ចូរចាំយាម!
តើអ្នកអាចធ្វើយ៉ាងណាដើម្បីរក្សាចិត្តរីករាយ ទោះជាជួបការពិបាក? តើគម្ពីរចែងយ៉ាងណា?
ពេលស្ថិតក្នុងការពិបាក យើងមិនតែងតែអាចគ្រប់គ្រងអ្វីដែលកើតឡើងចំពោះយើងទេ។ ទោះជាយ៉ាងនោះក្ដី យើងអាចមានចិត្តរីករាយបានឬមិនបាន គឺអាស្រ័យទៅលើទស្សនៈរបស់យើងចំពោះស្ថានភាពនោះ។ គម្ពីរប្រាប់ថាទោះជាមានបញ្ហាអ្វីក៏ដោយ«អ្នកដែលមានចិត្តរីករាយ តែងតែមានអំណរក្នុងជីវិត»។ (សុភាសិត ១៥:១៥, Good News Translation) តើយើងអាចធ្វើយ៉ាងណាដើម្បីរក្សាចិត្តរីករាយ? សូមពិចារណាដំបូន្មានខ្លះៗក្នុងគម្ពីរដែលជួយយើងឲ្យមានចិត្តរីករាយ។
ពេលខ្វល់ចិត្ត
គម្ពីរចែងថា៖«ការព្រួយបារម្ភនាំឲ្យកម្លាំងចិត្តចុះខ្សោយ តែពាក្យសម្ដីល្អមួយម៉ាត់ធ្វើឲ្យមានកម្លាំងចិត្តឡើងវិញ»។—សុភាសិត ១២:២៥
គម្ពីរអាចជួយអ្នកកាត់បន្ថយការខ្វល់ចិត្ត។ ដើម្បីស្វែងយល់អំពីរឿងនេះ សូមអានអត្ថបទដែលមានចំណងជើងថា«តើគម្ពីរចែងយ៉ាងណាអំពីការខ្វល់ចិត្ត?»។
ពេលមានអារម្មណ៍ឯកោ
គម្ពីរចែងថា៖«មិត្តពិតបង្ហាញសេចក្ដីស្រឡាញ់គ្រប់ពេលវេលា ហើយគាត់ប្រៀបដូចជាបងប្អូនដែលកើតមក ដើម្បីជួយគ្នានៅពេលមានទុក្ខលំបាក»។—សុភាសិត ១៧:១៧
គម្ពីរមានយោបល់ល្អៗដែលអាចជួយយកឈ្នះអារម្មណ៍ឯកោ ដោយពង្រឹងចំណងមិត្តភាពជាមួយអ្នកឯទៀត។ សូមអានអត្ថបទដែលមានចំណងជើងថា«ជំនះភាពឯកោដោយរាប់អានមិត្ត តើគម្ពីរអាចជួយយ៉ាងណា?»។
បណ្ដុះឲ្យមានសេចក្ដីស្រឡាញ់ចំពោះព្រះនិងអ្នកជិតខាង
គម្ពីរចែងថា៖«អ្នកត្រូវស្រឡាញ់ព្រះយេហូវ៉ាជាព្រះរបស់អ្នក ឲ្យអស់ពីដួងចិត្ត អស់ពីជីវិត និងអស់ពីសមត្ថភាពរិះគិត . . . អ្នកត្រូវស្រឡាញ់អ្នកជិតខាងដូចស្រឡាញ់ខ្លួនអ្នក»។a—ម៉ាថាយ ២២:៣៧-៣៩
សេចក្ដីអធិដ្ឋានអាចជួយយើងឲ្យមានចំណងមិត្តភាពជិតស្និទ្ធជាមួយព្រះ។ ដើម្បីស្វែងយល់ថែមទៀតអំពីរឿងនេះ សូមអានអត្ថបទដែលមានចំណងជើងថា«តើព្រះពិតជាស្ដាប់សេចក្ដីអធិដ្ឋានរបស់យើងឬទេ?»។
យើងបង្ហាញសេចក្ដីស្រឡាញ់ចំពោះអ្នកឯទៀតដោយធ្វើតាមគោលការណ៍ដ៏ល្បីល្បាញ។ ដើម្បីស្វែងយល់ថែមទៀតអំពីរឿងនេះ សូមអានអត្ថបទដែលមានចំណងជើងថា«តើអ្វីទៅជាគោលការណ៍ដ៏ល្បីល្បាញ?»។
សូមរៀនថែមទៀតនូវអ្វីដែលគម្ពីរចែងអំពីការរក្សាចិត្តរីករាយ ទោះជាយើងជួបការពិបាកក្នុងជីវិតក្ដី។ ដើម្បីធ្វើដូច្នេះ យើងសូមអញ្ជើញលោកអ្នកសាកល្បងវគ្គសិក្សាគម្ពីរដោយឥតគិតថ្លៃ។
a យេហូវ៉ាគឺជានាមរបស់ព្រះ។—ចម្រៀងសរសើរព្រះ ៨៣:១៨