ប្អូនៗវ័យក្មេង តើប្អូនមានគោលដៅអ្វីក្នុងកិច្ចបម្រើព្រះ?
១ ព្រះយេហូវ៉ាជ្រាបថាគឺសំខាន់ណាស់ឲ្យយើងមានកិច្ចការដែលមានន័យខ្លឹមសារ និងមានគោលដៅដែលអាចសម្រេចបាន ព្រោះនោះនាំឲ្យយើងមានសុភមង្គលពិត។ (សូមមើល លោ. ១:២៨; ២:១៥, ១៩) សព្វថ្ងៃនេះ ព្រះយេហូវ៉ាបានប្រគល់ភារកិច្ចឲ្យរាស្ត្ររបស់លោក ពោលគឺកិច្ចផ្សព្វផ្សាយនិងការបង្រៀន។ សំខាន់បំផុត យើងក៏មានគោលដៅទទួលជីវិតដែលគ្មានទីបញ្ចប់នៅសួនឧទ្យានដែរ។ ប៉ុន្តែ ទម្រាំដល់គ្រានោះ យើងត្រូវកំណត់គោលដៅបន្តបន្ទាប់ក្នុងកិច្ចបម្រើព្រះដើម្បីជឿនទៅមុខ។ បើយើងធ្វើដូច្នោះ យើងអាចជៀសវាងពីការបង្ខាតកម្លាំងនិងធនធានរបស់យើង។—១កូ. ៩:២៦
២ គោលដៅផ្សេងៗដែលប្អូនវ័យក្មេងអាចសម្រេចបាន: ប្អូនៗវ័យក្មេងគួរកំណត់គោលដៅក្នុងកិច្ចបម្រើព្រះដែលអាចសម្រេចបាន ដែលស្របតាមសមត្ថភាពរបស់ពួកគេ។ (១ធី. ៤:១៥) ប្អូនតូចៗខ្លះបានខំព្យាយាមទន្ទេញចាំឈ្មោះសៀវភៅដែលមានក្នុងគម្ពីរ សូម្បីតែពួកគេមិនទាន់ចេះអានអក្សរក៏ដោយ។ តាមរយៈការគោរពប្រណិប័តន៍ជាក្រុមគ្រួសារ កូនៗរៀនឲ្យចេះរៀបចំសម្រាប់កិច្ចប្រជុំ ដើម្បីពួកគេអាចឆ្លើយចម្លើយយ៉ាងល្អ ហើយដើម្បីពួកគេអាចចុះឈ្មោះក្នុងសាលាកិច្ចបម្រើផ្សាយ។ ពេលដែលកូនៗទៅផ្សព្វផ្សាយជាមួយនឹងឪពុកម្ដាយ នោះពួកគេរៀនឲ្យចេះផ្សព្វផ្សាយ ហើយក៏ជួយពួកគេឲ្យរីកចម្រើន រហូតដល់មានគុណសម្បត្ដិគ្រប់គ្រាន់ក្លាយទៅជាអ្នកផ្សព្វផ្សាយដែលមិនទាន់ទទួលការជ្រមុជទឹក។ ឪពុកម្ដាយគួរជួយកូនៗឲ្យកំណត់គោលដៅប្រគល់ខ្លួនជូនព្រះនិងទទួលការជ្រមុជទឹក។
៣ បើប្អូនជាក្មេងជំទង់ តើប្អូនមានគោលដៅអ្វីខ្លះ? គម្ពីរចែងថា៖ «ចូរនឹកចាំពីព្រះដ៏បង្កើតខ្លួន»។ ប្អូនអាចធ្វើដូច្នេះដោយផ្ដោតអារម្មណ៍ទៅលើគោលដៅផ្សេងៗដែលពិតជាសំខាន់ក្នុងជីវិត។ (សាស្ដ. ១២:១; ទំនុក. ៧១:១៧) សូមធ្វើជាអ្នកត្រួសត្រាយជំនួយក្នុងអំឡុងពេលដែលសាលាប្អូនមានវិស្សមកាល។ តើប្អូនធ្លាប់គិតអំពីកិច្ចបម្រើជាអ្នកត្រួសត្រាយពេញពេលឬទេ? ចុះយ៉ាងណាបើប្អូនរៀនភាសាថ្មីមួយដើម្បីនៅថ្ងៃអនាគត ប្អូនអាចជួយក្រុមតូច ឬក្រុមជំនុំដែលនិយាយភាសាផ្សេងដែលមានក្នុងតំបន់របស់ប្អូន ឬនៅកន្លែងផ្សេងទៀត? បងប្អូនជាច្រើនដែលឥឡូវនេះកំពុងបម្រើនៅបេតអែល ឬជាអ្នកត្រួតពិនិត្យប្រចាំមណ្ឌល ឬជាសាសនទូត ពួកគាត់បានកំណត់គោលដៅចូលរួមកិច្ចបម្រើពេញពេលពិសេស តាំងពីពួកគាត់នៅជាសិស្សសាលានៅឡើយ។ សូមប្អូនកំណត់គោលដៅដូចពួកគាត់ដែរ។
៤ កាលដែលប្អូននៅក្មេងនៅឡើយ សូមខំព្យាយាមធ្វើតាមគំរូលោកយេស៊ូ។ សូម្បីតែលោកយេស៊ូមានអាយុ១២ឆ្នាំ លោកបាននិយាយយ៉ាងក្លាហានអំពីព្រះ។ (លូក. ២:៤២-៤៩, ៥២) សូមប្អូនកំណត់គោលដៅដែលមានប្រយោជន៍សម្រាប់ខ្លួន ដូចជាការសិក្សាផ្ទាល់ខ្លួន ការអានគម្ពីរជារៀងរាល់ថ្ងៃ និងការសេពគប់ជាទៀងទាត់ជាមួយនឹងបងប្អូនគ្រិស្តសាសនិកដែលមានភាពចាស់ទុំ នៅកិច្ចប្រជុំនិងពេលចូលរួមផ្សព្វផ្សាយជាមួយនឹងពួកគាត់ ព្រោះអ្វីទាំងនេះនឹងជួយប្អូនឲ្យមានភាពប៉ិនប្រសប់ក្នុងការបង្រៀនអ្នកដទៃអំពីរាជាណាចក្រព្រះ ដូចលោកយេស៊ូដែរ។