ព្រះយេហូវ៉ាឲ្យរង្វាន់ដល់អ្នកដែល ខំស្វែងរកលោកអស់ពីចិត្ត
«អ្នកដែលចូលទៅជិតព្រះ ត្រូវតែជឿថាមានព្រះ ហើយជឿថាលោកឲ្យរង្វាន់ដល់ អ្នកដែលខំស្វែងរកលោកអស់ពីចិត្ត»។—ហេប្រឺ ១១:៦
១, ២. (ក) តើសេចក្ដីស្រឡាញ់និងជំនឿជាប់ទាក់ទងគ្នាយ៉ាងណា? (ខ) តើយើងនឹងពិចារណាសំណួរអ្វីខ្លះ?
ព្រះយេហូវ៉ាដែលជាបិតារបស់យើងសន្យាថាលោកនឹងឲ្យពរដល់អ្នកបម្រើដ៏ស្មោះភក្ដីរបស់លោក។ នេះជារបៀបមួយដែលព្រះយេហូវ៉ាបង្ហាញសេចក្ដីស្រឡាញ់របស់លោកចំពោះយើង ហើយយើងស្រឡាញ់លោក‹ពីព្រោះលោកបានស្រឡាញ់យើងជាមុន›។ (យ៉ូហានទី១ ៤:១៩) កាលដែលយើងស្រឡាញ់ព្រះយេហូវ៉ាកាន់តែខ្លាំង នោះជំនឿរបស់យើងទៅលើលោកកាន់តែរឹងមាំ ហើយយើងកាន់តែជឿជាក់ថាព្រះយេហូវ៉ានឹងឲ្យរង្វាន់ដល់អ្នកដែលលោកស្រឡាញ់។—សូមអាន ហេប្រឺ ១១:៦
២ ការឲ្យរង្វាន់គឺជាអ្វីដ៏សំខាន់ណាស់ចំពោះព្រះយេហូវ៉ា ហើយលោកតែងតែធ្វើដូច្នេះ! ហេតុនេះ បើយើងមិនជឿជាក់ថាលោកនឹងឲ្យរង្វាន់ដល់អ្នកដែលខំស្វែងរកលោកអស់ពីចិត្តទេ នោះយើងមិនមានជំនឿទាំងស្រុងទៅលើព្រះឡើយ។ ហេតុអ្វី? ពីព្រោះ«ជំនឿគឺជាការទុកចិត្តដោយមានទីសំអាងមាំមួនថា អ្វីៗនឹងកើតឡើងដូចសង្ឃឹម»។ (ហេប្រឺ ១១:១) ជំនឿមានន័យថាយើងជឿជាក់ទាំងស្រុងថាព្រះនឹងឲ្យពរដល់អ្នកបម្រើដ៏ស្មោះភក្ដីរបស់លោក។ ប៉ុន្តែ តើយើងទទួលប្រយោជន៍យ៉ាងណាពីសេចក្ដីសង្ឃឹមដើម្បីទទួលរង្វាន់? តើតាមរបៀបណាព្រះយេហូវ៉ាឲ្យរង្វាន់ដល់អ្នកបម្រើរបស់លោកនៅអតីតកាលនិងបច្ចុប្បន្នកាល? សូមយើងពិចារណាចម្លើយចំពោះសំណួរទាំងនេះ។
ព្រះយេហូវ៉ាសន្យាថាលោកនឹងឲ្យពរដល់អ្នកបម្រើលោក
៣. តើម៉ាឡាគី ៣:១០មានសេចក្ដីសន្យាអ្វី?
៣ ព្រះយេហូវ៉ាបានសន្យាថាលោកនឹងឲ្យរង្វាន់ដល់អ្នកបម្រើដ៏ស្មោះត្រង់របស់លោក។ លោកអញ្ជើញយើងឲ្យជូនលោកនូវអ្វីដ៏ល្អបំផុត ហើយទុកចិត្តថាលោកនឹងឲ្យពរដល់យើង។ ព្រះយេហូវ៉ាមានប្រសាសន៍ថា៖ «[សូម]ល្បងលអញ»។ លោកបានបន្តទៀតថា៖ «បើអញមិនបើកទ្វារស្ថានសួគ៌ ដើម្បីចាក់ព្រះពរមកលើឯងដែលនឹងគ្មានកន្លែងល្មមទុកបានទេ»។ (ម៉ាឡាគី ៣:១០) យើងបង្ហាញចិត្តកតញ្ញូ ពេលយើងធ្វើតាមសេចក្ដីអញ្ជើញរបស់ព្រះយេហូវ៉ាដែលឲ្យល្បងលលោក។
៤. ហេតុអ្វីយើងអាចទុកចិត្តលើសេចក្ដីសន្យារបស់លោកយេស៊ូនៅម៉ាថាយ ៦:៣៣?
៤ លោកយេស៊ូបានសន្យានឹងអ្នកកាន់តាមលោកថាបើពួកគេចាត់ទុករាជាណាចក្រព្រះថាសំខាន់បំផុត នោះព្រះនឹងគាំទ្រពួកគេ។ (សូមអាន ម៉ាថាយ ៦:៣៣) លោកយេស៊ូអាចមានប្រសាសន៍ដូច្នេះបានដោយសារលោកដឹងថាសេចក្ដីសន្យារបស់ព្រះតែងតែសម្រេច។ (អេសាយ ៥៥:១១) ដូច្នេះ យើងក៏អាចជឿជាក់ដែរថា បើយើងបង្ហាញជំនឿទាំងស្រុងទៅលើព្រះយេហូវ៉ា នោះលោកនឹងរក្សាសេចក្ដីសន្យានេះ ដែលថា៖ «ខ្ញុំប្រាកដជាមិនចាកចេញពីអ្នកឡើយ ក៏ប្រាកដជាមិនបោះបង់ចោលអ្នកដែរ»។ (ហេប្រឺ ១៣:៥) សេចក្ដីសន្យានេះរបស់ព្រះយេហូវ៉ាជួយយើងឲ្យទុកចិត្តទៅលើពាក្យរបស់លោកយេស៊ូនៅម៉ាថាយ ៦:៣៣។
លោកយេស៊ូបានបង្ហាញថាអ្នកកាន់តាមលោកនឹងទទួលរង្វាន់ចំពោះការលះបង់របស់ពួកគេ (សូមមើលវគ្គ៥)
៥. ហេតុអ្វីការឆ្លើយតបរបស់លោកយេស៊ូទៅកាន់ពេត្រុសលើកទឹកចិត្តយើងទាំងអស់គ្នា?
៥ សាវ័កពេត្រុសបានសួរលោកយេស៊ូថា៖ «យើងខ្ញុំបានចាកចេញពីអ្វីៗទាំងអស់ ហើយបានតាមលោក តើនឹងមានផលប្រយោជន៍អ្វីសម្រាប់យើង?»។ (ម៉ាថាយ ១៩:២៧) លោកយេស៊ូមិនបានកែតម្រង់ពេត្រុសដោយសារគាត់បានសួរសំណួរដូច្នេះទេ។ ផ្ទុយទៅវិញ លោកយេស៊ូបានប្រាប់អ្នកកាន់តាមលោកថាពួកគេនឹងទទួលរង្វាន់ចំពោះការលះបង់របស់ពួកគេ។ ពួកសាវ័កនិងអ្នកស្មោះត្រង់ឯទៀតនឹងគ្រប់គ្រងជាមួយនឹងលោកយេស៊ូនៅស្ថានសួគ៌នាពេលអនាគត។ ប៉ុន្តែ លោកយេស៊ូបានមានប្រសាសន៍ដែរថា សូម្បីតែឥឡូវនេះក៏មានរង្វាន់។ លោកបានមានប្រសាសន៍ថា៖ «អ្នកណាដែលបានចាកចេញពីផ្ទះ ឬបងប្អូនប្រុសស្រី ឬឪពុក ឬម្ដាយ ឬកូន ឬស្រែចម្ការ ព្រោះតែនាមខ្ញុំ អ្នកនោះនឹងទទួលអ្វីៗទាំងនោះច្រើនដងលើសមុនទៅទៀត ក៏នឹងទទួលជីវិតដែលគ្មានទីបញ្ចប់ជាមត៌ក»។ (ម៉ាថាយ ១៩:២៩) សព្វថ្ងៃនេះ អស់អ្នកដែលកាន់តាមលោកយេស៊ូអាចមានឪពុក ម្ដាយ បងប្អូនប្រុសស្រី និងកូនក្នុងក្រុមជំនុំ។ នេះពិតជាមានតម្លៃច្រើនជាងអ្វីណាក៏ដោយដែលយើងបានលះបង់ដើម្បីរាជាណាចក្ររបស់ព្រះ។
«យុថ្កាសម្រាប់ជីវិត»
៦. ហេតុអ្វីព្រះយេហូវ៉ាសន្យាថាលោកនឹងឲ្យរង្វាន់ដល់អ្នកបម្រើរបស់លោក?
៦ ក្រៅពីការទទួលពរដ៏អស្ចារ្យជាច្រើននៅឥឡូវនេះ យើងក៏ទន្ទឹងរង់ចាំទទួលពរដែលកាន់តែអស្ចារ្យនាពេលអនាគតដែរ។ (ធីម៉ូថេទី១ ៤:៨) ព្រះយេហូវ៉ាសន្យាថាលោកនឹងឲ្យរង្វាន់ដល់អ្នកបម្រើដ៏ស្មោះត្រង់របស់លោក ហើយការដឹងដូច្នេះជួយយើងឲ្យស៊ូទ្រាំនឹងគ្រាដែលមានការលំបាក។ ដោយជឿជាក់ទាំងស្រុងថាព្រះយេហូវ៉ា«ឲ្យរង្វាន់ដល់អ្នកដែលខំស្វែងរកលោកអស់ពីចិត្ត» នោះយើងអាចរក្សាខ្លួនឲ្យនៅស្មោះត្រង់។—ហេប្រឺ ១១:៦
៧. តើសេចក្ដីសង្ឃឹមប្រៀបដូចជាយុថ្កាយ៉ាងដូចម្ដេច?
៧ ក្នុងសុន្ទរកថានៅលើភ្នំ លោកយេស៊ូបានមានប្រសាសន៍ថា៖ ‹គេធ្លាប់បៀតបៀនពួកអ្នកប្រកាសទំនាយ ដែលបានរស់នៅមុនអ្នករាល់គ្នា។ ហេតុនេះចូរសប្បាយ ហើយត្រេកអរចុះ! ពីព្រោះអ្នករាល់គ្នាមានរង្វាន់យ៉ាងធំនៅស្ថានសួគ៌›។ (ម៉ាថាយ ៥:១២) អ្នកបម្រើខ្លះរបស់ព្រះនឹងទទួលរង្វាន់នៅស្ថានសួគ៌។ អ្នកឯទៀតនឹងទទួលរង្វាន់ជាជីវិតដែលគ្មានទីបញ្ចប់នៅលើផែនដីជាសួនឧទ្យាន។ នេះក៏ជាហេតុឲ្យ«សប្បាយ ហើយត្រេកអរ»ដែរ។ (ទំនុកតម្កើង ៣៧:១១; លូកា ១៨:៣០) ប៉ុន្តែ ចំពោះយើងទាំងអស់គ្នា សេចក្ដីសង្ឃឹមរបស់យើងអាចប្រៀបដូចជា«យុថ្កាសម្រាប់ជីវិតយើង ក៏រឹងមាំនិងពិតប្រាកដ»។ (ហេប្រឺ ៦:១៧-២០) ដូចយុថ្កាដែលទប់កប៉ាល់ឲ្យនៅនឹងក្នុងអំឡុងខ្យល់ព្យុះ សេចក្ដីសង្ឃឹមដ៏រឹងមាំរបស់យើងអាចជួយយើងឲ្យនៅមាំមួននិងមិនរង្គោះរង្គើ។ សេចក្ដីសង្ឃឹមនេះអាចផ្ដល់កម្លាំងចិត្តឲ្យយើងស៊ូទ្រាំនឹងគ្រាដែលមានការលំបាក។
ព្រះយេហូវ៉ាសន្យាថាលោកនឹងឲ្យរង្វាន់ដល់អ្នកបម្រើដ៏ស្មោះត្រង់របស់លោក ហើយការដឹងដូច្នេះជួយយើងឲ្យស៊ូទ្រាំនឹងគ្រាដែលមានការលំបាក
៨. តើសេចក្ដីសង្ឃឹមរបស់យើងកាត់បន្ថយការខ្វល់ចិត្តយ៉ាងដូចម្ដេច?
៨ សេចក្ដីសង្ឃឹមរបស់យើងអាចជួយកាត់បន្ថយការខ្វល់ចិត្ត។ ដូចប្រេងលាបដែលអាចធ្វើឲ្យស្បែករបស់យើងធូរស្បើយ សេចក្ដីសន្យារបស់ព្រះអាចធ្វើឲ្យចិត្តរបស់យើងដែលមានកង្វល់ធូរស្រាល។ យើងទទួលការសម្រាលទុក្ខដោយដឹងថាព្រះយេហូវ៉ានឹងថែរក្សាយើង ពេលយើងផ្ទេរបន្ទុករបស់យើងទៅលើលោក។ (ទំនុកតម្កើង ៥៥:២២) យើងអាចមានទំនុកចិត្តទាំងស្រុងថាព្រះអាចធ្វើ«ហួសពីអ្វីៗទាំងអស់ដែលយើងសុំ»។ (អេភេសូរ ៣:២០) ព្រះយេហូវ៉ានឹងជួយយើង មិនគ្រាន់តែយ៉ាងច្រើនឬច្រើនក្រៃលែងប៉ុណ្ណោះទេ តែ«ហួស»ពីនេះទៅទៀត!
៩. តើតាមរបៀបណាយើងអាចប្រាកដថាយើងនឹងទទួលពរពីព្រះយេហូវ៉ា?
៩ ដើម្បីទទួលរង្វាន់ យើងត្រូវមានជំនឿទាំងស្រុងទៅលើព្រះយេហូវ៉ា ហើយធ្វើតាមការណែនាំរបស់លោក។ ម៉ូសេបានប្រាប់ប្រជាជាតិអ៊ីស្រាអែលថា៖ «ព្រះយេហូវ៉ាជាព្រះនៃឯង ទ្រង់នឹងប្រទានពរដល់ឯងនៅក្នុងស្រុកដែលទ្រង់ប្រទានមក ឲ្យឯងចាប់យកជាមរដកនោះជាមិនខាន។ គឺបើឯងគ្រាន់តែខំប្រឹងស្ដាប់តាមព្រះយេហូវ៉ាជាព្រះនៃឯង ឲ្យអស់ពីចិត្តដើម្បីនឹងកាន់ ហើយប្រព្រឹត្តតាមសេចក្ដីបញ្ញត្តដែលអញបង្គាប់ដល់ឯងនៅថ្ងៃនេះគ្រប់ជំពូកប៉ុណ្ណោះ។ ដ្បិតព្រះយេហូវ៉ាជាព្រះនៃឯង ទ្រង់នឹងប្រទានពរដល់ឯង ដូចជាទ្រង់បានសន្យាហើយ»។ (ចោទិយកថា ១៥:៤-៦) តើអ្នកជឿជាក់ទាំងស្រុងថាព្រះយេហូវ៉ានឹងឲ្យពរអ្នក បើអ្នកបន្តបម្រើលោកយ៉ាងស្មោះត្រង់ឬទេ? អ្នកមានមូលហេតុត្រឹមត្រូវដើម្បីមានទំនុកចិត្តបែបនេះ។
ព្រះយេហូវ៉ាបានឲ្យរង្វាន់ដល់ពួកគាត់
១០, ១១. តើព្រះយេហូវ៉ាបានឲ្យរង្វាន់អ្វីដល់យ៉ូសែប?
១០ គម្ពីរបានត្រូវសរសេរដើម្បីជាប្រយោជន៍ដល់យើង។ ក្នុងគម្ពីរមានកំណត់ហេតុជាច្រើនអំពីរបៀបដែលព្រះឲ្យរង្វាន់ដល់អ្នកបម្រើដ៏ស្មោះត្រង់របស់លោកនៅអតីតកាល។ (រ៉ូម ១៥:៤) យ៉ូសែបជាគំរូដ៏ល្អប្រសើរស្តីអំពីរឿងនេះ។ ដំបូង បងប្រុសៗរបស់គាត់បានលក់គាត់ឲ្យធ្វើជាខ្ញុំបម្រើ។ ក្រោយមក ប្រពន្ធរបស់ម្ចាស់គាត់បានចោទប្រកាន់គាត់ ហើយគាត់បានត្រូវបញ្ជូនទៅគុកនៅស្រុកអេស៊ីប។ ពេលយ៉ូសែបនៅក្នុងគុក តើគាត់បានឃ្លាតចេញពីព្រះយេហូវ៉ាឬទេ? មិនមែនទេ! គម្ពីរចែងថា៖ «ព្រះយេហូវ៉ាទ្រង់គង់ជាមួយនឹងយ៉ូសែប ហើយក៏ផ្ដល់សេចក្ដីសប្បុរសដល់គាត់» ហើយក៏ចែងដែរថា៖ «ព្រះយេហូវ៉ាទ្រង់គង់ជាមួយនឹងគាត់ ហើយការអ្វីដែលគាត់ធ្វើ នោះទ្រង់ធ្វើឲ្យចំរើនឡើងគ្រប់ជំពូក»។ (លោកុប្បត្តិ ៣៩:២១, ២៣) សូម្បីតែក្នុងគ្រានោះដែលមានការលំបាកក្ដី យ៉ូសែបបានរង់ចាំព្រះរបស់គាត់ដោយចិត្តអត់ធ្មត់។
១១ ប៉ុន្មានឆ្នាំក្រោយមក ផារ៉ូបានដោះលែងយ៉ូសែបចេញពីគុក ហើយខ្ញុំបម្រើដែលមានចិត្តរាបទាបនេះបានទៅជាអ្នកគ្រប់គ្រងដែលមានអំណាចខ្លាំងបំផុតទី២នៅស្រុកអេស៊ីប។ (លោកុប្បត្តិ ៤១:១, ៣៧-៤៣) ពេលយ៉ូសែបនិងប្រពន្ធរបស់គាត់មានកូនប្រុសពីរនាក់ «យ៉ូសែបឲ្យកូនច្បងឈ្មោះថាម៉ាន៉ាសេ ដោយគិតថា ‹ព្រះទ្រង់បានធ្វើឲ្យអញភ្លេចសេចក្ដីទុក្ខលំបាករបស់អញទាំងប៉ុន្មាន ព្រមទាំងពួកគ្រួឪពុកអញផង› ហើយកូន១ទៀតគាត់ឲ្យឈ្មោះថាអេប្រាអិម ដោយគិតថា ‹ព្រះទ្រង់បានប្រទានឲ្យអញមានកូននៅក្នុងស្រុកនៃសេចក្ដីទុក្ខព្រួយរបស់អញ›»។ (លោកុប្បត្តិ ៤១:៥១, ៥២) ព្រះយេហូវ៉ាបានឲ្យរង្វាន់ដល់យ៉ូសែប ដោយសារគាត់មានភក្ដីភាពចំពោះលោក ហើយគាត់បានសង្គ្រោះទាំងជនជាតិអ៊ីស្រាអែលទាំងជនជាតិអេស៊ីបពីការអត់ឃ្លាន។ ម្យ៉ាងទៀត យ៉ូសែបបានដឹងថាគឺព្រះយេហូវ៉ាដែលបានឲ្យរង្វាន់និងពរដល់គាត់។—លោកុប្បត្តិ ៤៥:៥-៩
លោកយេស៊ូពិតជាមានអំណរក្នុងការធ្វើឲ្យនាមរបស់ព្រះបានបរិសុទ្ធ
១២. ពេលលោកយេស៊ូបានត្រូវល្បងល តើតាមរបៀបណាលោកបានរក្សាភាពស្មោះត្រង់?
១២ លោកយេស៊ូគ្រិស្តក៏នៅតែស្ដាប់បង្គាប់ព្រះ ទោះជាមានការល្បងលជាច្រើនក៏ដោយ ហើយព្រះយេហូវ៉ាបានឲ្យរង្វាន់ដល់លោក។ តើអ្វីបានជួយលោកយេស៊ូឲ្យនៅស្មោះត្រង់? បណ្ដាំរបស់ព្រះពន្យល់ថា៖ «ដោយសារអំណរដែលនៅខាងមុខលោក លោកបានស៊ូទ្រាំលើបង្គោលទារុណកម្ម ក៏បានមើលងាយចំពោះសេចក្ដីអាម៉ាស់ខ្មាស»។ (ហេប្រឺ ១២:២) លោកយេស៊ូពិតជាមានអំណរក្នុងការធ្វើឲ្យនាមរបស់ព្រះបានបរិសុទ្ធ។ ម្យ៉ាងទៀត លោកយេស៊ូបានទទួលរង្វាន់ ពោលគឺការពេញចិត្តពីបិតារបស់លោក និងឯកសិទ្ធិដ៏អស្ចារ្យជាច្រើន។ គម្ពីរចែងថា លោក«បានអង្គុយនៅខាងស្ដាំបល្ល័ង្កនៃព្រះ»។ គម្ពីរក៏ចែងដែរថា៖ «ព្រះបានលើកតម្កើងលោកឲ្យមានឋានៈខ្ពស់ជាងមុន ក៏បានមេត្ដាឲ្យនាមដល់លោកដែលជានាមប្រសើរជាងនាមឯទៀតទាំងអស់»។—ភីលីព ២:៩
ព្រះយេហូវ៉ាមិនភ្លេចអ្វីដែលយើងធ្វើទេ
១៣, ១៤. តើព្រះយេហូវ៉ាមានអារម្មណ៍យ៉ាងណាចំពោះអ្វីដែលយើងធ្វើដើម្បីលោក?
១៣ យើងអាចប្រាកដថាព្រះយេហូវ៉ាឲ្យតម្លៃចំពោះអ្វីៗទាំងអស់ដែលយើងធ្វើដើម្បីបម្រើលោក។ លោកយល់ពេលយើងមិនមានទំនុកចិត្តលើខ្លួនឯង ឬពេលយើងសង្ស័យលើសមត្ថភាពរបស់ខ្លួន។ លោកយកចិត្តទុកដាក់យ៉ាងខ្លាំងចំពោះយើងពេលយើងមានកង្វល់អំពីការងារ ឬការផ្គត់ផ្គង់ក្រុមគ្រួសាររបស់យើង។ ម្យ៉ាងទៀត លោកយល់ពេលយើងមិនអាចធ្វើអ្វីច្រើនដូចដែលយើងធ្លាប់ធ្វើពីមុនក្នុងកិច្ចបម្រើរបស់លោក ពីព្រោះឥឡូវយើងមានជំងឺ ឬធ្លាក់ទឹកចិត្ត។ យើងអាចជឿជាក់ទាំងស្រុងថាព្រះយេហូវ៉ាឲ្យតម្លៃចំពោះភាពស្មោះត្រង់របស់យើង ទោះជាយើងមានបញ្ហាក៏ដោយ។—សូមអាន ហេប្រឺ ៦:១០, ១១
១៤ សូមចាំដែរថាព្រះយេហូវ៉ាគឺជាព្រះដែល«ស្ដាប់សេចក្ដីអធិស្ឋាន»។ យើងអាចប្រាកដថាពេលយើងអធិស្ឋានទៅលោក លោកនឹងស្ដាប់យើង។ (ទំនុកតម្កើង ៦៥:២) ‹បិតានៃសេចក្ដីមេត្ដាករុណា និងព្រះនៃការសម្រាលទុក្ខគ្រប់យ៉ាង› នឹងផ្ដល់ឲ្យយើងនូវអ្វីៗទាំងអស់ដែលយើងត្រូវការដើម្បីនៅជិតស្និទ្ធនឹងលោក។ ជួនកាល លោកប្រហែលជាធ្វើដូច្នេះតាមរយៈបងប្អូនរបស់យើង។ (កូរិនថូសទី២ ១:៣) ព្រះយេហូវ៉ាពេញចិត្តពេលយើងបង្ហាញចិត្តមេត្ដាករុណាចំពោះអ្នកឯទៀត។ «អ្នកណាដែលមានចិត្តអាណិតចែកដល់ពួកទាល់ក្រ[អ្នកមានទុក្ខលំបាក] នោះឈ្មោះថាថ្វាយឲ្យព្រះយេហូវ៉ាខ្ចី ទ្រង់នឹងតបស្នងសងគុណអ្នកនោះវិញ»។ (សុភាសិត ១៩:១៧; ម៉ាថាយ ៦:៣, ៤) ដូច្នេះ ពេលយើងមានចិត្តទូលាយដោយជួយបងប្អូនឯទៀត នោះព្រះយេហូវ៉ាចាត់ទុកការល្អដែលយើងធ្វើដូចជាឲ្យលោកខ្ចី។ ម្យ៉ាងទៀត លោកសន្យាថាលោកនឹងឲ្យរង្វាន់ចំពោះសេចក្ដីសប្បុរសនោះ។
រង្វាន់នៅឥឡូវនេះនិងជារៀងរហូត
១៥. តើអ្នកទន្ទឹងរង់ចាំទទួលរង្វាន់អ្វី? (សូមមើលរូបភាពនៅដើមអត្ថបទ)
១៥ គ្រិស្តសាសនិកដែលព្រះបានរើសតាំងមានសេចក្ដីសង្ឃឹមទទួល«មកុដនៃសេចក្ដីសុចរិត»ដែលជារង្វាន់ពីលោកយេស៊ូ។ (ធីម៉ូថេទី២ ៤:៧, ៨) ក៏ប៉ុន្តែ បើអ្នកមានសេចក្ដីសង្ឃឹមផ្សេង នេះមិនមានន័យថាអ្នកមិនសូវមានតម្លៃចំពោះព្រះទេ។ «ចៀមឯទៀត»រាប់លានរបស់លោកយេស៊ូពិតជាទន្ទឹងរង់ចាំទទួលរង្វាន់នៅពេលអនាគត ពោលគឺជីវិតដែលគ្មានទីបញ្ចប់នៅលើផែនដីជាសួនឧទ្យាន។ នៅទីនោះពួកគេ«នឹងបានចិត្តរីករាយ ដោយសេចក្ដីក្សេមក្សាន្តដ៏បរិបូរ»។—យ៉ូហាន ១០:១៦; ទំនុកតម្កើង ៣៧:១១
១៦. តើយ៉ូហានទី១ ៣:១៩, ២០ផ្ដល់ឲ្យយើងនូវការសម្រាលទុក្ខបែបណា?
១៦ ពេលខ្លះ យើងប្រហែលជាមានអារម្មណ៍ថាយើងមិនធ្វើច្រើនក្នុងកិច្ចបម្រើព្រះយេហូវ៉ា ឬយើងប្រហែលជាឆ្ងល់ថាព្រះយេហូវ៉ាពេញចិត្តចំពោះអ្វីដែលយើងធ្វើឬយ៉ាងណា។ យើងប្រហែលជាថែមទាំងមានអារម្មណ៍ថាយើងមិនមានគុណសម្បត្ដិគ្រប់គ្រាន់ដើម្បីទទួលរង្វាន់ណាឡើយ។ ប៉ុន្តែ យើងមិនគួរភ្លេចថា «ព្រះធំជាងចិត្តរបស់យើង ហើយក៏ជ្រាបគ្រប់ទាំងអស់»។ (សូមអាន យ៉ូហានទី១ ៣:១៩, ២០) ពេលយើងបម្រើព្រះយេហូវ៉ាដោយសារយើងមានជំនឿនិងសេចក្ដីស្រឡាញ់ចំពោះលោក យើងអាចប្រាកដថាលោកនឹងឲ្យរង្វាន់ដល់យើង ទោះជាអ្វីដែលយើងធ្វើប្រហែលជាមើលទៅមានតម្លៃតិចតួចណាស់ចំពោះយើងក្ដី។—ម៉ាកុស ១២:៤១-៤៤
១៧. នៅឥឡូវនេះ តើយើងទទួលរង្វាន់អ្វីខ្លះ?
១៧ សូម្បីតែនៅក្នុងគ្រាចុងក្រោយបង្អស់នេះនៃរបៀបរបបពិភពលោកដ៏អាក្រក់របស់សាថានក្ដី ព្រះយេហូវ៉ាកំពុងឲ្យពររាស្ត្ររបស់លោក។ លោកធ្វើឲ្យប្រាកដថាយើងទទួលចំណេះជាបរិបូរ ហើយមានសេចក្ដីសុខសាន្តជាមួយនឹងបងប្អូនរួមជំនឿនៅទូទាំងពិភពលោក។ (អេសាយ ៥៤:១៣) ពិតមែន ដូចលោកយេស៊ូបានសន្យា ព្រះយេហូវ៉ាឲ្យរង្វាន់ដល់យើងនៅឥឡូវនេះដោយផ្ដល់ឲ្យយើងនូវក្រុមគ្រួសារមួយដែលប្រកបដោយសេចក្ដីស្រឡាញ់ជាបងប្អូនរួមជំនឿទាំងអស់នៅទូទាំងពិភពលោក។ (ម៉ាកុស ១០:២៩, ៣០) ម្យ៉ាងទៀត អ្នកដែលខំស្វែងរកព្រះអស់ពីចិត្តទទួលរង្វាន់ដ៏អស្ចារ្យជាសេចក្ដីសុខសាន្តក្នុងចិត្ត ការស្កប់ចិត្ត និងសុភមង្គល។—ភីលីព ៤:៤-៧
១៨, ១៩. តើអ្នកបម្រើព្រះយេហូវ៉ាមានអារម្មណ៍យ៉ាងណាចំពោះរង្វាន់ដែលពួកគាត់ទទួល?
១៨ អ្នកបម្រើព្រះយេហូវ៉ាទូទាំងពិភពលោកបានទទួលរង្វាន់ដ៏អស្ចារ្យពីបិតារបស់យើង។ ជាឧទាហរណ៍ បងស្រីប៊ីអាន់កាដែលមកពីប្រទេសអាល្លឺម៉ង់និយាយថា៖ «ទោះជាខ្ញុំអរគុណព្រះយេហូវ៉ាច្រើនយ៉ាងណាក៏ដោយ នេះមិនស្មើនឹងការដែលលោកជួយខ្ញុំពេលខ្ញុំខ្វល់ចិត្ត ហើយនៅក្បែរខ្ញុំជារៀងរាល់ថ្ងៃទេ។ ពិភពលោកនេះមានតែភាពច្របូកច្របល់និងភាពអស់សង្ឃឹម។ ប៉ុន្តែ កាលដែលខ្ញុំធ្វើការយ៉ាងជិតស្និទ្ធជាមួយនឹងព្រះយេហូវ៉ា ខ្ញុំមានអារម្មណ៍ថាខ្លួនមានសុវត្ថិភាពក្នុងដៃរបស់លោក។ ពេលណាដែលខ្ញុំលះបង់ដើម្បីលោក លោកផ្ដល់ពរឲ្យខ្ញុំមកវិញមួយជាមួយរយ»។
១៩ ម្យ៉ាងទៀត សូមគិតអំពីបងស្រីផូឡាដែលមានអាយុ៧០ឆ្នាំដែលរស់នៅប្រទេសកាណាដា គាត់មានជំងឺឆ្អឹងខ្នងធ្ងន់ធ្ងរដែលធ្វើឲ្យគាត់ពិបាកធ្វើចលនា។ គាត់និយាយថា ដោយសារបញ្ហាសុខភាពរបស់គាត់ដាក់កម្រិតលើសកម្មភាពរបស់គាត់ នេះមិនមានន័យថានោះដាក់កម្រិតលើកិច្ចបម្រើផ្សាយរបស់គាត់ទេ។ គាត់បន្ថែមទៀតថា៖ «ខ្ញុំបានផ្សព្វផ្សាយតាមរបៀបផ្សេងៗដូចជាតាមទូរស័ព្ទនិងក្រៅផ្លូវការ។ ដើម្បីលើកទឹកចិត្តខ្លួនឯង ខ្ញុំទុកសៀវភៅកំណត់ដែលមានបទគម្ពីរនិងចំណុចផ្សេងៗពីសៀវភៅរបស់យើងដែលខ្ញុំអាចយកមកមើលម្ដងម្កាល។ ខ្ញុំហៅសៀវភៅកំណត់នោះថា‹សៀវភៅលើកទឹកចិត្ត›។ ការធ្លាក់ទឹកចិត្តគឺគ្រាន់តែបណ្ដោះអាសន្ន បើយើងផ្ដោតអារម្មណ៍ទៅលើសេចក្ដីសន្យារបស់ព្រះយេហូវ៉ា។ ព្រះយេហូវ៉ាតែងតែជួយយើង ទោះជាយើងមានកាលៈទេសៈយ៉ាងណាក៏ដោយ»។ ស្ថានភាពរបស់អ្នកប្រហែលជាខុសគ្នាឆ្ងាយណាស់ពីស្ថានភាពរបស់បងប៊ីអាន់កា ឬស្ថានភាពរបស់បងផូឡា។ ក៏ប៉ុន្តែ អ្នកទំនងជាអាចគិតអំពីរបៀបដែលព្រះយេហូវ៉ាបានឲ្យរង្វាន់ដល់អ្នកនិងបុគ្គលដែលនៅជុំវិញអ្នក។ គឺជាការល្អដែលអ្នកគិតអំពីរបៀបដែលព្រះយេហូវ៉ាកំពុងឲ្យរង្វាន់ដល់អ្នកនៅពេលឥឡូវនេះ និងរបៀបដែលលោកនឹងឲ្យរង្វាន់ដល់អ្នកនៅពេលអនាគត។
២០. បើយើងបន្តខំអស់ពីសមត្ថភាពដើម្បីបម្រើព្រះយេហូវ៉ាយ៉ាងស្មោះត្រង់ តើយើងអាចទន្ទឹងរង់ចាំអ្វី?
២០ សូមកុំភ្លេចថាសេចក្ដីអធិដ្ឋានដ៏ស្មោះរបស់អ្នកនឹង«ទទួលរង្វាន់យ៉ាងធំ»។ អ្នកអាចប្រាកដថា«ក្រោយពីបានធ្វើតាមបំណងប្រាថ្នារបស់ព្រះ» អ្នកនឹង«ទទួលតាមសេចក្ដីសន្យា»។ (ហេប្រឺ ១០:៣៥, ៣៦) ដូច្នេះ សូមយើងបន្តពង្រឹងជំនឿរបស់យើង ហើយខំអស់ពីសមត្ថភាពដើម្បីបម្រើព្រះយេហូវ៉ា។ យើងមានទំនុកចិត្តថាព្រះយេហូវ៉ានឹងឲ្យរង្វាន់ដល់យើង!—សូមអាន កូឡុស ៣:២៣, ២៤