ពួកទេវតាកំពុងតែជួយយើង
១ «មើល! ខ្ញុំក៏នៅជាមួយនឹងអ្នករាល់គ្នាជារាល់ថ្ងៃដែរ ដរាបដល់បំផុតកល្ប»។ ពាក្យទាំងនេះពិតជាលើកទឹកចិត្តអស់អ្នកដែលស្ដាប់តាមការបង្គាប់របស់ព្រះយេស៊ូដែលថា៖ «ចូរទៅបញ្ចុះបញ្ចូលឲ្យមានសិស្ស!»។ (ម៉ាថ. ២៨:១៨-២០) វិធីម្យ៉ាងដែលព្រះយេស៊ូនៅជាមួយនឹងគ្រីស្ទានពិត គឺតាមរយៈពួកទេវតារបស់ទ្រង់។ (ម៉ាថ. ១៣:៣៦-៤៣) ការផ្សាយ«ដំណឹងល្អដ៏នៅអស់កល្បជានិច្ច»រួមជាមួយនឹងសត្តនិករវិញ្ញាណដែលស្មោះភក្ដីទាំងនេះ ក៏ធ្វើឲ្យយើងរំភើបចិត្តណាស់។—វិវរ. ១៤:៦, ៧
២ ក្នុងកិច្ចបំរើផ្សាយរបស់យើង: ព្រះគម្ពីរបានប្រាប់ឲ្យដឹងថា ពួកទេវតាត្រូវបានចាត់មក«សំរាប់ការងារជួយដល់ពួកដែលត្រូវទទួលសេចក្ដីសង្គ្រោះ»។ (ហេ. ១:១៤) នៅសតវត្សរ៍ទីមួយ ពួកទេវតាបានជួយពួកអ្នកកាន់តាមព្រះយេស៊ូរកមនុស្សឯទៀតដែលសមនឹងទទួលសេចក្ដីសង្គ្រោះនោះ។ (កិច្ច. ៨:២៦) សព្វថ្ងៃនេះ អ្នកបំរើរបស់ព្រះនៅតែឮពីទីសំអាងនៃការណែនាំពីពួកទេវតា។ ជាច្រើនដង ម្ចាស់ផ្ទះបាននិយាយថា គេកំពុងតែអធិស្ឋានសូមជំនួយ បន្ទាប់មកស្មរបន្ទាល់ម្នាក់បានទៅផ្សព្វផ្សាយនៅផ្ទះរបស់គេ។ នៅពេលដែលមនុស្សបែបនេះទទួលសារព្រះរាជាណាចក្រ យើងក៏ពិតជាមានអំណរដូចពួកទេវតាដែរ។—លូ. ១៥:១០
៣ នៅពេលដែលយើងពិសោធការប្រឆាំង: ដានីយ៉ែលនិងសហការីបីនាក់របស់គាត់សាសន៍ហេព្រើរដែលនៅក្មេងនៅឡើយ សាវ័កពេត្រុស ហើយនិងមនុស្សច្រើនឯទៀតដែលបានឆ្លងកាត់ការល្បងលយ៉ាងខ្លាំងបានពិសោធនូវការការពារពីព្រះយេហូវ៉ាតាមរយៈពួកទេវតា«ជាអ្នកដែលមានឥទ្ធិឫទ្ធិខ្លាំង»។ (ទំនុក. ១០៣:២០; ដា. ៣:២៨; ៦:២១, ២២; កិច្ច. ១២:១១) ទោះបីជាយើងមានអារម្មណ៍ជួយខ្លួនឯងពុំកើតក៏ដោយ ក៏យើងអាចទទួលការលើកទឹកចិត្តពីអ្វីដែលអ្នកបំរើអេលីសេបានពិសោធនៅពេលដែលគាត់បានយល់ដឹងថា«ពួកដែលនៅខាងយើង មានគ្នាច្រើនជាងពួកដែលនៅខាងគេទៅទៀត»។ (២ពង្ស. ៦:១៥-១៧) ទោះបីជាមានគេបង្ខំយើងឲ្យញែកខ្លួនចេញពីបងប្អូនគ្រីស្ទានយើងក៏ដោយ ក៏យើងមិនត្រូវអស់សង្ឃឹមឡើយ។ ព្រះបន្ទូលរបស់ព្រះធានាយើងថា«ទេវតានៃព្រះយេហូវ៉ាចោមរោមនៅជុំវិញនៃអស់អ្នកដែលកោតខ្លាចដល់ទ្រង់»។—ទំនុក. ៣៤:៧
៤ មិនយូរប៉ុន្មានទៀត ពលបរិវារនៃពួកទេវតានឹងជិះមកដកចេញអស់អ្នកដែលប្រឆាំងនឹងអំណាចគ្រប់គ្រងរបស់ព្រះគ្រីស្ទជាស្តេច។ (វិវរ. ១៩:១១, ១៤, ១៥) កំឡុងពេលដែលយើងរង់ចាំថ្ងៃនោះ ចូរឲ្យយើងមានចិត្តយ៉ាងអង់អាចក្នុងការសរសើរព្រះយេហូវ៉ាជាបន្ត ដោយមានទំនុកចិត្តទៅលើពួកពលបរិវារនៅស្ថានសួគ៌ដែលនៅក្រោមបង្គាប់របស់ព្រះគ្រីស្ទ។—១ពេ. ៣:២២