ការធូរស្រាលពីការតានតឹងចិត្ត

តើការតានតឹងចិត្តបណ្ដាលមកពីអ្វី?

គ្លីនិកសុខភាពដ៏ល្បីមួយបានរៀបរាប់ថា៖ «មនុស្សពេញវ័យភាគច្រើនប្រាប់យើងថា ពួកគេមានអារម្មណ៍តានតឹងចិត្តកាន់តែច្រើនឡើងៗ។ នេះដោយសារជីវិតនៅសម័យទំនើបពោរពេញទៅដោយការផ្លាស់ប្ដូរនិងភាពមិនទៀងទាត់»។ (Mayo Clinic) សូមពិចារណាការផ្លាស់ប្ដូរនិងភាពមិនទៀងទាត់ខ្លះដែលបណ្ដាលឲ្យមានការតានតឹងចិត្ត៖

ការលែងលះគ្នា
មនុស្សជាទីស្រឡាញ់ស្លាប់
ជំងឺរ៉ាំរ៉ៃ
គ្រោះថ្នាក់ធ្ងន់ធ្ងរ
ឧក្រិដ្ឋកម្ម
ជីវិតមមាញឹក
គ្រោះមហន្តរាយធម្មជាតិ ឬគ្រោះមហន្តរាយដែលមកពីមនុស្ស
ការបង្ខិតបង្ខំនៅសាលារៀនឬកន្លែងការងារ
ការបារម្ភអំពីការងារនិងការចាត់ចែងលុយកាក់

ការបាត់បង់ការងារ

សមាគមចិត្តវិជ្ជាអាម៉េរិកបានរៀបរាប់ថា៖ «ការបាត់បង់ការងារអាចនាំឲ្យមានគ្រោះថ្នាក់ ដោយសារអ្នកដែលគ្មានការងារអាចនឹងមានជំងឺ ការពិបាកក្នុងអាពាហ៍ពិពាហ៍ កង្វល់ ធ្លាក់ទឹកចិត្ត និងរហូតដល់ធ្វើអត្តឃាត។ ការបាត់បង់ការងារមានឥទ្ធិពលទៅលើជីវិតទាំងមូល»។

ការតានតឹងចិត្តពេលនៅក្មេង

ពេលដែលកូនក្មេងតានតឹងចិត្ត មិនមែនជាអ្វីចម្លែកទេ។ កូនក្មេងខ្លះមានគេសម្លុតធ្វើបាបនៅសាលា ឬនៅផ្ទះគ្មានអ្នកណាយកចិត្តទុកដាក់ចំពោះពួកគេ។ កូនក្មេងខ្លះទៀតត្រូវគេបៀតបៀនខាងរាងកាយ ខាងផ្លូវចិត្ត ឬខាងកេរ្ដិ៍ខ្មាស។ ប្អូនៗជាច្រើនខ្វល់អំពីការប្រឡង និងចំណាត់ថ្នាក់។ រីឯប្អូនៗឯទៀត ឃើញក្រុមគ្រួសារបែកបាក់ ដោយសារឪពុកម្ដាយលែងលះគ្នា។ កូនក្មេងដែលតានតឹងចិត្តប្រហែលជាមានសុបិនអាក្រក់ បញ្ហារៀនសូត្រ ធ្លាក់ទឹកចិត្ត ឬចង់ថយចេញពីអ្នកឯទៀត។ ប្អូនៗខ្លះមិនអាចគ្រប់គ្រង់អារម្មណ៍ខ្លួន។ កូនក្មេងដែលតានតឹងចិត្តត្រូវការជំនួយជាបន្ទាន់។