យោបល់សម្រាប់សិក្សា
ចូរសិក្សាដោយមានគោលដៅប្រាប់អ្នកឯទៀតអំពីអ្វីដែលអ្នកបានរៀន
ការសិក្សាផ្ទាល់ខ្លួនអាចជួយយើងឲ្យមានកម្លាំងចិត្ត តែយើងកាន់តែអាចមានកម្លាំងចិត្ត ពេលយើងប្រាប់អ្នកឯទៀតអំពីចំណុចវិសេសដែលយើងបានរកឃើញ។ សុភាសិត ១១:២៥ចែងថា៖ «អ្នកណាដែលផ្ដល់កម្លាំងចិត្តដល់អ្នកឯទៀត អ្នកនោះនឹងទទួលកម្លាំងចិត្តដែរ»។
ពេលយើងប្រាប់អ្នកឯទៀតអំពីអ្វីដែលខ្លួនបានរៀន យើងស្រួលចាំចំណុចទាំងនោះជាង ហើយយើងក៏កាន់តែយល់អំពីចំណុចទាំងនោះដែរ។ ម្យ៉ាងទៀត ដោយសារចំណុចទាំងនេះអាចផ្ដល់ប្រយោជន៍ដល់អ្នកឯទៀត នោះយើងសប្បាយចែករំលែកចំណុចវិសេសបែបនោះជាមួយនឹងពួកគេ។—សកម្ម. ២០:៣៥
សូមសាកល្បង៖ នៅក្នុងអំឡុងសប្ដាហ៍ខាងមុខនេះ សូមរកឱកាសដើម្បីប្រាប់បុគ្គលម្នាក់អំពីអ្វីដែលអ្នកបានរៀន។ អ្នកអាចប្រាប់សមាជិកក្រុមគ្រួសារ បងប្អូនណាម្នាក់ក្នុងក្រុមជំនុំ អ្នករួមការងារ សិស្សរួមថ្នាក់ អ្នកជិតខាង ឬមនុស្សដែលអ្នកជួបក្នុងកិច្ចបម្រើផ្សាយ។ សូមព្យាយាមនិយាយដោយប្រើពាក្យផ្ទាល់ខ្លួន និងនិយាយយ៉ាងច្បាស់។
សូមចងចាំ៖ សូមចែករំលែកអ្វីដែលអ្នករៀនដើម្បីលើកទឹកចិត្តអ្នកឯទៀត មិនមែនដើម្បីឲ្យពួកគេកោតស្ងើចអ្នកទេ។—១កូ. ៨:១