Okutuukiriza Obulungi Obuweereza Bwaffe—Okulaga Engeri Gye Tuyigirizaamu Abantu Bayibuli nga Tukozesa Akatabo Baibuli Ky’Eyigiriza

Lwaki Kikulu: Abantu bangi bwe tubagamba nti tuyigiriza abantu Bayibuli ku bwereere, bayinza obutategeera kye tuba tutegeeza. Bayinza okulowooza nti waliwo we bajja okukuŋŋaaniranga bayigirizibwe Bayibuli mu kibinja. Mu kifo ky’okubagamba obugambi nti tuyigiriza abantu Bayibuli, balage engeri gye tukikolamu. Mu ddakiika ntono nnyo, era ne bw’oba oyimiridde ku mulyango gw’omuntu, osobola okumulaga nti okuyiga Bayibuli kya muganyulo era si kizibu.

Engeri y’Okukikolamu:

Bw’omala okweyanjulira omuntu, mubuuze ky’alowooza ku biseera eby’omu maaso.
Mutegeeze nti abantu bangi beeraliikirira ebiseera eby’omu maaso, era mulage olukalala lw’emitwe egiri mu katabo Baibuli Ky’Eyigiriza. Munnyonnyole nti akatabo kano kalimu ebintu ebyangu okuyiga ebiraga ekyo Bayibuli ky’eyigiriza ku biseera eby’omu maaso ne ku bintu ebirala, era musabe alonde essuula gye yandyagadde mwogereko.
Muwe akatabo ako era omulage essuula gy’alonze w’etandikira. Munnyonnyole nti ebibuuzo ebiri ku ntandikwa y’essuula biddibwamu mu butundu obuli mu ssuula eyo.
Oyinza okumusaba asome akatundu akasooka ak’essuula eyo. Oluvannyuma soma ekibuuzo ky’akatundu ako era omuyambe okufuna eky’okuddamu. Musome era mukubaganye ebirowoozo ku byawandiikibwa ebikwatagana n’eky’okuddamu. Mulage nti wasaza ku ky’okuddamu ekyo mu katabo ko.
Mugende ku katundu ak’okubiri, naye ku luno musabe agezeeko okuddamu mu bigambo bye.
Mwebaze era kola enteekateeka ey’okuddayo mumaleko essuula eyo.
Bwe kiba kituukirawo, musabe alabe vidiyo erina omutwe ogugamba nti Omuntu Ayigirizibwa Atya Bayibuli? eri ku mukutu gwaffe jw.org.

Mu Mwezi Guno Gezaako Kino:

Saba Yakuwa akuyambe okufuna omuyizi wa Bayibuli.—Baf. 2:13.
Buli lw’oba ogenze okubuulira, fuba okulaga waakiri omuntu omu engeri gye tuyigirizaamu Bayibuli ng’okozesa akatabo Bayibuli Ky’Eyigiriza, oba vidiyo erina omutwe ogugamba nti Omuntu Ayigirizibwa Atya Bayibuli?