគ្រប់លក្ខណ៍ផង»។ យើងផ្លាស់ប្រែគំនិតឬបំណងចិត្តរបស់យើងជាថ្មីឡើងវិញ ដោយបំពេញគំនិតយើងនូវគោលការណ៍និងសិក្ខាបទពីបន្ទូលរបស់ព្រះ។ ការសិក្សាព្រះគម្ពីរដោយទៀងទាត់ ជួយយើងឲ្យផ្លាស់ប្រែ ហើយជួយឲ្យបង្ហាញដល់ខ្លួនយើងនូវអ្វីជាគោលបំណងរបស់ព្រះយេហូវ៉ាសំរាប់យើង ដើម្បីឲ្យយើងឃើញច្បាស់នូវផ្លូវដែលយើងត្រូវដើរ។—ទំនុកដំកើង ១១៩:១០៥
៤. តើតាមរបៀបណាដែលបុគ្គលម្នាក់អាចពាក់បុគ្គលិកលក្ខណៈថ្មីដ៏សុខសាន្ត?
៤ សេចក្ដីពិតក្នុងព្រះគម្ពីរផ្លាស់ប្រែមិនគ្រាន់តែរបៀបដែលយើងគិតទេ តែផ្លាស់ប្រែសកម្មភាពនិងបុគ្គលិកលក្ខណៈរបស់យើងដែរ។ ចំណេះនេះនឹងជួយយើងឲ្យធ្វើអ្វីដែលសាវ័កប៉ុលបានដាស់តឿនថា៖ «ខាងឯកិរិយាប្រព្រឹត្តកាលពីដើម នោះត្រូវឲ្យអ្នករាល់គ្នាបានដោះមនុស្សចាស់ ដែលតែងតែខូចទៅ តាមសេចក្ដីប៉ងប្រាថ្នារបស់សេចក្ដីឆបោកចោលចេញ ហើយឲ្យគំនិតក្នុងចិត្តបានកែប្រែជាថ្មីឡើង ព្រមទាំងប្រដាប់ខ្លួន ដោយមនុស្សថ្មីវិញ ដែលកើតមកក្នុងសេចក្ដីសុចរិត ហើយក្នុងសេចក្ដីបរិសុទ្ធរបស់ផងសេចក្ដីពិត តាមភាពព្រះ»។ (អេភេសូរ ៤:២២-២៤) កម្លាំងដែលមានសកម្មភាពក្នុងគំនិតរបស់យើង គឺមានពីខាងក្នុង។ នេះត្រូវបានផ្លាស់ប្រែ ហើយក្លាយទៅជាមាំមួនឡើង កាលដែលសេចក្ដីស្រឡាញ់របស់យើងចំពោះព្រះយេហូវ៉ានិងច្បាប់របស់ទ្រង់ បានរីកចំរើនឡើង ហើយនេះនឹងធ្វើឲ្យយើងទៅជាមនុស្សខាងវិញ្ញាណនិងសុខសាន្ត។
៥. តើតាមរបៀបណាដែល‹បញ្ញត្តថ្មី›ដែលព្រះយេស៊ូប្រទានដល់ពួកសិស្សទ្រង់ បណ្ដាលឲ្យមានសន្ដិភាពក្នុងចំណោមពួកគេ?
៥ សេចក្ដីត្រូវការផ្លាស់ប្រែនេះត្រូវបានឃើញពីការបង្រៀនរបស់ព្រះយេស៊ូ ដែលទ្រង់ប្រទានដល់ពួកសិស្សទ្រង់ ក្នុងវេលាចុងក្រោយជាមួយពួកគេថា៖ «ខ្ញុំឲ្យសេចក្ដីបញ្ញត្ត១ថ្មីដល់អ្នករាល់គ្នា គឺឲ្យអ្នករាល់គ្នាស្រឡាញ់គ្នាទៅវិញទៅមក ត្រូវឲ្យស្រឡាញ់គ្នា ដូចជាខ្ញុំបានស្រឡាញ់អ្នករាល់គ្នាដែរ គេនឹងដឹងថា អ្នករាល់គ្នាជាសិស្សរបស់ខ្ញុំ ដោយសារសេចក្ដីនេះឯង គឺដោយអ្នករាល់គ្នាមានសេចក្ដីស្រឡាញ់ដល់គ្នាទៅវិញទៅមក»។ (យ៉ូហាន ១៣:៣៤, ៣៥) សេចក្ដីស្រឡាញ់ដ៏ឥតកំណាញ់នេះ ដែលមានដូចព្រះគ្រីស្ទ បានចងភ្ជាប់ពួកសិស្សជាមួយគ្នាដោយសាមគ្គីភាពដ៏ល្អគ្រប់ល័ក្ខណ៍។ (កូល៉ុស ៣:១៤) មានតែពួកណាដែលសុខចិត្តទទួលឬរស់នៅតាម‹បញ្ញត្តថ្មី›នេះទេ ដែលនឹងអាចមានសន្ដិភាពដែលព្រះសន្យាមកនោះ។ តើមានមនុស្សណាដែលធ្វើការនេះទេនៅសព្វថ្ងៃ?
៦. ហេតុអ្វីក៏ស្មរបន្ទាល់ព្រះយេហូវ៉ាមានសន្ដិភាព បើប្រៀបធៀបនឹងពួកមនុស្សក្នុងលោកីយ៍នោះ?
៦ ស្មរបន្ទាល់ព្រះយេហូវ៉ាខំប្រឹងបង្ហាញសេចក្ដីស្រឡាញ់ក្នុងភាតរភាពពេញពិភពលោក។ ទោះបីជាពួកគេមកពីគ្រប់សាសន៍ក៏ដោយ ពួកគេមិនជ្រៀតជ្រែកក្នុងទំនាស់លោកីយ៍ឡើយ ទោះជាមានការបង្ខិតបង្ខំយ៉ាងខ្លាំងពីនយោបាយនិងសាសនាក៏ដោយ។ ជាមនុស្សដែលមានសាមគ្គីភាពគ្នា ព្រះយេហូវ៉ាបានបង្រៀនពួកគេ ហើយពួកគេមានសន្ដិភាព។ (អេសាយ ៥៤:១៣) ពួកគេរក្សាអព្យាក្រឹតក្នុងរឿងនយោបាយ ហើយពួកគេមិនចូលធ្វើសង្គ្រាមឡើយ។ អ្នកខ្លះដែលពីដើមជាមនុស្សឃោរឃៅ បានបោះបង់ជីវភាពបែបនោះ។ ពួកគេបានក្លាយទៅជាគ្រីស្ទានដែលស្រឡាញ់សន្ដិភាព ដោយយកតម្រាប់តាមព្រះយេស៊ូគ្រីស្ទ។ ហើយពួកគេបានធ្វើតាមឱវាទរបស់ពេត្រុសអស់ពីចិត្ត៖ «អ្នកណាដែលចូលចិត្តចង់ស្រឡាញ់ជីវិតហើយចង់ឃើញគ្រាដ៏ល្អនោះ ត្រូវបញ្ចៀសអណ្ដាតពីសេចក្ដីអាក្រក់ចេញហើយបបូរមាត់ក៏ដែរ កុំឲ្យពោលពាក្យប្រកបដោយឧបាយកលឡើយ ត្រូវឲ្យអ្នកនោះបែរចេញពីការអាក្រក់ប្រយោជន៍ឲ្យបានធ្វើការល្អវិញត្រូវស្វែងរកហើយដេញតាមសេចក្ដីមេត្រីភាព»។—ពេត្រុសទី១ ៣:១០, ១១; អេភេសូរ ៤:៣
ពួកអ្នកដែលដេញតាមសន្ដិភាព
៧, ៨. សូមឲ្យឧទាហរណ៍នៃមនុស្សដែលបានលះបង់ចោលសង្គ្រាម ហើយបានក្លាយទៅជាអ្នកដែលស្វែងរកសន្ដិភាពពិត។ (សូមរៀបរាប់ឧទាហរណ៍ឯទៀត ដែលអ្នកប្រហែលជាដឹង)
៧ ជាឧទាហរណ៍ រ៉ាម៉ី អូវីឌ ជាអតីតទាហានម្នាក់ដែលមានឯកទេសខាងប្រឆាំងភេរវជន។ គាត់ត្រូវបានគេបង្ហាត់ឲ្យសម្លាប់ពួកសត្រូវ។ គាត់បានជឿយ៉ាងជាក់ក្នុងជាតិនិយមអ៊ីស្រាអែល រហូតដល់ថ្ងៃដែលគាត់ដឹងថា ពួករ៉ាប៊ីមិនចង់ឲ្យគាត់រៀបការស្ត្រីដែលគាត់ស្រឡាញ់ ពីព្រោះនាងជាជនជាតិអាស៊ី ជាសាសន៍ដទៃ។ គាត់បានចាប់ផ្ដើមស្វែងរកសេចក្ដីពិតក្នុងព្រះគម្ពីរ។ បន្ទាប់មក គាត់ក៏បានមកជួបស្មរបន្ទាល់ព្រះយេហូវ៉ា។ ការរៀនព្រះគម្ពីរជាមួយស្មរបន្ទាល់ព្រះយេហូវ៉ាធ្វើឲ្យគាត់ជឿថា គាត់មិនអាចធ្វើជាអ្នកប្រកាន់ជាតិនិយមដ៏ហួសហេតុបានឡើយ។ សេចក្ដីស្រឡាញ់គ្រីស្ទានមានន័យថា គាត់ត្រូវបោះបង់ចោលសង្គ្រាមនិងអាវុធ ហើយត្រូវស្រឡាញ់មនុស្សគ្រប់សាសន៍។ គាត់មានចិត្តភ្ញាក់ផ្អើលណាស់ នៅពេលដែលគាត់បានទទួលសំបុត្រល្អមួយ ដែលសរសេរថា៖ «ជូនចំពោះបងប្រុសរ៉ាម៉ី»! តើអ្វីទៅដែលគួរចម្លែកអំពីរឿងនេះ? អ្នកសរសេរសំបុត្រនេះ គាត់ជាស្មរបន្ទាល់ជាតិប៉ាលីស្ទីន។ រ៉ាម៉ីនិយាយថា «នេះជាអ្វីដ៏អស្ចារ្យណាស់ ពីព្រោះពួកប៉ាលីស្ទីនជាសត្រូវរបស់ខ្ញុំ ហើយម្នាក់នេះហៅខ្ញុំ ‹បងប្រុស›»។ ឥឡូវនេះរ៉ាម៉ីនិងប្រពន្ធរបស់គាត់ស្វែងរកសន្ដិភាពពិតតាមផ្លូវរបស់ព្រះ។
៨ ឧទាហរណ៍មួយទៀត គឺអំពី ចូច រ៉ីធើ ដែលបានបំរើជាទាហានក្នុងកងទ័ពអាល្លឺម៉ង់ ដែលបានចូលរុករានប្រទេសរុស្ស៊ីក្នុងកំឡុងសង្គ្រាមលោកលើកទីពីរ។ ក្រោយមក គាត់បានស្រងាកចិត្តយ៉ាងខ្លាំងនឹងគម្រោងការដ៏ធំសម្បើមរបស់ហិត្លើ ចំពោះការជិះជាន់លើពិភពលោក។ នៅពេលដែលគាត់ត្រឡប់មកពីសង្គ្រាមវិញ គាត់បានចាប់ផ្ដើមរៀនព្រះគម្ពីរជាមួយស្មរបន្ទាល់ព្រះយេហូវ៉ា។ គាត់បានសរសេរថា៖ «នៅទីបំផុត ខ្ញុំក៏ចាប់ផ្ដើមយល់ឃើញច្បាស់លាស់។ ខ្ញុំបានដឹងថា ព្រះមិនមែនជាបុគ្គលដែលទទួលខុសត្រូវចំពោះការបង្ហូរឈាមទេ។ . . . ខ្ញុំដឹងថា គឺជាបំណងរបស់ទ្រង់ក្នុងការស្ថាបនាសួនមនោរម្យទូទាំងពិភពលោក ដែលនឹងប្រទានពរដល់មនុស្សដែលគោរពទ្រង់ជារៀងរហូតទៅ។ . . . ហិត្លើបានអួតអំពី‹របបគ្រប់គ្រងមួយពាន់ឆ្នាំរបស់គាត់› តែបានគ្រប់គ្រងតែ១២ឆ្នាំប៉ុណ្ណោះ—ហើយមានកម្មផលដ៏អាក្រក់ក្រៃលែង! គឺមិនមែនហិត្លើទេ តែព្រះគ្រីស្ទវិញ . . . ដែលអាចសោយរាជ្យមួយពាន់ឆ្នាំទៅលើផែនដី»។ ឥឡូវនេះប្រមាណ៥០ឆ្នាំមកហើយ ចូចបានបំរើជាអ្នកនាំសារនៃសន្ដិភាពពិតក្នុងកិច្ចបំរើពេញពេល។
៩. តើការពិសោធរបស់ស្មរបន្ទាល់ព្រះយេហូវ៉ាក្នុងរបបណាត្ស៊ីនៃប្រទេសអាល្លឺម៉ង់ បង្ហាញថាគេជាពួកអ្នកដ៏ក្លាហាននិងដ៏សុខសាន្តយ៉ាងដូចម្ដេច?
៩ ចិត្តស្មោះគ្រប់ល័ក្ខណ៍និងអព្យាក្រឹតភាពនៃស្មរបន្ទាល់ព្រះយេហូវ៉ាក្នុងប្រទេសអាល្លឺម៉ង់ ក្នុងកំឡុងរបបណាត្ស៊ី បន្តធ្វើជាសាក្សីដល់សេចក្ដីស្រឡាញ់របស់គេចំពោះព្រះនិងចំពោះសន្ដិភាពនៅឥឡូវនេះ ដែលមានជាង៥០ឆ្នាំមកហើយ។ កូនសៀវភៅមួយដែលបានបោះពុម្ពដោយសារមន្ទីររំឭកហាយនភាព ក្នុងក្រុងវ៉ាស៊ីនតោន ថ្លែងថា៖ «ស្មរបន្ទាល់ព្រះយេហូវ៉ាបានស៊ូទ្រាំនឹងការបៀតបៀនយ៉ាងខ្លាំង នៅក្រោមរបបណាត្ស៊ី។ . . . សេចក្ដីក្លាហាននៃស្មរបន្ទាល់ព្រះយេហូវ៉ាភាគច្រើន ដែលបានបង្ហាញក្នុងការបដិសេធ[បោះបង់ចោលសាសនារបស់គេ] ទោះបីមានទារុណកម្ម ការធ្វើទុក្ខទោសក្នុងជំរំឃុំឃាំង ហើយជួនកាលត្រូវបានគេប្រហារជីវិតនោះ បណ្ដាលឲ្យមនុស្សជាច្រើននៅពេលនោះមានការគោរពដល់ពួកគេ»។ រួចមកថ្លែងទៀតថា៖ «ក្នុងកំឡុងការរំដោះនៃជំរំ ស្មរបន្ទាល់ព្រះយេហូវ៉ាបានបន្តធ្វើការរបស់គេ ដោយនិយាយលេងទាក់ទងជាមួយពួករួចរស់ជីវិតក្នុងជំរំ»។
ការផ្លាស់ប្រែដ៏ធំទៀត
១០. (ក) តើត្រូវការការផ្លាស់ប្រែដ៏ធំអ្វីដើម្បីឲ្យមានសន្ដិភាពពិត? (ខ) តើនេះត្រូវបង្ហាញមកយ៉ាងណាក្នុងសៀវភៅដានីយ៉ែល?
១០ តើនេះមានសេចក្ដីថា ស្មរបន្ទាល់ព្រះយេហូវ៉ាជឿថា ពួកគេអាចនាំឲ្យមានសន្ដិភាពក្នុងពិភពលោកទាំងមូល ដោយធ្វើឲ្យមនុស្សជាច្រើនផ្លាស់ប្រែគំនិតជឿក្នុងអព្យាក្រឹតភាពគ្រីស្ទានឬ? អត់ទេ! ដើម្បីឲ្យមានសន្ដិភាពលើផែនដី គឺត្រូវមានការផ្លាស់ប្រែដ៏ធំជាងនោះទៅទៀត។ តើនោះជាអ្វីទៅ? នេះគឺត្រូវដកចេញការគ្រប់គ្រងរបស់មនុស្សដ៏បំផ្លាញ ជិះជាន់ ឃោរឃៅ ហើយដាក់ការគ្រប់គ្រងនៃព្រះរាជាណាចក្ររបស់ព្រះជំនួសវិញ ដែលព្រះយេស៊ូបានបង្រៀនពួកសិស្សរបស់ទ្រង់ឲ្យអធិស្ឋានសុំនោះ។ (ម៉ាថាយ ៦:៩, ១០) ប៉ុន្តែ តើនេះនឹងកើតឡើងដូចម្ដេច? ក្នុងសុបិនដែលព្រះបានបណ្ដាលមក ព្យាការីដានីយ៉ែលបានរៀនដឹងថាក្នុងថ្ងៃជាន់ក្រោយបង្អស់ ព្រះរាជាណាចក្ររបស់ព្រះ ប្រៀបដូចដុំថ្មធំមួយដែល‹ឥតដាប់ចេញដោយដៃមនុស្ស› នឹងបំបាក់បំបែករូបដ៏ធំនេះ ដែលតំណាងការគ្រប់គ្រងនយោបាយរបស់មនុស្សជាតិលើផែនដី។ រួចមកគាត់ប្រកាសថា៖ «រីឯនៅគ្រានៃស្តេចទាំងនោះ ព្រះនៃស្ថានសួគ៌ទ្រង់នឹងតាំងនគរ១ឡើង ដែលមិនត្រូវបំផ្លាញឡើយ ហើយអំណាចហ្លួងក៏មិនត្រូវផ្ទេរដល់សាសន៍ដទៃណាដែរ គឺនឹងបំបាក់បំបែក ហើយលេបបំបាត់នគរទាំងនោះវិញ នគរនោះនឹងស្ថិតស្ថេរនៅអស់កល្បជានិច្ច»។—ដានីយ៉ែល ២:៣១-៤៤
១១. ដោយមធ្យោបាយណាដែលព្រះយេហូវ៉ានឹងនាំឲ្យមានការផ្លាស់ប្រែសំរាប់សន្ដិភាព?
១១ ហេតុអ្វីក៏ការផ្លាស់ប្រែដ៏ធំនេះក្នុងលោកីយ៍នឹងកើតឡើង? ពីព្រោះព្រះយេហូវ៉ាបានសន្យាថា ទ្រង់នឹងបោសសំអាតផែនដីដោយដកយកអស់អ្នកដែលធ្វើឲ្យផែនដីកខ្វក់និងបង្ហិនបង្ហោចវា។ (វិវរណៈ ១១:១៨) ការផ្លាស់ប្រែនេះនឹងកើតឡើងក្នុងសង្គ្រាមដ៏សុចរិតរបស់ព្រះយេហូវ៉ា ប្រឆាំងសាតាំងនិងលោកីយ៍ដ៏អាក្រក់របស់វា។ នៅវិវរណៈ ១៦:១៤, ១៦ យើងអានថា៖ «ដ្បិតវិញ្ញាណទាំងនោះ ជាវិញ្ញាណនៃពួកអារក្ស ដែលចេញទៅឯអស់ទាំងស្តេច នៅផែនដីទាំងមូល ទាំងធ្វើទីសំគាល់ ដើម្បីនឹងប្រមូលស្តេច[ពួកដឹកនាំនយោបាយ]ទាំងនោះមកក្នុងចំបាំង នៅថ្ងៃដ៏ធំរបស់ព្រះដ៏មានគ្រប់ព្រះចេស្ដាបំផុត រួចវិញ្ញាណទាំងនោះ ក៏ប្រមូលគេទៅឯកន្លែង ដែលភាសាហេព្រើរហៅថា អើម៉ាគេដូន»។
១២. តើអើម៉ាគេដូននឹងកើតមានឡើងយ៉ាងណា?
១២ តើអើម៉ាគេដូននឹងកើតឡើងយ៉ាងណា? គឺប្រាកដជាមិនដូចសង្គ្រាមនុយក្លេអែ ឬមហន្តរាយណាមួយ បង្កដោយមនុស្សជាតិឡើយ។ ទេ នេះជាសង្គ្រាមរបស់ព្រះ ដើម្បីកំទេចសង្គ្រាមរបស់មនុស្ស និងបញ្ចប់អស់អ្នកដែលគាំទ្រសង្គ្រាមបែបនេះ។ នេះជាសង្គ្រាមរបស់ព្រះដើម្បីនាំឲ្យមានសន្ដិភាពពិតសំរាប់អស់អ្នកដែលស្រឡាញ់សន្ដិភាព។ ត្រូវហើយ អើម៉ាគេដូននឹងកើតមានឡើងដូចព្រះយេហូវ៉ាបានមានបំណងមែន។ វានឹងមិនបង្អង់យូរទេ។ ព្យាការីហាបាគុក ត្រូវបានបណ្ដាលឲ្យសរសេរថា៖ «ដ្បិតការជាក់ស្តែងនេះ ទុកសំរាប់ដល់វេលាកំណត់ ក៏កំពុងស្រូតឲ្យដល់ពេលនោះហើយ នៅគ្រានោះ នឹងមិនកុហកទេ បើសិនជាបង្អង់យូរ ក៏ចូររង់ចាំចុះ ដ្បិតនឹងមកជាពិត ឥតរារង់ឡើយ»។ (ហាបាគុក ២:៣) ដោយសារតែអារម្មណ៍របស់មនុស្សយើង នេះធ្វើឲ្យអើម៉ាគេដូនហាក់បីដូចជាបង្អង់យូរ ប៉ុន្តែព្រះយេហូវ៉ាទ្រង់រក្សាទុកកំណត់ពេលរបស់ទ្រង់។ អើម៉ាគេដូននឹងកើតឡើងនៅក្នុងម៉ោងដែលព្រះយេហូវ៉ាបានកំណត់ទុក។
១៣. តើព្រះនឹងដោះស្រាយយ៉ាងណាចំពោះអារក្សសាតាំង?
១៣ ការប្រព្រឹត្តដែលមិនរួញរានេះនឹងបើកផ្លូវសំរាប់សន្ដិភាពពិត! ប៉ុន្តែ បើចង់ឲ្យសន្ដិភាពពិតបានស្ថាបនាយ៉ាងមាំមួននោះ មានអ្វីមួយដែលត្រូវតែធ្វើឡើង—គឺការដកចេញបុគ្គលដែលបណ្ដាលឲ្យមានការបែកខ្ញែក សម្អប់ និងការទាស់ទែង។ ហើយនោះជាអ្វីដែលទំនាយព្រះគម្ពីរថានឹងកើតឡើងជាបន្ទាប់—ការបោះទម្លាក់សាតាំងក្នុងជង្ហុកធំ ជាអ្នកដែលបង្កបង្កើតសង្គ្រាម ហើយជាឪពុកនៃសេចក្ដីកំភូត។ សាវ័កយ៉ូហានបានឃើញព្រឹត្ដិការណ៍ក្នុងចក្ខុនិមិត្តទំនាយ ដែលបានកត់ទុកក្នុងវិវរណៈ ២០:១-៣៖ «ខ្ញុំក៏ឃើញទេវតា១ ចុះពីស្ថានសួគ៌មក ទាំងកាន់កូនសោជង្ហុកធំ នឹងច្រវាក់១យ៉ាងធំនៅដៃ ទេវតានោះក៏ចាប់នាគចងវាទុក១ពាន់ឆ្នាំ គឺជាពស់ពីចាស់បុរាណ ដែលជាអារក្សឈ្មោះថា សាតាំង ក៏បោះវាចោលទៅក្នុងជង្ហុកធំ ទាំងខ្ទប់ ហើយបិទត្រាពីលើ ដើម្បីកុំឲ្យវានាំអស់ទាំងសាសន៍ ឲ្យវង្វេងទៀត ទាល់តែផុតពី១ពាន់ឆ្នាំនោះទៅ»។
១៤. តើសកម្មភាពដ៏ជោគជ័យរបស់ព្រះយេហូវ៉ា ប្រឆាំងសាតាំងអាចរៀបរាប់យ៉ាងណា?
១៤ នេះមិនមែនជាសុបិនទេ នេះជាសេចក្ដីសន្យារបស់ព្រះ—ហើយព្រះគម្ពីរចែងថា៖ «ព្រះទ្រង់កុហកពុំបានទេ»។ (ហេព្រើរ ៦:១៨) ដូច្នេះព្រះយេហូវ៉ាអាចមានបន្ទូលតាមរយៈព្យាការីយេរេមាថា៖ «‹អញជាព្រះយេហូវ៉ាដែលប្រោសផ្សាយសេចក្ដីសប្បុរស សេចក្ដីយុត្ដិធម៌ នឹងសេចក្ដីសុចរិតនៅផែនដី ដ្បិតអញរីករាយចិត្តចំពោះសេចក្ដីទាំងនោះហើយ› នេះជាព្រះបន្ទូលនៃព្រះយេហូវ៉ា»។ (យេរេមា ៩:២៤) ព្រះយេហូវ៉ានឹងចាត់វិធានការដោយយុត្ដិធម៌និងដោយសេចក្ដីសុចរិត ហើយទ្រង់សព្វព្រះហឫទ័យក្នុងសន្ដិភាពដែលទ្រង់នឹងនាំឲ្យមានលើផែនដីនេះ។
គ្រប់គ្រងដោយម្ចាស់នៃមេត្រីភាព
១៥, ១៦. (ក) តើព្រះយេហូវ៉ាបានជ្រើសរើសយកអ្នកណាឲ្យគ្រប់គ្រងជាស្តេច? (ខ) តើការគ្រប់គ្រងនោះត្រូវបានរៀបរាប់យ៉ាងដូចម្ដេច ហើយតើអ្នកណានឹងចូលរួមក្នុងការគ្រប់គ្រងនោះ?
១៥ ដើម្បីធានារ៉ាប់រងថាសន្ដិភាពពិតនឹងមានដល់ពួកអ្នកដែលរស់នៅក្រោមព្រះរាជាណាចក្រ ព្រះយេហូវ៉ាបានប្រគល់ការគ្រប់គ្រងទៅម្ចាស់នៃមេត្រីភាពពិត ព្រះយេស៊ូគ្រីស្ទ ដូចបានទាយមកក្នុងអេសាយ ៩:៦, ៧៖ «ដ្បិតមានបុត្រ១កើតដល់យើង ព្រះទ្រង់ប្រទានបុត្រា១មកយើងហើយ ឯការគ្រប់គ្រងនឹងនៅលើស្មារបស់បុត្រនោះ ហើយគេនឹងហៅព្រះនាមទ្រង់ថា ព្រះដ៏ជំនួយគំនិតយ៉ាងអស្ចារ្យ ព្រះដ៏មានព្រះចេស្ដា ព្រះវរបិតាដ៏គង់នៅអស់កល្ប នឹងជាម្ចាស់នៃមេត្រីភាព ឯសេចក្ដីចំរើននៃរដ្ឋបាលទ្រង់នឹងសេចក្ដីសុខសាន្តរបស់ទ្រង់ . . . គឺសេចក្ដីឧស្សាហ៍របស់ព្រះយេហូវ៉ានៃពួកពលបរិវារ នឹងសំរេចការនេះ»។ អ្នកតែងបទទំនុកដំកើងក៏បានសរសេរជាទំនាយអំពីការគ្រប់គ្រងរបស់ព្រះមេស្ស៊ីថា៖ «នៅក្នុងគ្រាព្រះរាជបុត្រា នោះមនុស្សសុចរិតនឹងមានសេចក្ដីចំរើនឡើង ហើយនឹងមានសេចក្ដីសុខជាបរិបូរ ដរាបដល់ព្រះចន្ទរលត់សូន្យទៅ»។—ទំនុកដំកើង ៧២:៧
១៦ បន្ថែមទៀត គឺមាន១៤៤.០០០នាក់នៃបងប្អូនរបស់ព្រះគ្រីស្ទដែលរើសតាំងដោយព្រះវិញ្ញាណ ដែលនឹងគ្រប់គ្រងជាមួយទ្រង់នៅស្ថានសួគ៌។ ពួកទាំងនេះជាពួកដែលនឹងទទួលមរតកជាមួយព្រះគ្រីស្ទ ដែលប៉ុលបានសរសេរថា៖ «ឯព្រះនៃសេចក្ដីសុខសាន្ត នៅបន្ដិចទៀតទ្រង់នឹងកិនអារក្សសាតាំង នៅក្រោមជើងអ្នករាល់គ្នាហើយ សូមឲ្យអ្នករាល់គ្នាបានប្រកបដោយនូវព្រះគុណនៃព្រះយេស៊ូវគ្រីស្ទ ជាព្រះអម្ចាស់នៃយើងចុះ»។ (រ៉ូម ១៦:២០) ត្រូវហើយ ពួកទាំងនេះនឹងចូលរួមនៅស្ថានសួគ៌ក្នុងការជោគជ័យរបស់ព្រះគ្រីស្ទលើអារក្សសាតាំងជាអ្នកបង្កបង្កើតសង្គ្រាម!
១៧. តើយើងត្រូវតែធ្វើអ្វីដើម្បីឲ្យទទួលសន្ដិភាពពិត?
១៧ ដូច្នេះ សំនួរដែលយើងត្រូវសួរឥឡូវនេះគឺ តើអ្នកត្រូវធ្វើយ៉ាងណាដើម្បីឲ្យបានសន្ដិភាពពិត? សន្ដិភាពពិតគឺបានមកតែពីផ្លូវរបស់ព្រះ ហើយដើម្បីទទួលឲ្យបាន អ្នកត្រូវតែចាត់យកវិធានការដ៏ល្អៗ។ អ្នកត្រូវតែទទួលស្គាល់ម្ចាស់នៃមេត្រីភាព ហើយដាក់ជំនឿលើទ្រង់។ នេះមានន័យថា អ្នកត្រូវតែទទួលស្គាល់ព្រះគ្រីស្ទ មុខនាទីទ្រង់ជាអ្នកលោះមនុស្សមានបាប។ ព្រះយេស៊ូអង្គទ្រង់ បានមានបន្ទូលដ៏ល្បីនេះថា៖ «ដ្បិតព្រះទ្រង់ស្រឡាញ់មនុស្សលោក ដល់ម្ល៉េះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ»។ (យ៉ូហាន ៣:១៦) តើអ្នកសុខចិត្តអនុវត្តជំនឿក្នុងព្រះគ្រីស្ទយេស៊ូ ជាបុគ្គលដែលព្រះនឹងនាំឲ្យបង្កើតសន្ដិភាពពិតនិងសេចក្ដីសង្គ្រោះទេ? គឺគ្មាននាមឯណាទៀតក្រោមស្ថានសួគ៌ ដែលអាចនាំឲ្យមានសន្ដិភាពហើយធានារ៉ាប់រងបាននោះឡើយ។ (ភីលីព ២:៨-១១) ហេតុអ្វី? ពីព្រោះព្រះយេស៊ូជាបុគ្គលដែលព្រះបានរើសតាំង។ ទ្រង់ជាអ្នកនាំសារដ៏ឧត្តមនៃសន្ដិភាព ដែលបានគង់នៅលើផែនដី។ តើអ្នកនឹងស្ដាប់តាមព្រះយេស៊ូ ហើយធ្វើតាមគំរូរបស់ទ្រង់ទេ?
១៨. តើយើងត្រូវតែធ្វើអ្វីក្នុងការតបឆ្លើយតាមពាក្យរបស់ព្រះយេស៊ូ ក្នុងយ៉ូហាន ១៧:៣?
១៨ ព្រះយេស៊ូបានមានបន្ទូលថា «នេះជាជីវិតដ៏នៅអស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែ១ នឹងព្រះយេស៊ូវគ្រីស្ទ ដែលទ្រង់បានចាត់ឲ្យមកផង»។ (យ៉ូហាន ១៧:៣) ឥឡូវនេះជាពេលវេលាដែលត្រូវយកចូលចំណេះត្រឹមត្រូវ ដោយមកឯកិច្ចប្រជុំយ៉ាងទៀងទាត់នៃស្មរបន្ទាល់ព្រះយេហូវ៉ា នៅឯសាលព្រះរាជាណាចក្រ។ កិច្ចប្រជុំអប់រំទាំងនេះនឹងជំរុញទឹកចិត្តអ្នកឲ្យចែកចំណេះនិងសេចក្ដីសង្ឃឹមរបស់អ្នកជាមួយមនុស្សដទៃ។ អ្នកក៏អាចជាអ្នកនាំសារសំរាប់សន្ដិភាពរបស់ព្រះដែរ។ អ្នកអាចមានសន្ដិភាពឥឡូវនេះ ដោយទុកចិត្តលើព្រះយេហូវ៉ា ដូចបានចែងមកនៅអេសាយ ២៦:៣ «ឯអ្នកណាដែលមានគំនិតជាប់តាមទ្រង់ នោះទ្រង់នឹងថែរក្សាអ្នកនោះ ឲ្យមានសេចក្ដីសុខពេញខ្នាត ដោយព្រោះគេទុកចិត្តនឹងទ្រង់»។ តើអ្នកត្រូវទុកចិត្តលើអ្នកណា? «ចូរទុកចិត្តដល់ព្រះយេហូវ៉ាជាដរាបចុះ ដ្បិតព្រះដ៏ជាព្រះយេហូវ៉ាទ្រង់ជាថ្មដាដ៏នៅអស់កល្បជានិច្ច»។—អេសាយ ២៦:៤
១៩, ២០. តើអ្វីដែលនឹងរង់ចាំពួកអ្នកស្វែងរកនិងដេញតាមសន្ដិភាពនៅសព្វថ្ងៃនេះ?
១៩ ឥឡូវនេះចូរអ្នកប្ដេជ្ញាចិត្តជ្រើសរើសយកជីវិតអស់កល្បជានិច្ចក្នុងពិភពលោកថ្មីចុះ។ នៅវិវរណៈ ២១:៣, ៤ បន្ទូលរបស់ព្រះធានារ៉ាប់រងយើងថា៖ «មើលរោងឧបោសថរបស់ព្រះ បាននៅជាមួយនឹងមនុស្សហើយ ទ្រង់នឹងគង់នៅជាមួយនឹងគេ គេនឹងធ្វើជារាស្ត្ររបស់ទ្រង់ ហើយព្រះអង្គទ្រង់ក៏នឹងធ្វើជាព្រះដល់គេ។ ព្រះទ្រង់នឹងជូតអស់ទាំងទឹកភ្នែក ពីភ្នែកគេចេញ នឹងគ្មានសេចក្ដីស្លាប់ ឬសេចក្ដីសោកសង្រេង ឬសេចក្ដីយំទួញ ឬទុក្ខលំបាកណាទៀតឡើយ។ ដ្បិតសេចក្ដីមុនទាំងប៉ុន្មាន បានកន្លងបាត់ទៅហើយ»។ តើអ្នកមិនចង់បានអនាគតដ៏សុខសាន្តដូចនេះទេឬ?
២០ ចូរចងចាំនូវអ្វីៗដែលព្រះបានសន្យាមកចុះ។ «ឯមនុស្សរាបសា គេនឹងបានផែនដីជាមរដក ហើយនឹងបានចិត្តរីករាយ ដោយសេចក្ដីក្សេមក្សាន្តដ៏បរិបូរ។ ចូរចំណាំមើលមនុស្សគ្រប់លក្ខណ៍វិញ ហើយពិចារណាមើលមនុស្សទៀងត្រង់ចុះ ដ្បិតចុងបំផុតនៃមនុស្សនោះមានសេចក្ដីសាន្តត្រាណ»។ (ទំនុកដំកើង ៣៧:១១, ៣៧) នៅពេលថ្ងៃដ៏សប្បាយនោះមកដល់ សូមឲ្យយើងនិយាយដោយកតញ្ញូធម៌ថា «សន្ដិភាពពិតនៅទីបំផុតបានមកដល់ហើយ! ដោយសារព្រះយេហូវ៉ា ប្រភពនៃសន្ដិភាពពិត»!
តើអ្នកអាចពន្យល់បានទេ?
◻ តើអ្វីដែលអាចជួយបុគ្គលម្នាក់ឲ្យផ្លាស់ប្រែគំនិតនិងសកម្មភាព?
◻ តើតាមរបៀបណាដែលស្មរបន្ទាល់ព្រះយេហូវ៉ា ជាបុគ្គលម្នាក់និងជាក្រុម បានបង្ហាញសេចក្ដីស្រឡាញ់របស់គេចំពោះសន្ដិភាពពិត?
◻ តើព្រះយេហូវ៉ានឹងដោះស្រាយយ៉ាងណាចំពោះពួកអ្នកដែលផ្សព្វផ្សាយការស្អប់និងសង្គ្រាម?
◻ តើការគ្រប់គ្រងរបស់ម្ចាស់នៃមេត្រីភាពនឹងធ្វើអ្វីសំរាប់មនុស្សជាតិ?
[រូបភាពនៅទំព័រ២៦]
ពាក្យរបស់អេសាយបានសម្រេច មិនមែនដោយអង្គការសហប្រជាជាតិទេ តែដោយអស់អ្នកដែលធ្វើតាមសេចក្ដីបង្រៀនរបស់ព្រះយេហូវ៉ា
[រូបភាពនៅទំព័រ២៧]
បុរសពីរនាក់នេះបានផ្លាស់ប្រែដើម្បីស្វែងរកសន្ដិភាព
រ៉ាម៉ី អូវីឌ
ចូច រ៉ីធើ
[រូបភាពនៅទំព័រ២៩]
សន្ដិភាពពិតនឹងមានឡើងនៅក្រោមម្ចាស់នៃមេត្រីភាព