ការបង្ហាញភាពស្មោះត្រង់នាំឲ្យព្រះពេញចិត្ត
«ចូរយកតម្រាប់តាមពួកអ្នកដែលបានទទួលសេចក្ដីសន្យាជាមត៌កដោយសារជំនឿនិងចិត្តអត់ធ្មត់»។—ហេប្រឺ ៦:១២
១, ២. តើយែបថានិងកូនស្រីរបស់គាត់ប្រឈមមុខនឹងការពិបាកអ្វី?
ស្ត្រីវ័យក្មេងម្នាក់បានរត់ទៅជួបឪពុករបស់នាង។ នាងសប្បាយចិត្តយ៉ាងខ្លាំងដោយឃើញឪពុកនាងត្រឡប់មកពីចម្បាំងវិញដោយសុវត្ថិភាព។ ជ័យជម្នះដ៏អស្ចារ្យរបស់គាត់បានធ្វើឲ្យនាងច្រៀងនិងរាំយ៉ាងសប្បាយរីករាយ។ ប៉ុន្តែអ្វីដែលឪពុកនាងបានធ្វើនិងនិយាយក្រោយមក ច្បាស់ជាបាននាំឲ្យនាងភ្ញាក់ផ្អើល។ គាត់បានហែកអាវរបស់គាត់ ហើយបានបន្លឺសំឡេងយ៉ាងខ្លាំងថា៖ «វរហើយ កូនអើយ! ឯងបានធ្វើឲ្យអញមានចិត្តក្រាបចុះ[ឬ«កើតទុក្ខ»]ជាខ្លាំងណាស់»។ ក្រោយមក គាត់បានប្រាប់នាងថា គាត់បានធ្វើសេចក្ដីសន្យាមួយចំពោះព្រះយេហូវ៉ាដែលនឹងផ្លាស់ប្ដូររបៀបរស់នៅរបស់នាងអស់មួយជីវិត។ សេចក្ដីសន្យារបស់គាត់មានន័យថានាងនឹងមិនអាចរៀបការ ឬមានកូនឡើយ។ ប៉ុន្តែ ភ្លាមៗនោះនាងបានតបឆ្លើយយ៉ាងល្អដែលលើកទឹកចិត្តឪពុកនាងឲ្យធ្វើតាមសេចក្ដីសន្យារបស់គាត់ចំពោះព្រះយេហូវ៉ា។ ចម្លើយរបស់នាងបានបង្ហាញថានាងទុកចិត្តទាំងស្រុងថាអ្វីណាក៏ដោយដែលព្រះយេហូវ៉ាសុំពីនាងគឺមានប្រយោជន៍ចំពោះនាង។ (ពួកចៅហ្វាយ [វិរបុរស] ១១:៣៤-៣៧; ខ.ស.) ពេលដែលឪពុកនាងបានឃើញជំនឿរបស់នាង គាត់មានមោទនភាពណាស់ចំពោះនាង ពីព្រោះគាត់ដឹងថាដោយសារនាងព្រមធ្វើតាម នោះនឹងនាំឲ្យព្រះយេហូវ៉ាសប្បាយរីករាយ។
២ យែបថានិងកូនស្រីរបស់គាត់បានទុកចិត្តទាំងស្រុងទៅលើព្រះយេហូវ៉ានិងរបៀបដែលលោកប្រព្រឹត្ត។ ពួកគាត់បានស្មោះត្រង់ សូម្បីតែនៅពេលដែលមិនសូវងាយស្រួលសម្រាប់ពួកគាត់ក្ដី។ ពួកគាត់ចង់ទទួលការពេញចិត្តពីព្រះយេហូវ៉ា ហើយនេះពិតជាអ្វីដែលសមនឹងការលះបង់ណាក៏ដោយដែលពួកគាត់បានធ្វើ។
៣. ហេតុអ្វីគំរូរបស់យែបថានិងកូនស្រីរបស់គាត់អាចជួយយើងនៅសព្វថ្ងៃនេះ?
៣ ការរក្សាភាពស្មោះត្រង់ចំពោះព្រះយេហូវ៉ាគឺមិនតែងតែងាយស្រួលទេ។ យើងត្រូវ«តស៊ូដើម្បីការពារជំនឿ»។ (យូដាស ៣) ដើម្បីជួយយើងឲ្យធ្វើដូច្នេះ សូមយើងរៀនអំពីរបៀបដែលយែបថានិងកូនស្រីរបស់គាត់បានស៊ូទ្រាំនឹងទុក្ខលំបាកផ្សេងៗក្នុងជីវិតរបស់ពួកគាត់។ តើតាមរបៀបណាពួកគាត់បានរក្សាភាពស្មោះត្រង់ចំពោះព្រះយេហូវ៉ា?
ការរក្សាភាពស្មោះត្រង់ ទោះជាមានឥទ្ធិពលពីពិភពលោកនេះក្ដី
៤, ៥. (ក) តើព្រះយេហូវ៉ាបានឲ្យបង្គាប់អ្វីដល់ជនជាតិអ៊ីស្រាអែល ពេលដែលពួកគេបានចូលស្រុកដែលលោកបានសន្យា? (ខ) យោងទៅតាមទំនុកតម្កើង ទំនុកទី១០៦ តើអ្វីបានកើតឡើងដល់ជនជាតិអ៊ីស្រាអែលដោយសារពួកគេមិនបានស្ដាប់បង្គាប់ព្រះ?
៤ ជារៀងរាល់ថ្ងៃ យែបថានិងកូនស្រីរបស់គាត់បាននឹកឃើញអំពីលទ្ធផលដែលជនជាតិអ៊ីស្រាអែលបានទទួលពីការមិនស្ដាប់បង្គាប់ព្រះយេហូវ៉ា។ ជិត៣០០ឆ្នាំមុនសម័យយែបថា ព្រះយេហូវ៉ាបានបង្គាប់ជនជាតិអ៊ីស្រាអែលឲ្យសម្លាប់បុគ្គលទាំងអស់ដែលគោរពបូជាព្រះមិនពិតនៅក្នុងស្រុកដែលលោកបានសន្យា ប៉ុន្តែពួកគេមិនបានធ្វើតាមឡើយ។ (ចោទិយកថា ៧:១-៤) ជនជាតិអ៊ីស្រាអែលជាច្រើននាក់បានចាប់ផ្ដើមធ្វើតាមជនជាតិកាណានដែលជាអ្នកគោរពបូជាព្រះមិនពិតនិងដែលមានរបៀបរស់នៅប្រាសចាកសីលធម៌។—សូមអាន ទំនុកតម្កើង ១០៦:៣៤-៣៩
៥ ដោយសារជនជាតិអ៊ីស្រាអែលមិនបានស្ដាប់បង្គាប់ព្រះយេហូវ៉ា នោះលោកមិនបានការពារពួកគេពីសត្រូវរបស់ពួកគេឡើយ។ (ពួកចៅហ្វាយ ២:១-៣, ១១-១៥; ទំនុកតម្កើង ១០៦:៤០-៤៣) ក្នុងអំឡុងឆ្នាំដ៏ពិបាកទាំងនោះ ក្រុមគ្រួសារដែលស្រឡាញ់ព្រះយេហូវ៉ាច្បាស់ជាពិបាករក្សាភាពស្មោះត្រង់នឹងលោកណាស់។ ក៏ប៉ុន្តែ គម្ពីរបានរៀបរាប់ថាមានបុគ្គលស្មោះត្រង់ដូចជាយែបថានិងកូនស្រីរបស់គាត់ អែលកាណា ហាណា និងសាំយូអែលជាដើម។ ពួកគេបានតាំងចិត្តធ្វើឲ្យព្រះយេហូវ៉ាសប្បាយរីករាយ។—សាំយូអែលទី១ ១:២០-២៨; ២:២៦
៦. សព្វថ្ងៃនេះ តើពិភពលោកនេះមានឥទ្ធិពលបែបណាលើមនុស្ស ហើយតើយើងត្រូវធ្វើអ្វី?
៦ នៅសម័យយើងនេះ មនុស្សគិតនិងប្រព្រឹត្តដូចជនជាតិកាណានដែរ។ ក្នុងជីវិតរបស់ពួកគេ ពួកគេគិតតែលុយ ការរួមភេទ និងអំពើឃោរឃៅ។ ប៉ុន្តែ ព្រះយេហូវ៉ាផ្ដល់ការព្រមានច្បាស់លាស់ដល់យើង។ លោកចង់ការពារយើងពីឥទ្ធិពលដ៏អាក្រក់ទាំងនោះដូចដែលលោកចង់ការពារជនជាតិអ៊ីស្រាអែល។ តើយើងនឹងទាញយកមេរៀនពីកំហុសរបស់ពួកគេឬទេ? (កូរិនថូសទី១ ១០:៦-១១) យើងត្រូវខំអស់ពីសមត្ថភាពដើម្បីជៀសវាងពីរបៀបគិតគូររបស់ពិភពលោកនេះ។ (រ៉ូម ១២:២) តើយើងនឹងព្យាយាមអស់ពីសមត្ថភាពដើម្បីធ្វើដូច្នេះឬទេ?
យែបថាបានរក្សាភាពស្មោះត្រង់ ទោះជាខកចិត្តក្ដី
៧. (ក) តើបណ្ដាជនបានធ្វើអ្វីដល់យែបថា? (ខ) តើយែបថាបានប្រព្រឹត្តយ៉ាងដូចម្ដេច?
៧ នៅសម័យយែបថា ជនជាតិអ៊ីស្រាអែលបានត្រូវជិះជាន់ដោយជនជាតិភីលីស្ទីននិងជនជាតិអាំម៉ូន ពីព្រោះជនជាតិអ៊ីស្រាអែលមិនបានស្ដាប់បង្គាប់ព្រះយេហូវ៉ា។ (ពួកចៅហ្វាយ ១០:៧, ៨) យែបថាមិនគ្រាន់តែមានការពិបាកជាមួយនឹងប្រទេសផ្សេងៗដែលជាសត្រូវប៉ុណ្ណោះទេ គាត់ក៏មានការពិបាកផ្សេងៗដែរជាមួយនឹងបងប្អូនរបស់គាត់និងពួកអ្នកដឹកនាំជនជាតិអ៊ីស្រាអែល។ ដោយសារបងប្អូនរបស់គាត់ច្រណែននិងស្អប់គាត់ នោះពួកគេបានបង្ខំគាត់ឲ្យចាកចេញពីទឹកដីដែលជាកម្មសិទ្ធិស្របច្បាប់របស់គាត់។ (ពួកចៅហ្វាយ ១១:១-៣) យែបថាមិនព្រមអនុញ្ញាតឲ្យការប្រព្រឹត្តដែលគ្មានមេត្ដារបស់ពួកគេមានឥទ្ធិពលទៅលើចិត្តគំនិតរបស់គាត់ឡើយ។ ហេតុអ្វីយើងដឹងដូច្នេះ? ពីព្រោះពេលដែលពួកអ្នកចាស់ទុំនៃប្រជាជាតិអ៊ីស្រាអែលបានអង្វរសុំគាត់ឲ្យជួយពួកគេ នោះគាត់បានធ្វើភ្លាមៗ។ (ពួកចៅហ្វាយ ១១:៤-១១) តើអ្វីប្រហែលជាបានជំរុញចិត្តយែបថាឲ្យប្រព្រឹត្តបែបនេះ?
៨, ៩. (ក) តើគោលការណ៍អ្វីក្នុងច្បាប់ម៉ូសេប្រហែលជាបានជួយយែបថា? (ខ) តើអ្វីគឺសំខាន់បំផុតចំពោះយែបថា?
៨ យែបថាជាអ្នកប្រយុទ្ធដ៏អង់អាចក្លាហាន ហើយគាត់ស្គាល់យ៉ាងច្បាស់អំពីប្រវត្ដិសាស្ត្ររបស់ជនជាតិអ៊ីស្រាអែលនិងច្បាប់ម៉ូសេ។ របៀបដែលព្រះយេហូវ៉ាបានប្រព្រឹត្តទៅលើរាស្ត្ររបស់លោកបង្រៀនគាត់អំពីខ្នាតតម្រារបស់ព្រះស្តីអំពីអ្វីដែលខុសនិងអ្វីដែលត្រូវ។ (ពួកចៅហ្វាយ ១១:១២-២៧) យែបថាបានប្រើចំណេះដឹងនេះក្នុងជីវិតរបស់គាត់ពេលដែលគាត់ធ្វើការសម្រេចចិត្ត។ គាត់បានស្គាល់ច្បាស់អំពីអារម្មណ៍របស់ព្រះយេហូវ៉ាចំពោះកំហឹងនិងការសងសឹក និងអំពីរបៀបដែលព្រះចង់ឲ្យរាស្ត្ររបស់លោកស្រឡាញ់គ្នាទៅវិញទៅមក។ បន្ថែមទៅទៀត ច្បាប់ម៉ូសេបានបង្រៀនគាត់អំពីរបៀបប្រព្រឹត្តចំពោះអ្នកឯទៀត សូម្បីតែពួកអ្នកដែលស្អប់គាត់ក្ដី។—សូមអាន និក្ខមនំ ២៣:៥; លេវីវិន័យ ១៩:១៧, ១៨
៩ គំរូរបស់យ៉ូសែបទំនងជាបានជួយយែបថា។ យែបថាច្បាស់ជាបានរៀនអំពីរបៀបដែលយ៉ូសែបបង្ហាញសេចក្ដីមេត្ដាករុណាចំពោះបងប្អូនរបស់គាត់ ទោះជាពួកគេស្អប់គាត់ក្ដី។ (លោកុប្បត្តិ ៣៧:៤; ៤៥:៤, ៥) ការដែលយែបថាគិតអំពីគំរូនេះ នោះប្រហែលជាបានជួយគាត់ឲ្យប្រព្រឹត្តអ្វីដែលធ្វើឲ្យព្រះយេហូវ៉ាពេញចិត្ត។ អ្វីដែលបងប្អូនរបស់យែបថាបានធ្វើពិតជានាំឲ្យគាត់ឈឺចិត្ត។ ប៉ុន្តែ ចំពោះយែបថា ការច្បាំងដើម្បីការពារនាមរបស់ព្រះយេហូវ៉ានិងរាស្ត្ររបស់លោកគឺសំខាន់ជាងអារម្មណ៍របស់គាត់។ (ពួកចៅហ្វាយ ១១:៩) គាត់បានតាំងចិត្តរក្សាភាពស្មោះត្រង់ចំពោះព្រះយេហូវ៉ា។ ចិត្តគំនិតនេះបាននាំឲ្យគាត់និងជនជាតិអ៊ីស្រាអែលទទួលពរពីព្រះយេហូវ៉ា។—ហេប្រឺ ១១:៣២, ៣៣
យើងមិនគួរអនុញ្ញាតឲ្យអារម្មណ៍ឈឺចាប់របស់យើងរារាំងយើងមិនឲ្យបម្រើព្រះយេហូវ៉ាទេ
១០. នៅសព្វថ្ងៃនេះ តើតាមរបៀបណាយើងអាចអនុញ្ញាតឲ្យគោលការណ៍របស់ព្រះជួយយើងប្រព្រឹត្តដូចជាគ្រិស្តសាសនិក?
១០ តើយើងនឹងរៀនពីគំរូរបស់យែបថាឬទេ? បើបងប្អូនរួមជំនឿរបស់យើងធ្វើឲ្យយើងខកចិត្ត ឬបើយើងមានអារម្មណ៍ថាពួកគេប្រព្រឹត្តមិនល្អចំពោះយើង តើយើងនឹងធ្វើអ្វី? យើងមិនគួរអនុញ្ញាតឲ្យអារម្មណ៍ឈឺចាប់របស់យើងរារាំងយើងមិនឲ្យបម្រើព្រះយេហូវ៉ាទេ។ សូមកុំឈប់ចូលរួមកិច្ចប្រជុំ ឬចំណាយពេលជាមួយនឹងក្រុមជំនុំឡើយ។ សូមឲ្យយើងយកតម្រាប់យែបថា ហើយស្ដាប់បង្គាប់ព្រះយេហូវ៉ា។ នេះនឹងជួយយើងឲ្យយកឈ្នះស្ថានភាពពិបាកផ្សេងៗ ដើម្បីយើងក៏អាចធ្វើជាគំរូល្អដែរ។—រ៉ូម ១២:២០, ២១; កូឡុស ៣:១៣
ការលះបង់ប្រយោជន៍ខ្លួនដោយស្ម័គ្រពីចិត្តបង្ហាញអំពីជំនឿរបស់យើង
១១, ១២. តើយែបថាបានស្បថអ្វី ហើយតើនេះជាប់ទាក់ទងនឹងអ្វី?
១១ យែបថាបានដឹងថាគាត់ត្រូវការជំនួយពីព្រះដើម្បីរំដោះជនជាតិអ៊ីស្រាអែលចេញពីកណ្ដាប់ដៃជនជាតិអាំម៉ូន។ គាត់បានសន្យានឹងព្រះយេហូវ៉ាថា បើលោកធ្វើឲ្យគាត់ឈ្នះ គាត់នឹងជូនលោកនូវមនុស្សដំបូងដែលចេញពីផ្ទះដើម្បីទទួលគាត់ ពេលគាត់ត្រឡប់មកពីចម្បាំងវិញឲ្យធ្វើជា«ដង្វាយដុត»ឬគ្រឿងបូជាដុត។ (ពួកចៅហ្វាយ ១១:៣០, ៣១) តើនេះមានន័យយ៉ាងណា?
១២ ព្រះយេហូវ៉ាស្អប់គ្រឿងបូជាដែលជាមនុស្ស ដូច្នេះយើងដឹងថាយែបថានឹងមិនធ្វើគ្រឿងបូជាមែនទែនទេ។ (ចោទិយកថា ១៨:៩, ១០) ក្រោមច្បាប់ម៉ូសេ គ្រឿងបូជាដុតគឺជាអំណោយដ៏ពិសេសមួយដែលមនុស្សម្នាក់ជូនទៅព្រះយេហូវ៉ាទាំងស្រុង។ ដូច្នេះ យែបថាចង់មានន័យថាបុគ្គលដែលគាត់នឹងជូនទៅព្រះយេហូវ៉ានឹងបម្រើនៅឯត្រសាលអស់មួយជីវិត។ ព្រះយេហូវ៉ាបានស្ដាប់យែបថា ហើយបានជួយគាត់ឲ្យទទួលជ័យជម្នះទាំងស្រុង។ (ពួកចៅហ្វាយ ១១:៣២, ៣៣) ប៉ុន្តែ តើយែបថានឹងជូនអ្នកណាទៅព្រះយេហូវ៉ាជាគ្រឿងបូជា?
១៣, ១៤. តើពាក្យសម្ដីរបស់យែបថានៅពួកចៅហ្វាយ ១១:៣៥ បង្ហាញយ៉ាងណាអំពីជំនឿរបស់គាត់?
១៣ សូមគិតអំពីអ្វីដែលបានរៀបរាប់នៅដើមអត្ថបទនេះ។ ពេលដែលយែបថាត្រឡប់មកពីចម្បាំងវិញ មនុស្សដំបូងដែលចេញមកជួបគាត់គឺជាកូនស្រីជាទីស្រឡាញ់ដែលជាកូនតែម្នាក់គត់របស់គាត់! តើយែបថានឹងធ្វើតាមសេចក្ដីសន្យារបស់គាត់ឬទេ? តើគាត់នឹងជូនកូនស្រីរបស់គាត់ទៅព្រះយេហូវ៉ាដើម្បីឲ្យនាងបម្រើនៅឯត្រសាលអស់មួយជីវិតឬទេ?
១៤ ម្ដងនេះទៀត គោលការណ៍ក្នុងច្បាប់របស់ព្រះច្បាស់ជាបានជួយយែបថាឲ្យធ្វើការសម្រេចចិត្តដ៏ត្រឹមត្រូវ។ ប្រហែលជាគាត់បាននឹកចាំអំពីពាក្យនៅនិក្ខមនំ ២៣:១៩ ដែលប្រាប់រាស្ត្ររបស់ព្រះឲ្យសុខចិត្តជូនអ្វីដ៏ល្អបំផុតទៅព្រះយេហូវ៉ា។ ច្បាប់របស់ព្រះក៏បានចែងដែរថា ពេលបុគ្គលម្នាក់ស្បថនឹងព្រះយេហូវ៉ា «អ្នកនោះមិនត្រូវក្បត់ពាក្យខ្លួនឡើយ គឺត្រូវតែធ្វើតាមសំដីរបស់ខ្លួនគ្រប់ចំពូក»។ (ជនគណនា ៣០:២) ហាណាដែលជាអ្នកស្មោះត្រង់ទំនងជាបានរស់នៅក្នុងអំឡុងសម័យយែបថា។ យែបថាត្រូវធ្វើតាមសេចក្ដីសន្យារបស់គាត់ដូចហាណាដែរ ទោះជាគាត់ដឹងថានេះនឹងមានឥទ្ធិពលយ៉ាងណាទៅលើគាត់និងកូនស្រីរបស់គាត់ក៏ដោយ។ ដោយសារកូនស្រីរបស់គាត់នឹងបម្រើនៅឯត្រសាល នោះនាងនឹងមិនអាចរៀបការនិងមានកូនឡើយ។ ដូច្នេះ នឹងគ្មានអ្នកណាម្នាក់ស្នងត្រកូលនិងទទួលទឹកដីជាមត៌កពីយែបថាឡើយ។ (ពួកចៅហ្វាយ ១១:៣៤) ទោះជាយ៉ាងនេះក៏ដោយ យែបថាបាននិយាយថា៖ «អញបានមានវាចានឹងព្រះយេហូវ៉ាហើយនឹងថយមកក្រោយវិញពុំបានឡើយ»។ (ពួកចៅហ្វាយ ១១:៣៥) ព្រះយេហូវ៉ាបានទទួលយកការលះបង់ដ៏ធំធេងរបស់យែបថា ហើយលោកបានឲ្យពរដល់គាត់។ បើអ្នកជាយែបថា តើអ្នកនឹងនៅស្មោះត្រង់ដូចគាត់ឬទេ?
១៥. តើយើងជាច្រើននាក់បានស្បថអ្វី ហើយតើតាមរបៀបណាយើងអាចរក្សាភាពស្មោះត្រង់?
១៥ ពេលដែលយើងប្រគល់ជីវិតជូនព្រះយេហូវ៉ា យើងបានស្បថថាយើងនឹងធ្វើតាមបំណងប្រាថ្នារបស់លោកទោះជាមានអ្វីកើតឡើងក៏ដោយ។ យើងបានដឹងថានឹងមិនតែងតែងាយស្រួលដើម្បីធ្វើតាមសេចក្ដីសន្យានោះឡើយ។ ប៉ុន្តែ តើយើងប្រព្រឹត្តយ៉ាងណាពេលដែលយើងបានត្រូវសុំឲ្យធ្វើអ្វីមួយដែលយើងមិនចូលចិត្ត? បើយើងយកឈ្នះអារម្មណ៍របស់យើង ហើយសុខចិត្តស្ដាប់បង្គាប់ព្រះ នោះយើងបង្ហាញថាយើងធ្វើតាមសេចក្ដីសន្យារបស់ខ្លួន។ ការលះបង់របស់យើងប្រហែលជាធ្វើឲ្យយើងពិបាកចិត្ត តែពរពីព្រះយេហូវ៉ាតែងតែច្រើនជាងការលះបង់ទាំងនោះ។ (ម៉ាឡាគី ៣:១០) ប៉ុន្តែ ចុះយ៉ាងណាកូនស្រីរបស់យែបថា? តើនាងមានប្រតិកម្មយ៉ាងណាចំពោះសេចក្ដីសន្យារបស់ឪពុកនាង?
តើតាមរបៀបណាយើងអាចបង្ហាញជំនឿដូចយែបថានិងកូនស្រីរបស់គាត់? (សូមមើលវគ្គ១៦, ១៧)
១៦. តើកូនស្រីរបស់យែបថាបានតបឆ្លើយយ៉ាងណាចំពោះសេចក្ដីសន្យារបស់ឪពុកនាង? (សូមមើលរូបភាពនៅដើមអត្ថបទ)
១៦ ពាក្យស្បថរបស់យែបថាគឺខុសគ្នាពីពាក្យស្បថរបស់ហាណា។ ហាណាបានស្បថថានាងនឹងជូនសាំយូអែលដែលជាកូនប្រុសរបស់នាងឲ្យទៅបម្រើនៅឯត្រសាលក្នុងនាមជាណាសារ៉ែតម្នាក់។ (សាំយូអែលទី១ ១:១១) បុគ្គលដែលជាណាសារ៉ែតបានត្រូវអនុញ្ញាតឲ្យរៀបការនិងមានកូន។ ប៉ុន្តែ កូនស្រីរបស់យែបថាបានត្រូវជូនជា«ដង្វាយដុត»ឬគ្រឿងបូជាដុតទាំងមូល ដូច្នេះនាងនឹងមិនអាចមានអំណរដែលមកពីការធ្វើជាប្រពន្ធនិងម្ដាយឡើយ។ (ពួកចៅហ្វាយ ១១:៣៧-៤០) សូមគិតអំពីរឿងនេះ! ដោយសារឪពុករបស់នាងគឺជាអ្នកដឹកនាំជនជាតិអ៊ីស្រាអែល នាងទំនងជាអាចរៀបការជាមួយនឹងបុរសដ៏ល្អបំផុតដែលរស់នៅក្នុងស្រុកនោះ។ ប៉ុន្តែ នាងនឹងទៅជាអ្នកបម្រើម្នាក់នៅត្រសាល។ តើស្ត្រីវ័យក្មេងម្នាក់នេះបានតបឆ្លើយយ៉ាងណា? នាងបានបង្ហាញថាកិច្ចបម្រើរបស់ព្រះយេហូវ៉ាគឺជាអ្វីដែលសំខាន់បំផុត ដោយនិយាយទៅកាន់ឪពុករបស់នាងថា៖ «សូមធ្វើដល់ខ្ញុំតាមវាចាដែលចេញពីមាត់នោះចុះ»។ (ពួកចៅហ្វាយ ១១:៣៦) ដើម្បីបម្រើព្រះយេហូវ៉ា នាងបានលះបង់សេចក្ដីប៉ងប្រាថ្នាដែលមនុស្សទូទៅមាន ពោលគឺការចង់រៀបការនិងមានកូន។ តើតាមរបៀបណាយើងអាចមានចិត្តគំនិតដែលលះបង់ប្រយោជន៍ខ្លួនដូចនាង?
ដើម្បីបម្រើព្រះយេហូវ៉ា កូនស្រីរបស់យែបថាបានលះបង់សេចក្ដីប៉ងប្រាថ្នាដែលមនុស្សទូទៅមាន ពោលគឺការចង់រៀបការនិងមានកូន
១៧. (ក) តើតាមរបៀបណាយើងអាចមានជំនឿដូចយែបថានិងកូនស្រីរបស់គាត់? (ខ) តើពាក្យនៅហេប្រឺ ៦:១០-១២លើកទឹកចិត្តអ្នកយ៉ាងណាឲ្យលះបង់ប្រយោជន៍ខ្លួន?
១៧ បុរសនិងស្ត្រីគ្រិស្តសាសនិកវ័យក្មេងរាប់ពាន់នាក់សុខចិត្តមិនរៀបការ ឬសម្រេចចិត្តមិនយកកូននៅឥឡូវនេះ។ ហេតុអ្វី? ពីព្រោះពួកគេចង់ផ្ដោតអារម្មណ៍ទៅលើការបម្រើព្រះយេហូវ៉ាឲ្យបានច្រើនជាង។ ម្យ៉ាងទៀត បងប្អូនដែលមានវ័យចាស់ជាងជាច្រើននាក់ក៏លះបង់ពេលវេលានៅជាមួយនឹងកូនចៅរបស់ពួកគាត់ដែរ។ ពួកគាត់ប្រើពេលវេលានិងកម្លាំងរបស់ពួកគាត់ដើម្បីព្រះយេហូវ៉ា។ ពួកគាត់ខ្លះជួយធ្វើកិច្ចការសាងសង់ ឬចូលរួមសាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ ហើយរើទៅក្រុមជំនុំដែលត្រូវការអ្នកផ្សាយច្រើនជាង។ បងប្អូនខ្លះទៀតរៀបចំគម្រោងដើម្បីបង្កើនកិច្ចបម្រើព្រះយេហូវ៉ាក្នុងអំឡុងរដូវពិធីរំលឹក។ លោកនឹងមិនភ្លេចការលះបង់ដែលប្រកបដោយសេចក្ដីស្រឡាញ់របស់ពួកអ្នកដែលស្មោះត្រង់ទាំងនេះឡើយ។ (សូមអាន ហេប្រឺ ៦:១០-១២) ចុះយ៉ាងណាអ្នកវិញ? តើអ្នកអាចធ្វើការលះបង់ផ្សេងៗដើម្បីបម្រើព្រះយេហូវ៉ាឲ្យបានពេញលេញជាងឬទេ?
តើយើងបានទាញមេរៀនអ្វីខ្លះ?
១៨, ១៩. តើយើងបានរៀនអ្វីខ្លះពីកំណត់ហេតុក្នុងគម្ពីរស្តីអំពីយែបថានិងកូនស្រីរបស់គាត់ ហើយតើយើងអាចយកតម្រាប់ពួកគាត់យ៉ាងដូចម្ដេច?
១៨ តើអ្វីបានជួយយែបថាឲ្យយកឈ្នះការពិបាកជាច្រើនដែលគាត់បានជួបប្រទះ? គាត់បានឲ្យព្រះយេហូវ៉ាណែនាំគាត់ពេលគាត់ធ្វើការសម្រេចចិត្តផ្សេងៗក្នុងជីវិត។ គាត់សម្រេចចិត្តមិនឲ្យមនុស្សនៅជុំវិញគាត់មានឥទ្ធិពលមកលើគាត់ឡើយ។ ម្យ៉ាងទៀត គាត់បានរក្សាភាពស្មោះត្រង់ សូម្បីតែពេលអ្នកឯទៀតបានធ្វើឲ្យគាត់ខកចិត្តក្ដី។ ព្រះយេហូវ៉ាបានឲ្យពរយែបថានិងកូនស្រីរបស់គាត់ដោយសារការលះបង់ដោយស្ម័គ្រពីចិត្តរបស់ពួកគាត់ ហើយលោកបានប្រើពួកគាត់ទាំងពីរនាក់ដើម្បីជួយអ្នកឯទៀតឲ្យបម្រើព្រះយេហូវ៉ា។ សូម្បីតែនៅពេលដែលអ្នកឯទៀតឈប់ធ្វើអ្វីដែលត្រឹមត្រូវក្ដី យែបថានិងកូនស្រីរបស់គាត់នៅតែរក្សាភាពស្មោះត្រង់នឹងព្រះយេហូវ៉ា។
១៩ គម្ពីរចែងថា៖ «ចូរយកតម្រាប់តាមពួកអ្នកដែលបានទទួលសេចក្ដីសន្យាជាមត៌កដោយសារជំនឿនិងចិត្តអត់ធ្មត់»។ (ហេប្រឺ ៦:១២) សូមយើងយកតម្រាប់យែបថានិងកូនស្រីរបស់គាត់ ដោយដឹងថាពេលដែលយើងរក្សាភាពស្មោះត្រង់ ព្រះយេហូវ៉ានឹងឲ្យពរដល់យើង។