ជំពូកទី២០
កិច្ចបម្រើខាងការផ្ដល់ជំនួយ
១, ២. (ក) តើគ្រិស្តសាសនិកនៅតំបន់យូឌាបានប្រឈមមុខបញ្ហាអ្វី? (ខ) តើគ្រិស្តសាសនិកនៅតំបន់យូឌាបានទទួលសេចក្ដីស្រឡាញ់យ៉ាងដូចម្ដេច?
ប្រហែលជាឆ្នាំ៤៦ គ.ស. តំបន់យូឌាបានកើតទុរ្ភិក្ស។ ស្បៀងអាហារដែលនៅសល់គឺថ្លៃហួសពេក ហើយអ្នកកាន់តាមគ្រិស្តដែលរស់នៅសម័យនោះគ្មានលទ្ធភាពទិញស្បៀងអាហារឡើយ។ ពួកគេឃ្លាន ហើយតាមមើលទៅ ពួកគេនឹងរងគ្រោះដោយសារទុរ្ភិក្សនោះ។ ក៏ប៉ុន្តែ មិនយូរក្រោយមក អ្នកកាន់តាមគ្រិស្តបានទទួលការការពារពីព្រះយេហូវ៉ា តាមរបៀបមួយដែលពួកគេមិនធ្លាប់ពិសោធពីមុនឡើយ។ តើអ្វីបានកើតឡើង?
២ គ្រិស្តសាសនិកជនជាតិយូដានិងជនជាតិដទៃនៅក្រុងអាន់ទីយ៉ូកនាស្រុកស៊ីរីបានអាណិតអាសូរគ្រិស្តសាសនិកជាជនជាតិយូដានៅក្រុងយេរូសាឡិមនិងតំបន់យូឌា។ ដូច្នេះពួកគេបានប្រមូលប្រាក់ដើម្បីជួយបងប្អូនរួមជំនឿរបស់ពួកគេ។ រួចមក គ្រិស្តសាសនិកនៅក្រុងអាន់ទីយ៉ូកបានជ្រើសរើសបងប្រុសពីរនាក់ដែលអាចទទួលខុសត្រូវនាំយកជំនួយនោះទៅអ្នកចាស់ទុំនៅក្រុមជំនុំនាក្រុងយេរូសាឡិម។ បងប្រុសពីរនាក់នោះគឺបាណាបាសនិងសុល។ (សូមអាន សកម្មភាព ១១:២៧-៣០; ១២:២៥) បងប្អូននៅតំបន់យូឌាច្បាស់ជាបានរំភើបចិត្តខ្លាំងណាស់ ពេលឃើញថាបងប្អូននៅក្រុងអាន់ទីយ៉ូកបង្ហាញសេចក្ដីស្រឡាញ់ដូច្នេះ!
៣. (ក) តើរាស្ត្ររបស់ព្រះនៅសម័យនេះធ្វើតាមគំរូគ្រិស្តសាសនិកនៅក្រុងអាន់ទីយ៉ូកយ៉ាងដូចម្ដេច? សូមឲ្យឧទាហរណ៍។ (សូមមើលដែរនូវប្រអប់ដែលមានចំណងជើងថា«លើកទី១ដែលយើងផ្ដល់ជំនួយទ្រង់ទ្រាយធំនៅសម័យនេះ») (ខ) តើសំណួរអ្វីដែលយើងនឹងឆ្លើយក្នុងជំពូកនេះ?
៣ កំណត់ហេតុអំពីព្រឹត្ដិការណ៍នោះនៅសតវត្សរ៍ទី១ គ.ស. ជាកំណត់ហេតុដំបូងបង្អស់ដែលបញ្ជាក់អំពីគ្រិស្តសាសនិកនៅតំបន់មួយបានផ្ញើជំនួយទៅគ្រិស្តសាសនិកនៅតំបន់មួយទៀត។ សព្វថ្ងៃនេះ យើងធ្វើតាមគំរូរបស់បងប្អូនយើងនៅក្រុងអាន់ទីយ៉ូក។ ពេលយើងដឹងថាបងប្អូនរួមជំនឿនៅតំបន់មួយកំពុងរងទុក្ខលំបាកឬក៏បានរងគ្រោះដោយសារមហន្តរាយណាមួយ នោះយើងតែងតែជួយពួកគេ។a ដើម្បីយល់ច្បាស់ជាងអំពីរបៀបដែលការផ្ដល់ជំនួយទាក់ទងនឹងកិច្ចបម្រើរបស់យើង សូមពិចារណាសំណួរបីយ៉ាងអំពីកិច្ចបម្រើខាងការផ្ដល់ជំនួយគឺ ហេតុអ្វីយើងចាត់ទុកការផ្ដល់ជំនួយជាកិច្ចបម្រើ? តើយើងផ្ដល់ជំនួយក្នុងគោលបំណងអ្វី? តើយើងទទួលប្រយោជន៍អ្វីពីកិច្ចបម្រើខាងការផ្ដល់ជំនួយ?
មូលហេតុដែលកិច្ចការផ្ដល់ជំនួយជា«កិច្ចបម្រើពិសិដ្ឋ»
៤. តើប៉ូលបានប្រាប់បងប្អូននៅក្រុងកូរិនថូសអំពីអ្វីខ្លះស្តីអំពីកិច្ចបម្រើរបស់គ្រិស្តសាសនិក?
៤ ក្នុងសំបុត្រទី២ដែលសាវ័កប៉ូលបានសរសេរទៅបងប្អូននៅក្រុងកូរិនថូស គាត់ពន្យល់ថាកិច្ចបម្រើរបស់គ្រិស្តសាសនិកពិតមានពីរផ្នែក។ ទោះជាប៉ូលបានសរសេរទៅកាន់គ្រិស្តសាសនិកដែលមានសេចក្ដីសង្ឃឹមឡើងទៅស្ថានសួគ៌ក៏ដោយ ក៏ការណែនាំរបស់គាត់ទាក់ទងនឹង«ចៀមឯទៀត»របស់គ្រិស្តនៅសព្វថ្ងៃនេះដែរ។ (យ៉ូន. ១០:១៦) ផ្នែកទី១នៃកិច្ចបម្រើរបស់យើងជា«កិច្ចបម្រើខាងការផ្សះផ្សា» ពោលគឺការផ្សព្វផ្សាយនិងការបង្រៀន។ (២កូ. ៥:១៨-២០; ១ធី. ២:៣-៦) ផ្នែកទី២គឺជាកិច្ចបម្រើដែលយើងធ្វើដើម្បីជាប្រយោជន៍បងប្អូនរួមជំនឿ។ ប៉ូលបានហៅផ្នែកទី២នេះថា«ការបម្រើពួកអ្នកបរិសុទ្ធ»ឬកិច្ចបម្រើខាងការផ្ដល់ជំនួយ។ (២កូ. ៨:៤) ក្នុងឃ្លា«កិច្ចបម្រើខាងការផ្សះផ្សា» និង«ការបម្រើពួកអ្នកបរិសុទ្ធ» ពាក្យ«បម្រើ»បានត្រូវបកប្រែពីពាក្យភាសាក្រិចឌីអាកូនីអា។ ហេតុអ្វីនេះជាចំណុចសំខាន់មួយ?
៥. ពេលសាវ័កប៉ូលថាកិច្ចការផ្ដល់ជំនួយជាកិច្ចបម្រើម្យ៉ាង ហេតុអ្វីនេះជាចំណុចសំខាន់មួយ?
៥ ដោយប្រើពាក្យភាសាក្រិចតែមួយសម្រាប់សកម្មភាពទាំងពីរនោះ ប៉ូលបានបញ្ជាក់ថាកិច្ចបម្រើខាងការផ្ដល់ជំនួយគឺដូចកិច្ចបម្រើឯទៀតដែលក្រុមជំនុំគ្រិស្តសាសនិកធ្វើដែរ។ មុននោះគាត់បានសរសេរថា៖ «កិច្ចបម្រើមានផ្សេងៗពីគ្នា ប៉ុន្តែមានម្ចាស់តែមួយទេ . . . ឯសកម្មភាពមានផ្សេងៗពីគ្នា . . . ប៉ុន្តែសកម្មពលតែមួយធ្វើសកម្មភាពទាំងនេះ»។ (១កូ. ១២:៤-៦, ១១) មិនត្រឹមតែប៉ុណ្ណោះ ប៉ូលក៏បានបញ្ជាក់ដែរថា កិច្ចបម្រើផ្សេងៗរបស់ក្រុមជំនុំជាប់ទាក់ទងនឹង«កិច្ចបម្រើពិសិដ្ឋ»។b (រ៉ូម ១២:១, ៦-៨) នេះហើយជាមូលហេតុដែលប៉ូលយល់ថា ជាការត្រឹមត្រូវដែលគាត់ចំណាយពេលខ្លះក្នុងការ«បម្រើពួកអ្នកបរិសុទ្ធ»។—រ៉ូម ១៥:២៥, ២៦
៦. (ក) ដូចប៉ូលបានពន្យល់នោះ ហេតុអ្វីកិច្ចការផ្ដល់ជំនួយជាផ្នែកនៃការគោរពប្រណិប័តន៍របស់យើង? (ខ) សូមពន្យល់នូវរបៀបដែលកិច្ចការផ្ដល់ជំនួយរបស់យើងត្រូវធ្វើឡើងទូទាំងពិភពលោក។ (សូមមើលប្រអប់ដែលមានចំណងជើងថា«ពេលមានមហន្តរាយ!»)
៦ ប៉ូលបានជួយគ្រិស្តសាសនិកនៅក្រុងកូរិនថូសឲ្យយល់មូលហេតុដែលកិច្ចការផ្ដល់ជំនួយជាផ្នែកមួយនៃកិច្ចបម្រើនិងការគោរពប្រណិប័តន៍ព្រះយេហូវ៉ា។ សូមកត់សម្គាល់នូវការវែកញែករបស់ប៉ូលថា គ្រិស្តសាសនិកផ្ដល់ជំនួយដោយសារពួកគេ«ចុះចូលស្ដាប់តាមដំណឹងល្អអំពីគ្រិស្ត»។ (២កូ. ៩:១៣) ដូច្នេះ គ្រិស្តសាសនិកជួយបងប្អូនរួមជំនឿ ដោយសារពួកគេចង់អនុវត្តសេចក្ដីបង្រៀនរបស់គ្រិស្ត។ សេចក្ដីសប្បុរសដែលគ្រិស្តសាសនិកបង្ហាញចំពោះបងប្អូនរួមជំនឿ ពិតជាការបង្ហាញនូវ«គុណដ៏វិសេសលើសលប់រកអ្វីប្រៀបផ្ទឹមពុំបានដែលព្រះមាន»ចំពោះបងប្អូនទាំងនោះ។ (២កូ. ៩:១៤; ១ពេ. ៤:១០) ហេតុនេះ ទស្សនាវដ្ដីប៉មយាម ថ្ងៃទី១ ខែធ្នូ ឆ្នាំ១៩៧៥ បានចែងយ៉ាងត្រឹមត្រូវអំពីការជួយបងប្អូនដែលមានសេចក្ដីត្រូវការថា៖ «យើងអាចប្រាកដថា ព្រះយេហូវ៉ានិងលោកយេស៊ូគ្រិស្តដែលជាបុត្រលោក ចាត់ទុកថាកិច្ចបម្រើបែបនោះពិតជាសំខាន់ណាស់»។ ពិតណាស់ កិច្ចការផ្ដល់ជំនួយជាកិច្ចបម្រើពិសិដ្ឋម្យ៉ាងដែលមានតម្លៃ។—រ៉ូម ១២:១, ៧; ២កូ. ៨:៧; ហេ. ១៣:១៦
កិច្ចការផ្ដល់ជំនួយដែលមានគោលបំណងច្បាស់លាស់
៧, ៨. តើគោលបំណងទី១នៃកិច្ចការផ្ដល់ជំនួយគឺជាអ្វី? សូមពន្យល់។
៧ តើយើងបំពេញកិច្ចបម្រើខាងការផ្ដល់ជំនួយដោយមានគោលបំណងអ្វី? ក្នុងសំបុត្រទី២ដែលសាវ័កប៉ូលសរសេរទៅកាន់បងប្អូននៅក្រុងកូរិនថូស គាត់ឆ្លើយសំណួរនោះ។ (សូមអាន កូរិនថូសទី២ ៩:១១-១៥) ក្នុងខទាំងនេះ ប៉ូលបញ្ជាក់គោលបំណងសំខាន់បីដែលយើងអាចសម្រេចដោយរួមចំណែកក្នុង«កិច្ចបម្រើសាធារណៈនេះ» ពោលគឺ កិច្ចការផ្ដល់ជំនួយ។ សូមពិចារណាគោលបំណងទាំងនេះម្ដងមួយៗ។
៨ ទី១ កិច្ចបម្រើខាងការផ្ដល់ជំនួយនាំឲ្យព្រះយេហូវ៉ាទទួលសេចក្ដីសរសើរ។ សូមកត់សម្គាល់ថា ក្នុងខទាំងប្រាំខាងលើនេះ ជាច្រើនដងប៉ូលនាំឲ្យបងប្អូនគិតអំពីព្រះយេហូវ៉ា។ សាវ័កប៉ូលរំលឹកគ្រិស្តសាសនិកថា«មនុស្សអរគុណព្រះ» និងថាមាន«ការថ្លែងអំណរគុណជាច្រើនដល់ព្រះ»។ (ខ១១និង១២) គាត់ក៏បញ្ជាក់ដែរថា កិច្ចការផ្ដល់ជំនួយនាំឲ្យគ្រិស្តសាសនិក«សរសើរតម្កើងព្រះ» ថែមទាំងសរសើរ«គុណដ៏វិសេសលើសលប់រកអ្វីប្រៀបផ្ទឹមពុំបានដែលព្រះមាន»ចំពោះពួកគេ។ (ខ១៣និង១៤) ប៉ូលបញ្ចប់ការពន្យល់អំពីកិច្ចបម្រើខាងការផ្ដល់ជំនួយដោយប្រកាសថា៖ «សូមអរគុណព្រះ»។—ខ១៥; ១ពេ. ៤:១១
៩. តើកិច្ចការផ្ដល់ជំនួយអាចធ្វើឲ្យមនុស្សផ្លាស់ប្ដូរទស្សនៈយ៉ាងដូចម្ដេច? សូមឲ្យឧទាហរណ៍មួយ។
៩ ដូចប៉ូលដែរ អ្នកបម្រើរបស់ព្រះនៅសព្វថ្ងៃនេះ ក៏ចាត់ទុកកិច្ចការផ្ដល់ជំនួយជាឱកាសដើម្បីនាំឲ្យព្រះយេហូវ៉ាទទួលសេចក្ដីសរសើរ និងធ្វើឲ្យសេចក្ដីបង្រៀនរបស់លោកមានលម្អ។ (១កូ. ១០:៣១; ទីត. ២:១០) ម្យ៉ាងទៀត ច្រើនដង កិច្ចការផ្ដល់ជំនួយមានឥទ្ធិពលខ្លាំងទៅលើអ្នកឯទៀត ដោយធ្វើឲ្យពួកគេលែងមានទស្សនៈមិនល្អចំពោះព្រះយេហូវ៉ានិងសាក្សីរបស់លោក។ ជាឧទាហរណ៍ ស្ត្រីម្នាក់ដែលរស់នៅតំបន់មួយដែលត្រូវបំផ្លាញដោយខ្យល់ព្យុះ ធ្លាប់មានស្លាកលើទ្វារថា«សាក្សីព្រះយេហូវ៉ាកុំមកទីនេះ»។ ប៉ុន្តែនៅថ្ងៃមួយគាត់ឃើញមនុស្សកំពុងជួសជុលផ្ទះខូចខាតមួយនៅទល់មុខផ្ទះគាត់។ អស់ជាច្រើនថ្ងៃគាត់សង្កេតមើលពួកគេធ្វើការជាមួយគ្នាដោយរាក់ទាក់រួសរាយ រួចមកគាត់បានទៅជួបពួកគេដើម្បីសួរឲ្យដឹងថាពួកគេជាអ្នកណា។ ពេលដឹងថាជនស្ម័គ្រចិត្តទាំងនោះជាសាក្សីព្រះយេហូវ៉ា គាត់នឹកស្ងើចក្នុងចិត្ត ហើយនិយាយថា៖ «ខ្ញុំបានយល់ខុសអំពីអ្នករាល់គ្នា»។ តើមានលទ្ធផលយ៉ាងណា? គាត់បានដកស្លាកនោះចេញពីទ្វាររបស់គាត់។
១០, ១១. (ក) សូមឲ្យឧទាហរណ៍ខ្លះដែលបង្ហាញថាយើងកំពុងសម្រេចគោលបំណងទី២នៃកិច្ចការផ្ដល់ជំនួយ។ (ខ) តើព័ត៌មានអ្វីខ្លះជួយអ្នកដែលធ្វើកិច្ចការផ្ដល់ជំនួយ? (សូមមើលប្រអប់ដែលមានចំណងជើងថា«ជំនួយថែមទៀតសម្រាប់អ្នកធ្វើកិច្ចការផ្ដល់ជំនួយ»)
១០ ទី២ យើង«ផ្ដល់ជាបរិបូរ»នូវអ្វីដែលបងប្អូនរួមជំនឿត្រូវការ។ (២កូ. ៩:១២ក) យើងចង់ជួយយ៉ាងខ្លាំងដើម្បីផ្ដល់អ្វីដែលបងប្អូនត្រូវការជាបន្ទាន់ និងជួយកាត់បន្ថយការលំបាករបស់បងប្អូនប្រុសស្រីរបស់យើង។ ហេតុអ្វី? ពីព្រោះសមាជិកក្រុមជំនុំគ្រិស្តសាសនិកពិតជា«រូបកាយតែមួយ» ហើយ«ប្រសិនបើអវយវៈមួយរងទុក្ខ អវយវៈទាំងប៉ុន្មានទៀតក៏រងទុក្ខជាមួយដែរ»។ (១កូ. ១២:២០, ២៦) ដូច្នេះ សព្វថ្ងៃនេះ សេចក្ដីស្រឡាញ់និងការអាណិតអាសូរជំរុញចិត្តបងប្អូនជាច្រើនឲ្យឈប់ធ្វើអ្វីដែលពួកគេកំពុងធ្វើ រួចប្រមូលឧបករណ៍ផ្សេងៗ ហើយទៅកន្លែងដែលមានមហន្តរាយដើម្បីជួយបងប្អូនរួមជំនឿភ្លាម។ (យ៉ា. ២:១៥, ១៦) ជាឧទាហរណ៍ ក្រោយពីមានរលកយក្សស៊ូណាមីនៅប្រទេសជប៉ុននាឆ្នាំ២០១១ ការិយាល័យសាខាសហរដ្ឋអាម៉េរិកបានផ្ញើសំបុត្រទៅគណៈកម្មាធិការខាងការសាងសង់តាមភូមិភាគនៅសហរដ្ឋអាម៉េរិក ដោយសុំ«បងប្អូនខ្លះដែលមានគុណសម្បត្ដិគ្រប់គ្រាន់» ឲ្យទៅជួយសង់សាលប្រជុំឡើងវិញ។ តើមានលទ្ធផលយ៉ាងណា? ក្នុងតែប៉ុន្មានសប្ដាហ៍ប៉ុណ្ណោះ ជនស្ម័គ្រចិត្តជិត៦០០នាក់បានចុះឈ្មោះទៅជួយ ហើយបានយល់ព្រមទិញសំបុត្រយន្តហោះខ្លួនឯងដើម្បីទៅប្រទេសជប៉ុន! ការិយាល័យសាខាសហរដ្ឋអាម៉េរិកបានសរសេរថា៖ «យើងមិនបានស្មានសោះថានឹងមានបងប្អូនច្រើនយ៉ាងនេះស្ម័គ្រចិត្តទៅ»។ ពេលដែលបងប្រុសម្នាក់នៅប្រទេសជប៉ុនបានសួរបងប្អូនជនជាតិផ្សេងម្នាក់ដែលកំពុងធ្វើកិច្ចការផ្ដល់ជំនួយ អំពីមូលហេតុដែលគាត់បានមកជួយ បងប្អូននោះបានឆ្លើយថា៖ «បងប្អូនរបស់យើងនៅប្រទេសជប៉ុនគឺដូចជាអវយវៈ‹រូបកាយរបស់យើង›។ ពេលពួកគេឈឺចាប់ យើងក៏ឈឺចាប់ជាមួយនឹងពួកគេដែរ»។ ដោយមានសេចក្ដីស្រឡាញ់ជំរុញឲ្យលះបង់ប្រយោជន៍ខ្លួន អ្នកខ្លះដែលធ្វើកិច្ចការផ្ដល់ជំនួយនោះបានលះបង់រហូតដល់ប្រថុយជីវិតដើម្បីជួយបងប្អូនរួមជំនឿទៀតផង។c—១យ៉ូន. ៣:១៦
១១ មនុស្សដែលមិនមែនជាសាក្សីព្រះយេហូវ៉ាក៏ពេញចិត្តនឹងកិច្ចការផ្ដល់ជំនួយរបស់យើងផងដែរ។ ជាឧទាហរណ៍ ក្រោយពីមានមហន្តរាយនៅរដ្ឋអារកាន់សាស់ សហរដ្ឋអាម៉េរិក នាឆ្នាំ២០១៣ កាសែតមួយបានចុះផ្សាយអំពីរបៀបដែលជនស្ម័គ្រចិត្តជាសាក្សីព្រះយេហូវ៉ាផ្ដល់ជំនួយយ៉ាងលឿនថា៖ «សាក្សីព្រះយេហូវ៉ាបានទៅជាជំនាញខាងការចាត់ចែងជនស្ម័គ្រចិត្តសម្រាប់ផ្ដល់ជំនួយពេលមានមហន្តរាយ»។ ដូចសាវ័កប៉ូលបានបញ្ជាក់ យើងពិតជា«ផ្ដល់ជាបរិបូរ»នូវអ្វីដែលបងប្អូនរួមជំនឿរបស់យើងត្រូវការ។
១២-១៤. (ក) ហេតុអ្វីការសម្រេចគោលបំណងទី៣នៃកិច្ចការផ្ដល់ជំនួយគឺសំខាន់ម្ល៉េះ? (ខ) តើបងប្អូនបាននិយាយអ្វីខ្លះដែលបញ្ជាក់ថាការបន្តសកម្មភាពខាងការគោរពប្រណិប័តន៍គឺសំខាន់?
១២ ទី៣ យើងជួយអ្នករងគ្រោះឲ្យមានសកម្មភាពឡើងវិញក្នុងការគោរពប្រណិប័តន៍។ ហេតុអ្វីនេះគឺសំខាន់ម្ល៉េះ? ប៉ូលបញ្ជាក់ថាអ្នកដែលទទួលជំនួយនឹងត្រូវជំរុញឲ្យ«ថ្លែងអំណរគុណជាច្រើនដល់ព្រះ»។ (២កូ. ៩:១២ខ) វិធីល្អបំផុតដែលអ្នករងគ្រោះអាចអរគុណព្រះយេហូវ៉ា គឺដោយមានសកម្មភាពឡើងវិញឲ្យបានឆាប់បំផុតក្នុងការគោរពប្រណិប័តន៍ព្រះ មែនទេ? (ភី. ១:១០) នៅឆ្នាំ១៩៤៥ ទស្សនាវដ្ដីប៉មយាម បានចែងថា៖ «ប៉ូលបានគាំទ្រ . . . ការប្រមូលវិភាគទាន ពីព្រោះនោះបានជួយ . . . គ្រិស្តសាសនិកដែលខ្វះខាតឲ្យមានអ្វីខ្លះដែលពួកគេត្រូវការ ហើយយ៉ាងនោះពួកគេអាចចូលរួមច្រើនជាង ហើយខ្នះខ្នែងជាងក្នុងការធ្វើជាសាក្សីបញ្ជាក់អំពីព្រះយេហូវ៉ា»។ សព្វថ្ងៃនេះយើងក៏មានគោលបំណងដូចនោះដែរ។ ដោយចាប់ផ្ដើមចូលរួមក្នុងកិច្ចផ្សព្វផ្សាយម្ដងទៀត បងប្អូនរបស់យើងមិនគ្រាន់តែពង្រឹងកម្លាំងចិត្តអ្នកជិតខាងដែលកំពុងកើតទុក្ខនោះទេ តែបងប្អូនក៏ពង្រឹងកម្លាំងចិត្តខ្លួនឯងផងដែរ។—សូមអាន កូរិនថូសទី២ ១:៣, ៤
១៣ សូមពិចារណាអំពីពាក្យខ្លះរបស់បងប្អូនដែលបានទទួលជំនួយដែលពួកគេត្រូវការយ៉ាងខ្លាំង ហើយបានចាប់ផ្ដើមផ្សព្វផ្សាយម្ដងទៀត ថែមទាំងបានទទួលកម្លាំងចិត្តពីកិច្ចផ្សព្វផ្សាយនោះ។ បងប្រុសម្នាក់ប្រាប់ថា៖ «ពេលដែលខ្ញុំនិងក្រុមគ្រួសារខ្ញុំបានចូលរួមក្នុងកិច្ចផ្សព្វផ្សាយ នោះជាពរមួយ ពីព្រោះយើងអាចឈប់ខ្វល់ខ្វាយមួយរយៈពេលខ្លីអំពីបញ្ហារបស់យើង ដើម្បីខំជួយសម្រាលទុក្ខអ្នកឯទៀត»។ បងស្រីម្នាក់ប្រាប់ថា៖ «ពេលខ្ញុំផ្ចង់អារម្មណ៍ទៅលើកិច្ចបម្រើ នោះជួយខ្ញុំឲ្យឈប់គិតអំពីការបំផ្លិចបំផ្លាញនៅជុំវិញខ្ញុំ ហើយធ្វើឲ្យខ្ញុំមានអារម្មណ៍ថាខ្ញុំមានសុវត្ថិភាព»។ បងស្រីម្នាក់ទៀតរៀបរាប់ថា៖ «មានអ្វីជាច្រើនដែលយើងមិនអាចទប់ស្កាត់ឬជួយបានឡើយ។ តែកិច្ចបម្រើផ្សាយជួយក្រុមគ្រួសារខ្ញុំឲ្យមានគោលដៅក្នុងជីវិតឡើងវិញ។ ពេលដែលនិយាយជាមួយនឹងអ្នកឯទៀតអំពីសេចក្ដីសង្ឃឹមរបស់យើងស្តីអំពីពិភពលោកថ្មី នោះបានពង្រឹងទំនុកចិត្តរបស់យើងថាអ្វីៗទាំងអស់នឹងថ្មីឡើងវិញ»។
១៤ ការចូលរួមកិច្ចប្រជុំជាសកម្មភាពមួយទៀតដែលបងប្អូនជាអ្នករងគ្រោះត្រូវចាប់ផ្ដើមធ្វើម្ដងទៀតឲ្យបានលឿនបំផុត។ សូមគិតអំពីបទពិសោធន៍របស់បងស្រីគីយ៉ូកូដែលមានអាយុជិត៦០ឆ្នាំពេលមានមហន្តរាយធម្មជាតិ។ ពេលមានរលកយក្សស៊ូណាមី គាត់បាត់បង់ទ្រព្យសម្បត្ដិទាំងអស់ លើកលែងតែសម្លៀកបំពាក់និងស្បែកជើងដែលគាត់កំពុងពាក់ប៉ុណ្ណោះ។ គាត់ឆ្ងល់ថាតើគាត់អាចរស់ដូចម្ដេចបាន។ ក្រោយមក អ្នកចាស់ទុំម្នាក់ប្រាប់ថាពួកគេនឹងធ្វើកិច្ចប្រជុំនៅក្នុងឡានរបស់គាត់។ បងគីយ៉ូកូប្រាប់ថា៖ «អ្នកចាស់ទុំ ប្រពន្ធគាត់ បងស្រីម្នាក់ទៀត និងខ្ញុំបានអង្គុយក្នុងឡានរបស់គាត់។ កិច្ចប្រជុំនោះគឺសាមញ្ញ ប៉ុន្តែពេលនោះខ្ញុំភ្លេចអំពីរលកយក្សស៊ូណាមី។ នោះគឺដូចជាអព្ភូតហេតុមួយ។ ខ្ញុំមានសេចក្ដីសុខសាន្តក្នុងចិត្ត។ កិច្ចប្រជុំនោះបង្ហាញឲ្យឃើញឥទ្ធិពលនៃការសេពគប់ជាមួយនឹងគ្រិស្តសាសនិកពិត»។ បងស្រីម្នាក់ទៀតប្រាប់អំពីកិច្ចប្រជុំដែលគាត់បានចូលរួមក្រោយពីមានមហន្តរាយថា៖ «កិច្ចប្រជុំទាំងនោះជាអ្វីដែលបានជួយខ្ញុំឲ្យស៊ូទ្រាំ!»។—រ៉ូម ១:១១, ១២; ១២:១២
កិច្ចបម្រើខាងការផ្ដល់ជំនួយនាំឲ្យមានប្រយោជន៍ដែលស្ថិតស្ថេរ
១៥, ១៦. (ក) ពេលដែលគ្រិស្តសាសនិកនៅក្រុងកូរិនថូសនិងនៅកន្លែងផ្សេងទៀតគាំទ្រកិច្ចការផ្ដល់ជំនួយ តើពួកគេទទួលប្រយោជន៍អ្វីខ្លះ? (ខ) ស្រដៀងគ្នាដែរ តើយើងទទួលប្រយោជន៍អ្វីខ្លះពីកិច្ចការផ្ដល់ជំនួយនៅសព្វថ្ងៃនេះ?
១៥ ពេលដែលប៉ូលសរសេរអំពីកិច្ចបម្រើខាងការផ្ដល់ជំនួយ គាត់ពន្យល់គ្រិស្តសាសនិកនៅក្រុងកូរិនថូសអំពីប្រយោជន៍ដែលពួកគេនិងគ្រិស្តសាសនិកឯទៀតទទួលពីការរួមចំណែកក្នុងកិច្ចការនោះ។ គាត់សរសេរថា៖ «ពួកគាត់[គ្រិស្តសាសនិកជនជាតិយូដានៅក្រុងយេរូសាឡិម ដែលបានទទួលជំនួយ] អង្វរព្រះអំពីអ្នករាល់គ្នា ហើយមានសេចក្ដីស្រឡាញ់ចំពោះអ្នករាល់គ្នាណាស់ ដោយសារគុណដ៏វិសេសលើសលប់រកអ្វីប្រៀបផ្ទឹមពុំបានដែលព្រះមានចំពោះអ្នករាល់គ្នា»។ (២កូ. ៩:១៤) ចិត្តទូលាយរបស់បងប្អូននៅក្រុងកូរិនថូស បានជំរុញចិត្តគ្រិស្តសាសនិកជនជាតិយូដាឲ្យអធិដ្ឋានឲ្យបងប្អូនរបស់ពួកគេនៅក្រុងកូរិនថូស រួមទាំងបងប្អូនជនជាតិដទៃ ហើយក៏ជំរុញចិត្តពួកគេឲ្យស្រឡាញ់បងប្អូនទាំងនោះខ្លាំងជាងដែរ។
១៦ នៅសព្វថ្ងៃនេះ តើសម្ដីរបស់ប៉ូលស្តីអំពីប្រយោជន៍នៃកិច្ចការផ្ដល់ជំនួយទាក់ទងនឹងយើងយ៉ាងដូចម្ដេច? ទស្សនាវដ្ដីប៉មយាម ថ្ងៃទី១ ខែធ្នូ ឆ្នាំ១៩៤៥ ឆ្លើយសំណួរនោះដោយចែងថា៖ ‹ពេលរាស្ត្រមួយក្រុមរបស់ព្រះជួយបំពេញសេចក្ដីត្រូវការរបស់រាស្ត្រមួយក្រុមទៀត នេះធ្វើឲ្យមានសាមគ្គីភាពខ្លាំងណាស់!›។ នេះក៏ជាអារម្មណ៍របស់បងប្អូនដែលធ្វើកិច្ចការផ្ដល់ជំនួយសព្វថ្ងៃនេះដែរ។ អ្នកចាស់ទុំម្នាក់ដែលបានជួយពេលមានទឹកជំនន់ បាននិយាយថា៖ «កិច្ចការផ្ដល់ជំនួយបានធ្វើឲ្យខ្ញុំមានអារម្មណ៍ជិតស្និទ្ធជាងមុនជាមួយនឹងបងប្អូន»។ បងស្រីម្នាក់ដែលបានទទួលជំនួយបាននិយាយថា៖ «នៅផែនដីនេះ ភាតរភាពរបស់យើងគឺជាអ្វីដែលដូចសួនឧទ្យានបំផុត»។—សូមអាន សុភាសិត ១៧:១៧
១៧. (ក) តើពាក្យនៅអេសាយ ៤១:១៣ ទាក់ទងនឹងកិច្ចការផ្ដល់ជំនួយយ៉ាងដូចម្ដេច? (ខ) សូមលើកឧទាហរណ៍ខ្លះដែលបញ្ជាក់អំពីរបៀបដែលកិច្ចការផ្ដល់ជំនួយនាំឲ្យព្រះយេហូវ៉ាទទួលសេចក្ដីសរសើរ ហើយពង្រឹងសាមគ្គីភាពរបស់យើង។ (សូមមើលដែរនូវប្រអប់ដែលមានចំណងជើងថា«ជនស្ម័គ្រចិត្តជុំវិញពិភពលោកផ្ដល់ជំនួយ»)
១៧ ពេលបងប្អូនដែលផ្ដល់ជំនួយទៅដល់កន្លែងមហន្តរាយ បងប្អូនដែលជាអ្នករងគ្រោះឃើញវិធីពិសេសមួយដែលព្រះយេហូវ៉ាធ្វើតាមសន្យារបស់លោកថា៖ «អញនេះ គឺយេហូវ៉ាជាព្រះនៃឯង អញនឹងកាន់ដៃស្ដាំឯង ដោយពោលនឹងឯងថា កុំឲ្យភ័យខ្លាចឡើយ អញនឹងជួយឯង»។ (អេ. ៤១:១៣) ក្រោយពីបងស្រីម្នាក់បានរួចជីវិតពីមហន្តរាយ គាត់និយាយថា៖ «ពេលខ្ញុំឃើញការខូចខាត ខ្ញុំមានអារម្មណ៍អស់សង្ឃឹម។ ប៉ុន្តែព្រះយេហូវ៉ាបានជួយខ្ញុំ។ ជំនួយដែលខ្ញុំបានទទួលពីបងប្អូនគឺអស្ចារ្យរកព័ណ៌នាពុំបានឡើយ»។ បន្ទាប់ពីមហន្តរាយមួយបានបំផ្លាញតំបន់របស់ពួកគេ នោះអ្នកចាស់ទុំពីរនាក់បានសរសេរសំបុត្រតាងនាមក្រុមជំនុំរបស់ពួកគេថា៖ «ការរញ្ជួយដីនោះបានធ្វើឲ្យយើងកើតទុក្ខខ្លាំងណាស់ ប៉ុន្តែយើងបានទទួលជំនួយពីព្រះយេហូវ៉ាតាមរយៈបងប្អូនរបស់យើង។ យើងធ្លាប់អានអំពីកិច្ចការផ្ដល់ជំនួយ តែឥឡូវយើងបានឃើញកិច្ចការនោះដោយផ្ទាល់ភ្នែក»។
តើអ្នកអាចរួមចំណែកបានឬទេ?
១៨. តើអ្នកអាចធ្វើអ្វីបើអ្នកចង់ចូលរួមក្នុងកិច្ចការផ្ដល់ជំនួយ? (សូមមើលដែរនូវប្រអប់ដែលមានចំណងជើងថា«នោះបានកែប្រែជីវិតរបស់គាត់»)
១៨ តើអ្នកចង់ទទួលអំណរដែលមកពីកិច្ចការផ្ដល់ជំនួយដែរឬទេ? បើដូច្នេះ សូមចាំថាអង្គការយើងច្រើនតែជ្រើសរើសអ្នកធ្វើកិច្ចការផ្ដល់ជំនួយពីចំណោមអ្នកដែលជួយសង់សាលប្រជុំ។ ដូច្នេះសូមប្រាប់អ្នកចាស់ទុំថា អ្នកចង់បំពេញឯកសារដាក់ពាក្យសុំចូលរួមកិច្ចការសាងសង់សាលប្រជុំ។ អ្នកចាស់ទុំម្នាក់ដែលមានបទពិសោធន៍ច្រើនក្នុងកិច្ចការផ្ដល់ជំនួយរំលឹកយើងថា៖ «កុំធ្វើដំណើរទៅកន្លែងដែលមានមហន្តរាយ មុនអ្នកបានទទួលការអញ្ជើញជាផ្លូវការពីគណៈកម្មាធិការផ្ដល់ជំនួយពេលមានមហន្តរាយ»។ យ៉ាងនេះ កិច្ចការផ្ដល់ជំនួយអាចមានរបៀបរៀបរយនិងសណ្ដាប់ធ្នាប់។
១៩. តើតាមរបៀបណាអ្នកដែលធ្វើកិច្ចការផ្ដល់ជំនួយបង្ហាញយ៉ាងច្បាស់ថាសាក្សីព្រះយេហូវ៉ាជាអ្នកកាន់តាមពិតរបស់គ្រិស្ត?
១៩ កិច្ចការផ្ដល់ជំនួយជាវិធីអស្ចារ្យមួយដែលយើងធ្វើតាមបង្គាប់របស់គ្រិស្តដែលឲ្យ«ស្រឡាញ់គ្នា»។ ដោយបង្ហាញសេចក្ដីស្រឡាញ់ដូច្នេះ យើងបង្ហាញថាយើងជាអ្នកកាន់តាមគ្រិស្តពិតប្រាកដ។ (យ៉ូន. ១៣:៣៤, ៣៥) នៅសព្វថ្ងៃនេះ យើងពិតជាមានពរដ៏វិសេសមែន! គឺយើងមានអ្នកស្ម័គ្រចិត្តច្រើនណាស់ ដែលនាំឲ្យព្រះយេហូវ៉ាទទួលសេចក្ដីសរសើរ កាលដែលពួកគេផ្ដល់ជំនួយដែលចាំបាច់ដល់អ្នកដែលគាំទ្រយ៉ាងស្មោះនូវរាជាណាចក្ររបស់ព្រះ!
a ជំពូកនេះបញ្ជាក់អំពីកិច្ចការផ្ដល់ជំនួយសម្រាប់បងប្អូនរួមជំនឿ។ ក៏ប៉ុន្តែ ក្នុងករណីជាច្រើន កិច្ចការផ្ដល់ជំនួយរបស់យើងក៏ជួយអ្នកដែលមិនមែនជាសាក្សីព្រះយេហូវ៉ាដែរ។—កាឡ. ៦:១០
b ប៉ូលបានប្រើពាក្យពហុវចនឌីអាកូណុស (អ្នកបម្រើ) ដើម្បីរៀបរាប់អំពី«ជំនួយការខាងកិច្ចបម្រើ»។—១ធី. ៣:១២
c សូមមើលអត្ថបទ«ការជួយបងប្អូនរួមជំនឿនៅប្រទេសបូស្នៀ» (Aiding Our Family of Believers in Bosnia) ក្នុងទស្សនាវដ្ដីប៉មយាម ថ្ងៃទី១ ខែវិច្ឆិកា ឆ្នាំ១៩៩៤ ទំព័រ២៣-២៧។