Sapwilainga Jizhina ja Yehoba ne Byubilo Byanji
1 “Ubai sante kwi Yehoba, mwite pa jizhina janji; bayukishai ba mu mitundu ya bantu byubilo byanji... . Michima ya boba bamukeba Yehoba isekele.” (Sala.105:1, 3) Nyimbi wa masalamo wanembele bino byambo, watananga lusekelo lukatampe byo asapwilanga ku bakwabo mambo a Yehoba ne “byubilo” byanji. Byubilo bya mutundu ka? Kwakubula nangwa kuzhinaukatu ne, byajinga byubilo bya bufumu bwa Lesa bwa lukumo ne “mambo a lupulukilo lwanji.”—Sala. 96:2, 3; 145:11, 12.
2 Byo tubena kunanga ku kimye kya Kivuluko kya mu 2001, tuji na byavula bibena kwitusangajika pa mambo a bibena kwitubila Yehoba. Mu ñanyi jishinda? Kechi kya kuzhinauka ne, Kijiilo kya Nkambo kyo kya kusekela kikatampe mu mwaka ku bena Kilishitu bakine bonse. Kafwako kijiilo kikwabo kyanema kyakila kino mu nkebelo kyubiwa mu jishinda jitufwainwa ne. Kino kyo kimye kyo tuvuluka bitubila Yehoba ne Yesu pa kwitunengezhezha mwa kupulukila. O ene mambo o twingijila na ngovu mu kusapwila “mambo a lupulukilo” mu mwingilo wa mu bujimi kimye kya Kivuluko!
3 Mukengilako Bupainiya bwa Kukwasha Nyi? Bantu 10,724 bo baingijileko bupainiya bwa kukwasha mu April mwaka wapwa. Abya uno mwaka, twakonsha kusalulula March ne April kwikala bañondo beikajila mo twakonsha kwingila na ngovu mwingilo wa busapwishi? Mu ñondo wa March mukekala moba a Bibelushi atanu, mu April namo mukekala moba a Mulungu atanu. Basapwishi bengila nkito ya ku mubiji bakonsha kwingilako mwingilo wa bupainiya bwa kukwasha kupichila mu kwinengezha kwingila mu moba onse atuntulu a mpelo ya milungu. Pa kuba’mba afikizhe maawala 50 akebewa, painiya wa kukwasha wafwainwa kwingila maawala pepi na 12 mu mulungu umo. Monai mutanchi wa byo mwakonsha kwingila mu kabokoshi pa peja 5. Abya pajipo mutanchi waesakanako na byo mwinengezha nyi? Umvwe kafwapo, mwakonsha kwitanchikila anweba bene mutanchi wenu pa kuba’mba mukengileko bupainiya bwa kukwasha mu ñondo wa March ne April.
4 Bakulumpe mu bipwilo bafwainwa kutatula lonka luno kukosesha ne kutundaika balongo ne banyenga kwingila na ngovu mu mwingilo. Mwaka wapwa kipwilo kimo kyajinga na basapwishi 121, mu bano 64 baingijile bupainiya bwa kukwasha kuvwangakotu ne bakulumpe ne bankwasho mu April! Kabiji kipwilo kyasangalele bingi pa kumona basapwishi babula kubatizwa batanu na umo kutuma masawakya abo atanshi mu ñondo wa March ne April. Kya kine, kino kyo kimye kyawama ku baana ne bapya bakwabo kwipuzha bakulumpe mu kipwilo kumona umvwe bafikapo kutatula mwingilo wa busapwishi.
5 Kwingila na Ngovu Kuleta Mapesho: Bipwilo biimikila bikonkwanyi biikajila ne kwingila na ngovu biyowa mapesho avula. Bipwilo bimo byakonsha kuta maana kwingila mu manyaunda o babula kwingijilamo javula, kasa batesha muchima ku mashinda onse a busapwishi bukwabo nangwa kusapwila pa foni—ajo jaikala jishinda ja kwisambilamo na bantu babula kutanwa pa mazubo abo ne bekala mu mapunzha akatazha kuyamo.
6 Nanchi kukolwa-kolwa ne bukote byakonsha kulengela muntu kukankalwa kwingilako mwingilo papelela ngovu yanji nyi? Ine kechi ibyo ne. Kya kumwenako, mwaka wapwa kwajinga nyenga umo wa myaka ya kusemwa 86 wabelele kansa. Nangwa kyakuba wavimbile maulu, waingijileko bupainiya bwa kukwasha mu April. Kyamukwashishe kwingila mwingilo bulongo ne kutota Yehoba ke busapwishi bwa pa foni. Kino kyamukoseshe aye mwine ne kipwilo.
7 Inengezhai Bulongo Mukatanwe ku Kivuluko: Uno mwaka Kivuluko kikekalako pa April 8. Byo jiji juba ja Mulungu, kikapeelela bavula kutanwako. Pa kuba’mba bantu bavule bakonsha kutanwa ku Kivuluko kukila batainweko ku nyuma kwe (1) atweba bene twafwainwa kutanwako ne (2) kwita bakwetu kwiya na kutanwa ku Kivuluko. Bañanyi bo twafwainwa kwita?
8 Balaulai mu buku wenu momunemba mazhina a bantu baji na lusekelo lwa kufunda bukine, nangwa kya kuba kechi mwibafwakashisha kimye kyonse ne. Saka kwakishala milungu ibiji nangwa isatu kufika pa juba ja Kivuluko, teshai muchima ku bano bantu ne kwibeta kwiya na kutanwa ku Kivuluko. Umvwe kyakonsheka, bakwashai mu ñendelo, nengezhai kwendela pamo na bakeba kutanwako.
9 Vulukai Bakoka: Kileta bingi lusekelo inge ufunda Baibolo wipana kwi Yehoba ne kumwesha kwipana kwanji mu lubatizhilo lwa mu mema. Nangwa kikala byonkabyo, pa mwaka pa mwaka bamo baleka kupwañana ne atweba, kabiji baleka ne kusapwila jizhina ja Yehoba ne byubilo byanji. Tuji na kishinka kyawama kya kutesha muchima ku bano bantu. Kibalengela bakoka kuleka kusapwila kimo kimye ke mambo a kufichishiwa ku muchima, makatazho a kyabo kyabo, nangwa na mambo a bya kutabataba bikwabo bya mu bwikalo, bino kechi bafuma mu bukine. (Mat. 13:20-22) Bakoka ku mupashi bakebewa kwibakwasha kubwela mu kipwilo, buno bwikalo bwa kwa Satana saka bukyangye kwibatabakanya. (1 Pe. 5:8) Mu kino kimye kya Kivuluko tukeba kwingila na ngovu kukwasha bonse bakoka kuba’mba batatule kusapwila mambo awama.
10 Kanemba wa pa kipwilo wafwainwa kutebawizha batangijila mafunjisho a buku ne kuyuka inge mu mabumba abo mujipo bakoka. Kometi ya Mwingilo wa Kipwilo ikanengezha mutanchi wa kufwakashisha bakoka bonse. Umvwe kyatanyiwa kuba’mba muntu wakoka wakonsha kumwenamo mu lufunjisho lwa Baibolo, utangijila mwingilo ukatongola wafwainwa kumukwasha pa nyuma ya kwisambila pamo na bakwabo ba mu kometi ya mwingilo. Nangwa kya kuba lufunjisho kechi lwafwainwa kutangijilwa pa kimye kyabaya ne, ubena kutangijila wafwainwa kunemba maawala, bimye byo abwelako ne lufunjisho lwa Baibolo.
11 Mwaka wapwa mu April, nyenga umo wajinga mu busapwishi bwa ku nzubo ne nzubo wamwesheshe magazini ku nsongwalume mu mukwakwa. Uno nsongwalume waambile kuba’mba mukazhanji Kamonyi pano bino, wakoka. Waipwizhe kwaikela Nzubo ya Bufumu ne kubula nyenga amba akebafwakwashishe juba jimo. Kino kyalengejile bano bamulume ne mukazhi kutanwa ku kupwila kwalondejilepo kabiji baswile kutatula lufunjisho lwa Baibolo.
12 Inengezhai Kwingila na Ngovu! Nyimbi wa masalamo waambile’mba twafwainwa kuyukanyikisha jizhina ja Yehoba ne byubilo byanji wanungilepo’mba: “Mwimbilai, mwimbilai ya kumutota; Ambañanainga mambo a mingilo yanji yonse ya kukumya. Itotelai mu jizhina janji jazhila.” (Sala. 105:2, 3) Twayai tumweshe lutotelo lwetu ku jizhina ja Yehoba jikatampe ne “mingilo yanji ya kukumya” kupichila mu kwingila na ngovu mu busapwishi, ne kumona kino kimye kya Kivuluko kwikala kikatampe kukila myaka yapita!
[Kitenguluzha pa peja 5]
Mashinda Apusana-pusana Akutanchikilamo Kwingila Maawala 12 mu Mulungu ne Mulungu byo Mubena Kwingila Bupainiya bwa Kukwasha
Juba Maawala
Pa Kimo 1 2 − −
Pa Kibiji 1 − 3 −
Pa Kisatu 1 2 − 5
Pa Kina 1 − 3 −
Pa Kitanu 1 2 − −
Pa Kibelushi 5 4 3 5
Pa Mulungu 2 2 3 2
Onse: 12 12 12 12
Pa ino mitanchi abya pajipo umo wakonsha kwingila kwi anweba nyi?
Umvwe kafwapo, mambo ka kutanchikapo mutanchi wenu anweba bene ne?