របៀបរស់នៅជាគ្រិស្តសាសនិក
ចូរបង្កើនភាពប៉ិនប្រសប់ក្នុងកិច្ចបម្រើផ្សាយ ដោយសរសេរសំបុត្រយ៉ាងល្អ
ហេតុអ្វីសំខាន់: សៀវភៅកូរិនថូសទី១គឺជាសំបុត្រមួយក្នុងចំណោមសំបុត្រ១៤ដែលសរសេរដោយសាវ័កប៉ូល ដើម្បីលើកទឹកចិត្តគ្រិស្តសាសនិកឯទៀត។ ពេលអ្នកណាម្នាក់សរសេរសំបុត្រ នោះគាត់អាចមានពេលដើម្បីជ្រើសរើសពាក្យដែលគាត់សរសេរ ហើយអាចឲ្យអ្នកទទួល អានម្ដងហើយម្ដងទៀត។ សំបុត្រគឺជារបៀបល្អមួយដើម្បីផ្សព្វផ្សាយដល់សាច់ញាតិនិងមនុស្សដែលយើងស្គាល់។ ការសរសេរសំបុត្រក៏មានប្រសិទ្ធភាពក្នុងការផ្សព្វផ្សាយដល់អ្នកដែលមិនអាចនិយាយជាមួយដោយផ្ទាល់ដែរ។ ជាឧទាហរណ៍ ប្រហែលជាមានអ្នកណាម្នាក់បង្ហាញចំណាប់អារម្មណ៍ តែមិនសូវនៅផ្ទះ។ យើងប្រហែលជាពិបាកជួបមនុស្សខ្លះដែលនៅក្នុងតំបន់ផ្សាយយើង ដោយសារពួកគេរស់នៅក្នុងអគារឬបុរីដែលមិនអនុញ្ញាតឲ្យអ្នកក្រៅចូល ឬក៏កន្លែងដាច់ស្រយាល។ តើយើងគួរចងចាំចំណុចអ្វីខ្លះ ជាពិសេសពេលដែលសរសេរសំបុត្រទៅអ្នកដែលមិនស្គាល់?
របៀបអនុវត្ត:
សរសេរអ្វីដែលអ្នកនឹងនិយាយបើជួបផ្ទាល់។ ជាបឋម សូមណែនាំខ្លួន ហើយសរសេរឲ្យបានច្បាស់លាស់អំពីមូលហេតុដែលអ្នកសរសេរសំបុត្រនេះ។ ប្រហែលជាអាចសួរសំណួរមួយទៅបុគ្គលនោះដើម្បីឲ្យគាត់គិត ហើយប្រាប់គាត់អំពីគេហទំព័រយើង។ រួចមក សូមប្រាប់គាត់អំពីកម្មវិធីបង្រៀនគម្ពីរតាមផ្ទះ ឬលើកឡើងអំពីចំណងជើងនៃជំពូកខ្លះពីសៀវភៅសិក្សាណាមួយរបស់យើង។ ម្យ៉ាងទៀត អ្នកអាចភ្ជាប់ជាមួយនឹងកាតវីស៊ីត លិខិតអញ្ជើញ ឬខិត្តប័ណ្ណជាដើម
សរសេរយ៉ាងខ្លី។ សំបុត្ររបស់អ្នកគួរខ្លីល្មម បើមិនដូច្នេះទេ បុគ្គលដែលទទួលសំបុត្ររបស់អ្នកប្រហែលជាធុញទ្រាន់មិនចង់អានទៀត (សូមមើលសំបុត្រគំរូ)
អានឡើងវិញដើម្បីប្រាកដថាគ្មានកំហុស និងស្រួលអាន។ សូមធ្វើឲ្យប្រាកដថាសរសេរព័ត៌មានល្អៗ មិនធ្វើឲ្យទើសចិត្ត ហើយឲ្យអ្នកទទួលមានអារម្មណ៍កក់ក្ដៅ។ នៅប្រទេសខ្លះ ត្រូវបិទតែមនៅលើសំបុត្រ