MUKANDA WA KUMPALA WA SAMUELE

1 Mpindieu kuvua muntu mukuabu wa ku Lamatayima-sofima*+ mu buloba bua mikuna bua Efelayima+ diende Elekana,+ muana wa Yelohama, muana wa Elihu, muana wa Tohu, muana wa Zufa, muena Efelayima. 2 Uvua ne bakaji babidi; umue diende Hana, ne mukuabu Penina. Penina uvua ne bana, kadi Hana kavua ne bana to. 3 Muntu au uvua umbuka mu tshimenga tshiabu tshidimu tshionso ubanda ku Shilo bua kutendelela* Yehowa wa biluilu ne kumulambula milambu.+ Ku Shilo aku ke kuvua bana babidi ba Eli, Hofeni ne Pinehasa,+ benzela Yehowa mudimu wa buakuidi.+

4 Dituku dikuabu pavua Elekana mulambule mulambu, wakapesha Penina pamue ne bana bende bonso ba balume ne ba bakaji mabulu a munyinyi,+ 5 kadi wakapesha Hana dibulu dia munyinyi dia pa buadi, bualu Hana ke uvuaye munange; kadi Yehowa kavua mumupeshe bana to.* 6 Mukenende uvua kabidi umusendeka kakuyi dikisha bua kumutatshisha mu lungenyi, bualu Yehowa kavua mumupeshe bana to. 7 Ke muvuaye wenza tshidimu tshionso; misangu yonso ivua Hana ubanda ku nzubu wa Yehowa,+ mukenende uvua umusendeka bikole, bimufikisha ku didila ne ku dibenga kudia. 8 Kadi bayende Elekana wakamuebeja ne: “Hana, udi udila bua tshinyi? Kuena udia bua tshinyi? Udi mubungame nunku bua tshinyi?* Meme tshiena mupite bana ba balume dikumi kuudi anyi?”

9 Pashishe pakajikijabu kudia ne kunua ku Shilo, Hana wakajuka. Dîba adi muakuidi Eli uvua musombe pa tshisombedi tshivua pabuipi ne dikunji dia ku tshiibi tshia ntempelo*+ wa Yehowa. 10 Hana uvua ne kanyinganyinga* ka bungi menemene, ne wakatuadija kusambila Yehowa+ ne kudila bikole. 11 Nunku wakaditshipa ne: “Yehowa wa biluilu, wewe mutangile lutatu lua muena mudimu webe, mumvuluke, kuyi upua muena mudimu webe muoyo, ne wewe mupeshe muena mudimu webe muana wa balume,+ nemmufile kudi Yehowa matuku ende onso a muoyo, ne kapaya kakakulenga ku mutu wende to.”+

12 Pavuaye musambile mutantshi mule kumpala kua Yehowa, Eli uvua mutangile mishiku yende. 13 Hana uvua wakuila mu muoyo wende, mishiku yende nkayayi ke ivua izakala, kadi dîyi diende kadivua diumvuika to. Nunku Eli wakela meji ne: uvua mukuatshike. 14 Eli wakamuambila ne: “Neushale mukuatshike too ne dîba kayi? Lekela kunua mvinyo webe au.” 15 Ke Hana kuandamuna ne: “Tòo, mukalenge wanyi! Ndi mukaji udi ne kanyinganyinga kakole;* tshiena munue mvinyo anyi maluvu makuabu makole to, kadi ndi mpumuna anyima* wanyi kumpala kua Yehowa.+ 16 Kuangatshi muena mudimu webe bu mukaji tshianana to, bualu dikenga dianyi dinene ne kanyinganyinga ke bidi bingakuishe too ne mpindieu.” 17 Nunku Eli wakamuambila ne: “Ndaku mu ditalala, ne Nzambi wa Isalele akumbaje dilomba diebe diudi mumulombe.”+ 18 Ke yeye kuamba ne: “Muena mudimu webe anyishibue ku mêsu kuebe.” Pashishe mukaji au wakaya, yeye kudia, ne mpala wende katshivua kabidi mubungame to.

19 Nunku bakabika mu dinda menemene, bobu kuinama kumpala kua Yehowa, pashishe bakapingana ku nzubu kuabu ku Lama.+ Elekana wakasangila ne mukajende Hana, ne Yehowa wakamuvuluka.+ 20 Munda mua tshidimu tshimue* Hana wakapeta difu, kulelaye muana wa balume, kumuinyikaye+ ne: Samuele,* bualu uvua muambe ne: “Ndi mumulombe kudi Yehowa.”

21 Pakapita matuku Elekana wakabanda ne ba mu nzubu muende bonso bua kulambula Yehowa mulambu uvuaye ulambula ku tshidimu,+ ne bua kufila mulambu wende wa kukumbaja nawu mutshipu. 22 Kadi Hana kakabanda to,+ bualu wakambila bayende ne: “Diakamue pandi ndekesha muana dibele, nenye nende; dîba adi neamueneke kumpala kua Yehowa, ne kubangila anu pine apu neashale kuntu aku.”+ 23 Nunku bayende Elekana wakamuambila ne: “Enza tshiudi mumone ne: ntshitambe buimpe.* Shala kumbelu too ne paudi ulekesha muana dibele. Yehowa akumbajaku tshiudi muambe.” Nunku mukaji wakashala kumbelu, kuamushaye muanende too ne pakamulekeshaye dibele.

24 Diakamue pakamulekeshaye dibele, wakabanda nende ku Shilo pamue ne ngombe mulume wa bidimu bisatu, efa* umue wa bukula ne mulondo munene wa mvinyo,+ ne wakafika ku nzubu wa Yehowa ku Shilo,+ ne uvua mulue ne muana wa balume. 25 Pashishe bakashipa ngombe mulume au, kuyabu ne muana kudi Eli. 26 Ke Hana kuamba ne: “Mfuila koku luse, mukalenge wanyi! Bulelela, bu muudi wewe ne muoyo,* mukalenge wanyi, meme ke mukaji uvua muimane nebe muaba eu bua kusambila Yehowa.+ 27 Mvua nsambila bua muana wa balume eu, ne Yehowa uvua mukumbaje dilomba dianyi dimvua mumulombe.+ 28 Mpindieu meme panyi ndi mmusombesha Yehowa. Bua matuku ende onso, yeye mmusombesha Yehowa.”

Pashishe yeye* wakinamina Yehowa muaba au.

2 Nunku Hana wakamba mu disambila ne:

11 Pashishe Elekana wakaya kuende ku Lama, kadi muana wakalua muena mudimu wa Yehowa+ kumpala kua muakuidi Eli.

12 Kadi bana ba balume ba Eli bavua bantu babi;+ kabavua banemeka Yehowa to. 13 Mona tshivuabu benza ne bintu bivua bakuidi ne bukenji bua kuangata kudi bantu:+ Dîba dionso divua muntu ufila mulambu, muambuluishi wa muakuidi uvua ulua ne nsomo wa mênu asatu mu tshianza pavua munyinyi wenda usaba, 14 ne uvua umutua mu dilongo dinene, anyi mu luesu lua mikolo ibidi, anyi mu luesu luenze bu dibungu, anyi mu luesu lua mukolo umue. Tshionso tshivua nsomo ujula, muakuidi uvua utshiangata buende yeye. Ke tshivuabu benzela bena Isalele bonso bavua balua ku Shilo. 15 Kabidi, nansha kumpala kua muntu udi ufila mulambu kufuimishaye mafuta,+ muambuluishi wa muakuidi uvua ulua umuambila ne: “Pesha muakuidi munyinyi wa kuosha. Yeye kakuangata munyinyi mulamba kuudi to, anu munyinyi mubishi.” 16 Pavua muntu umuambila ne: “Lekela banji kufuimisha mafuta,+ pashishe wangate tshionso tshiudi musue,”* yeye uvua wamba ne: “Tòo, mpesha anu mpindieu; tshianana ndi nguangata ku bukole!” 17 Nunku mpekatu wa bambuluishi abu wakalua munene menemene kumpala kua Yehowa,+ bualu bantu abu bavua bapetula mulambu wa Yehowa.

18 Nunku Samuele uvua wenza mudimu+ kumpala kua Yehowa, muvuale* efoda wa line,+ nansha mutshivuaye anu muana. 19 Mamuende uvua kabidi umutelela muzabi mukese wa kawuyi maboko, ne uvua umutuadilawu tshidimu tshionso pavuaye ubanda ne bayende bua kufila mulambu wa ku tshidimu.+ 20 Nunku Eli wakabenesha Elekana ne mukajende, kuambaye ne: “Yehowa akupeshe muana kudi mukaji eu pa muaba wa muana uvua musombesha Yehowa.”+ Pashishe bakapingana kuabu. 21 Yehowa wakavuluka Hana, nunku yeye wakimita;+ ne wakalela bana bakuabu ba balume basatu ne ba bakaji babidi. Kadi muana eu Samuele uvua wenda ukola kumpala kua Yehowa.+

22 Mpindieu Eli ukavua mukulakaje bikole, kadi uvua mumvue malu onso avua bana bende benzela+ Isalele mujima ne muvuabu balala ne bantu bakaji bavua benza mudimu ku tshibuelelu tshia ntenta wa kusambakena.+ 23 Uvua ubambila ne: “Bua tshinyi nudi nutungunuka ne kuenza malu a nunku? Bualu malu andi ngumvua bua bualu buenu kudi bantu bonso mmabi. 24 Tòo, bana banyi, lumu lundi ngumvua luenda munkatshi mua tshisamba tshia Yehowa kaluena luimpe to. 25 Muntu yeye muenzele muntu mukuabu bibi, muntu mukuabu udi mua kumulombela kudi Yehowa;* kadi muntu yeye muenzele Yehowa mpekatu,+ nnganyi udi mua kumulombela?” Kadi bakabenga kuteleja tatuabu, bualu Yehowa ukavua mupangadije bua kubashipa.+ 26 Pine apu muana eu Samuele uvua wenda ukola ku mubidi ne wenda wanyishibua kudi Yehowa ne kudi bantu.+

27 Muntu mukuabu wa Nzambi wakalua kudi Eli, kumuambilaye ne: “Yehowa udi wamba nunku: ‘Tshivuaku mudileje patoke kudi nzubu wa tatuebe pavuabu bapika mu nzubu wa Palô mu Ejipitu anyi?+ 28 Nunku ngakamusungula mu bisa bionso bia Isalele+ bua kungenzelaye mudimu wa buakuidi ne bua kufila milambu pa tshioshelu tshianyi,+ kulambula musenga wa manananshi,* ne kuvuala efoda kumpala kuanyi; ne ngakapesha nzubu wa nkambua webe milambu yonso miosha pa kapia ya bena Isalele.*+ 29 Bua tshinyi nuenu bantu nudi nupetula* mulambu wanyi ne dipa dianyi bindi mutume dîyi bua kufila muaba wanyi wa kusombela?+ Bua tshinyi udi utungunuka ne kunemeka bana bebe ba balume kumpita meme, nuasa manyi ne bitupa bitambe buimpe bia milambu yonso ya bantu banyi bena Isalele?+

30 “‘Ke bualu kayi dîyi dia Yehowa Nzambi wa Isalele didi ne: “Mvua muambe bushuwa ne: nzubu webe ne nzubu wa nkambua webe neyikale anu yenda kumpala kuanyi.”+ Kadi Yehowa udi wamba mpindieu ne: “Buanyi meme kabiena mua kuenzeka, bualu nennemeke bantu badi bannemeka,+ kadi bantu badi bampetula nebapetudibue.” 31 Tangila! Matuku adi alua angumbusha bukole* buebe ne bua nzubu wa tatuebe, bua muntu nansha umue wa mu nzubu muebe kikadi ne muoyo too ne ku bukulakaja.+ 32 Pashishe munkatshi mua malu mimpe onso adi menzela Isalele,+ wewe neumone muluishi muaba wanyi wa kusombela, ne kakuakuikala kabidi muntu mukulakaje mu nzubu muebe. 33 Muntu wa kuudi undi tshiyi ngumbusha ku mudimu wa ku tshioshelu tshianyi neenze bua mêsu ebe atekete ne neakukebele kanyinganyinga,* kadi bantu ba bungi ba mu nzubu muebe nebafue ku muele wa bantu.+ 34 Pashishe bualu buenzekela bana bebe babidi, Hofeni ne Pinehasa, nebuikale tshimanyinu kuudi: Bonso babidi nebafue dituku dimue.+ 35 Pashishe nendijudile muakuidi wa lulamatu.+ Neenze malu mu diumvuangana ne tshidi dijinga dia muoyo wanyi;* nemmuashile nzubu wa kashidi, ne neende kumpala kua muela manyi wanyi misangu yonso. 36 Muntu yonso udi ushala mu nzubu muebe nealue ne neamuinamine bua bamufute makuta ne bua tshipese tshia diampa, ne neambe ne: “Mpesha koku umue wa ku midimu ya buakuidi bua ndie tshipese tshia diampa.”’”+

3 Pine apu, muana eu Samuele uvua wenzela Yehowa mudimu+ kumpala kua Eli, kadi dîyi dia kudi Yehowa kadivua ditamba kumvuika matuku au to; bikena kumona+ bivua bikese.

2 Dimue dituku Eli uvua mulale muaba wende wa tshibidilu, ne mêsu ende akavua bitayitayi; katshivua umona to.+ 3 Muendu wa Nzambi+ kauvua muanji kujima to, ne Samuele uvua mulale mu ntempelo*+ wa Yehowa, muaba uvua Mushete wa Nzambi. 4 Pashishe Yehowa wakabikila Samuele. Yeye kuitaba ne: “Mmeme eu.” 5 Wakaya kudi Eli lubilu, kuambaye ne: “Mmeme eu, bualu udi mumbikile.” Kadi yeye wakamba ne: “Tshiena mukubikile to. Ndaku ulale kabidi.” Nunku wakaya, yeye kulala. 6 Yehowa wakabikila kabidi ne: “Samuele!” Ke Samuele kujuka, kuyaye kudi Eli, yeye kuamba ne: “Mmeme eu, bualu udi mumbikile.” Kadi yeye wakamba ne: “Muananyi, tshiena mukubikile to. Ndaku ulale kabidi.” 7 (Kadi Samuele kavua muanji kufika ku dimanya Yehowa to, ne dîyi dia Yehowa kadivua dianji kubuluibua kudiye to.)+ 8 Nunku Yehowa wakabikila kabidi musangu muisatu ne: “Samuele!” Ke yeye kujuka, kuyaye kudi Eli, kuambaye ne: “Mmeme eu, bualu udi mumbikile.”

Eli wakajingulula dîba adi ne: Yehowa ke uvua ubikila muana au. 9 Nunku Eli wakambila Samuele ne: “Ndaku ulale, yeye mukubikile, wambe ne: ‘Akula, Yehowa, bualu muena mudimu webe udi uteleja.’” Nunku Samuele wakaya, kulalaye muaba wende.

10 Yehowa wakalua, kuimanaye muaba au, yeye kubikila anu bu misangu mikuabu ne: “Samuele, Samuele!” Ke Samuele kuamba ne: “Akula, bualu muena mudimu webe udi uteleja.” 11 Yehowa wakambila Samuele ne: “Mona! Ndi ngenza bualu kampanda mu Isalele buelesha matshi a muntu yonso udi ubumvua ngonga.+ 12 Dituku adi nenkumbajile Eli malu onso amvua muambe bua nzubu wende, ku mbangilu too ne ku ndekelu.+ 13 Udi ne bua kumuambila ne: ndi ntumina nzubu wende dinyoka dia kashidi bua tshilema tshidiye mumanye,+ bualu bana bende ba balume badi bela Nzambi mulawu,+ kadi yeye ki mmubakanyine to.+ 14 Ke bualu kayi ndi muditshipe bua nzubu wa Eli ne: tshilema tshia nzubu wa Eli katshiakubuikidibua musangu nansha umue ne milambu anyi ne mapa to.”+

15 Samuele wakashala mulale too ne mu dinda; pashishe wakunzulula biibi bia nzubu wa Yehowa. Samuele uvua utshina bua kuambila Eli bua tshikena kumona. 16 Kadi Eli wakabikila Samuele ne: “Muananyi Samuele!” Ke yeye kuamba ne: “Mmeme eu.” 17 Wakamuebeja ne: “Mbualu kayi budiye mukuambile? Kubunsokoki koku to. Nzambi akuenzele nunku ne apitshishe apu wewe munsokoke bualu nansha bumue bua ku malu onso adiye mukuambile.” 18 Nunku Samuele wakamuambila malu onso, ne kakamusokoka bualu nansha bumue to. Eli wakamba ne: “N’Yehowa. Enze tshidi tshimpe ku mêsu kuende.”

19 Samuele uvua anu wenda ukola, ne Yehowa nkayende uvua nende+ ne kakalekela dîyi nansha dimue dia ku mêyi ende onso dipanga kukumbana.* 20 Bena Isalele bonso, kumbukila ku Dana too ne ku Bê-sheba, bakamanya ne: Samuele ke uvuabu bateke muprofete wa Yehowa. 21 Yehowa wakatungunuka ne kumueneka ku Shilo, bualu Yehowa wakadileja kudi Samuele ku Shilo ku dîyi dia Yehowa.+

4 Nunku dîyi dia Samuele diakaya mu Isalele mujima.

Pashishe Isalele wakapatuka bua kuluangana ne bena Peleshete; bakasa tshitudilu kumpenga kua Ebene-ezê, ne bena Peleshete bakasa tshitudilu ku Afeke. 2 Bena Peleshete bakela mualu wa mvita bua kuluangana ne Isalele, kadi mvita ivua mibi ne bena Peleshete bakatshimuna Isalele, kushipabu bantu balume batue ku 4 000 muaba wa mvita mu mpata. 3 Pakapingana bantu mu tshitudilu, bakulu ba mu Isalele bakamba ne: “Bua tshinyi Yehowa mmuanyishe bua bena Peleshete batutshimune* lelu?+ Tuye tuangate mushete wa tshipungidi tshia Yehowa ku Shilo+ bua wikale netu ne utupandishe mu tshianza tshia bena lukuna betu.” 4 Nunku bakatuma bantu ku Shilo, bobu kuangataku mushete wa tshipungidi tshia Yehowa wa biluilu udi musombe mu nkuasa wende wa bukalenge pa mutu* pa bakeluba.+ Bana babidi ba Eli, Hofeni ne Pinehasa,+ bavuaku pabu ne mushete wa tshipungidi tshia Nzambi mulelela.

5 Diakamue pavua mushete wa tshipungidi tshia Yehowa mufike mu tshitudilu, bena Isalele bonso bakela mbila ne dîyi dikole, buloba kunyukukabu. 6 Pakumvua bena Peleshete mutoyi wa mbila ayi, bakebeja ne: “Bua tshinyi kudi mbila mikole nunku mu tshitudilu tshia bena Ebelu?” Ndekelu wa bionso bakumvua ne: Mushete wa Yehowa uvua mufike mu tshitudilu. 7 Bena Peleshete bakumvua buôwa, bualu bakamba ne: “Nzambi mmulue mu tshitudilu!”+ Nunku bakamba ne: “Diakabi dietu! Bualu katshia bualu bua mushindu eu kabutu buanji kuenzeka to! 8 Diakabi dietu! Nnganyi watupandisha mu tshianza tshia Nzambi munene eu? Nzambi eu ke uvua mukengeshe Ejipitu ne dishipa dia mishindu yonso mu tshipela.+ 9 Nuenu bena Peleshete, ikalayi ne dikima ne enzayi malu bu bantu balume, bua kanuenzedi bena Ebelu mudimu anu muvuabu banuenzelawu nuenu.+ Enzayi malu bu bantu balume ne luanganayi!” 10 Nunku bena Peleshete bakaluangana, kutshimunabu Isalele,+ ne yonso wa kudibu wakanyemena ku ntenta wende. Bakashipa bantu bikole menemene; ku luseke lua Isalele basalayi binunu 30 bavua benda ku makasa bakapona. 11 Bakanyenga kabidi Mushete wa Nzambi, ne bana babidi ba Eli, Hofeni ne Pinehasa, bakafua.+

12 Muntu mukuabu wa mu Benyamina wakumbuka muaba wa mvita lubilu, kufikaye ku Shilo dituku adi mudipande bilamba ne muikale ne buloba mu mutu.+ 13 Pakafika muntu au, Eli uvua musombe pa tshisombedi kumpenga kua njila muindile, bualu muoyo wende uvua uzakala bua Mushete wa Nzambi mulelela.+ Muntu au wakabuela mu tshimenga bua kufila lumu alu, ne tshimenga tshijima tshiakatuadija kudila. 14 Pakumvua Eli mutoyi wa miadi, wakakonka ne: “Mutoyi wa diyumbakana au ngua tshinyi?” Muntu umue umue au wakalua lukasa, kuambilaye Eli lumu alu. 15 (Tshikondo atshi Eli uvua ne bidimu 98, ne mêsu ende akavua malengame matangile anu kumpala, ne kavua mua kumona to.)+ 16 Nunku muntu au wakambila Eli ne: “Meme ke udi mufume muaba udi mvita yenzekela! Ndi munyeme anu lelu eu muaba wa mvita au.” Ke yeye kumuebeja ne: “Muananyi, tshidi tshienzeke ntshinyi?” 17 Nunku muntu uvua mulue ne lumu au wakamba ne: “Isalele mmunyeme bena Peleshete, ne mbashipe bantu bibi menemene;+ bana bebe babidi, Hofeni ne Pinehasa, mbafue pabu,+ ne mbanyenge Mushete wa Nzambi mulelela.”+

18 Diakamue pavua muntu au muakule bua Mushete wa Nzambi mulelela, Eli wakakuluka tshianyima pa tshisombedi tshiende kumpenga kua tshiibi tshia tshimenga, nshingu wende wakatshibuka, yeye kufua, bualu ukavua mukulakaje ne uvua ne bujitu. Uvua mulumbuluishe Isalele bidimu 40. 19 Mukaji wa muanende, mukaji wa Pinehasa, uvua ne difu ne ukavua pa kulela. Pakumvuaye lumu lua ne: mbanyenge Mushete wa Nzambi mulelela, ne lua ne: tatuende muenu ne bayende mbafue, wakinama, diakamue lulelu kumukuata, yeye kulela. 20 Pavuaye wenda ukuula muoyo, bantu bakaji bavua bimane ku luseke luende bakamuambila ne: “Kutshinyi to, bualu udi mulele muana wa balume.” Kakandamuna ne kakateya ntema ku bualu abu to.* 21 Kadi wakinyika muana au ne: Ikaboda,*+ wamba ne: “Butumbi mbumbuke mu Isalele buye mu ditunga dikuabu,”+ wakula bua muvuabu banyenge Mushete wa Nzambi mulelela ne tshivua tshienzekele tatuende muenu ne bayende.+ 22 Wakamba ne: “Butumbi mbumbuke mu Isalele buye mu ditunga dikuabu, bualu mbanyenge Mushete wa Nzambi mulelela.”+

5 Pavua bena Peleshete banyenge Mushete+ wa Nzambi mulelela, bakumbuka nawu ku Ebene-ezê kuyabu nawu ku Ashedodo. 2 Bena Peleshete bakangata Mushete wa Nzambi mulelela, kuwubuejabu mu nzubu* wa Dagona, kuwutekabu kumpenga kua Dagona.+ 3 Pavua bena Ashedodo bajuke mu dindadinda dituku diakalonda, bakasangana Dagona mudishinde mutue mpala panshi kumpala kua Mushete wa Yehowa.+ Nunku bakangata Dagona, kumupingajabu pa muaba wende.+ 4 Pakajukabu mu dinda menemene dituku diakalonda, bakasangana Dagona mudishinde mutue mpala panshi kumpala kua Mushete wa Yehowa. Mutu wa Dagona ne bianza biende bionso bibidi bivua bikosa, bikale panshi mu mushiku wa mbelu. Anu tshitupa tshiende tshivua tshienze bu mushipa* ke tshivua tshishale tshijima. 5 Ke bualu kayi too ne lelu, bakuidi ba Dagona ne bantu bonso badi babuela mu nzubu wa Dagona kabatu badiata mu mushiku wa mbelu wa Dagona mu Ashedodo.

6 Tshianza tshia Yehowa tshiakanemena bena Ashedodo, yeye kubakengesha, kutua Ashedodo ne bitupa biende bia maloba nsundu.+ 7 Pavua bantu ba mu Ashedodo bamone tshivua tshienzeka, bakamba ne: “Mushete wa Nzambi wa Isalele kawushadi munkatshi muetu to, bualu tshianza tshiende ntshitukengeshe tuetu ne nzambi wetu Dagona bikole.” 8 Nunku bakabikidisha bakalenge bonso ba bena Peleshete, kubasangishabu, kubebejabu ne: “Tuenze tshinyi ne Mushete wa Nzambi wa Isalele?” Kuandamunabu ne: “Baye ne Mushete wa Nzambi wa Isalele ku Gata.”+ Nunku bakaya ne Mushete wa Nzambi wa Isalele kuntu aku.

9 Bobu bamane kuya nawu kuntu aku, tshianza tshia Yehowa tshiakaluisha tshimenga atshi, kubatuminatshi buôwa bukole menemene. Yeye wakakengesha bantu ba mu tshimenga atshi, kumbukila ku bakese too ne ku banene, ne nsundu yakabapatuka.+ 10 Nunku bakatuma Mushete wa Nzambi mulelela ku Ekelona,+ kadi diakamue pakafika Mushete wa Nzambi mulelela ku Ekelona, bena Ekelona bakabanga kudila bamba ne: “Mbalue ne Mushete wa Nzambi wa Isalele kutudi bua kutushipa tuetu ne bantu betu!”+ 11 Nunku bakabikidisha bakalenge bonso ba bena Peleshete, kubasangishabu, kuambabu ne: “Pingajayi Mushete wa Nzambi wa Isalele; upingane muaba wawu bua tuetu ne bantu betu katufu to.” Bualu buôwa bua kufua buvua butangalake mu tshimenga tshijima; tshianza tshia Nzambi mulelela tshivua tshineme bujitu menemene mu tshimenga atshi,+ 12 ne bantu bavua kabayi bafue bakapeta nsundu. Nunku muadi wa tshimenga bua kulomba diambuluisha wakabanda too ne mu diulu.

6 Mushete+ wa Yehowa uvua mushale mu buloba bua bena Peleshete ngondo muanda mutekete. 2 Bena Peleshete bakabikila bakuidi ne bena mbuku,+ bobu kubebeja ne: “Tuenze tshinyi ne Mushete wa Yehowa eu? Tuambilayi mutudi mua kuwupingaja muaba wawu.” 3 Bakandamuna ne: “Nuenu bapingaje mushete wa tshipungidi tshia Yehowa Nzambi wa Isalele, kanuwupingaji kawuyi ne mulambu to. Mu mishindu yonso nudi ne bua kumutumina mulambu wa dipila.+ Dîba adi ke nuenu kushisha kuondopibua, ne nebanuambile bua tshinyi tshianza tshiende ki ntshiumbuke kunudi.” 4 Nunku bakebeja ne: “Mmulambu wa dipila kayi utudi ne bua kumutumina?” Kuambabu ne: “Bilondeshile bungi bua bakalenge ba bena Peleshete,+ tumayi nsundu itanu ya or ne mpuku itanu ya or, bualu tshipupu tshia muomumue ntshikuate yonso wa kunudi ne bakalenge benu. 5 Nudi ne bua kuenza bimfuanyi bia nsundu yenu ne bia mpuku yenu+ idi inyanga buloba, ne nudi ne bua kunemeka Nzambi wa Isalele. Pamuapa neapepeje bujitu bua tshianza tshiende tshidi pa mutu penu, pa nzambi wenu, ne pa buloba buenu.+ 6 Bua tshinyi nudi ne bua kupapisha muoyo wenu muvua Ejipitu ne Palô bapapishe mioyo yabu?+ Pavuaye mubakengeshe bikole,+ bakalekela bena Isalele bua baye, bobu kuya.+ 7 Mpindieu enzayi ditempu dipiadipia ne angatayi ngombe ibidi idi ne bana itubu kabayi banji kusuika mutshi wa tshikokedi. Pashishe nusuikile ngombe ayi ku ditempu, kadi nupingaje bana bayi kumbelu, nubumbushe kudiyi. 8 Angatayi Mushete wa Yehowa, nuwuteke mu ditempu adi, nuele bintu bia or binudi numutumina bu mulambu wa dipila mu kashete ku luseke luawu.+ Pashishe nuwulekele uye 9 ne nushale batangile: wowu mubande ne njila wa ku Bete-shemeshe,+ mutangile ku buloba buawu, dîba adi netumanye ne: yeye ke udi mutuenzele bualu bubi butambe ebu. Kadi biobi kabiyi bienzeke nanku, netumanye ne: ki ntshianza tshiende tshivua tshitukengeshe to; bivua bituenzekele ku mpukapuka.”

10 Bantu abu bakenza nanku. Bakangata ngombe ibidi ivua ne bana, kuyisuikilabu ku ditempu, bobu kuela bana bayi mu tshikumbi kumbelu. 11 Pashishe bakateka Mushete wa Yehowa mu ditempu, pamue ne kashete kavua ne mpuku ya or ne bimfuanyi bia nsundu yabu. 12 Ngombe yakayila buludiludi mu njila wa ku Bete-shemeshe.+ Yakashala anu mu njila munene, yenda iya, yenda idila; kayakaya ni nku dia balume ni nku dia bakaji. Dîba dionso adi bakalenge ba bena Peleshete bavua benda bayilonda mu nyima too ne ku mukalu wa Bete-shemeshe. 13 Bantu ba mu Bete-shemeshe bavua bapuola blé mu tshibandabanda.* Pavuabu babandishe mêsu ne bamone Mushete, bakasanka bikole bua diwumona. 14 Ditempu diakafika mu budimi bua Yoshua muena Bete-shemeshe, kuimanadi muaba au pabuipi ne dibue dinene. Nunku bakapanda mabaya a ditempu, bobu kulambula ngombe ayi+ bu mulambu wa kuosha kudi Yehowa.

15 Bena Lewi+ bakatulula Mushete wa Yehowa ne kashete kavua nawu kavua ne bintu bia or, bobu kubiteka pa dibue dinene. Bantu ba mu Bete-shemeshe+ bakalambula milambu ya kuosha ne kufilabu milambu kudi Yehowa dituku adi.

16 Pakamona bakalenge batanu ba bena Peleshete bualu abu, bakapingana ku Ekelona dituku adi. 17 Mpindieu eyi ke nsundu ya or ivua bena Peleshete batumine Yehowa bu mulambu wa dipila:+ nsundu umue bua Ashedodo,+ umue bua Gaza, umue bua Ashekelona, umue bua Gata,+ umue bua Ekelona.+ 18 Bungi bua mpuku ya or buvua bupetangana ne bungi bua bimenga bionso bia bena Peleshete bivua ku bukokeshi bua bakalenge batanu abu, bimenga bikolesha ne misoko ivua mu mpata.

Dibue dinene divuabu batekele Mushete wa Yehowa didi tshijadiki mu budimi bua Yoshua muena Bete-shemeshe too ne lelu. 19 Kadi Nzambi wakashipa bantu ba mu Bete-shemeshe, bualu bavua batangile Mushete wa Yehowa. Wakashipa bantu 50 070* munkatshi mua bantu abu, ne bantu kutuadijabu kudila bualu Yehowa uvua mushipe bantu dishipa dia dikema.+ 20 Ke bantu ba mu Bete-shemeshe kuebeja ne: “Nnganyi wakumbana kuimana kumpala kua Yehowa, Nzambi wa tshijila eu?+ Yeye mumbuke kutudi neaye kudi banganyi?”+ 21 Nunku bakatumina bena mu Kîyata-yalima+ bantu ne mukenji, bamba ne: “Bena Peleshete mbapingaje Mushete wa Yehowa. Puekayi, nuwangate, nubande nawu.”+

7 Nunku bantu ba mu Kîyata-yalima bakalua, kuangatabu Mushete wa Yehowa, kubandabu nawu ku nzubu kua Abinadaba+ ku mukuna mukese, ne bakajidila muanende Eleazâ bua ikale ulama Mushete wa Yehowa.

2 Bidimu bia bungi biakapita, bidimu 20 bijima, kumbukila ku dituku divua Mushete mufike mu Kîyata-yalima; ne nzubu mujima wa Isalele wakatuadija kukeba* Yehowa.+ 3 Nunku Samuele wakambila nzubu mujima wa Isalele ne: “Nuenu basue kupingana kudi Yehowa ne muoyo wenu mujima,+ umbushayi nzambi ya ku babende+ ne bimfuanyi bia Ashatelota+ munkatshi muenu, tuminayimu muoyo wenu kudi Yehowa ne numuenzele anu yeye nkayende mudimu,+ ne yeye neanusungile mu tshianza tshia bena Peleshete.”+ 4 Nunku bena Isalele bakumbusha Babâla ne bimfuanyi bia Ashatelota ne bakenzela anu Yehowa mudimu.+

5 Ke Samuele kuamba ne: “Sangishayi bena Isalele bonso ku Misepa,+ ne nensambile Yehowa bua bualu buenu.”+ 6 Nunku bakadisangisha bonso ku Misepa, ne bakasuna mâyi, kuapongololabu kumpala kua Yehowa ne kujilabu biakudia dituku adi.+ Bakamba kuntu aku ne: “Tudi benzele Yehowa mpekatu.”+ Pashishe Samuele wakatuadija kulumbuluisha+ bena Isalele ku Misepa.

7 Pakumvua bena Peleshete ne: bena Isalele bavua badisangishe ku Misepa, bakalenge ba bena Peleshete+ bakabanda bua kuluisha Isalele. Pakumvua bena Isalele bualu abu, bakumvua buôwa bua bualu bua bena Peleshete. 8 Nunku bena Isalele bakambila Samuele ne: “Kulekedi kubikila Yehowa Nzambi wetu bua atuambuluishe+ ne atupandishe mu tshianza tshia bena Peleshete.” 9 Pashishe Samuele wakangata muana wa mukoko utshivua wamua, kumulambulaye bu mulambu wa kuosha mujima+ kudi Yehowa; ne Samuele wakabikila Yehowa bua ambuluishe Isalele, ne Yehowa wakamuandamuna.+ 10 Pavua Samuele ulambula mulambu wa kuosha, bena Peleshete bakasemena bua kuluisha Isalele. Ke Yehowa kudidishila bena Peleshete makubakuba makole+ dituku adi, Yeye kubabueja mu kayumbayumba,+ ne Isalele wakabatshimuna.+ 11 Nunku bantu ba mu Isalele bakumbuka ku Misepa, kulondakajabu bena Peleshete, benda babashipa too ne ku sud kua Bete-kâ. 12 Pashishe Samuele wakangata dibue,+ kudimanyikaye pankatshi pa Misepa ne Yeshana, kuinyikaye dibue adi ne: Ebene-ezê,* bualu wakamba ne: “Too ne mpindieu Yehowa mmutuambuluishe.”+ 13 Nunku bena Peleshete bakakokeshibua, ne kabakalua kabidi mu buloba bua Isalele to;+ ne tshianza tshia Yehowa tshiakatungunuka ne kuluisha bena Peleshete matuku onso a Samuele.+ 14 Bimenga bivua bena Peleshete banyenge Isalele biakapingana kabidi kudi Isalele, kumbukila ku Ekelona too ne ku Gata, ne Isalele wakapetulula maloba abi ku tshianza tshia bena Peleshete.

Kuvua kabidi ditalala pankatshi pa Isalele ne bena Amole.+

15 Samuele wakatungunuka ne kulumbuluisha Isalele matuku ende onso a muoyo.+ 16 Tshidimu tshionso uvua wenza luendu, unyunguluka uya ku Betele,+ ku Gilegala,+ ne ku Misepa,+ ne uvua ulumbuluisha Isalele miaba yonso eyi. 17 Kadi uvua upingana ku Lama,+ bualu nzubu wende uvua kuntu aku, ne uvua ulumbuluishilaku kabidi Isalele. Wakashilaku Yehowa tshioshelu.+

8 Pakakulakaja Samuele, wakateka bana bende balumbuluishi mu Isalele. 2 Dîna dia muanende muanabute divua Yoele, ne dîna dia muanende muibidi divua Abiya;+ bavua balumbuluisha mu Bê-sheba. 3 Kadi bana bende kabavua balonda njila yende to; bavua basue kupeta bintu mu njila mubi,+ bavua bitaba nkosa mishiku+ ne kabavua balumbuluisha bimpe to.+

4 Pakapita matuku, bakulu bonso ba mu Isalele bakadisangisha pamue, bobu kulua kudi Samuele ku Lama. 5 Bakamuambila ne: “Tangila! Ukadi mukulakaje, kadi bana bebe kabena balonda njila yebe to. Mpindieu tutekela mukalenge bua atulumbuluishe anu bu mudibi bienzeka mu bisamba bikuabu bionso.”+ 6 Kadi biakatonda* Samuele pavuabu bamuambile ne: “Tupesha mukalenge bua atulumbuluishe.” Ke Samuele kusambila Yehowa, 7 ne Yehowa kuambila Samuele ne: “Teleja malu onso adi bantu aba bakuambila; bualu udibu babenge ki nguewe to, kadi meme ke udibu babenge bua tshikadi mukalenge wabu.+ 8 Badi benza anu mudibu benza katshia dituku dimvua mubapatule mu Ejipitu too ne lelu; badi bandekela+ bua kuenzela nzambi mikuabu mudimu,+ ne ke tshidibu bakuenzela pebe. 9 Mpindieu itaba tshidibu bamba. Kadi udi ne bua kubadimuija ne muoyo umue; ubambile tshikala mukalenge udi ubakokesha ne bukenji bua kulomba.”

10 Nunku Samuele wakambila bantu bavua bamulomba mukalenge mêyi onso a Yehowa. 11 Wakamba ne: “Mukalenge wanukokesha neikale ne bukenji bua kulomba malu aa:+ Neangate bana benu ba balume,+ neabateke mu matempu ende,+ neabavuije bendeshi ba tubalu tuende,+ ne bakuabu nebikale benda banyema kumpala kua matempu ende. 12 Neaditekele kabidi bamfumu ba bantu tshinunu tshinunu+ ne bamfumu ba bantu makumi atanu makumi atanu+ ne bakuabu nebikale bamudimina,+ bamupuolela bia pa madimi,+ ne bamuenzela bia mvita ne bintu bia matempu ende.+ 13 Neangate bana benu ba bakaji bua bikale benji ba mafuta,* balambi, ne benji ba mampa.+ 14 Neangate madimi enu matambe buimpe, madimi enu a tumuma tua mvinyo, madimi enu a mitshi ya olive,+ ne neaapeshe bena mudimu bende. 15 Neangate tshia dikumi tshia madimi enu a ntete ne tshia madimi enu a tumuma tua mvinyo, ne neatshipeshe banene badi benza mudimu mu lubanza luende ne bena mudimu bende. 16 Neangate kabidi bena mudimu benu ba balume ne ba bakaji, bimuna bienu bitambe buimpe, ne mpunda yenu, ne neenze nabi mudimu wende.+ 17 Neangate tshia dikumi tshia mikoko yenu,+ ne nuenu nenuikale bena mudimu bende. 18 Dituku nedilue dinuadila bua mukalenge unudi badisunguile,+ kadi Yehowa kakunumvuila dituku adi to.”

19 Kadi bantu bakabenga kuteleja tshivua Samuele mubambile, bakamba ne: “Mu mishindu yonso, tuetu tudi basue anu kuikala ne mukalenge ku mutu kuetu. 20 Dîba adi netuikale anu bu bisamba bikuabu bionso, ne mukalenge wetu neatulumbuluishe, neatulombole ne neatuluile mvita.” 21 Pakumvua Samuele mêyi onso avua bantu bambe, wakaambulula mu matshi a Yehowa. 22 Yehowa wakambila Samuele ne: “Itaba tshidibu bamba, ne ubatekele mukalenge bua abakokeshe.”+ Ke Samuele kuambila bantu ba mu Isalele ne: “Yonso wa kunudi apingane mu tshimenga tshiabu.”

9 Kuvua muntu mukuabu wa mu Benyamina dîna diende Kishi,+ muana wa Abiele muana wa Selô muana wa Bekolata muana wa Afia, muena Benyamina+ ne muntu wa bubanji bua bungi. 2 Uvua ne muana wa balume diende Shaula+ utshivua nsonga ne uvua muimpe kumona; kakuvua muntu mukuabu munkatshi mua bena Isalele uvua muimpe kumona bu yeye to; uvua mupite bantu bonso ku bule kubangila ku makaya too ne ku mutu.

3 Pavua mpunda* ya Kishi tatuende wa Shaula mijimine, Kishi wakambila muanende Shaula ne: “Angata koku muambuluishi umue, nuye kukeba mpunda.” 4 Bakapitshila mu buloba bua mikuna bua Efelayima ne mu buloba bua Shalisha, kadi kabakayipeta to. Bakayila mu buloba bua Shâlima, kadi mpunda kayivuamu to. Kupitshilabu mu buloba buonso bua bena Benyamina, kadi kabakayipeta to.

5 Bakafika mu buloba bua Zufa, Shaula kuambilaye muambuluishi uvuaye nende ne: “Luaku tupingane, bua tatu katuadiji kusamisha mutu buetu tuetu pamutu pa kuwusamisha bua mpunda.”+ 6 Kadi muambuluishi wakandamuna ne: “Mona, mu tshimenga etshi mudi muntu wa Nzambi, muntu udibu banemeka bikole. Malu onso adiye wamba adi akumbana.+ Luaku tuye kuntu aku mpindieu. Pamuapa yeye udi mua kutuleja njila wa kuyila.” 7 Ke Shaula kuambila muambuluishi wende ne: “Tuetu baye, netutuadile muntu au tshinyi? Katuena ne mampa mu bibuta bietu; katuena ne dipa dia kutuadila muntu wa Nzambi mulelela au to. Tudi ne tshinyi?” 8 Nunku muambuluishi wakandamuna kabidi Shaula ne: “Tangila! Ndi ne tshia binayi tshia nshekele* wa tshiamu tshia arjan mu tshianza tshianyi. Nentshipeshe muntu wa Nzambi mulelela, ne neatuleje njila wa kuyila.” 9 (Kale mu Isalele, pavua muntu uya bua kukeba Nzambi, uvua wamba ne: “Luaku tuye kudi mumonyi wa malu.”+ Bualu kale bavua babikila muprofete wa lelu ne: mumonyi wa malu.) 10 Ke Shaula kuambila muambuluishi wende ne: “Tshiudi muambe ntshimpe. Luaku tuye.” Nunku bakaya mu tshimenga muvua muntu wa Nzambi mulelela.

11 Pavuabu babanda kakuna batangile mu tshimenga, bakasambakena ne bansongakaji bapatuka bua kuya kusuna mâyi. Ke bobu kubebeja ne: “Mumonyi wa malu+ udiku muaba eu anyi?” 12 Bakandamuna ne: “Udiku. Tangilayi, udi kumpala kuenu aku. Mpindieu koleshayi, bualu lelu mmulue mu tshimenga bu mudi bantu bafila mulambu+ muaba mutumbuke lelu.+ 13 Diakamue panudi nubuela mu tshimenga, nenumupete kumpala kua kubandaye muaba mutumbuke bua kudia. Bantu kabakudia too ne padiye ufika, bualu yeye ke udi ubenesha mulambu. Padiye anu ujikija kuenza nanku, bantu badibu babikile badi mua kudia. Nunku bandayi anu mpindieu, nenumusangane.” 14 Nunku bakabanda mu tshimenga. Pavuabu babuela munda mua tshimenga, bakamona Samuele ulua bua kusambakena nabu bua kuya muaba mutumbuke.

15 Dituku dimue kumpala kua Shaula kulua, Yehowa wakambila* Samuele ne: 16 “Malaba ku mêba aa, nenkutumine muntu kampanda wa mu buloba bua Benyamina.+ Udi ne bua kumuela manyi bua ikale mulombodi wa tshisamba tshianyi tshia Isalele,+ ne yeye neapandishe tshisamba tshianyi mu tshianza tshia bena Peleshete. Bualu ndi mumone dikenga dia bena mu tshisamba tshianyi, ne muadi wabu mmufike kundi.”+ 17 Pavua Samuele mumone Shaula, Yehowa wakamuambila ne: “Muntu umvua mukuambile ne: ‘Eu ke wakokesha tshisamba tshianyi’* nyeye eu.”+

18 Pashishe Shaula wakaya kudi Samuele ku tshiibi, kuebejaye ne: “Ngambila koku, nzubu wa mumonyi wa malu udi kuepi?” 19 Samuele wakandamuna Shaula ne: “Meme ke mumonyi wa malu. Pita kumpala kuanyi tubande muaba mutumbuke, ne nenudie pamue nanyi lelu.+ Netulayangane mu dinda, ne nenkuambile malu onso audi musue kumanya.* 20 Bua mpunda ivua mijimine kukadi matuku asatu,+ kusamishi mutu bua bualu buayi to, bualu bakadi bayipete. Bintu bionso bimpe bia mu Isalele mbia nganyi? Ki mbiebe wewe ne nzubu mujima wa tatuebe anyi?”+ 21 Ke Shaula kuandamuna ne: “Meme tshiena muena Benyamina wa mu tshisa tshitambe bukese tshia mu bisa bia mu Isalele anyi?+ Pashishe dîku dietu ki nditambe bukese ku mêku onso a mu tshisa tshia Benyamina anyi? Nunku bua tshinyi udi ungambila nanku?”

22 Pashishe Samuele wakangata Shaula ne muambuluishi wende, kuyaye nabu mu nzubu wa kudiila, yeye kubapesha muaba ku mutu kua bantu bavuabu babikile; kuvua bantu batue ku 30. 23 Samuele wakambila muntu uvua ku tshikuku ne: “Luaku ne munyinyi umvua mukupeshe, mukuambile ne: ‘Uwuteke ku luseke.’” 24 Ke muntu uvua ku tshikuku kuambulaye tshibelu ne bintu bivuapu, yeye kutshiteka kumpala kua Shaula. Nunku Samuele wakamba ne: “Mbateke kumpala kuebe bintu bivuabu balame. Diaku, bualu bavua bakulaminabi bua tshikondo etshi. Bualu mvua mubambile ne: ‘Ndi mubikile benyi.’” Nunku Shaula wakadia ne Samuele dituku adi. 25 Pashishe bakumbuka muaba mutumbuke,+ kupuekabu mu tshimenga, yeye kutungunuka ne kuakula ne Shaula pa mutu pa nzubu. 26 Bakajuka kumpala kua dîba, ne patshiatshia Samuele wakabikila Shaula pa mutu pa nzubu, wamba ne: “Dilongolola bua tulayangane nebe.” Nunku Shaula wakadilongolola, ne yeye ne Samuele kupatukabu pambelu. 27 Pavuabu bapueka batangile pambelu pa tshimenga, Samuele wakambila Shaula ne: “Ambila muambuluishi webe+ adianjile kumpala kuetu,” nunku wakadianjila. “Kadi wewe, imana mpindieu bua nkuambile dîyi dia kudi Nzambi.”

10 Pashishe Samuele wakangata kalondo ka manyi, kuapongololaye pa mutu wa Shaula.+ Wakamutua mishiku, kuambaye ne: “Yehowa ki mmukuele manyi bua wikale mulombodi+ pa bumpianyi buende anyi?+ 2 Paudi unshiya lelu, neusangane bantu babidi pabuipi ne lukita lua Lakele+ mu buloba bua Benyamina ku Selesa, ne nebakuambile ne: ‘Bakadi bapete mpunda iuvua muye kukeba, kadi mpindieu tatuebe mmupue bualu bua mpunda muoyo+ ne udi usamisha mutu buebe wewe. Yeye udi wamba ne: “Nengenze tshinyi bua muananyi?”’ 3 Umbuke muaba au, uye too ne paudi ufika ku mutshi munene wa ku Tabô kuwapetangana ne bantu basatu badi babanda kudi Nzambi mulelela ku Betele,+ umue muambule bana ba mbuji basatu, mukuabu muambule mampa asatu, ne munga muambule mulondo munene wa mvinyo. 4 Nebebeje bua kumanya muudi, nebakupeshe mampa abidi, ne udi ne bua kuangata mampa adibu bakupesha au. 5 Pashishe neufike ku mukuna mukese wa Nzambi mulelela, muaba udi tshisumbu tshia basalayi tshia bena Peleshete. Paudi ufika mu tshimenga, neupetangane ne tshisumbu tshia baprofete bapueka bafumina muaba mutumbuke, ne nebikale benda bimba tshiombelu tshia nshinga, ngoma, lushiba ne lunzenze kumpala kuabu padibu bobu benda bamba mêyi a buprofete. 6 Nyuma wa Yehowa neakupeshe bukole,+ newambe mêyi a buprofete pamue nabu ne neuvuijibue muntu mukuabu.+ 7 Padi bimanyinu ebi bikumbana, enza tshionso tshidi tshianza tshiebe mua kuenza, bualu Nzambi mulelela udi nebe. 8 Pashishe upueke, undianjidile ku Gilegala,+ ne meme nempueke kuudi kuntu aku bua kufila milambu ya kuosha ne milambu ya diumvuangana. Newindile matuku muanda mutekete too ne pangalua kuudi. Nunku nenkuambile tshiudi ne bua kuenza.”

9 Diakamue pavua Shaula mukudimuke bua kushiyangana ne Samuele, Nzambi wakatuadija kushintulula muoyo wende bua wikale bu wa muntu mukuabu, ne bimanyinu bionso ebi biakakumbana dituku adi. 10 Nunku bakumbuka kuntu aku, kubandabu ku mukuna mukese, yeye kusambakena ne tshisumbu tshia baprofete. Diakamue nyuma wa Nzambi wakamupesha bukole,+ yeye kubanga kuamba mêyi a buprofete+ munkatshi muabu. 11 Pavua bantu bonso bavua bamumanye kumpala bamumone wamba mêyi a buprofete pamue ne baprofete, bakebejangana ne: “Ntshinyi tshidi tshienzekele muana wa Kishi? Shaula ukadi pende munkatshi mua baprofete anyi?” 12 Ke muntu mukuabu wa kuntu aku kuambaye ne: “Kadi tatuabu nnganyi?” Nunku bakatuadija kuamba* ne: “Shaula ukadi pende munkatshi mua baprofete anyi?”+

13 Pakajikijaye kuamba mêyi a buprofete, wakalua muaba mutumbuke. 14 Pashishe tatuende mukuabu wa Shaula wakamuebeja yeye ne muambuluishi wende ne: “Nuvua baye kuepi?” Ke yeye kuamba ne: “Tuvua baye kukeba mpunda,+ kadi tuetu kumona ne: kayivuaku to, ke tuetu kuya kudi Samuele.” 15 Tatuende mukuabu wa Shaula au wakebeja ne: “Ngambila koku, Samuele mmukuambile tshinyi?” 16 Shaula wakandamuna tatuende mukuabu ne: “Uvua mutuambile ne: bakadi bapete mpunda.” Kadi Shaula kakamuambila tshivua Samuele muambe bua bualu bua bukalenge to.

17 Pashishe Samuele wakabikidisha bantu bonso kudi Yehowa ku Misepa,+ 18 yeye kuambila bena Isalele ne: “Yehowa Nzambi wa Isalele udi wamba nunku: ‘Meme ke uvua mupatule Isalele mu Ejipitu ne uvua munusungile mu tshianza tshia Ejipitu+ ne mu tshianza tshia makalenge onso avua anukengesha. 19 Kadi lelu nuenu nudi babenge Nzambi wenu+ uvua Mupandishi wenu mu malu mabi onso avua anukuata ne mu makenga enu onso, ne nuvua bambe ne: “Mu mishindu yonso, wewe udi ne bua kututekela anu mukalenge.” Mpindieu imanayi kumpala kua Yehowa bilondeshile bisa bienu ne bilondeshile binunu* bienu.’”

20 Nunku Samuele wakamba bua bisa bionso bia Isalele bisemene,+ ne bakasungula tshisa tshia Benyamina.+ 21 Pashishe wakamba bua tshisa tshia Benyamina tshisemene bilondeshile mêku atshi, ne bakasungula dîku dia bena Mâteli. Ndekelu wa bionso bakasungula Shaula muana wa Kishi.+ Kadi pakayabu bua kumukeba, kabakamupeta muaba nansha umue to. 22 Nunku bakebeja Yehowa ne:+ “Muntu au ukadi mulue muaba eu anyi?” Yehowa wakandamuna ne: “Nyeye au musokome munkatshi mua mabuki.” 23 Nunku bakaya lubilu, kumuangatabu kuntu aku. Pakimanaye munkatshi mua bantu, uvua mupite bantu bakuabu bonso bule kutuadijila ku makaya too ne ku mutu.+ 24 Samuele wakambila bantu bonso ne: “Nudi bamone muntu udi Yehowa musungule anyi?+ Kakuena muntu mukuabu bu yeye munkatshi mua bantu bonso to.” Nunku bantu bonso bakatuadija kuela mbila bamba ne: “Mukalenge ikale ne muoyo matuku a bungi!”

25 Samuele wakambila bantu malu avuabu ne bua kuenzela bakalenge,+ ne wakaafunda mu mukanda, kuwutekaye kumpala kua Yehowa. Pashishe Samuele wakalayangana ne bantu bonso, muntu yonso kuyaye ku nzubu kuende. 26 Shaula pende wakapingana kuende ku Gibea, ne bena mvita bavua Yehowa mulenge mioyo yabu bakaya nende. 27 Kadi bamue bantu tshianana bakamba ne: “Muntu eu neatupandishe mushindu kayi?”+ Nunku bakamupetula, ne kabakamutuadila dipa nansha dimue.+ Kadi yeye kakamba tshintu nansha tshimue bua bualu abu.*

11 Pashishe Nahasha muena Amona+ wakabanda, kuasaye tshitudilu bua kuluisha Yabesha+ mu Gilada. Bantu bonso ba mu Yabesha bakambila Nahasha ne: “Punga netu tshipungidi,* ne tuetu netukuenzele mudimu.” 2 Nahasha muena Amona wakabambila ne: “Nentshipunge nenu anu nuenu bitabe bualu ebu: bua banutonkone mêsu a dia balume. Nengenze nunku bua kufuisha Isalele mujima bundu.” 3 Bakulu ba mu Yabesha bakamuandamuna ne: “Tupesha matuku muanda mutekete bua tutume bantu ne mukenji mu buloba buonso bua Isalele. Koku kakuyi muntu wa kutusungila, dîba adi netudifile mu bianza biebe.” 4 Ndekelu wa bionso, bantu bavuabu batume ne mukenji abu bakafika mu Gibea+ wa Shaula, bobu kuamba mêyi onso au mu matshi a bantu, ne bantu bonso bakadila ne dîyi diabu dionso.

5 Kadi Shaula uvua ufumina mu mpata muikale panyima pa tshisumbu tshia ngombe, ne Shaula wakebeja ne: “Ntshilumbu kayi tshidi natshi bantu aba? Bua tshinyi badi badila?” Nunku bakamuambila mêyi a bantu ba ku Yabesha. 6 Pakumvua Shaula mêyi aa, nyuma wa Nzambi wakamupesha bukole,+ tshiji tshiende kutematshi. 7 Ke yeye kuangata ngombe ibidi, kuyikosololaye bitupa bitupa, kutumaye bantu ne mukenji mu buloba buonso bua Isalele ne bitupa abi, bamba ne: “Muntu yonso wabenga kulonda Shaula ne Samuele atekemene ne: nebenzele ngombe yende mushindu eu!” Nunku ditshina dia Yehowa diakakuata bantu, bobu kupatuka bu muntu umue.* 8 Pashishe wakababala ku Bezeke, ne kuvua bena Isalele binunu 300 ne bantu ba mu Yuda binunu 30. 9 Nunku bakambila bantu bavua balue ne mukenji ne: “Nuambile bantu ba mu Yabesha mu Gilada nunku: ‘Malaba padi munya ukola, nebanupandishe.’” Ke bantu bavua balue ne mukenji abu kupinganabu, kuambilabu bantu ba mu Yabesha bualu ebu, bobu kusanka bikole. 10 Nunku bantu ba mu Yabesha bakambila Nahasha ne: “Malaba netudifile mu bianza biebe, ne udi mua kutuenzela tshionso tshiudi mumone tshimpe.”+

11 Dituku diakalonda, Shaula wakatapulula bantu mu bisumbu bisatu, bobu kuya, kubuelabu munkatshi mua tshitudilu mu tshilu tshia mu dinda,* kushipabu bena Amona+ too ne pakakola munya. Bantu bavua bashale ne muoyo bakatangalaka, kakuyi kushale nansha bantu babidi kaba kamue to. 12 Pashishe bantu bakambila Samuele ne: “Mbanganyi bavua bamba ne: ‘Shaula udi ne bua kuikala mukalenge wetu anyi?’+ Filayi bantu abu bua tubashipe.” 13 Kadi Shaula wakamba ne: “Kabakushipa muntu nansha umue dituku edi to,+ bualu lelu Yehowa mmusungile Isalele.”

14 Pashishe Samuele wakambila bantu ne: “Luayi tuye ku Gilegala+ bua kujadikulula bukalenge.”+ 15 Nunku bantu bonso bakaya ku Gilegala, ne bakateka Shaula mukalenge kumpala kua Yehowa ku Gilegala aku. Pashishe bakalambula milambu ya diumvuangana kuntu aku kumpala kua Yehowa,+ ne Shaula ne bena Isalele bonso bakasanka disanka dia dikema.+

12 Ndekelu wa bionso, Samuele wakambila Isalele mujima ne: “Monayi, ndi muenze* malu onso anuvua bandombe bua kuenza ne ndi muteke mukalenge bua anukokeshe.+ 2 Mpindieu monayi mukalenge udi unulombola!*+ Kadi meme nkadi mukulakaje ne nsuki yanyi mmitoke; bana banyi badi nenu muaba eu,+ ne ndi munulombole kumbukila ku buana buanyi too ne lelu.+ 3 Mmeme eu. Nuenu bikale ne bualu, buambayi kumpala kua Yehowa ne kumpala kua muela manyi wende:+ Ndi muangate ngombe anyi mpunda wa nganyi?+ Anyi nnganyi undi mudie bintu biende anyi mudiatakaje? Ndi muitabe dikosa mishiku* ku tshianza tshia nganyi bua meme kutangila luseke lukuabu?+ Bingikala muenze nanku, nennupingajilabi.”+ 4 Bobu kuamba ne: “Kuena mutudie bintu anyi mutudiatakaje anyi muangate tshintu ku tshianza tshia muntu nansha umue to.” 5 Ke yeye kubambila ne: “Yehowa udi ntemu wanyi kumpala kuenu, ne muela manyi wende udi ntemu lelu eu ne: kanuena bapete bualu bua kumfunda nabu* to.” Bobu kuamba ne: “Yeye udi ntemu.”

6 Nunku Samuele wakambila bantu ne: “Yehowa, uvua mukuate mudimu ne Mose ne Alona ne uvua mupatule bankambua benu mu buloba bua Ejipitu,+ udi ntemu. 7 Mpindieu imanayi miaba yenu, ne nennulumbuluishe kumpala kua Yehowa bua bienzedi biakane bionso bidi Yehowa munuenzele nuenu ne bankambua benu.

8 “Diakamue pavua Yakoba mulue mu Ejipitu+ ne bankambua benu batuadije kubikila Yehowa bua abambuluishe,+ Yehowa wakatuma Mose+ ne Alona bua kupatula bankambua benu mu Ejipitu ne kuenza bua basombele muaba eu.+ 9 Kadi bakapua Yehowa Nzambi wabu muoyo, ke yeye kubapana+ mu tshianza tshia Sisela+ mfumu wa tshiluilu tshia Hasô ne mu tshianza tshia bena Peleshete+ ne mu tshianza tshia mukalenge wa Moaba,+ ne bobu bakabaluisha. 10 Kadi bakabikila Yehowa bua abambuluishe,+ bobu kuamba ne: ‘Tudi benze mpekatu,+ bualu tudi balekele Yehowa bua kuenzela Babâla+ ne bimfuanyi bia Ashatelota+ mudimu; mpindieu tusungilaku mu tshianza tshia bena lukuna betu bua tumone mua kukuenzela wewe mudimu.’ 11 Ke Yehowa kutuma Yelubâla+ ne Bedana ne Yefeta+ ne Samuele,+ Yeye kunusungila mu tshianza tshia bena lukuna bavua banunyunguluke ku nseke yonso, bua nusombe talalaa.+ 12 Nansha mudi Yehowa Nzambi wenu muikale Mukalenge wenu,+ panuvua bamone ne: Nahasha+ mukalenge wa bena Amona uvua mulue kunuluisha, nuvua anu nungambila ne: ‘Tòo, tudi badisuike bua kuikala ne mukalenge ku mutu kuetu!’+ 13 Mpindieu tangilayi mukalenge unudi basungule, mukalenge unuvua balombe. Monayi! Yehowa mmuteke mukalenge ku mutu kuenu.+ 14 Nuenu batshine Yehowa,+ bamuenzele mudimu,+ batumikile dîyi diende+ ne nuenu kanuyi batombokele dîyi dituma dia Yehowa, ne nuenu ne mukalenge udi unukokesha nuenu balonde Yehowa Nzambi wenu, mbimpe. 15 Kadi nuenu kanuyi batumikile dîyi dia Yehowa ne nuenu batombokele dîyi dituma dia Yehowa, tshianza tshia Yehowa netshikale kunudi bua kununyoka nuenu ne batatuenu.+ 16 Mpindieu imanayi miaba yenu ne numone bualu bunene ebu budi Yehowa wenza mu mêsu enu. 17 Lelu ki ntshikondo tshia dipuola blé anyi? Nembikile Yehowa bua atutshishe makubakuba ne alokeshe mvula; dîba adi nenumanye ne nenumvue ne: nudi benze bualu bubi ku mêsu kua Yehowa panudi badilombele mukalenge.”+

18 Nunku Samuele wakabikila Yehowa, ke Yehowa kututshisha makubakuba ne kulokesha mvula dituku adi, kufikishabi bantu bonso ku ditshina Yehowa ne Samuele bikole. 19 Bantu bonso bakambila Samuele ne: “Sambila Yehowa Nzambi webe bua bena mudimu bebe,+ bualu katuena basue kufua to, bualu tudi basakidile bubi bukuabu ku mpekatu yetu yonso patudi balombe mukalenge.”

20 Ke Samuele kuambila bantu ne: “Kanutshinyi to. Bushuwa nudi benze bubi buonso ebu. Kadi kanulekedi kulonda Yehowa,+ ne nuenzele Yehowa mudimu ne muoyo wenu wonso.+ 21 Kanukudimuki bua kulonda bintu bia tshianana*+ bidi kabiyi mua kunuambuluisha+ ne bidi kabiyi mua kunusungila, bualu bidi tshianana.* 22 Yehowa kaknulekela nuenu bantu bende+ bua bualu bua dîna diende dinene,+ bualu Yehowa mmunusungule bua nuikale bantu bende.+ 23 Buanyi meme, kakuena mushindu wa meme kuenzela Yehowa mpekatu pa kulekela bua kusambila bua bualu buenu, ne nentungunuke ne kunulongesha mu njila muimpe ne mululame. 24 Kadi nuenu tshinayi Yehowa+ ne numuenzele mudimu ne lulamatu* ne muoyo wenu wonso, bualu monayi malu manene adiye munuenzele.+ 25 Kadi nuenu benze malu mabi mu dikamakama, nenubutudibue+ nuenu ne mukalenge wenu.”+

13 Shaula uvua ne bidimu . . .* pavuaye mulue mukalenge,+ ne wakakokesha mu Isalele bidimu bibidi. 2 Shaula wakasungula bantu balume 3 000 mu Isalele; bantu 2 000 ba kudibu bavua ne Shaula ku Mikemasha ne mu buloba bua mikuna bua ku Betele ne bantu tshinunu bavua ne Yonatana+ ku Gibea+ wa Benyamina. Wakapingaja bantu bavua bashale, muntu yonso ku ntenta wende. 3 Pashishe Yonatana wakashipa basalayi ba bena Peleshete+ bavua mu Geba,+ ne bena Peleshete bakumvua bualu abu. Nunku Shaula wakelesha mpungi+ mu buloba buonso wamba ne: “Bena Ebelu bumvue!” 4 Isalele mujima wakumvua lumu elu ne: “Shaula mmushipe basalayi ba bena Peleshete, ne mpindieu Isalele mmulue tshintu tshidi tshinunka bibi munkatshi mua bena Peleshete.” Nunku bakabikidisha bantu bua kulonda Shaula ku Gilegala.+

5 Bena Peleshete bakadisangisha pabu pamue bua kuluisha Isalele, bikale ne matempu a mvita binunu 30 ne bendeshi ba tubalu 6 000 ne basalayi bungi bu nsenga ya ku muelelu kua mbuu;+ ne bakabanda, kutudilabu mu Mikemasha ku est kua Bete-awena.+ 6 Nunku bantu ba mu Isalele bakamona ne: bavua mu lutatu, bualu bavua babatshintshimike; nunku bantu bakasokoma mu nyongolo,+ mu bina, mu mikuna ya mabue, mu nzubu ya muinshi mua buloba ne mu bina bia kulamina mâyi. 7 Bena Ebelu bakuabu bakasabuka too ne Yadene, kuyabu mu buloba bua Gada ne bua Gilada.+ Kadi Shaula uvua yeye anu mu Gilegala, ne bantu bonso bavua bamulonda bavua benda bazakala. 8 Wakatungunuka ne kuindila matuku muanda mutekete too ne pavua dîba divua Samuele mukose* dikumbane, kadi Samuele kavua mulue ku Gilegala to, ne bantu bavua nende bakatuadija kumuangalaka. 9 Ndekelu wa bionso Shaula wakamba ne: “Ntuadilayi mulambu wa kuosha ne milambu ya diumvuangana.” Ke yeye kulambula mulambu wa kuosha.+

10 Kadi diakamue pakajikijaye kulambula mulambu wa kuosha, Samuele wakafika. Nunku Shaula wakaya bua kusambakena nende ne kumubenesha. 11 Pashishe Samuele wakakonka ne: “Tshiudi muenze ntshinyi?” Shaula wakandamuna ne: “Mvua mumone ne: bantu bakavua bumbuka kundi,+ ne wewe kuvua mulue pa dîba dikosa to, ne bena Peleshete bavua benda badisangisha pamue ku Mikemasha.+ 12 Ke meme kudiambila ne: ‘Mpindieu bena Peleshete nebapueke bua kunduisha ku Gilegala, ne tshiena mukebe dianyishibua kudi* Yehowa to.’ Nunku mvua mudimone muenzejibue bua kufila mulambu wa kuosha.”

13 Nunku Samuele wakambila Shaula ne: “Udi muenze bualu bua bupote. Kuena mutumikile dîyi divua Yehowa Nzambi webe mukuambile to.+ Bu wewe muditumikile, Yehowa uvua mua kuenza bua bukalenge buebe bushindame mu Isalele bua kashidi. 14 Kadi mpindieu bukalenge buebe kabuakunenga to.+ Yehowa neakebe muntu udi usankisha muoyo wende,+ ne Yehowa neamuteke mulombodi wa tshisamba tshiende,+ bualu wewe kuvua mutumikile tshivua Yehowa mukutumine dîyi bua kuenza to.”+

15 Pashishe Samuele wakajuka ku Gilegala, kubandaye ku Gibea wa mu Benyamina, ne Shaula wakabala bantu; bantu batshivua nende bavua batue ku 600.+ 16 Shaula, muanende Yonatana, ne bantu batshivuabu nabu bavua basombela mu Geba+ wa mu Benyamina, kadi bena Peleshete bobu bavua base tshitudilu ku Mikemasha.+ 17 Bisumbu bia bapawudi bivua bipatuka mu tshitudilu tshia bena Peleshete mu bisumbu bisatu. Tshisumbu tshimue tshivua tshiyila mu njila wa ku Ofela, too ne ku buloba bua Shuala; 18 tshisumbu tshikuabu tshivua tshiyila njila wa ku Bete-holona;+ ne tshisumbu tshisatu tshivua tshiyila njila udi uya ku mikalu idi ku mutu kua tshibandabanda tshia Seboima, luseke lua tshipela.

19 Tshikondo atshi kakuvua nsenda wa biamu mu buloba buonso bua Isalele to, bualu bena Peleshete bavua bambe ne: “Bua bena Ebelu kabenji muele wa mvita anyi difuma to.” 20 Nunku bena Isalele bonso bavua bapueka kudi bena Peleshete bua kunonesha bikasu, mpiki, tusuyi, anyi miele yabu. 21 Bavua banonesha bikasu, mpiki, nkanya ya mênu asatu, tusuyi, ne bakoleshisha musongolo wa kusaka nawu ngombe ku mushinga wa pima* umue. 22 Nunku dituku dionso dia mvita, kakuvua muele wa mvita anyi difuma mu tshianza tshia muntu nansha umue wa ku bantu bavua ne Shaula ne Yonatana to;+ anu Shaula ne muanende Yonatana ke bavua ne bia mvita.

23 Mpindieu basalayi* ba bena Peleshete bavua baye mu kajila ka mu lupongo lua Mikemasha.+

14 Dituku dikuabu, Yonatana+ muana wa Shaula wakambila muambuluishi uvua umuambuila bia mvita ne: “Luaku tusambuke, tuye kudi basalayi ba bena Peleshete badi balama dia muamua.” Kadi kavua muambile tatuende to. 2 Shaula uvua musombele kumpenga kua Gibea+ muinshi mua mutshi wa grenade mu Migelona, ne uvua ne bantu batue ku 600.+ 3 (Ahiya muana wa Ahituba,+ muanabu ne Ikaboda,+ muana wa Pinehasa,+ muana wa Eli,+ muakuidi wa Yehowa mu Shilo,+ uvua muvuale efoda.)+ Bantu kabavua bamanye ne: Yonatana uvua muye to. 4 Mpindieu pankatshi pa miaba ivua Yonatana ujinga kusambukila bua kuya muaba uvua basalayi ba bena Peleshete pavua mukuna wa dibue musongoloke muenze bu dînu ku luseke lumue ne mukuna mukuabu wa dibue musongoloke muenze bu dînu luseke lukuabu; dîna dia mukuna umue divua Bosese ne dîna dia mukuabu divua Sene. 5 Mukuna wa dibue umue uvua muenze bu dikunji ku nord mutangilangane ne Mikemasha ne mukuabu uvua ku sud mutangilangane ne Geba.+

6 Nunku Yonatana wakambila muntu uvua umuambuila bia mvita ne: “Luaku tusambuke, tuye muaba udi basalayi badi kabayi batengudibue aba.+ Pamuapa Yehowa neatuambuluishe, bualu kakuena tshintu tshidi mua kupangisha Yehowa bua kupandisha bantu nansha ne bantu ba bungi anyi ne bakese.”+ 7 Ke muntu uvua umuambuila bia mvita kumuandamuna ne: “Enza tshionso tshidi muoyo webe ukusaka bua kuenza. Ndaku kuonso kuudi musue, ne meme nenkulonde kuonso kudi muoyo webe ukusaka bua kuya.” 8 Ke Yonatana kumuambila ne: “Netusambuke bua kuya muaba udi bantu abu ne netudileje kudibu. 9 Bobu batuambile ne: ‘Imanayi too ne patudi tulua kunudi!’ netuimane muaba utudi, katuakubanda kudibu to. 10 Kadi bobu batuambile ne: ‘Bandayi tuluangane!’ netubande, bualu Yehowa neabafile mu tshianza tshietu. Etshi netshikale tshimanyinu tshietu.”+

11 Nunku bubidi buabu bakadileja muaba uvua basalayi ba bena Peleshete. Bena Peleshete bakamba ne: “Tangilayi! Bena Ebelu badi benda bapatuka mu bina muvuabu basokome.”+ 12 Nunku basalayi abu bakambila Yonatana ne muntu uvua umuambuila bia mvita ne: “Bandayi kutudi, netunupeshe kalasa!”+ Diakamue Yonatana wakambila muntu uvua umuambuila bia mvita ne: “Ndonda, bualu Yehowa neabafile mu tshianza tshia Isalele.”+ 13 Yonatana wakabanda ne bianza ne makasa, muntu uvua umuambuila bia mvita wenda umulonda mu nyima; nunku bena Peleshete bakabanga kukuluka kumpala kua Yonatana, ne muntu uvua umuambuila bia mvita uvua wenda ubashipa panyima pende. 14 Mu mvita ya kumpala ivua Yonatana ne muntu uvua mumuambuile bia mvita bele, bakashipa bantu batue ku 20 muaba uvua bunene bu bua tshia binayi tshia hektare wa budimi.*

15 Pashishe buôwa buakatangalaka mu tshitudilu tshivua mu mpata ne munkatshi mua basalayi, too ne bisumbu bia bapawudi+ bivua biumvue buôwa bua bungi. Buloba buakatuadija kuzakala, ne buôwa bua kudi Nzambi buakalonda. 16 Bansentedi ba Shaula bavua mu Gibea+ wa Benyamina bakamona ne: kayumbayumba kavua kenda katangalaka nseke yonso.+

17 Shaula wakambila bantu bavua nende ne: “Ndi nnulomba nubale bantu, numone badi bumbuke kutudi.” Pakabalabu bantu, bakamona ne: Yonatana ne muntu uvua umuambuila bia mvita kabavuaku to. 18 Ke Shaula kuambila Ahiya ne:+ “Semeja Mushete wa Nzambi mulelela pabuipi!” (Bualu bena Isalele bavua ne Mushete wa Nzambi mulelela tshikondo atshi.*) 19 Pavua Shaula wenda wakula ne muakuidi, kayumbayumba kavua mu tshitudilu tshia bena Peleshete kavua kenda kakola anu kukola. Nunku Shaula wakambila muakuidi ne: “Lekela tshiudi wenza atshi.”* 20 Nunku Shaula ne bantu bonso bavua nende bakadisangisha, kuyabu mu mvita, bobu kusangana bena Peleshete baluishangana nkayabu ne miele ya mvita, ne kayumbayumba kavua kakole katambe. 21 Kabidi, bena Ebelu bavua ku luseke lua bena Peleshete kumpala ne bavua babande nabu mu tshitudilu bavua badisangisha kudi Isalele uvua ku bulombodi bua Shaula ne Yonatana. 22 Bantu bonso ba mu Isalele bavua basokome+ mu buloba bua mikuna bua Efelayima bakumvua ne: bena Peleshete mbanyeme, ne bobu pabu bakaditua mu dibalonda mu mvita. 23 Nunku Yehowa wakapandisha Isalele dituku adi,+ ne mvita yakaya too ne ku Bete-awena.+

24 Kadi bantu ba mu Isalele bakatata mu lungenyi bikole dituku adi, bualu Shaula uvua mutshipishe bantu wamba ne: “Mulawu ukuate muntu yonso udi udia tshiakudia* kayi tshionso kumpala kua dilolo kukumbana ne too ne pangadisombuela kudi bena lukuna banyi!” Nunku muntu nansha umue kakadia tshintu.+

25 Nunku bantu* bonso bakabuela muitu, ne kuvua buitshi panshi. 26 Pakabuela bantu muitu, bakamona buitshi bumata, kadi kakuvua muntu nansha umue uvua mua kuela tshianza tshiende mukana, bualu bavua batshina mutshipu. 27 Kadi Yonatana kavua mumvue pavua tatuende utshipisha bantu to,+ nunku wakolola dikombo divua mu tshianza tshiende, kutuaye lusongo luadi mu dipula dia buitshi. Pakelaye tshianza mukana, mêsu ende akasanguluka. 28 Ke muntu umue kuamba ne: “Tatuebe mmutshipishe bantu mutshipu mukole wamba ne: ‘Mulawu ukuate muntu udi udia tshiakudia lelu!’+ Ke bualu kayi bantu mbatshioke nunku.” 29 Kadi Yonatana wakamba ne: “Tatu mmukebele buloba lutatu lukole.* Monayi mudi mêsu anyi masanguluke anu bualu ndi mulabule tubuitshi tukese. 30 Bivua mua kuikala bimpe bu bantu badie kakuyi bualu+ lelu bintu bia bena lukuna babu bivuabu bapete! Bualu dîba adi tuvua mua kuikala bashipe kabidi bena Peleshete bikole.”

31 Dituku adi bakatungunuka ne kushipa bena Peleshete kumbukila ku Mikemasha too ne ku Ayalona,+ ne bantu bakapungila bikole. 32 Nunku bantu bakaya lukasa bua kuangata bintu ne lukuka luonso, ne bakangata mikoko ne ngombe ne bana ba ngombe, bobu kuyishipela panshi, bobu kudia munyinyi ne mashi.+ 33 Nunku bakambila Shaula ne: “Tangila! Bantu badi benzela Yehowa mpekatu pa kudia munyinyi ne mashi.”+ Ke yeye kuamba ne: “Nudi bapange lulamatu. Mbungulujilayi dibue dinene muaba eu mpindieu mpindieu.” 34 Ke Shaula kuamba ne: “Tangalakayi mu bantu, nubambile ne: ‘Muntu yonso wa kunudi udi ne bua kulua ne ngombe wende ne mukoko wende ne kuyishipela muaba eu, pashishe kuyidia. Kanuenzedi Yehowa mpekatu pa kudia munyinyi ne mashi to.’”+ Nunku yonso wa kudibu wakalua ne ngombe wende butuku abu, yeye kumushipela muaba au. 35 Nunku Shaula wakashila Yehowa tshioshelu.+ Etshi tshivua tshioshelu tshia kumpala tshivuaye muashile Yehowa.

36 Pashishe Shaula wakamba ne: “Tupuekayi tulonde bena Peleshete butuku butuku ne tubapawule too ne padibu butshia. Katuakushiya muntu nansha umuepele ne muoyo.” Ke basalayi kuambabu ne: “Enza tshionso tshidi tshimpe ku mêsu kuebe.” Pashishe muakuidi wakamba ne: “Tusemene kudi Nzambi mulelela muaba eu.”+ 37 Nunku Shaula wakebeja Nzambi ne: “Mpueke bua kulonda bena Peleshete anyi?+ Wewe neubafile mu tshianza tshia Isalele anyi?” Kadi Nzambi kakamuandamuna dituku adi to. 38 Nunku Shaula wakamba ne: “Nuenu bamfumu bonso ba tshisamba, luayi muaba eu, nukebe mpekatu udibu benze lelu. 39 Bualu bushuwa anu mudi Yehowa ne muoyo, yeye uvua musungile Isalele, nansha biobi bikale ne: mmuananyi Yonatana, udi ne bua kufua.” Kadi muntu nansha umue kakamuandamuna to. 40 Pashishe wakambila Isalele mujima ne: “Nuenu nenuikale luseke lumue, ne meme ne muananyi Yonatana netuikale luseke lukuabu.” Ke bantu kuandamuna Shaula ne: “Enza tshionso tshidi tshimpe ku mêsu kuebe.”

41 Pashishe Shaula wakambila Yehowa ne: “Wewe Nzambi wa Isalele, andamuna ne Tumima!”+ Nunku Tumima wakasungula Yonatana ne Shaula, ne bakalekela bantu bakuabu. 42 Ke Shaula kuamba ne: “Tuelelayi nshobo+ meme ne muananyi Yonatana.” Nshobo yakakuata Yonatana. 43 Nunku Shaula wakakonka Yonatana ne: “Ngambila, tshiudi muenze ntshinyi?” Ke Yonatana kumuandamuna ne: “Mvua mulabule anu tubuitshi tukese tshianana ku lusongo lua dikombo didi mu tshianza tshianyi.+ Mmeme eu! Ndi ngitaba bua kufua!”

44 Ke Shaula kuamba ne: “Nzambi enze nunku ne apitshishe apu wewe kuyi mufue, Yonatana.”+ 45 Kadi bantu bakambila Shaula ne: “Yonatana udi mupeteshe Isalele ditshimuna dinene*+ nunku udi ne bua kufua anyi? Kabiena mua kuenzeka to! Bushuwa, anu bu mudi Yehowa ne muoyo, lusuki lua ku mutu wende nansha lumue kaluakuya panshi to, bualu uvua muenze malu ne Nzambi lelu.”+ Ke bantu kusungilabu* Yonatana, ne yeye kakafua to.

46 Nunku Shaula wakalekela kulonda bena Peleshete, ne bena Peleshete bakaya mu buloba buabu.

47 Shaula wakajadika bukalenge buende bikole mu Isalele ne wakaluangana ne bena lukuna bende bonso ku nseke yonso, kuluanganaye ne bena Moaba+ ne bena Amona+ ne bena Edome+ ne bakalenge ba Soba+ ne bena Peleshete;+ muaba wonso uvuaye uya, uvua ubatshimuna. 48 Wakaluangana ne bukitu buonso, yeye kutshimuna bena Amaleka+ ne kusungila Isalele mu tshianza tshia bantu bavua babapawula.

49 Bana ba balume ba Shaula bavua: Yonatana, Yishewi ne Maleki-shua.+ Uvua ne bana ba bakaji babidi; dîna dia mukulumpe divua Melaba,+ ne dîna dia muakunyi divua Mikala.+ 50 Dîna dia mukaji wa Shaula divua Ahinoama muana wa Ahimasa. Dîna dia mfumu wa tshiluilu tshiende divua Abinê+ muana wa Nê, tatuende mukuabu wa Shaula. 51 Kishi+ uvua tatuende wa Shaula, ne Nê+ tatuende wa Abinê uvua muana wa Abiele.

52 Kuvua mvita mikole pankatshi pa bena Peleshete ne Shaula matuku ende onso.+ Pavua Shaula umona muntu mulume wa bukole anyi wa dikima, uvua umuangata ku busalayi.+

15 Pashishe Samuele wakambila Shaula ne: “Yehowa uvua muntume bua kukuela manyi bu mukalenge wa tshisamba tshiende tshia Isalele;+ mpindieu teleja tshidi Yehowa wamba.+ 2 Yehowa wa biluilu udi wamba ne: ‘Nendumbuluishe bena Amaleka bua tshivuabu benzele bena Isalele pavuabu babaluishe mu njila dîba divuabu bafumina mu Ejipitu.+ 3 Mpindieu ndaku, ushipe bena Amaleka,+ ubabutule bobu ne bionso bidibu nabi.+ Kuena ne bua kubashiya ne muoyo* to; udi ne bua kubashipa,+ bantu balume ne bantu bakaji, bana too ne bana ba mu maboko, ngombe ne mikoko, tumelu ne mpunda.’”+ 4 Shaula wakabikidisha bantu, kubabadilaye mu Telaima: Kuvua basalayi bavua benda ku makasa binunu 200 ne bantu balume ba mu Yuda binunu 10.+

5 Shaula wakasemena too ne ku tshimenga tshia Amaleka, kualaminaye pabuipi ne tshibandabanda.* 6 Ke Shaula kuambila bena Kene ne:+ “Ndayi, umbukayi munkatshi mua bena Amaleka bua tshinujimiji pamue nabu.+ Bualu nuenu nuvua baleje tshisamba tshijima tshia Isalele dinanga dia lulamatu+ pavuabu bapatuke mu Ejipitu.” Nunku bena Kene bakumbuka munkatshi mua Amaleka. 7 Pashishe Shaula wakashipa bena Amaleka+ kumbukila ku Hawila+ too ne ku Shû,+ udi ku luseke lua Ejipitu. 8 Wakakuata Agaga+ mukalenge wa Amaleka ne muoyo, kadi wakashipa bantu bakuabu bonso ne muele wa mvita.+ 9 Kadi Shaula ne bantu bende bakashiya Agaga ne muoyo* pamue ne mikoko, ngombe, nyama ya manyi, bimpanga bia mikoko bia bimpe menemene ne bintu bionso bivua bimpe.+ Kabavua basue kubibutula biobi to. Kadi bakabutula bintu bionso bivua kabiyi ne mushinga ne bivuabu kabayi basue.

10 Pashishe dîyi dia Yehowa diakalua kudi Samuele ne: 11 “Ndi nyingalala* bua mundi muteke Shaula mukalenge, bualu mmubenge kundonda ne ki mmukumbaje mêyi anyi to.”+ Bualu ebu buakatonda Samuele bikole, kudidilaye Yehowa butuku bujima.+ 12 Pavua Samuele mujuke mu dinda menemene bua kuya kumonangana ne Shaula, bakambila Samuele ne: “Shaula uvua muye ku Kâmele,+ ne mmudimanyikile dikunji kuntu aku.+ Pashishe wakakudimuka, kupuekaye ku Gilegala.” 13 Ndekelu wa bionso pakafika Samuele kudi Shaula, Shaula wakamuambila ne: “Yehowa akubeneshe. Ndi mukumbaje dîyi dia Yehowa.” 14 Kadi Samuele wakebeja ne: “Kadi muadi wa mikoko udi mu matshi anyi ne muadi wa ngombe undi ngumvua bidi bishi?”+ 15 Ke Shaula kuamba ne: “Mbafume nabi kudi bena Amaleka, bualu bantu bavua bashiye mikoko ne ngombe ya mimpe menemene ne muoyo* bua kubilambula Yehowa Nzambi webe; kadi tudi babutule bionso bivua bishale.” 16 Nunku Samuele wakambila Shaula ne: “Imana! Lekela nkuambile tshivua Yehowa mungambile butuku bua kutshia lelu.”+ Ke yeye kuamba ne: “Akula!”

17 Samuele wakamba kabidi ne: “Kuvua udimona muntu uvua kayi ne mushinga+ pavuabu bakuteke mfumu wa bisa bia Isalele ne pavua Yehowa mukuele manyi bua wikale mukalenge wa Isalele anyi?+ 18 Pashishe Yehowa wakakutuma, yeye kuamba ne: ‘Ndaku, ushipe bena Amaleka benji ba bubi abu.+ Ubaluishe too ne paudi ubajikija bonso.’+ 19 Nunku bua tshinyi kuvua mutumikile dîyi dia Yehowa? Kadi uvua muye lukasa ne lukuka luonso bua kuangata bintu binuvua banyenge,+ wewe kuenza bualu bubi ku mêsu kua Yehowa!”

20 Kadi Shaula wakambila Samuele ne: “Tòo, meme ndi mutumikile dîyi dia Yehowa! Mvua muye kuvua Yehowa muntume, meme kupingana ne Agaga mukalenge wa Amaleka, ne kushipa bena Amaleka.+ 21 Kadi bantu bavua bangate mikoko ne ngombe mu bintu bituvua banyenge, bintu bitambe buimpe bivua ne bua kubutudibua, bua kubilambula Yehowa Nzambi webe ku Gilegala.”+

22 Ke Samuele kuamba ne: “Yehowa udi usanka bua milambu ya kuosha ne bua milambu mikuabu+ kupita mudiye usanka bua kutumikila dîyi dia Yehowa anyi? Tangila! Kutumikila nkupite mulambu,+ ne kuteya ntema nkupite mafuta+ a bimpanga bia mikoko; 23 bualu buntomboji+ budi muomumue ne mpekatu wa kubukisha,+ ne kuenza malu ne dikamakama kudi muomumue ne kuenza majimbu ne kukukuila mpingu.* Bu muudi mubenge dîyi dia Yehowa,+ yeye pende mmukubenge bua kuikadi kabidi mukalenge to.”+

24 Ke Shaula kuambila Samuele ne: “Ndi muenze mpekatu bualu tshiena mutumikile dîyi dituma dia Yehowa ne mêyi ebe, bualu mvua mutshine bantu ne muteleje tshivuabu bambe. 25 Mpindieu, mbuikidila koku mpekatu wanyi, tupingane nebe bua nginamine Yehowa.”+ 26 Kadi Samuele wakambila Shaula ne: “Tshiakupingana nebe to, bualu udi mubenge dîyi dia Yehowa, ne Yehowa mmukubenge bua kutungunuki ne kuikala mukalenge wa Isalele.”+ 27 Pakavua Samuele ukudimuka bua kuya, Shaula wakamukuata ku luzembe lua muzabi wa kawuyi maboko, luolu kutuka. 28 Ke Samuele kumuambila ne: “Yehowa mmukutule bukalenge bua Isalele lelu, ne neabupeshe muinebe udi mukupite.+ 29 Kabidi, Nzambi Munene wa Isalele+ kakushima+ anyi kakushintulula lungenyi luende* to, bualu Yeye kena bu muntu wetu eu bua ashintulule lungenyi luende* to.”+

30 Ke yeye kuamba ne: “Ndi muenze mpekatu. Kadi ntua koku mushinga kumpala kua bakulu ba tshisamba tshianyi ne kumpala kua Isalele. Tupingane nebe ne nenginamine Yehowa Nzambi webe.”+ 31 Nunku Samuele wakapingana ne Shaula, Shaula kuinaminaye Yehowa. 32 Samuele wakamba ne: “Luayi ne Agaga mukalenge wa Amaleka kundi.” Nunku Agaga wakaya kudiye wenda ukoka makasa panshi,* bualu Agaga uvua udiambila ne: ‘Bushuwa mukanu wa* lufu mmumane kupita.’ 33 Kadi Samuele wakamba ne: “Anu bu mudi muele webe wa mvita mushiye bamamu kabayi bana, nunku mamuebe neashale kayi muana nansha umue munkatshi mua bakaji nende.” Ke Samuele kukosolola Agaga bitupa bitupa kumpala kua Yehowa ku Gilegala.+

34 Pashishe Samuele wakaya ku Lama, ne Shaula wakaya ku nzubu kuende ku Gibea wa Shaula. 35 Samuele kakamona kabidi Shaula too ne dituku dia lufu luende, bualu Samuele wakabuela mu madilu bua Shaula.+ Yehowa wakanyingalala bua muvuaye muteke Shaula mukalenge wa Isalele.+

16 Ndekelu wa bionso Yehowa wakambila Samuele ne: “Neudile Shaula+ too ne dîba kayi mpindieu undi mumubenge bua kikadi mukalenge wa Isalele?+ Uwuja manyi mu lusengu luebe+ ne ndaku. Nenkutume kudi Yishai+ muena Beteleheme, bualu ndi mudisunguile mukalenge munkatshi mua bana bende.”+ 2 Kadi Samuele wakamba ne: “Nenye mushindu kayi? Shaula yeye mumvue bualu ebu neanshipe.”+ Yehowa wakandamuna ne: “Ndaku ne lukungulu lua ngombe, wambe ne: ‘Ndi mulue bua kulambula Yehowa.’ 3 Ubikile Yishai ku mulambu au; pashishe nenkuambile tshiudi ne bua kuenza. Udi ne bua kungelela muntu undi nkuleja manyi.”+

4 Samuele wakenza tshivua Yehowa muambe. Pakafikaye ku Beteleheme,+ bakulu ba mu tshimenga bavua bazakala pavuabu bapetangane nende, bobu kuamba ne: “Udi mulue ne ditalala anyi?” 5 Ke yeye kuamba ne: “Ndi mulue ne ditalala. Ndi mulue bua kulambula Yehowa. Dijidilayi, nuye nanyi ku mulambu.” Nunku wakajidila Yishai ne bana bende ba balume, pashishe wakababikidisha ku mulambu. 6 Pakafikabu ne pakamonaye Eliaba,+ wakamba ne: “Bushuwa, muela manyi wa Yehowa mmuimane kumpala kuende muaba eu.” 7 Kadi Yehowa wakambila Samuele ne: “Kutangidi tshimuenekelu tshiende ne bule buende to,+ bualu ndi mumubenge. Bualu mushindu udi muntu umona ki ngudi Nzambi umona to, bualu muntu wetu eu udi umona tshidi tshimueneka ku mêsu, kadi Yehowa yeye udi umona mu muoyo.”+ 8 Ke Yishai kubikila Abinadaba,+ kumupitshishaye kumpala kua Samuele, kadi yeye wakamba ne: “Yehowa ki mmusungule nansha eu to.” 9 Pashishe Yishai wakamuleja Shama,+ kadi Samuele wakamba ne: “Yehowa ki mmusungule nansha eu to.” 10 Nunku Yishai wakapitshisha bana bende ba balume muanda mutekete kumpala kua Samuele, kadi Samuele wakambila Yishai ne: “Yehowa ki mmusungule nansha umue wa kudibu to.”

11 Ndekelu wa bionso Samuele wakebeja Yishai ne: “Aba ke bana bebe ba balume bonso anyi?” Ke yeye kuandamuna ne: “Muana wa mukala+ mmushale too ne mpindieu; udi ulama mikoko.”+ Nunku Samuele wakambila Yishai ne: “Mubikidisha, bualu netusombe bua kudia anu padiye ulua.” 12 Nunku wakamubikidisha, kuluaye nende kudi Samuele. Kadi yeye uvua ne mubidi mukunzubile, ne mêsu mimpe, ne uvua muimpe kumona.+ Ke Yehowa kuamba ne: “Juka, umuele manyi, bualu ke yeye eu!”+ 13 Nunku Samuele wakangata lusengu lua manyi,+ kumuelaye manyi kumpala kua bana babu. Kutuadijila anu dituku adi, nyuma wa Yehowa wakatuadija kupesha Davidi bukole.+ Pashishe Samuele wakajuka, kuyaye ku Lama.+

14 Mpindieu nyuma wa Yehowa ukavua mumbuke kudi Shaula,+ ne nyuma mubi wa kudi Yehowa uvua umutshingisha.+ 15 Bena mudimu ba Shaula bakamuambila ne: “Udi mumone ne: nyuma mubi wa kudi Nzambi udi ukutshingisha. 16 Mukalenge wetu atumine koku bena mudimu bebe badi kumpala kuebe dîyi bua bakebe muntu udi mumanye kuimba lunzenze bimpe menemene.+ Nunku dîba dionso didi nyuma mubi wa kudi Nzambi ukuluila, yeye nealuimbe, ne wewe neudiumvue bimpe.” 17 Nunku Shaula wakambila bena mudimu bende ne: “Nkebelayiku muntu udi wimba lunzenze bimpe, nulue nende kundi.”

18 Umue wa ku bena mudimu wakamba ne: “Tangila! Ndi mumone mudi umue wa ku bana ba Yishai muena Beteleheme wimba lunzenze bimpe menemene; udi ne dikima ne ntshilobo tshia mvita.+ Udi wakula bimpe, mmuimpe kumona+ ne Yehowa udi nende.”+ 19 Pashishe Shaula wakatuma bantu ne mukenji kudi Yishai, wamba ne: “Ntumina muanebe Davidi udi ulama mikoko au.”+ 20 Nunku Yishai wakangata mampa ne mulondo wa mvinyo wa tshiseba ne muana wa mbuji, kubitekaye pa mpunda, ne wakabitumina Shaula kudi muanende Davidi. 21 Nunku Davidi wakaya kudi Shaula ne wakatuadija kumuenzela mudimu.+ Shaula wakalua kumunanga bikole menemene, ne yeye wakalua muambudi wa bia mvita biende. 22 Shaula wakatumina Yishai mukenji ne: “Davidi ashalaku muena mudimu wanyi, bualu ndi mumuanyishe.” 23 Dîba dionso divua nyuma mubi wa kudi Nzambi uluila Shaula, Davidi uvua wangata lunzenze, uluimba, nunku Shaula uvua upeta disulakana ne udiumvua bimpe, ne nyuma mubi au uvua umbuka kudiye.+

17 Nunku bena Peleshete+ bakasangisha biluilu* biabu bua kuluangana. Bakadisangisha ku Soko+ wa mu Yuda, bobu kuasa tshitudilu pankatshi pa Soko ne Azeka,+ mu Efese-damima.+ 2 Shaula ne bantu ba mu Isalele bakadisangisha, kuasabu tshitudilu mu Tshibandabanda* tshia Elaha,+ bobu kuela mualu wa mvita bua kuluangana ne bena Peleshete. 3 Bena Peleshete bavua pa mukuna luseke lumue, ne bena Isalele bavua pabu pa mukuna luseke lukuabu, tshibandabanda tshikale pankatshi pabu.

4 Pashishe tshilobo kampanda tshiakapatuka mu bitudilu bia bena Peleshete; dîna diatshi divua Goleyata,+ uvua wa mu Gata,+ ne uvua ne bule bua nkubita isambombo kusangisha ne bule bua ntanta wa tshianza tshibalula.* 5 Uvua ne tshifulu tshia tshiamu tshia mitaku ku mutu, ne uvua muvuale kazaku ka mvita ka tuamu kikale ne tuamu tupayakaja. Bujitu bua kazaku ka mvita ka tshiamu tshia mitaku aku+ buvua bua nshekele 5 000.* 6 Uvua ne bitata bia tshiamu tshia mitaku bua kulama mikolo ne difuma dikese+ dia tshiamu tshia mitaku diasa pankatshi pa makaya. 7 Mutshi wa difuma diende uvua bu mutshi wa ku tshiamu tshia muluki wa bilamba,+ ne mutu wa tshiamu wa difuma diende uvua ne bujitu bua nshekele 600;* muntu uvua umuambuila ngabu uvua wenda kumpala kuende. 8 Nunku wakimana, kuelaye basalayi bena Isalele dîyi,+ kubambilaye ne: “Bua tshinyi nudi bapatuke bua kuela mualu wa mvita? Meme tshiena Muena Peleshete, ne nuenu kanuena bena mudimu ba Shaula anyi? Disunguilayi muntu, apueke kundi. 9 Yeye mukokeshe bua kuluangana nanyi ne munshipe, dîba adi netulue bena mudimu benu. Kadi meme mumutshimune ne mumushipe, nenulue bena mudimu betu ne nenutuenzele mudimu.” 10 Pashishe muena Peleshete au wakamba ne: “Ndi mbunda* basalayi bena Isalele+ lelu. Mpeshayi muntu, tuluangane nende!”

11 Pakumvua Shaula ne bena Isalele bonso mêyi a muena Peleshete aa, bakumvua buôwa bua bungi, kutshinabu bikole.

12 Mpindieu Davidi uvua muana wa muena Efelata+ wa mu Beteleheme+ wa Yuda diende Yishai.+ Yishai eu uvua ne bana ba balume muanda mukulu,+ ne ukavua muntu mununu mu matuku a Shaula. 13 Bana ba balume ba Yishai basatu ba bakulumpe bavua balonde Shaula ku mvita.+ Mêna a bana bende basatu bavua baye ku mvita abu avua: Eliaba+ muanabute, Abinadaba+ muanende muibidi, ne Shama+ muana muisatu. 14 Davidi uvua muana wa mukala,+ ne basatu ba bakulumpe bavua balonde Shaula.

15 Davidi uvua uya kudi Shaula, utua upingana bua kulama mikoko+ ya tatuende ku Beteleheme. 16 Pine apu, muena Peleshete au uvua ulua wimana dinda dionso ne dilolo dionso, wenza nanku munkatshi mua matuku 40.

17 Pashishe Yishai wakambila muanende Davidi ne: “Angata koku efa* wa ntete mikanga eu ne mampa dikumi aa, uye nabi lukasa lukasa kudi bana benu mu tshitudilu. 18 Angata kabidi bipese dikumi bia fromaje* ebi, ubituadile mfumu wa bantu tshinunu; ukebe mua kumanya kabidi mudi bana benu, ne untuadile tshimanyinu tshia ne: badi bimpe.” 19 Bavua ne Shaula ne bantu bakuabu bonso ba mu Isalele mu Tshibandabanda* tshia Elaha+ bua kuluangana ne bena Peleshete.+

20 Nunku Davidi wakajuka mu dinda menemene, kushilaye muntu mukuabu mikoko; pashishe wakasuika bintu biende, kuyaye anu muvua Yishai mumutumine dîyi bua kuenza. Pakafikaye ku tshitudilu, bena mu tshiluilu bavua bapatuka, baya muaba wa mvita, benda bela mbila ya mvita. 21 Bena Isalele ne bena Peleshete bakimana mu mushindu wa ne: basalayi ba luseke lumue bikale batangilangane ne basalayi ba luseke lukuabu. 22 Diakamue Davidi wakashiya mabuki ende kudi mulami wa mabuki, kuyaye lubilu muaba wa mvita. Pakafikaye, wakatuadija kuebeja bua kumanya muvua bana babu.+

23 Pavuaye wakula nabu apu, tshilobo atshi tshiakalua, dîna diatshi Goleyata,+ muena Peleshete wa mu Gata. Wakafumina muaba wa mvita wa bena Peleshete, yeye kuakula mêyi a muomumue ne a kumpala,+ Davidi mumuteleje. 24 Pakamona bantu bonso ba Isalele muntu au, bakamunyema ne buôwa bua bungi.+ 25 Bantu ba mu Isalele bavua bamba ne: “Nudi bamone muntu udi wenda ulua au anyi? Udi ulua bua kubunda* Isalele.+ Mukalenge neapeshe muntu wamushipa bubanji bua bungi, neamupeshe muanende wa bakaji,+ ne neenze bua nzubu wa tatuende ikale ne budikadidi ku majitu onso adi bena Isalele nawu.”

26 Davidi wakabanga kuambila bantu bavua bimane pabuipi nende ne: “Ntshinyi tshienzelabu muntu udi ushipa muena Peleshete wawa ne udi umbushila bena Isalele tshipendu? Bualu muena Peleshete udi kayi mutengula eu nganyi bua kubundaye* basalayi ba Nzambi wa muoyo?”+ 27 Pashishe bantu bakamuambila mêyi a muomumue ne a kumpala, bamba ne: “Etshi ke tshienzelabu muntu wamushipa.” 28 Pavua Eliaba+ tutuende wa Davidi mumumvue wakula ne bantu, wakamufiikila munda, kuambaye ne: “Bua tshinyi udi mupueke kuneku? Udi mushiye mikoko mikese ayi ne nganyi mu tshipela?+ Ndi mumanye bimpe dikamakama diebe ne meji mabi a mu muoyo webe; udi mulue anu bua kumona mvita.” 29 Ke Davidi kuamba ne: “Mpindieu ndi muenze tshinyi? Meme mvua ngela anu lukonko tshianana!” 30 Nunku wakumbuka kudiye, kuyaye kudi muntu mukuabu, yeye kumuebeja bualu bua muomumue anu bu kumpala,+ ne bantu kumuandamunabu anu bu kumpala.+

31 Bantu bakuabu bakumvua mêyi avua Davidi muakule, bobu kuambila Shaula. Nunku wakamubikidisha. 32 Davidi wakambila Shaula ne: “Muntu nansha umue kateketshi ku muoyo* bua bualu buende to. Muena mudimu webe neaye ne nealuangane ne muena Peleshete eu.”+ 33 Kadi Shaula wakambila Davidi ne: “Wewe kuena ukumbana bua kuluangana ne muena Peleshete eu to, bualu utshidi anu muana,+ ne yeye mmusalayi* katshia ku bunsonga buende.” 34 Ke Davidi kuambila Shaula ne: “Muena mudimu webe uvua ulama mikoko ya tatuende, ne ntambue+ wakalua, kukuataye mukoko kuyaye nawu. Pashishe nyama wa urse kulua pende, kuenzaye bia muomumue. 35 Ngakayilonda, meme kuyikuma ne kusungila mikoko mukana muayi. Pakantukilayi bua kunduisha, ngakayikuata ku buoya buayi,* meme kuyikuma, kuyishipa. 36 Muena mudimu webe wakashipa nyama wa ntambue ne wa urse, ne muena Peleshete udi kayi mutengula eu nealue anu bu umue wa ku nyama eyi, bualu mmubunde* basalayi ba Nzambi wa muoyo.”+ 37 Pashishe Davidi wakamba kabidi ne: “Yehowa uvua munsungile ku nzadi ya ntambue ne ya urse ke wansungila mu tshianza tshia muena Peleshete eu.”+ Ke Shaula kuambila Davidi ne: “Ndaku; Yehowa ikale nebe.”

38 Nunku Shaula wakavuadika Davidi bilamba biende bia mvita. Yeye kumuasa tshifulu tshia tshiamu tshia mitaku ku mutu, pashishe kumuvuadikaye kazaku ka mvita ka tuamu. 39 Pashishe Davidi wakasa muele wende wa mvita ku bilamba biende, yeye kuteta bua kuya, kadi kakakumbana to, bualu kavua mubibidile to. Davidi wakambila Shaula ne: “Tshiena nkumbana bua kuya muvuale bintu ebi to, bualu tshiena mubibidile to.” Nunku Davidi wakabikopola. 40 Pashishe wakangata dikombo mu tshianza tshiende, kusungulaye mabue atanu mafinunuke muaba uvua kasulu,* kuelaye mu mpaya wa tshibuta tshiende tshia balami ba mikoko, muikale ne ndundu wa kukupa nende mabue+ mu tshianza. Pashishe wakabanga kusemena kudi muena Peleshete.

41 Muena Peleshete uvua wenda anu usemena kudi Davidi, ne muntu uvua umuambuila ngabu uvua kumpala kuende. 42 Pavua muena Peleshete au mutangile ne mumone Davidi, wakamubedia ne kapeja bualu yeye uvua anu ne tshimuenekelu tshia buana ne uvua muimpe kumona.+ 43 Ke muena Peleshete kuambila Davidi ne: “Meme ndi mbua,+ bua wewe kulua kundi ne mitshi anyi?” Nunku muena Peleshete au wakatshipa Davidi mu dîna dia nzambi yende. 44 Muena Peleshete wakambila Davidi ne: “Luaku kundi, ne meme nempeshe nyunyi ya muulu ne nyama ya mu mpata mubidi webe.”

45 Davidi wakandamuna muena Peleshete ne: “Wewe udi ulua kundi ne muele wa mvita ne difuma ne difuma dikese,+ kadi meme ndi ndua kuudi mu dîna dia Yehowa wa biluilu,+ Nzambi wa basalayi bena Isalele, uudi mubunde.*+ 46 Dituku dia lelu edi Yehowa neakufile mu tshianza tshianyi,+ nenkushipe ne nenkukose mutu; dituku dia lelu edi nempeshe nyunyi ya muulu ne nyama ya tshisuku ya pa buloba bitalu bia mu tshitudilu tshia bena Peleshete; bantu ba pa buloba bujima nebamanye ne: kudi Nzambi mu Isalele.+ 47 Bantu bonso badi badisangishe muaba eu nebamanye* ne: Yehowa katu upandisha bantu ne muele wa mvita anyi ne difuma to,+ bualu mvita nya Yehowa,+ ne neanufile nuenu bonso mu tshianza tshietu.”+

48 Nunku muena Peleshete wakajuka, kuyaye wenda usemena ne dishindika bua kusambakena ne Davidi, ne Davidi pende wakaya lubilu muaba wa mvita bua kusambakena ne muena Peleshete. 49 Davidi wakela tshianza mu tshibuta tshiende, kuambulamu dibue, kudikupa. Wakadiasa muena Peleshete mu mpala, dibue kumubueladi mu mpala, yeye kukuluka mutue mpala panshi.+ 50 Nunku Davidi wakatshimuna muena Peleshete ne ndundu wa kukupa nende mabue ne dibue; wakakuma muena Peleshete, yeye kumushipa, nansha muvua Davidi kayi ne muele wa mvita mu tshianza tshiende.+ 51 Davidi wakatungunuka ne kunyema, kuimanaye ku luseke luende. Pashishe wakakuata muele wa mvita wa muena Peleshete,+ yeye kuwupatula mu tshizubu, kumukosaye nawu mutu bua kujadika ne: mmufue. Pavua bena Peleshete bamone ne: tshilobo tshiabu tshivua tshifue, bakanyema.+

52 Ke bantu ba mu Isalele ne ba mu Yuda kujukabu, kuelabu mbila, kulondabu bena Peleshete kumbukila mu tshibandabanda+ too ne ku biibi bia Ekelona,+ ne bena Peleshete bavuabu bashipa bavua bakuluka mu njila kumbukila ku Shâlayima+ too ne ku Gata ne ku Ekelona. 53 Pakafuma bena Isalele ku dipata bena Peleshete ne muoyo mujima, bakapawula bitudilu biabu.

54 Pashishe Davidi wakangata mutu wa muena Peleshete, kuyaye nawu mu Yelushalema, kadi wakateka bia mvita bia muena Peleshete au mu ntenta wende.+

55 Dîba divua Shaula mumone Davidi uya bua kusambakena ne muena Peleshete, wakebeja Abinê,+ mfumu wa tshiluilu ne: “Abinê, nsongalume eu mmuana wa nganyi?”+ Abinê kuandamuna ne: “Mukalenge, bulelela, bu muudi wewe ne muoyo,* tshiena mumanye to!” 56 Mukalenge wakamba ne: “Keba bua kumanya ne: nsongalume eu mmuana wa nganyi.” 57 Nunku diakamue pakafuma Davidi ku dishipa muena Peleshete, Abinê wakamuangata, kuyaye nende kumpala kua Shaula ne mutu wa muena Peleshete+ mu tshianza tshiende. 58 Ke Shaula kumuebeja ne: “Nsongalume, wewe udi muana wa nganyi?” Davidi kuandamuna ne: “Ndi muana wa muena mudimu webe Yishai+ muena Beteleheme.”+

18 Diakamue pavua Davidi mujikije kuakula ne Shaula, Yonatana+ ne Davidi bakalamatangana, bobu kudia bulunda bukole,* ne Yonatana wakatuadija kumunanga anu bu muvuaye mudinange yeye muine.*+ 2 Kubangila anu ku dituku adi, Shaula wakalama Davidi, kakamuanyishila bua kupingana ku nzubu wa tatuende to.+ 3 Yonatana ne Davidi bakadia tshipungidi+ bualu uvua mumunange anu bu muvuaye mudinange yeye muine.*+ 4 Yonatana wakavula muzabi wa kawuyi maboko uvuaye muvuale, kuwupeshaye Davidi, pamue ne tshilamba tshiende tshia mvita, muele wende wa mvita, buta buende bua mikete ne mukaba wende. 5 Davidi wakatuadija kupatuka, ne miaba yonso ivua Shaula umutuma, malu ende avua enda bimpe.*+ Nunku Shaula wakamuteka bua kutangila baluanganyi ba mvita,+ ne bualu ebu buakasankisha bantu bonso ne bena mudimu ba Shaula.

6 Pavua Davidi ne bantu bakuabu bapingana bafuma ku dishipa bena Peleshete, bantu bakaji bavua bapatuka mu bimenga bionso bia Isalele ne misambu+ ne maja bua kusambakena ne mukalenge Shaula, ne ngoma,+ ne bindanda, benda basanka. 7 Bantu bakaji bavua basanka abu bavua bimba bamba ne:

8 Shaula wakafiika munda bikole,+ ne musambu eu kawakamusankisha to, bualu wakamba ne: “Mbapeshe Davidi makumi a binunu, kadi mbampeshe meme anu binunu tshianana. Tshidi tshishale bua kumupesha tshidi anu bukalenge!”+ 9 Kubangila ku dituku adi, Shaula ukavua umona Davidi anu bu ne: uvua ne lungenyi lua kumuenzela bibi.

10 Dituku diakalonda, nyuma mubi wa kudi Nzambi wakakuata Shaula,+ ne Shaula wakatuadija kuenza malu mu nzubu mu mushindu uvua kawuyi umvuika* pavua Davidi wenda wimba lunzenze+ anu bu misangu mikuabu. Shaula uvua ne difuma mu tshianza tshiende,+ 11 ne wakakupa Davidi difuma+ misangu ibidi udiambila ne: ‘Ndi ndamatshisha Davidi ku tshimanu!’ Kadi Davidi wakadiepela. 12 Nunku Shaula ukavua utshina Davidi bualu Yehowa uvua nende,+ kadi ukavua mulekele Shaula.+ 13 Ke Shaula kumumbusha kumpala kuende, kumutekaye bua ikale mfumu wa bantu tshinunu, ne Davidi uvua ulombola tshiluilu mu mvita.*+ 14 Malu onso avua Davidi wenza avua anu enda bimpe,*+ ne Yehowa uvua nende.+ 15 Pavua Shaula mumone ne: malu ende avua enda bimpe menemene, wakatuadija kumutshina. 16 Kadi Isalele mujima ne Yuda bavua banange Davidi bualu uvua ubalombola pavuabu baya mu mvita.

17 Pashishe Shaula wakambila Davidi ne: “Melaba+ muananyi wa bakaji mukulumpe nyeye eu. Nenkupeshaye bua ikale mukajebe.+ Kadi udi ne bua kutungunuka ne kundeja dikima diebe ne kuluangana mvita ya Yehowa.”+ Bualu Shaula uvua udiambila ne: ‘Tshianza tshianyi katshimulengi to. Tshianza tshia bena Peleshete tshimushipe.’+ 18 Ke Davidi kuambila Shaula ne: “Meme ne balela banyi, dîku dia tatuanyi mu Isalele, tudi banganyi bua meme kulua muku wa mukalenge?”+ 19 Kadi pavua tshikondo tshikumbane tshia kupesha Davidi Melaba muana wa Shaula, bakavua bamuseleshe, mulue mukaji wa Adaliele+ muena Mehola.

20 Mpindieu Mikala+ muana wa Shaula uvua munange Davidi, ne bakambila Shaula bualu ebu, buobu kumusankisha. 21 Ke Shaula kuamba ne: “Nemmupeshaye bua ikale buteyi kudiye, bua tshianza tshia bena Peleshete tshilue kudiye.”+ Nunku Shaula wakambila Davidi musangu muibidi ne: “Neudie nanyi tshipungidi tshia dibaka* lelu.” 22 Shaula wakatumina kabidi bena mudimu bende dîyi ne: “Akulayi ne Davidi mu musokoko, nuambe ne: ‘Tangila! Udi usankisha mukalenge, ne bena mudimu bende bonso mbakunange bikole. Nunku diaku tshipungidi tshia dibaka ne mukalenge.’” 23 Pavua bena mudimu ba Shaula bambile Davidi malu aa, Davidi wakamba ne: “Buenu nuenu mbualu bukese bua kudia tshipungidi tshia dibaka ne mukalenge pandi meme muikale mupele ne muntu udibu kabayi bangata ne mushinga wa bungi anyi?”+ 24 Nunku bena mudimu ba Shaula bakalua kumuambila ne: “Ke mêyi adi Davidi muambe aa.”

25 Ke Shaula kuamba ne: “Nuambile Davidi nunku: ‘Mukalenge kena dijinga ne biuma to,+ anu misoso lukama+ ya bena Peleshete, bua kudisombuela kudi bena lukuna ba mukalenge.’” Bualu Shaula uvua uluka mayele bua Davidi apone ku tshianza tshia bena Peleshete. 26 Nunku bena mudimu bende bakalua kuambila Davidi mêyi aa, ne biakasankisha Davidi bua kudia tshipungidi tshia dibaka ne mukalenge.+ Kumpala kua dîba divuabu bakose kukumbana, 27 Davidi wakaya ne bantu bende, bobu kushipa bena Peleshete 200, ne Davidi kutuadilaye mukalenge misoso yabu yonso ayi bua kudia tshipungidi tshia dibaka ne mukalenge. Nunku Shaula wakamupesha muanende Mikala bua ikale mukajende.+ 28 Shaula wakajingulula ne: Yehowa uvua ne Davidi,+ ne muanende Mikala uvua mumunange.+ 29 Bualu ebu buakenza bua Shaula ikale utshina kabidi Davidi bikole, ne Shaula wakalua muena lukuna wa Davidi matuku ende onso a muoyo.+

30 Bakokeshi ba bena Peleshete bavua bapatuka bua kuluangana, kadi misangu yonso ivuabu bapatuka, Davidi uvua ukumbaja malu ende bimpe* kupita bena mudimu bonso ba Shaula;+ ne bantu bakatuadija kunemeka dîna diende bikole.+

19 Pashishe Shaula wakambila muanende Yonatana ne bena mudimu bende bonso bua kushipa Davidi.+ 2 Bu muvua Yonatana muana wa Shaula munange Davidi bikole,+ Yonatana wakambila Davidi ne: “Tatuanyi Shaula mmusue kukushipesha. Ndi nkulomba bua udimuke mu dinda, uye muaba musokome, ushale musokome. 3 Nempatuke ne nengimane ku luseke lua tatu mu mpata muwikala. Nengambile tatu bualu buebe, ne meme mumvue bualu, tshiakupanga kukuambilabu to.”+

4 Nunku Yonatana wakakuila Davidi+ kudi tatuende Shaula. Wakamuambila ne: “Mukalenge kena ne bua kuenzela muena mudimu wende Davidi bualu bubi to, bualu yeye ki mmukuenzele bualu bubi ne malu adiye mukuenzele mmakuambuluishe. 5 Uvua muteke muoyo wende mu njiwu* bua kushipa muena Peleshete,+ nunku Yehowa kupeshaye Isalele mujima ditshimuna dinene.* Wewe uvua mumone bualu abu ne uvua musanke bikole. Mpindieu bua tshinyi udi ne bua kuenzela mashi adi kaayi ne bualu bibi pa kushipa Davidi kakuyi bualu?”+ 6 Shaula wakateleja Yonatana, ne Shaula wakaditshipa ne: “Bushuwa anu bu mudi Yehowa ne muoyo, kakushipibua to.” 7 Pashishe Yonatana wakabikila Davidi ne wakamuambila malu aa onso. Nunku Yonatana wakaya ne Davidi kudi Shaula, yeye kutungunuka ne kumuenzela mudimu anu bu kumpala.+

8 Pakapita matuku mvita yakakutuka kabidi, ne Davidi wakapatuka, kuluanganaye ne bena Peleshete, kubashipaye dishipa dia dikema, bobu kunyema kumpala kuende.

9 Nyuma mubi wa kudi Yehowa wakakuata Shaula+ pavuaye musombe mu nzubu muende ne difuma mu tshianza, pavua eku Davidi wenda wimba lunzenze.+ 10 Shaula wakajinga kulamatshisha Davidi ku tshimanu ne difuma, kadi Davidi wakanyema Shaula, Shaula kubueja difuma mu tshimanu. Davidi wakanyema, yeye kudisungila butuku abu. 11 Pashishe Shaula wakatuma bantu ku nzubu kua Davidi bua kumutentekela ne kumushipa mu dinda,+ kadi Mikala mukaji wa Davidi wakamuambila ne: “Wewe kuyi munyeme* butuku ebu, badi bakushipa malaba.” 12 Diakamue Mikala wakapuekeshila Davidi ku dididishi, bua anyeme ne adisungile. 13 Mikala wakangata lupingu lua telafima,* kulutekaye pa bulalu, ne wakateka bukondo bua miosa ya mbuji muaba uvuaye utekela mutu, yeye kulubuikila tshilamba.

14 Mpindieu Shaula wakatuma bantu bua kukuata Davidi, kadi Mikala wakamba ne: “Udi usama.” 15 Nunku Shaula wakatuma bantu bua kutangila Davidi ne wakabambila ne: “Muntuadilayi pa bulalu bua bamushipe.”+ 16 Pakabuela bantu abu, bakamona lupingu lua telafima* pa bulalu ne bukondo bua miosa ya mbuji muaba uvua mutu wende ne bua kuikala. 17 Shaula wakambila Mikala ne: “Bua tshinyi udi munshime nunku ne mulekele muena lukuna wanyi+ uya bua adisungile?” Mikala wakandamuna Shaula ne: “Uvua mungambile ne: ‘Ndekela nye, tshianana ndi nkushipa!’”

18 Mpindieu Davidi uvua munyeme, yeye kudisungila, kuyaye kudi Samuele ku Lama.+ Wakamuambila malu onso avua Shaula mumuenzele. Pashishe yeye ne Samuele bakumbuka, kuyabu kusombela mu Nayota.+ 19 Pashishe bakalua kuambila Shaula ne: “Tangila! Davidi udi mu Nayota mu Lama.” 20 Diakamue Shaula wakatuma bantu bua bakuate Davidi. Pakamonabu baprofete ba bakulumpe bamba mêyi a buprofete ne Samuele muimane ubalombola, nyuma wa Nzambi wakatulukila bantu bavua Shaula mutume, ne bakatuadija pabu kuenza malu bu baprofete.

21 Pakambilabu Shaula bualu ebu, wakatuma diakamue bantu bakuabu, ne bobu pabu bakatuadija kuenza malu bu baprofete. Nunku Shaula wakatuma kabidi bantu bakuabu, tshisumbu tshisatu, bobu pabu bakatuadija kuenza malu bu baprofete. 22 Ndekelu wa bionso wakaya pende ku Lama. Pakafikaye ku tshina tshinene tshia kulamina mâyi tshidi mu Seku, wakebeja ne: “Samuele ne Davidi badi penyi?” Bakamuandamuna ne: “Badi mu Nayota+ mu Lama.” 23 Pavua Shaula umbuka kuntu aku mutangile ku Nayota mu Lama, nyuma wa Nzambi wakamutulukila pende, ne wakaya wenda wenza malu bu muprofete too ne pakafikaye mu Nayota mu Lama. 24 Yeye pende wakakopola bilamba ne wakatuadija pende kuenza malu bu muprofete kumpala kua Samuele, ne wakalala panshi butaka* dituku dionso adi ne butuku buonso abu. Ke bualu kayi badi bamba ne: “Shaula ukadi pende munkatshi mua baprofete anyi?”+

20 Pashishe Davidi wakanyema, kumbukaye ku Nayota mu Lama. Kadi wakaya kudi Yonatana, kumuambilaye ne: “Tshindi muenze ntshinyi?+ Mbualu bubi kayi bundi muenze, ne ndi muenzele tatuebe bibi mushindu kayi bua yeye kukeba muoyo* wanyi?” 2 Ke Yonatana kumuambila ne: “Kabiena mua kuenzeka to!+ Kuakufua to. Mona! Tatu kena mua kuenza bualu nansha bumue, bunene anyi bukese, kayi muanji kubungambila to. Bua tshinyi tatu udi ne bua kunsokoka bualu ebu? Ebu bualu kabuakuenzeka to.” 3 Kadi Davidi wakaditshipa kabidi, yeye kuamba ne: “Tatuebe mmumanye bimpe mundi muanyishibue ku mêsu kuebe,+ ne udi mua kuamba ne: ‘Yonatana kamanyi bualu ebu to, bualu nebimutonde.’ Kadi bushuwa anu bu mudi Yehowa ne muoyo, ne bushuwa anu bu muudi wewe* ne muoyo, kudi anu tshidia tshimue pankatshi panyi ne lufu!”+

4 Ke Yonatana kuambila Davidi ne: “Nenkuenzele tshionso tshiwamba.”* 5 Davidi wakambila Yonatana ne: “Ngondo udi ubala malaba,+ ne bushuwa nebatekemene bua meme kusomba ne mukalenge bua kudia; udi ne bua kundekela nye, ne nensokome mu mpata too ne dilolo dia dituku disatu. 6 Tatuebe yeye mumone ne: tshienaku, dîba adi wambe ne: ‘Davidi uvua mundombe bua yeye kuya lukasa mu tshimenga tshiabu tshia Beteleheme,+ bualu kudi mulambu wa ku tshidimu kuntu aku bua dîku diabu dijima.’+ 7 Yeye muandamune ne: ‘Mbimpe,’ nebiumvuije ne: muena mudimu webe neikale mu ditalala. Kadi yeye mufiike munda, umanye ne: mmudisuike bua kungenzela bibi. 8 Leja muena mudimu webe dinanga dia lulamatu,+ bualu udi mubuele ne muena mudimu webe mu tshipungidi tshia Yehowa.+ Kadi meme mupile,+ unshipe wewe nkayebe. Bua tshinyi kumfila mu bianza bia tatuebe?”

9 Ke Yonatana kuamba ne: “Kabiena mua kuenzeka bua kuamba bualu bua mushindu eu buebe wewe to! Meme mumvue ne: tatu mmudisuike bua kukuenzela bibi, tshiakukuambila anyi?”+ 10 Pashishe Davidi wakebeja Yonatana ne: “Nnganyi wangambila bikala tatuebe mukuandamune bibi?” 11 Yonatana wakambila Davidi ne: “Luaku tuye mu mpata.” Nunku bubidi buabu bakaya mu mpata. 12 Yonatana wakambila Davidi ne: “Yehowa Nzambi wa Isalele ikale ntemu wa ne: nembuelele tatu munda malaba mêba a buena aa anyi malaba mukuabu bua kumanya lungenyi luende. Yeye welela Davidi meji mimpe, dîba adi tshiakukutumina mukenji bua kukuambila anyi? 13 Kadi tatu wanyi yeye ne lungenyi lua kukuenzela bibi, Yehowa annyoke meme Yonatana bibi menemene meme tshiyi mukuambile ne tshiyi mukunyemeshe mu ditalala. Yehowa ikale nebe+ anu bu muvuaye ne tatu wanyi.+ 14 Wewe kuakundejaku dinanga dia lulamatu dia Yehowa pantshidi ne muoyo nansha pangafua anyi?+ 15 Kumbushi dinanga diebe dia lulamatu kudi ba mu nzubu muanyi nansha kakese,+ nansha pikala Yehowa mumbushe bena lukuna bonso ba Davidi pa buloba.” 16 Nunku Yonatana wakadia tshipungidi ne nzubu wa Davidi, wamba ne: “Yehowa neapeshe bena lukuna ba Davidi dinyoka.” 17 Nunku Yonatana wakatshipisha kabidi Davidi bua dinanga divuaye mumunange nadi, bualu uvua mumunange anu muvuaye mudinange yeye muine.*+

18 Pashishe Yonatana wakamuambila ne: “Ngondo udi ubala malaba,+ nebamone ne: kuenaku to, bualu muaba webe newikale mutupu. 19 Malaba mukuabu nebitambe kumueneka ne: kuenaku to; udi ne bua kulua muaba eu uuvua musokome dituku adi* ne ushale pabuipi ne dibue edi. 20 Pashishe nengele mikete isatu ku luseke luadi lumue, bienze bu ne: ndi ngasa tshintu. 21 Pandi ntuma muambuluishi wanyi, nengambe ne: ‘Ndaku, ukebe mikete.’ Meme muambile muambuluishi wanyi ne: ‘Mona! Mikete idi luseke luebe elu, yangata,’ dîba adi udi mua kupingana, bualu bushuwa anu bu mudi Yehowa ne muoyo, bidi biumvuija ne: malu onso adi mu ditalala buebe wewe ne kakuena njiwu to. 22 Kadi meme muambile nsongalume ne: ‘Mona! Mikete idi kumpala kuebe,’ dîba adi uye, bualu Yehowa mmukulekele bua uye. 23 Kadi bua bualu butudi balayangane nebe,+ meme ne wewe, Yehowa ikale pankatshi petu bua kashidi.”+

24 Nunku Davidi wakasokoma mu mpata. Pakabala ngondo, mukalenge wakasomba bua kudia biakudia.+ 25 Mukalenge uvua musombe muaba wende wa tshibidilu lua ku tshimanu. Yonatana uvua mutangilangane nende, ne Abinê+ uvua musombe ku luseke lua Shaula, kadi muaba wa Davidi uvua mutupu. 26 Dituku adi Shaula kakamba bualu nansha bumue to, bualu uvua udiambila ne: ‘Bualu kampanda mbuenzeke budi buenze bua ikale kayi mukezuke.+ Bushuwa, udi ne bua kuikala mukoya.’ 27 Dituku diakalonda divua ngondo mubale, dituku dibidi, muaba wa Davidi uvua anu mutupu. Ke Shaula kuebeja muanende Yonatana ne: “Bua tshinyi muana wa Yishai+ ki mmulue ku biakudia, ni mmalaba, ni ndelu?” 28 Yonatana wakandamuna Shaula ne: “Davidi uvua mundombe bua aye ku Beteleheme.+ 29 Uvua muambe ne: ‘Nganyishilaku nye, bualu tudi ne mulambu wa dîku mu tshimenga tshietu, ne muanetu mmumbikidishe. Nunku bingikala muanyishibue ku mêsu kuebe, ndekelaku nye bantu kabayi bamanye bua nye kumona bana betu.’ Ke bualu kayi ki mmulue ku mêsa a mukalenge to.” 30 Nunku Shaula wakakuatshila Yonatana tshiji tshikole, yeye kumuambila ne: “Wewe muana wa mukaji ntomboji, udi wela meji ne: tshiena mumanye muudi musungule bua kuikala ku luseke lua muana wa Yishai, bua bundu buebe wewe ne bua bundu bua mamuebe* anyi? 31 Matuku onso adi muana wa Yishai ne muoyo pa buloba, wewe ne bukalenge buebe kanuakushindama bikole to.+ Nunku mpindieu, tuma muntu amuntuadile, bualu udi ne bua kufua.”*+

32 Kadi Yonatana wakebeja tatuende Shaula ne: “Udi ne bua kushipibua bua tshinyi?+ Mmuenze tshinyi?” 33 Ke Shaula kumukupa difuma bua kumushipa,+ nunku Yonatana wakamanya ne: tatuende uvua mudisuike bua kushipa Davidi.+ 34 Yonatana wakajuka ku mêsa diakamue mu tshiji tshikole, ne kakadia tshintu nansha tshimue dituku diakalonda divua ngondo mubale, bualu tshilumbu tshia Davidi tshivua tshimutonde+ ne tatuende uvua mumufuishe bundu.

35 Mu dinda Yonatana wakaya mu mpata anu bu mukavuabu bumvuangane ne Davidi, ne uvua ne nsongalume uvua umuambuluisha.+ 36 Wakambila muambuluishi wende ne: “Nyemaku unkebele mikete indi ngela.” Muambuluishi wakaya lubilu, ne Yonatana wakela mukete kumpala kuende. 37 Pavua muambuluishi mufike muaba uvua Yonatana muele mukete, Yonatana wakela muambuluishi au dîyi ne: “Mukete kawena kumpala kuebe aku anyi?” 38 Yonatana wakela muambuluishi dîyi ne: “Kolesha! Ndaku lukasa! Kujingakanyi to!” Muambuluishi wa Yonatana wakambula mikete, kupinganaye nayi kudi mfumuende. 39 Muambuluishi kavua mumvue bualu nansha bumue mu tshivua tshipitakana to; anu Yonatana ne Davidi ke bavua bamanye tshivua tshipitakana. 40 Pashishe Yonatana wakapesha muambuluishi wende bintu biende bia mvita, kumuambilaye ne: “Ndaku, uye nabi mu tshimenga.”

41 Pakaya muambuluishi, Davidi wakajukila muaba uvua pabuipi apu, lua ku sud. Pashishe wakatua mpala panshi, kuinamaye misangu isatu, bobu kutuangana mishiku, kudidilanganabu, kadi Davidi wakadila yeye bikole menemene. 42 Yonatana wakambila Davidi ne: “Ndaku mu ditalala, bualu tuetu bonso babidi tudi baditshipe+ mu dîna dia Yehowa, bambe ne: ‘Yehowa ikale pankatshi panyi nebe ne pankatshi pa bana* banyi ne bana* bebe bua kashidi.’”+

Pashishe Davidi wakajuka, kuyaye, Yonatana pende kupinganaye mu tshimenga.

21 Pashishe Davidi wakaya ku Nobo+ kudi muakuidi Ahimeleke. Ahimeleke wakatuadija kuzakala pavuabu bapetangane ne Davidi, ne wakamuebeja ne: “Bua tshinyi udi nkayebe muntu nansha umue kayi nebe?”+ 2 Davidi wakandamuna muakuidi Ahimeleke ne: “Mukalenge mmungambile bua kuenza bualu kampanda, kadi uvua muambe ne: ‘Muntu nansha umue kamanyi mudimu undi nkutuma bua kuenza ne malu andi mukuambile.’ Ndi mumvuangane ne bantu banyi bua kupetangana nabu muaba kampanda. 3 Mpindieu wewe muikale ne mampa atanu, ampeshaku anyi mpesha tshionso tshidiku.” 4 Kadi muakuidi wakandamuna Davidi ne: “Tshiena ne mampa etu a tshianana aa to, ndi anu ne mampa a tshijila,+ kadi anu bantu bebe bobu bikale badilame kudi bantu bakaji.”*+ 5 Davidi wakandamuna muakuidi ne: “Bushuwa tudi badilame kudi bantu bakaji anu bu misangu mikuabu pamvua nya ku mvita.+ Bikala mibidi ya bantu banyi mikale ya tshijila nansha patudi tuya mu mudimu wetu wa tshianana eu, lelu badi mua kuikala ba tshijila mushindu kayi!” 6 Nunku muakuidi wakamupesha mampa a tshijila,+ bualu kakuvua mampa makuabu pa kumbusha mampa a dileja avuabu bumbushe kumpala kua Yehowa bua kupingaja mampa mapiamapia dituku divuabu baumbushe.

7 Dituku adi muena mudimu mukuabu wa Shaula uvua muaba au, bamulame kumpala kua Yehowa. Dîna diende divua Doege+ muena Edome,+ mfumu wa balami ba mikoko ba Shaula.

8 Pashishe Davidi wakambila Ahimeleke ne: “Udiku ne difuma anyi muele wa mvita muaba eu anyi? Tshivua muangate muele wanyi anyi bia mvita bianyi bualu mudimu udi mukalenge muntume bua kuenza uvua wa lukasa lukasa.” 9 Ke muakuidi kuamba ne: “Muele wa mvita wa Goleyata+ muena Peleshete uuvua mushipe mu Tshibandabanda* tshia Elaha+ udi muaba eu mujingila mu tshilamba panyima pa efoda.+ Wewe musue kuwangata, uwangate, bualu anu wowu ke udi muaba eu.” Davidi wakamba ne: “Kakuena mukuabu bu wowu au to. Umpesha.”

12 Mêyi aa akatonda Davidi bikole, kumvuaye buôwa bua bungi+ bua Akisha mukalenge wa Gata. 13 Nunku wakadishiya bu muntu mupale+ kumpala kuabu ne kuenzaye malu bu mupale pavuaye munkatshi muabu.* Uvua uzola bintu ku biibi bia ku tshiibi tshia tshimenga ne ulekela lute lupuekela ku muedi. 14 Ndekelu wa bionso, Akisha wakambila bena mudimu bende ne: “Nudi bamone ne: muntu eu mmupale! Bua tshinyi nudi balue nende kundi? 15 Ndi mupangile bantu bapale bua meme kujinga bua muntu eu angenzele malu bu mupale anyi? Muntu eu udi ne bua kubuela mu nzubu muanyi anyi?”

22 Nunku Davidi wakumbuka kuntu aku,+ kunyemenaye mu nyongolo wa Adulama.+ Pakumvua bana babu ne ba mu nzubu wa tatuende bonso bualu abu, bakapueka kuvuaye aku. 2 Bantu bonso bavua mu lutatu ne bavua ne mabanza ne aba bavua malu kaayi asankisha* bakadisangisha kudiye, yeye kulua mfumuabu. Bantu bavua nende abu bavua batue ku 400.

3 Pashishe Davidi wakumbuka kuntu aku, kuyaye ku Misepe mu Moaba, kuambilaye mukalenge wa Moaba ne:+ “Itabaku bua tatu ne mamu bashale nebe too ne pangamanya tshikala Nzambi mua kungenzela.” 4 Nunku wakabashiya kudi mukalenge wa Moaba, ne bakashala nende tshikondo tshionso tshivua Davidi muaba wa kusokomena.+

5 Pakapita matuku muprofete Gada+ wakambila Davidi ne: “Kushadi muaba wa kusokomena au to. Umbuka muntu amu, uye mu buloba bua Yuda.”+ Nunku Davidi wakumbuka, kuyaye mu ditu dia Helete.

6 Shaula wakumvua ne: bavua bapete Davidi ne bantu bavuaye nabu. Dîba adi Shaula uvua musombe mu Gibea+ muinshi mua mutshi wa tamalise muaba mutumbuke, muikale ne difuma mu tshianza, ne bena mudimu bende bonso bavua bamunyunguluke. 7 Ke Shaula kuambila bena mudimu bende bavua bamunyunguluke ne: “Ntelejayiku nuenu bena Benyamina. Muana wa Yishai+ neanupeshe pende buonso buenu madimi ne madimi a tumuma tua mvinyo anyi? Neanuteke buonso buenu bu bamfumu ba bantu tshinunu tshinunu ne bamfumu ba bantu lukama lukama anyi?+ 8 Buonso buenu nudi bantungile tshitungu! Muntu nansha umue kavua mungambile pavua muananyi meme mudie tshipungidi ne muana wa Yishai to!+ Muntu nansha umue wa kunudi ki mmungumvuile luse ne ki mmungambile ne: muananyi meme mmusake muena mudimu wanyi meme bua kuntombokela ne kungelela tshifufu, anu mudibi lelu.”

9 Ke Doege+ muena Edome, uvua muaba au ku mutu kua bena mudimu ba Shaula, kuandamuna ne:+ “Mvua mumone muana wa Yishai mulue ku Nobo kudi Ahimeleke muana wa Ahituba.+ 10 Uvua mumuebejile malu kudi Yehowa ne mumupeshe biakudia. Uvua mumupeshe too ne muele wa mvita wa Goleyata muena Peleshete.”+ 11 Diakamue mukalenge wakabikidisha Ahimeleke muana wa muakuidi Ahituba ne bakuidi bonso ba mu nzubu wa tatuende bavua ku Nobo. Nunku buonso buabu bakalua kudi mukalenge.

12 Ke Shaula kuamba ne: “Ntelejaku wewe muana wa Ahituba!” Yeye kuandamuna ne: “Ndi mukuteleje mukalenge wanyi.” 13 Shaula wakamuambila ne: “Bua tshinyi nudi bantungile tshitungu, wewe ne muana wa Yishai, bualu udi mumupeshe mampa ne muele wa mvita ne mumuebejile malu kudi Nzambi? Mmuntombokele ne mmungelele tshifufu, anu mudibi mpindieu.” 14 Ke Ahimeleke kuandamuna mukalenge ne: “Nnganyi munkatshi mua bena mudimu bebe bonso udi wa kueyemena* bu Davidi?+ Yeye mmuku wa mukalenge+ ne udi mfumu ku mutu kua bantu badi bakulama ne udi munemekibue mu nzubu muebe.+ 15 Lelu ke musangu wa kumpala undi mumuebejile malu kudi Nzambi anyi?+ Meme tshiena mua kuenza bualu buudi wamba abu to! Mukalenge kalaminyi muena mudimu wende ne nzubu wa tatuanyi yonso bualu nansha bumue, bualu muena mudimu webe kavua mumanye bualu nansha bumue mu bionso ebi to.”+

16 Kadi mukalenge wakamba ne: “Ahimeleke, wewe neufue bushuwa+ pamue ne nzubu wa tatuebe mujima.”+ 17 Ke mukalenge kuambila bantu bavua bamulama* bavua bamunyunguluke ne: “Kudimukayi, nushipe bakuidi ba Yehowa, bualu mbatue ku tshia Davidi! Bavua bamanye ne: uvua wenda unyema, ne kabavua bangambile to!” Kadi bena mudimu ba mukalenge kabavua basue kujula bianza biabu bua kuluisha bakuidi ba Yehowa to. 18 Nunku mukalenge wakambila Doege ne:+ “Wewe kudimuka, uluishe bakuidi!” Diakamue Doege muena Edome+ wakaya ne wakaluisha bakuidi yeye nkayende. Dituku adi wakashipa bantu 85 bavua bavuale efoda wa line.+ 19 Wakabutula kabidi Nobo,+ tshimenga tshia bakuidi, ne muele wa mvita; wakashipa bantu balume ne bantu bakaji, bana ne bana ba mu maboko, ngombe, mpunda ne mikoko ku muele wa mvita.

20 Kadi muana umue wa Ahimeleke muana wa Ahituba uvua ne dîna ne: Ebeyatâ+ wakadisungila, kunyemaye bua kulonda Davidi. 21 Ebeyatâ wakambila Davidi ne: “Shaula mmushipe bakuidi ba Yehowa.” 22 Ke Davidi kuambila Ebeyatâ ne: “Mvua mumanye dituku adi+ pavua Doege muena Edome kuntu aku ne: kavua mua kupanga kuambila Shaula to. Bantu bonso ba* mu nzubu wa tatuebe mbafue bua bualu buanyi meme. 23 Ushale nanyi. Kutshinyi to, bualu muntu yonso udi ukeba muoyo* webe udi ukeba muoyo* wanyi; ndi nkulama bimpe.”+

23 Pakapita matuku bakambila Davidi ne: “Bena Peleshete badi baluisha Keila,+ ne badi benda bapawula miaba ya tshishipuidi.” 2 Nunku Davidi wakebeja Yehowa ne:+ “Nye bua kushipa bena Peleshete aba anyi?” Yehowa wakambila Davidi ne: “Ndaku, ushipe bena Peleshete ne usungile Keila.” 3 Kadi bantu ba Davidi bakamuambila ne: “Mona! Tudi ne buôwa patudi mu Yuda emu;+ nebikale mushindu kayi tuetu baye ku Keila bua kuluangana ne basalayi ba bena Peleshete!”+ 4 Nunku Davidi wakebeja kabidi Yehowa.+ Ke Yehowa kumuandamuna ne: “Juka; pueka ku Keila bualu nemfile bena Peleshete mu tshianza tshiebe.”+ 5 Nunku Davidi wakaya ku Keila ne bantu bende, kuluanganaye ne bena Peleshete; wakangata bimuna biabu, yeye kubashipa dishipa dia dikema, ne Davidi wakasungila bantu ba mu Keila.+

6 Mpindieu pavua Ebeyatâ+ muana wa Ahimeleke munyemene kudi Davidi ku Keila, uvua ne efoda. 7 Bakambila Shaula ne: “Davidi mmulue mu Keila.” Ke Shaula kuamba ne: “Nzambi mmumufile mu bianza bianyi,*+ bualu mmudibueje mu buteyi pa kubuela mu tshimenga tshidi ne biibi bikolesha bikole.” 8 Nunku Shaula wakabikidisha bantu bonso ku mvita bua kupueka ku Keila ne kutshintshimika Davidi ne bantu bende. 9 Pakumvua Davidi ne: Shaula uvua umuelela tshifufu, wakambila muakuidi Ebeyatâ ne: “Luaku ne efoda muaba eu.”+ 10 Pashishe Davidi wakamba ne: “Yehowa Nzambi wa Isalele, muena mudimu webe mmumvue bulelela ne: Shaula mmusue kulua ku Keila bua kubutula tshimenga bua bualu buanyi.+ 11 Balombodi* ba mu Keila nebamfile mu tshianza tshiende anyi? Shaula neapueke kuneku bu mudi muena mudimu webe mumvue anyi? Yehowa Nzambi wa Isalele, andamuna koku muena mudimu webe.” Ke Yehowa kuamba ne: “Neapueke.” 12 Davidi wakebeja ne: “Balombodi ba mu Keila nebamfile meme ne bantu banyi mu tshianza tshia Shaula anyi?” Yehowa wakandamuna ne: “Nebanufile.”

13 Diakamue Davidi wakajuka ne bantu bende, bantu batue ku 600,+ kumbukabu ku Keila benda baya muaba wonso uvuabu mua kuya. Pakambilabu Shaula ne: Davidi mmunyeme ku Keila, kakamulonda to. 14 Davidi wakashala mu tshipela mu miaba ivua mikole bua kufika, mu buloba bua mikuna bua mu tshipela tshia Zifa.+ Shaula wakamukeba kayi wikisha,+ kadi Yehowa kavua mumufile mu tshianza tshiende to. 15 Pavua Davidi mu tshipela tshia Zifa ku Holesha,* Davidi uvua mumanye ne:* Shaula uvua mulue bua kukeba muoyo* wende.

16 Mpindieu Yonatana muana wa Shaula uvua muye kudi Davidi ku Holesha, yeye kumuambuluisha bua kupeta bukole* mu Yehowa.+ 17 Wakamuambila ne: “Kutshinyi to, bualu tatuanyi Shaula kakukupeta to; newikale mukalenge wa Isalele,+ ne meme nengikale mukulondele; tatuanyi Shaula mmumanye pende bualu ebu.”+ 18 Nunku bubidi buabu bakadia tshipungidi+ kumpala kua Yehowa; Davidi wakashala ku Holesha, ne Yonatana wakapingana kuende.

19 Pashishe bantu ba mu Zifa bakabanda kudi Shaula ku Gibea,+ kuambabu ne: “Davidi ki mmusokome pabuipi netu+ ku Holesha+ mu miaba idi mikole bua kufika, pa mukuna mukese wa Hakila,+ udi ku sud kua* Yeshimone* anyi?+ 20 Dîba dionso diudi* umvua bua kupueka kutudi, luaku mukalenge, ne netumufile mu tshianza tshia mukalenge.”+ 21 Ke Shaula kuamba ne: “Yehowa anubeneshe, bualu nudi bangumvuile luse. 22 Ndayiku, nutete kumanya menemene muaba udiye ne kumanya muntu uvua mumumone kuntu aku, bualu mbangambile ne: yeye udi ne budimu bua bungi be! 23 Nukebe bua kumanya bimpe menemene miaba idiye usokomena ne nupingane kundi ne bijadiki. Dîba adi nenye nenu, ne yeye muikale mu buloba abu, nemmukebe munkatshi mua binunu* bionso bia Yuda.”

24 Nunku bakumbuka, kudianjidilabu Shaula ku Zifa,+ pavua Davidi ne bantu bende mu tshipela tshia Maona,+ mu Alabâ+ ku sud kua Yeshimone. 25 Pashishe Shaula wakalua ne bantu bende bua kumukeba.+ Pakambilabu Davidi bualu ebu, wakapueka diakamue ku mukuna wa dibue,+ yeye kushala mu tshipela tshia Maona. Pakumvua Shaula nanku, wakalonda Davidi mu tshipela tshia Maona. 26 Pavua Shaula mufike ku luseke lumue lua mukuna, Davidi ne bantu bende bavua ku luseke lukuabu lua mukuna. Davidi uvua wenza lukasa lukasa bua kunyema+ Shaula, kadi Shaula ne bantu bende bavua benda basemena pabuipi menemene ne Davidi ne bantu bende bua kubakuata.+ 27 Kadi muntu mukuabu wakalua kudi Shaula ne mukenji wamba ne: “Luaku lukasa lukasa, bualu bena Peleshete mbalue kuluisha buloba!” 28 Ke Shaula kulekelaye kulonda Davidi,+ yeye kuya bua kuluangana ne bena Peleshete. Ke bualu kayi bakinyika muaba au ne: Sela-hamalekota.*

29 Pashishe Davidi wakumbuka kuntu aku, kubandaye bua kusombela ku Ene-gedi+ mu miaba ivua mikole bua kufika.

24 Diakamue pavua Shaula mupingane ufuma ku dilondakaja bena Peleshete, bakamuambila ne: “Tangila! Davidi udi mu tshipela tshia Ene-gedi.”+

2 Ke Shaula kuangata bantu balume 3 000 basungula mu Isalele mujima, kuyaye bua kukeba Davidi ne bantu bende pa mbuebue itu mbuji ya ku mikuna isombela. 3 Shaula wakafika ku bikumbi bia mikoko bia mabue bivua kumpenga kua njila, ne muaba au uvua nyongolo; wakabuelamu bua kusesuka* pavua eku Davidi ne bantu bende basombe mu nyongolo amu lua mu ndekelu muvua mufiikuluke.+ 4 Bantu ba Davidi bakamuambila ne: “Edi ke dituku didi Yehowa ukuambila ne: ‘Mona! Ndi mfila muena lukuna webe mu tshianza tshiebe+ ne udi mua kumuenzela tshionso tshidi tshimueneka tshimpe ku mêsu kuebe.’” Nunku Davidi wakajuka, kukosaye luzembe lua muzabi wa kawuyi maboko wa Shaula mu musokoko. 5 Kadi pashishe muoyo wa* Davidi wakatuadija kumututa+ bualu uvua mukose luzembe lua muzabi wa kawuyi maboko wa Shaula. 6 Wakambila bantu bende ne: “Ku mêsu kua Yehowa tshiena mua kuenzela mukalenge wanyi, muela manyi wa Yehowa, bualu bua mushindu eu pa kujula tshianza tshianyi bua kumuenzela bibi to, bualu yeye mmuela manyi wa Yehowa.”+ 7 Nunku Davidi wakakanda* bantu bende ne mêyi aa, ne kakabanyishila bua bobu kubunda Shaula to. Kadi Shaula wakajuka, kupatukaye mu nyongolo ne kutungunukaye ne njila wende.

8 Pashishe Davidi wakajuka, kupatukaye mu nyongolo, kuelaye Shaula dîyi ne: “Mfumu mukalenge wanyi!”+ Pavua Shaula mukudimuke mutangile panyima pende, Davidi wakinama mutangije mpala panshi, pashishe kutuaye mpala panshi. 9 Davidi wakambila Shaula ne: “Bua tshinyi udi uteleja mêyi a bantu badi bamba ne: ‘Mona! Davidi udi ukeba kukuenzela bibi’?+ 10 Dituku dia lelu edi mêsu ebe mmadimuene muvua Yehowa mukufile mu tshianza tshianyi mu nyongolo. Kadi pavua muntu mukuabu mungambile bua kukushipa,+ mvua mukumvuile luse, meme kuamba ne: ‘Tshiakujula tshianza tshianyi bua kuenzela mukalenge wanyi bibi to, bualu mmuela manyi wa Yehowa.’+ 11 Tangila, tatu wanyi, bushuwa, mona luzembe lua muzabi webe wa kawuyi maboko mu tshianza tshianyi; bualu pamvua mukose luzembe lua muzabi webe wa kawuyi maboko, mvua mua kuikala kabidi mukushipe, kadi tshiena mukushipe to. Mpindieu udi mua kumona ne kumvua ne: tshiena musue kukuenzela bibi anyi kukutombokela to, ne tshiena mukuenzele bibi+ nansha muudi wewe wenda undondakaja bua kuangata muoyo* wanyi.+ 12 Yehowa akose tshilumbu tshietu nebe,+ ne Yehowa adisombuele kuudi bua bualu buanyi,+ kadi tshianza tshianyi tshiotshi katshiakukuenzela bibi to.+ 13 Anu bu mudi lusumuinu lua kale luamba ne: ‘Bubi budi bufumina kudi bantu babi,’ nunku tshianza tshianyi katshiakukuenzela bibi to. 14 Mukalenge mmupatuke bua kulonda nganyi? Udi wenda wipata nganyi? Mmbua mufue anyi? Mmutole wa tshianana anyi?+ 15 Yehowa ikale mulumbuluishi, akose tshilumbu tshietu nebe, neakonkonone tshilumbu etshi ne neangakuile,+ neandumbuluishe ne neansungile mu tshianza tshiebe.”

16 Dîba divua Davidi mujikije kuambila Shaula mêyi aa, Shaula wakebeja ne: “Muananyi Davidi, adi dîyi ndiebe anyi?”+ Ke Shaula kutuadija kudila ne dîyi dikole. 17 Wakambila Davidi ne: “Udi muakane kumpita meme bualu udi mungenzele malu mimpe, kadi meme ndi mukufute malu mabi.+ 18 Bushuwa, lelu udi mungambile bualu buimpe buuvua muenze pa kubenga kunshipa pavua Yehowa mumfile mu tshianza tshiebe.+ 19 Bualu mmuntu kayi udi mua kupeta muena lukuna wende ne kumulekela uya kayi umuenzela bibi? Yehowa neakufute malu mimpe+ bua bualu buudi mungenzele lelu. 20 Mpindieu tangila! Ndi mumanye ne: bushuwa neukokeshe bu mukalenge,+ ne bukalenge bua Isalele nebunenge mu tshianza tshiebe. 21 Mpindieu ditshipa kundi mu dîna dia Yehowa+ ne: kuakujimija ndelanganyi* yanyi yalonda panyima panyi ne kuakujimija dîna dianyi mu nzubu wa tatuanyi to.”+ 22 Ke Davidi kuditshipa kudi Shaula, pashishe Shaula kupinganaye kuende.+ Kadi Davidi ne bantu bende bakabanda bobu muaba wa kusokomena+.

25 Pakapita matuku, Samuele+ wakafua; ne Isalele mujima wakadisangisha bua kumudila ne bua kumujiika ku nzubu kuende ku Lama.+ Pashishe Davidi wakajuka, kupuekaye mu tshipela tshia Palana.

2 Mpindieu kuvua muntu mukuabu mu Maona+ uvua wenzela mudimu ku Kâmele.*+ Muntu au uvua ne bubanji bua bungi; uvua ne mikoko 3 000 ne mbuji tshinunu, ne dîba adi uvua ukosa miosa ya mikoko yende ku Kâmele. 3 Dîna dia muntu au divua Nabala,+ ne dîna dia mukajende divua Abigayila.+ Mukaji au uvua ne busunguluji bua malu ne muimpe kumona, kadi bayende, uvua wa mu dîku dia Kaleba,+ uvua muena malu makole ne uvua wenza malu mabi.+ 4 Davidi wakumvua lumu pavuaye mu tshipela ne: Nabala uvua ukosa miosa ya mikoko yende. 5 Nunku Davidi wakatuma bantu dikumi kudiye; Davidi wakambila bantu abu ne: “Bandayi ku Kâmele ne panuafika kudi Nabala, numuebeje mu dîna dianyi bua kumanya mudiye. 6 Pashishe nuambe ne: ‘Ulale matuku a bungi ne wikale bimpe,* nzubu webe mujima ikale bimpe ne bintu biebe bionso bikale bimpe. 7 Mpindieu ndi mumvue ne: udi ukosa miosa ya mikoko yebe. Patuvua ne balami ba mikoko yebe, katuvua babenzele bibi to,+ ne kabavua basangane tshintu nansha tshimue tshijimine tshikondo tshionso tshivuabu mu Kâmele. 8 Ebeja bantu bebe ne bobu nebakuambile. Bantu banyi banyishibuaku ku mêsu kuebe, bualu tudi balue dîba dia disanka.* Itabaku upeshe bena mudimu bebe ne muanebe Davidi tshionso tshiudi mua kuikala natshi.’”+

9 Nunku bantu ba Davidi bakaya ne bakambila Nabala malu onso aa mu dîna dia Davidi. Pakajikijabu, 10 Nabala wakandamuna bena mudimu ba Davidi ne: “Davidi nnganyi, ne muana wa Yishai nnganyi? Matuku aa bena mudimu ba bungi bakadi banyema bamfumu babu.+ 11 Ndi ne bua kuangata mampa anyi, mâyi anyi ne munyinyi umvua musayile bakoshi banyi ba miosa ya mikoko kubipesha bantu badi bafumine kundi tshiyi mumanye anyi?”

12 Ke bantu ba Davidi kupinganabu ne kumuambilabu mêyi onso aa. 13 Diakamue Davidi wakambila bantu bende ne: “Muntu yonso asuike muele wende wa mvita!”+ Nunku buonso buabu bakasuika miele yabu ya mvita, ne Davidi wakasuika pende muele wende wa mvita, ne bantu batue ku 400 bakabanda ne Davidi pavua eku bantu 200 bashale ne mabuki.

14 Dîba adi umue wa ku bena mudimu wakambila Abigayila mukaji wa Nabala ne: “Tangila! Davidi uvua mutume bantu ne mukenji bafumina mu tshipela bua kujingila mfumuetu diakalenga, kadi yeye uvua mubandamune bibi.+ 15 Bantu abu bavua netu bimpe be! Kabavua batuenzele bibi to, ne katuvua bajimije tshintu nansha tshimue dîba dionso dituvua nabu pamue mu mpata to.+ 16 Bavua anu bu tshimanu tshivua tshitunyunguluke bua kutulama munya ne butuku dîba dionso dituvua nabu tulama mikoko. 17 Nunku manya tshiwikala mua kuenza, bualu mbamane kusuika bua kuenzela mukalenge wetu ne nzubu wende mujima bibi,+ ne yeye udi muntu tshianana+ udibu kabayi mua kuambila bualu kudi muntu nansha umue.”

18 Ke Abigayila+ kuangata ne lukasa mampa 200, milondo minene ibidi ya mvinyo, mikoko itanu mimana kulongolola, bipiminu bia seha* bitanu bia ntete mikanga, mabulu lukama a tumuma tua mvinyo tumisha, ne mabulu 200 a mfigi miumisha ne kubitekaye bionso pa mpunda.+ 19 Pashishe wakambila bena mudimu bende ne: “Dianjilayi; nennulonde.” Kadi kakambila bayende Nabala bualu to.

20 Pavuaye pa mpunda wenda upueka, mukuna mumujike, ke dîba divua Davidi pende ne bantu bende bapueka kudiye, yeye kusambakena nabu. 21 Mpindieu Davidi uvua wenda wamba ne: “Mvua mulamine muntu eu bintu biende bionso mu tshipela anu bua tshianana. Kakuvua tshintu tshia muntu eu nansha tshimue tshivua tshijimine to,+ kadi yeye udi umpingajila bubi ku buimpe.+ 22 Nzambi enzele bena lukuna ba Davidi* bia muomumue ne apitshishe apu bingashiya muntu mulume* wa muende nansha umue ne muoyo too ne mu dinda.”

23 Pavua Abigayila mumone Davidi, wakatuluka pa mpunda ne lukasa, kudielaye kumpala kua Davidi mpala mutangija panshi, kutuaye mutu panshi. 24 Ke kudielaye ku makasa ende, kuambaye ne: “Mukalenge wanyi, tshilema tshikale kundi; itabaku bua muena mudimu webe mukaji akuambile bualu, ne teleja mêyi a muena mudimu webe mukaji. 25 Mukalenge wanyi kalondi koku Nabala muntu tshianana au to,+ bualu udi anu bu mudi dîna diende. Nabala* ke dîna diende, ne kena ne lungenyi to. Kadi meme, muena mudimu webe mukaji, tshivua mumone bantu ba mukalenge wanyi bauvua mutume to. 26 Kadi mpindieu mukalenge wanyi, bushuwa anu mudi Yehowa ne muoyo, ne muudi wewe* ne muoyo, Yehowa ke udi mukukande+ bua kupi dibanza dia mashi+ ne bua kudisombuedi ne* tshianza tshiebe. Bena lukuna bebe ne aba badi bakeba kuenzela mukalenge wanyi bibi balue bu Nabala. 27 Mpindieu bapeshaku bantu badi balonda mukalenge wanyi dipa* edi+ didi muena mudimu webe mukaji mutuadile mukalenge wanyi.+ 28 Bua luse, buikila koku tshilema tshia muena mudimu webe mukaji, bualu kakuyi mpata Yehowa neenzele mukalenge wanyi nzubu udi ushala matuku a bungi,+ bualu mukalenge wanyi udi uluangana mvita ya Yehowa;+ ne kakuena bualu bubi nansha bumue budibu bapete kuudi matuku ebe onso.+ 29 Padi muntu ujuka bua kukulondakaja ne kukeba muoyo* webe, muoyo* wa mukalenge wanyi newikale mujingila bimpe menemene mu tshibuta tshia muoyo tshidi kudi Yehowa Nzambi webe, kadi neakupe mioyo* ya bena lukuna bebe kule anu bu mudibu bakupa mabue ne ndundu wa kukupa nende mabue.* 30 Dîba dikala Yehowa muenzele mukalenge wanyi malu mimpe onso adiye mulaye ne mukuteke mulombodi wa Isalele,+ 31 wewe kuakudiela meji anyi kunyingalala* mu muoyo webe bua muuvua muele mashi panshi kakuyi bualu ne mulekele tshianza tshia mukalenge wanyi tshidisombuela.*+ Pikala Yehowa ne bua kuenzela mukalenge wanyi malu mimpe, uvuluke muena mudimu webe mukaji.”

32 Ke Davidi kuambila Abigayila ne: “Yehowa Nzambi wa Isalele, yeye udi mukutume lelu bua kusambakena nanyi, atumbishibue! 33 Lungenyi luebe lujalame lubeneshibue! Ubeneshibue pebe bua muudi munkande lelu bua tshipi dibanza dia mashi+ ne bua tshidisombuedi ne* bianza bianyi. 34 Tshianana, bushuwa anu mudi Yehowa Nzambi wa Isalele uvua munkande bua tshikuenzedi bibi+ muikale ne muoyo, bu wewe kuyi mulue ne lukasa bua kusambakena nanyi,+ mu dinda kakuvua kushala muntu mulume* wa mua Nabala nansha umue to.”+ 35 Ke Davidi kuitaba bintu bivuaye mumutuadile ne kumuambilaye ne: “Banda ku nzubu kuebe mu ditalala. Tangila, ndi mukuteleje, ne nenkumbaje dilomba diebe.”

36 Pashishe Abigayila wakapingana kudi Nabala uvua wenza difesto bu mukalenge mu nzubu muende, ne Nabala* uvua ne disanka ne uvua mukuatshike kakuyi mushindu to. Abigayila kavua mumuambile bualu nansha bumue too ne pakatshiabu. 37 Mu dinda, pavua maluvu matenduke Nabala, mukajende wakamuambila malu aa. Muoyo wende wakalua bu wa muntu mufue, ne wakalala mutekete kayi unyunga anu bu dibue. 38 Matuku matue ku dikumi pashishe, Yehowa wakakuma Nabala, yeye kufua.

39 Pakumvua Davidi ne: Nabala uvua mufue, wakamba ne: “Yehowa atumbishibue, yeye udi mundumbuluile+ mu tshilumbu tshia muvua Nabala mumpende+ ne udi mukande muena mudimu wende bua kuenza bualu bubi,+ ne Yehowa mmupingajile Nabala bubi buende pa mutu pende nkayende!” Pashishe Davidi wakatumina Abigayila dîyi bua kumulomba bua alue mukajende. 40 Nunku bena mudimu ba Davidi bakaya kudi Abigayila ku Kâmele ne bakamuambila ne: “Davidi mmututume kuudi bua tukuangate bua ulue mukajende.” 41 Wakajuka diakamue, kuinamaye mutue mpala panshi, kuambaye ne: “Mupika webe udi witaba bua kuikala muena mudimu bua kuowesha bena mudimu ba mukalenge wanyi mâyi ku makasa.”+ 42 Ke Abigayila+ kujuka lukasa, kubandaye pa mpunda wende ne bena mudimu bende ba bakaji batanu benda bamulonda mu nyima; wakaya ne bantu ba Davidi bavua balue ne mukenji ne wakashala mukajende.

43 Davidi uvua musele kabidi Ahinoama+ wa mu Yizelele+ ne bakaji bonso babidi abu bakalua bakaji bende.+

44 Kadi Shaula ukavua mufile muanende wa bakaji Mikala,+ mukaji wa Davidi, kudi Palati+ muana wa Layishe wa mu Galima.

26 Pakapita matuku bantu ba mu Zifa+ bakaya kudi Shaula mu Gibea+ bamba ne: “Davidi ki mmusokome pa mukuna mukese wa Hakila udi mutangilangane ne Yeshimone* anyi?”+ 2 Nunku Shaula wakajuka, kupuekaye mu tshipela tshia Zifa ne bantu balume 3 000 basungula ba mu Isalele bua kukeba Davidi mu tshipela tshia Zifa.+ 3 Shaula uvua muase tshitudilu pa mukuna mukese wa Hakila udi mutangilangane ne Yeshimone, kumpenga kua njila. Dîba adi Davidi uvua yeye mu tshipela, ne wakumvua ne: Shaula uvua mulue mu tshipela wenda umulonda. 4 Nunku Davidi wakatuma batentekedi bua kutangila bikala Shaula uvua mulue bushuwa. 5 Pashishe Davidi wakaya muaba uvua Shaula muashile tshitudilu, ne Davidi wakamona muaba uvua Shaula ne Abinê+ muana wa Nê, mfumu wa tshiluilu tshiende, balale; Shaula uvua mulale mu tshitudilu, ne basalayi bende bavua bamunyunguluke. 6 Pashishe Davidi wakebeja Ahimeleke muena Hiti+ ne Abishai+ muana wa Seluya,+ muanabu ne Yoaba ne: “Nnganyi wapueka nanyi mu tshitudilu kudi Shaula?” Abishai kuandamuna ne: “Meme nempueke nebe.” 7 Nunku Davidi ne Abishai bakaya kudi basalayi abu butuku butuku, bobu kusangana Shaula mulale mu tshitudilu, difuma diende diasa mu buloba pabuipi ne mutu wende; Abinê ne basalayi bavua balale bamuele munkatshi.

8 Ke Abishai kuambila Davidi ne: “Lelu Nzambi mmufile muena lukuna webe mu tshianza tshiebe.+ Mpindieu, itaba koku mmulamatshishe ne difuma mu buloba anu musangu umue tshianana, kabiakundomba bua kuenza nanku misangu ibidi to.” 9 Kadi Davidi wakambila Abishai ne: “Kumuenzedi bibi to, bualu nnganyi udi mua kujula tshianza tshiende bua kuluisha muela manyi wa Yehowa+ ne kushala kayi ne bualu?”+ 10 Davidi wakamba kabidi ne: “Bushuwa anu mudi Yehowa ne muoyo, Yehowa nkayende neamushipe,+ anyi diende dituku nedilue+ yeye kufua, peshi udi mua kupueka ku mvita yeye kufua.+ 11 Ku mêsu kua Yehowa kabiena mua kuenzeka bua meme kujula tshianza tshianyi bua kuluisha muela manyi wa Yehowa to!+ Nunku mpindieu angataku anu difuma didi pabuipi ne mutu wende ne dibungu dia mâyi, tukebe kua diya tuye.” 12 Ke Davidi kuangata difuma ne dibungu dia mâyi bivua pabuipi ne mutu wa Shaula, bobu kuya. Kakuvua muntu uvua mubamone+ anyi mumone tshivuabu benze anyi mupapuke ku tulu to, bualu bavua balale bonso, bualu Yehowa uvua mubaladike tulu tukole. 13 Pashishe Davidi wakasambuluka kuyaye luseke lukuabu, kuimanaye pa mutu pa mukuna, ntanta mule ne muaba uvua Shaula.

14 Davidi wakela basalayi abu ne Abinê+ muana wa Nê dîyi wamba ne: “Abinê, kuena witaba anyi?” Abinê wakandamuna ne: “Wewe udi ubikila mukalenge udi nganyi?” 15 Davidi wakambila Abinê ne: “Kuena muntu wa bukitu anyi? Nnganyi udi bu wewe mu Isalele? Nunku, bua tshinyi kuvua mushale mutabale bua kulama mfumu webe ne mukalenge webe? Bualu musalayi kampanda uvua mulue bua kushipa mfumu webe ne mukalenge webe.+ 16 Tshiudi muenze ki ntshimpe to. Bushuwa anu mudi Yehowa ne muoyo, udi mukumbanyine lufu, bualu kuena mushale mutabale bua kulama mukalenge webe, muela manyi wa Yehowa+ to. Mpindieu tangila ku luseke luebe! Difuma ne dibungu dia mâyi bia mukalenge bivua pabuipi ne mutu wende bidi penyi?”+

17 Pashishe Shaula wakajingulula dîyi dia Davidi, kuebejaye ne: “Muananyi Davidi, adi dîyi ndiebe anyi?”+ Davidi kuandamuna ne: “Mfumu mukalenge wanyi, dîyi ndianyi.” 18 Yeye kuamba kabidi ne: “Bua tshinyi mukalenge wanyi udi wenda ulondakaja muena mudimu wende?+ Mbua bualu kayi bundi muenze? Ndi mupile bua bualu kayi?+ 19 Mfumu mukalenge wanyi, telejaku mêyi a muena mudimu webe: Bikala Yehowa ke uvua mukusake bua kunduisha, yeye itabe* koku mulambu wanyi wa ntete. Kadi bikala bantu ke badi bakusake,+ mbedibue mulawu kumpala kua Yehowa bualu mbangipate lelu bua tshidisangishi ne bumpianyi bua Yehowa,+ bamba ne: ‘Ndaku, wenzele nzambi mikuabu mudimu!’ 20 Mpindieu kulekedi mashi anyi amate panshi kule ne mpala wa Yehowa to, bualu mukalenge wa Isalele mmupatuke bua kuenda kukeba mutole wetu wa tshianana eu,+ bienze bu ne: udi wenda ulondakaja nkuadi mu mikuna.”

21 Shaula wakandamuna ne: “Ndi muenze bibi.+ Pingana muananyi Davidi, bualu tshiakukuenzela kabidi bibi to, bualu uvua muangate muoyo* wanyi ne mushinga+ dituku dia lelu. Bushuwa ndi muenze malu ne bupote ne ndi muenze tshilema tshibi tshitambe.” 22 Davidi wakandamuna ne: “Difuma dia mukalenge ndiodi edi. Muntu umue alue kudiangata. 23 Yehowa ke wafuta muntu yonso bua buakane buende+ ne bua lulamatu luende, bualu lelu Yehowa uvua mukufile mu tshianza tshianyi, kadi tshivua musue kujula tshianza tshianyi bua kuluisha muela manyi wa Yehowa to.+ 24 Mona! Anu muvua muoyo* webe ne mushinga ku mêsu kuanyi lelu, nunku muoyo* wanyi wikale pawu ne mushinga ku mêsu kua Yehowa, ne yeye ansungile mu makenga onso.”+ 25 Shaula wakandamuna Davidi ne: “Ubeneshibue muananyi Davidi. Bushuwa wewe newenze malu manene, ne bushuwa neutute diakalenga.”+ Pashishe Davidi wakaya, ne Shaula wakapingana muaba wende.+

27 Kadi Davidi wakadiambila mu muoyo wende ne: “Dituku dikuabu nemfue ku tshianza tshia Shaula. Bualu butambe buimpe bundi mua kuenza nkunyemena+ mu buloba bua bena Peleshete; dîba adi Shaula nealekele kunkeba mu buloba bujima bua Isalele,+ ne nensungidibue ku tshianza tshiende.” 2 Nunku Davidi wakajuka, yeye ne bantu balume 600+ bavuaye nabu, kuyaye kudi Akisha+ muana wa Maoka, mukalenge wa Gata. 3 Davidi wakasomba ne Akisha mu Gata, yeye ne bantu bende, muntu yonso muikale ne ba mu nzubu muende. Davidi uvua ne bakaji bende babidi, Ahinoama+ wa mu Yizelele ne Abigayila+ wa mu Kâmele, mukaji mukamba uvua Nabala mushiye. 4 Pakambilabu Shaula ne: Davidi uvua munyemene ku Gata, wakalekela kumukeba.+

5 Pashishe Davidi wakambila Akisha ne: “Meme muanyishibue ku mêsu kuebe, bampeshaku muaba mu tshimue tshia ku bimenga bikese bua nsombelamu. Bua tshinyi muena mudimu webe udi ne bua kusomba nebe mu tshimenga tshia bukalenge?” 6 Nunku dituku adi Akisha wakamupesha Sikelaga.+ Ke bualu kayi Sikelaga ntshimenga tshia bakalenge ba mu Yuda too ne lelu.

7 Tshikondo tshivua* Davidi musombele mu buloba bua bena Peleshete tshivua tshia tshidimu tshijima ne ngondo inayi.+ 8 Davidi uvua uya ne bantu bende bua kupawula bena Geshû,+ bena Gêze, ne bena Amaleka,+ bualu bavua basombele mu buloba buvua bumbukila ku Telama too ne ku Shû,+ bupueka too ne ku buloba bua Ejipitu. 9 Pavua Davidi uluisha bena buloba abu, kavua ushiya nansha muntu mulume nansha muntu mukaji ne muoyo to,+ kadi uvua wangata mikoko, ngombe, mpunda, tumelu, ne bilamba, ne pashishe uvua upingana kudi Akisha. 10 Nunku Akisha uvua webeja ne: “Lelu uvua muye kupawula kuepi?” Davidi uvua wandamuna ne: “Ku sud kua* Yuda”+ anyi “Ku sud kua bena Yelamele”+ peshi “Ku sud kua bena Kene.”+ 11 Davidi kavua ushiya nansha muntu mulume nansha muntu mukaji ne muoyo bua kulua nabu mu Gata to, bualu uvua wamba ne: “Bua kababambidi bua bualu buetu ne: ‘Davidi uvua muenze nunku.’” (Ke muvuaye wenza tshikondo tshionso tshivuaye musombele mu buloba bua bena Peleshete.) 12 Nunku Akisha wakitaba tshivua Davidi wamba, udiambila ne: ‘Bushuwa mmulue tshintu tshidi tshinunka bibi munkatshi mua tshisamba tshiabu tshia Isalele, nunku yeye neashale anu muena mudimu wanyi.’

28 Mu matuku au bena Peleshete bakasangisha biluilu biabu bua kuela Isalele mvita.+ Nunku Akisha wakambila Davidi ne: “Bushuwa, udi mumanye ne: wewe ne bantu bebe nenuye nanyi ku mvita.”+ 2 Ke Davidi kuambila Akisha ne: “Kakuyi mpata udi mumanye tshienza muena mudimu webe.” Akisha wakambila Davidi ne: “Ke bualu kayi nenkuteke bua wikale undama misangu yonso.”*+

3 Mpindieu Samuele ukavua mufue, ne Isalele mujima uvua mumudile ne mumujiike mu tshimenga tshiabu, mu Lama.+ Shaula uvua mumbushe bena mbuku mu buloba buende ne bantu batu bamba malu atshilualua.+

4 Bena Peleshete bakadisangisha ne bakaya kuasa tshitudilu mu Shunema.+ Nunku Shaula wakasangisha Isalele mujima ne bakasa tshitudilu mu Gileboa.+ 5 Pavua Shaula mumone tshitudilu tshia bena Peleshete, wakumvua buôwa, ne muoyo wende wakazakala bikole.+ 6 Nansha muvua Shaula webeja Yehowa malu,+ Yehowa kavua umuandamuna ni mmu bilota anyi ku diambuluisha dia Ulima+ peshi ku butuangaji bua baprofete to. 7 Ndekelu wa bionso Shaula wakambila bena mudimu bende ne: “Nkebelayi muntu mukaji muena mbuku,+ nye kumuebeja malu.” Bena mudimu bende bakandamuna ne: “Mona! Kudi muntu mukaji kampanda muena mbuku ku Ene-dô.”+

8 Nunku Shaula wakadivuija bu muntu mukuabu, kuvualaye bilamba bikuabu, kuyaye ne bantu bende babidi kudi muntu mukaji au butuku. Wakamba ne: “Buka koku, ungambile malu atshilualua,+ ne umbikidile muntu ungakuambila.” 9 Kadi muntu mukaji au wakamuambila ne: “Udi mumanye bimpe tshivua Shaula muenze, muvuaye mumbushe bena mbuku mu buloba buende ne bantu badi bamba malu atshilualua.+ Nunku, bua tshinyi udi ujinga kungela* mu buteyi bua kunshipesha?”+ 10 Ke Shaula kuditshipa kudiye mu dîna dia Yehowa wamba ne: “Bushuwa anu bu mudi Yehowa ne muoyo, kuakupila mu bualu ebu to!” 11 Nunku muntu mukaji au wakamba ne: “Nkubikidila nganyi?” Yeye wakandamuna ne: “Mbikidila Samuele.” 12 Pavua muntu mukaji au mumone “Samuele,”*+ wakela lubila ne dîyi diende dionso, kuambilaye Shaula ne: “Bua tshinyi udi munshime? Wewe udi Shaula!” 13 Mukalenge wakamuambila ne: “Kutshinyi to, kadi ngambila, udi mumone tshinyi?” Muntu mukaji au wakandamuna Shaula ne: “Ndi mumone muntu bu nzambi upatukila mu buloba.” 14 Diakamue Shaula kumuebeja ne: “Udi mushindu kayi?” Ke yeye kuamba ne: “Mmuntu mulume mukulakaje udi wenda ubanda, ne mmuvuale muzabi wa kawuyi maboko.”+ Ke Shaula kujingululaye ne: uvua “Samuele,” ne wakinama mutangije mpala wende panshi, pashishe kutuaye mpala panshi.

15 Ke “Samuele” kuebeja Shaula ne: “Bua tshinyi udi muntatshishe pa kumbikidisha?” Shaula wakandamuna ne: “Ndi mu lutatu lukole. Bena Peleshete badi banduisha, ne Nzambi mmundekele ne kena kabidi ungandamuna ni nku butuangaji bua baprofete anyi mu bilota;+ ke bualu kayi ndi mukubikile bua ungambile tshindi ne bua kuenza.”+

16 “Samuele” wakamba ne: “Bua tshinyi udi ungebeja malu mpindieu udi Yehowa mukulekele+ ne mulue muluishi webe? 17 Yehowa neadienzele tshikavuaye muambe ku butuangaji buanyi: Yehowa neakunyenge bukalenge mu bianza ne neabupeshe muinebe Davidi.+ 18 Bu muuvua kuyi mutumikile dîyi dia Yehowa ne kuyi mubutule bena Amaleka bavua bajule tshiji tshiende tshikole,+ ke bualu kayi Yehowa udi ukuenzela nunku lelu. 19 Yehowa neakufile kabidi wewe ne Isalele mu tshianza tshia bena Peleshete,+ ne malaba wewe+ ne bana bebe+ nenuikale nanyi. Yehowa neafile kabidi tshiluilu tshia bena Isalele mu bianza bia bena Peleshete.”+

20 Diakamue Shaula wakakuluka mudiolole panshi ne wakumvua buôwa bua bungi menemene bua mêyi a “Samuele.” Kavua mushale ne bukole nansha bukese munda muende to, bualu kavua mudie biakudia dituku dijima ne butuku bujima. 21 Pavua muntu mukaji au mulue kudi Shaula ne mumone ne: uvua upampakana bikole, wakamuambila ne: “Mona, muena mudimu webe mmutumikile tshiuvua muambe, ne mvua muteke muoyo wanyi mu njiwu*+ ne muenze tshiuvua mungambile bua kuenza. 22 Mpindieu telejaku tshidi muena mudimu webe musue kuamba. Nteke koku tshipese tshia diampa kumpala kuebe; pashishe udie bua upetaku ndambu wa makanda bua uye kuudi uya.” 23 Kadi yeye wakabenga, kuambaye ne: “Tshiena ndia to.” Kadi bena mudimu bende ne muntu mukaji au bakatungunuka ne kumuela mutoyi bua kudiaye. Ndekelu wa bionso wakabateleja, kujukaye panshi, kusombaye pa bulalu. 24 Muntu mukaji au uvua ne kana ka ngombe ka manyi mu nzubu, nunku wakakashipa* lukasa lukasa, kuangataye bukula, kubusopaye ne kuenzaye diampa kadiyi diela luevene. 25 Wakabipesha Shaula ne bena mudimu bende, bobu kudia. Pashishe bakajuka, kuyabu butuku butuku.+

29 Bena Peleshete+ bakasangisha biluilu biabu bionso ku Afeke, pavua eku bena Isalele bobu base tshitudilu pabuipi ne mpokolo wa mâyi wa mu Yizelele.+ 2 Bakalenge ba bena Peleshete bavua benda bapita ne nkama ya basalayi babu ne binunu bia basalayi babu; Davidi ne bantu bende bavua benda balonda panyima ne Akisha.+ 3 Kadi bakokeshi ba bena Peleshete bakebeja ne: “Bua tshinyi bena Ebelu aba badi muaba eu?” Akisha wakandamuna bakokeshi ba bena Peleshete ne: “Eu n’Davidi, muena mudimu wa Shaula mukalenge wa Isalele, udi musombe nanyi kukadi mpindieu tshidimu tshimue anyi kupita apu.+ Tshiena mumusangane ne bualu nansha bumue katshia dituku divuaye munyeme mulue kundi too ne lelu.” 4 Kadi bakokeshi ba bena Peleshete bakamufiikila munda, kumuambilabu ne: “Aluja muntu eu.+ Apingane muaba uudi mumupeshe. Kumulekedi upueka netu ku mvita, bua kalu kutukudimukila patuikala mu mvita.+ Bualu mmushindu kayi muimpe udiye mua kuanyishibua kudi mukalenge wende kupita kuanyishibua ne mitu ya bantu betu? 5 Eu ki n’Davidi uvuabu bimbile pavuabu baja maja bamba ne:

6 Nunku Akisha+ wakabikidisha Davidi, kumuambilaye ne: “Bushuwa anu bu mudi Yehowa ne muoyo, wewe udi muntu wa malu malulame, ne ndi nsanka bua kuya nebe ku mvita ne tshiluilu tshianyi,+ bualu tshiena mukusangane ne bualu nansha bumue katshia ku dituku diuvua mulue kundi too ne lelu.+ Kadi bakalenge kabena bakueyemena to.+ 7 Nunku pingana mu ditalala, ne kuenji bualu nansha bumue budi mua kunyingalaja bakalenge ba bena Peleshete to.” 8 Kadi Davidi wakebeja Akisha ne: “Ka! Tshindi muenze ntshinyi? Mbualu kayi buudi musangane kudi muena mudimu webe katshia ku dituku dimvua mulue kuudi too ne lelu? Bua tshinyi tshiena mua kuya nebe ne kuluisha bena lukuna ba mfumu mukalenge wanyi?” 9 Akisha wakambila Davidi ne: “Buanyi meme, wewe udi muntu muimpe anu bu muanjelu wa Nzambi.+ Kadi bakokeshi ba bena Peleshete mbambe ne: ‘Kumulekedi ubanda netu ku mvita to.’ 10 Mpindieu ujuke mu dinda menemene ne bena mudimu ba mukalenge webe badi balue nebe; nujuke nuye mu dinda menemene diakamue padi panshi patoka.”

11 Nunku Davidi ne bantu bende bakajuka mu dinda menemene bua kupingana mu buloba bua bena Peleshete, ne bena Peleshete bakabanda ku Yizelele.+

30 Pavua Davidi ne bantu bende bafike ku Sikelaga+ dituku disatu, bakasangana bena Amaleka+ bapawule ku sud* ne mu Sikelaga, bele Sikelaga mvita ne bamutue kapia. 2 Bavua bakuate bantu bakaji+ ne bantu bonso bavuamu, bakulumpe ne bana, baye nabu. Kabavua bashipe muntu nansha umue to, kadi bavua babakuate, baye nabu. 3 Pavua Davidi ne bantu bende bafike mu tshimenga, bakatshisangana tshiosha, bakuate bakaji babu ne bana babu ba balume ne bana babu ba bakaji, baye nabu. 4 Nunku Davidi ne bantu bavuaye nabu bakatuadija kudila ne dîyi dikole too ne pavuabu kabatshiyi kabidi ne bukole bua kudila nabu. 5 Bavua kabidi bakuate bakaji babidi ba Davidi, Ahinoama wa mu Yizelele ne Abigayila, mukaji mukamba uvua Nabala wa mu Kâmele mushiye,+ baye nabu. 6 Davidi uvua mubungame bikole bua muvua bantu bamba bua kumuasa mabue, bualu bantu bonso bavua* ne bululu bua bungi bua muvuabu bajimije bana babu ba balume ne bana babu ba bakaji. Kadi Davidi wakadikolesha mu Yehowa Nzambi wende.+

7 Ke Davidi kuambila muakuidi Ebeyatâ,+ muana wa Ahimeleke ne: “Luaku koku ne efoda muaba eu.”+ Nunku Ebeyatâ wakaya ne efoda kudi Davidi. 8 Davidi wakebeja Yehowa ne:+ “Ndonde tshisumbu tshia benzavi etshi anyi? Nembakuate anyi?” Ke Yeye kumuambila ne: “Balonda, bualu neubakuate bushuwa ne neusungile bantu.”+

9 Diakamue Davidi wakasa luendu ne bantu balume 600+ bavuaye nabu, ne bakaya too ne ku Kasulu ka tshilonda nkoka* ka Besô, muaba uvua bantu bakuabu bashadile panyima. 10 Davidi wakatungunuka ne kubalondakaja ne bantu 400, kadi bantu 200 bavua batshioke bikole bua kusabuka Kasulu ka tshilonda nkoka ka Besô abu bakashala panyima.+

11 Bakasangana muena Ejipitu kampanda mu mpata, bobu kuya nende kudi Davidi. Bakamupesha biakudia ne mâyi a kunua, 12 pamue ne tshipese tshia dibulu dia mfigi miumisha ne mabulu abidi a tumuma tua mvinyo tumisha. Yeye mumane kudia, wakapetulula bukole,* bualu kavua mudie tshiakudia nansha tshimue peshi munue mâyi munkatshi mua matuku asatu, munya ne butuku. 13 Pashishe Davidi wakamuebeja ne: “Wewe udi muena mudimu wa nganyi? Udi wa penyi?” Ke yeye kuandamuna ne: “Ndi muena mudimu muena Ejipitu, mupika wa muena Amaleka kampanda, kadi mfumuanyi mmunshiye bualu mvua mutuadije kusama kukadi matuku asatu. 14 Tuvua bapawule ku sud kua* bena Kelete+ ne mu buloba bua Yuda ne ku sud kua* Kaleba,+ ne tuvua batue Sikelaga kapia.” 15 Ke Davidi kumuambila ne: “Udi mua kuya kundeja muaba udi tshisumbu tshia benzavi atshi anyi?” Wakandamuna ne: “Wewe muditshipe kundi mu dîna dia Nzambi ne: kuakunshipa ne kuakumfila mu tshianza tshia mfumuanyi, nenye kukuleja muaba udi tshisumbu tshia benzavi atshi.”

16 Nunku wakapueka nende muaba uvuabu batangalake mu buloba buonso, badia, banua ne basanka bua bintu bipite bungi bivuabu banyenge mu buloba bua bena Peleshete ne mu buloba bua Yuda. 17 Ke Davidi kubashipa kumbukila ku dinda patshivua panshi pafiike too ne dilolo diakalonda; muntu nansha umue kakapanda+ pa kumbusha bantu 400 bavua banyeme pa tumelu. 18 Davidi wakapetulula bionso bivua bena Amaleka bangate,+ ne Davidi wakasungila bakaji bende babidi. 19 Tshintu tshiabu nansha tshimue katshivua tshijimine to, nansha tshinene menemene nansha tshikese menemene. Bakapetulula bana babu ba balume ne bana babu ba bakaji ne bintu bivuabu banyenge;+ Davidi wakapetulula bintu bionso bivuabu bangate. 20 Nunku Davidi wakangata bisumbu bionso bia mikoko ne bia ngombe bivuabu basaka kumpala kua bimuna biabu. Bakamba ne: “Ebi mbintu bidi Davidi munyenge.”

21 Pashishe Davidi wakaya kudi bantu 200 bavua batshioke bikole bua kuya nende, bavua bashale panyima ku Kasulu ka tshilonda nkoka ka Besô,+ ne bakapatuka bua kusambakena ne Davidi ne bantu bavuaye nabu. Pakafika Davidi pabuipi ne bantu abu, wakabebeja muvuabu. 22 Kadi bantu babi ne bantu tshianana bonso ba munkatshi mua bantu bavua baye ne Davidi bakamba ne: “Bu muvuabu kabayi baye netu, katuakubapesha tshintu nansha tshimue tshia mu bintu bivuabu banyenge bitudi bapetulule to, kadi muntu yonso udi mua kuangata mukajende ne bana bende, kuyaye.” 23 Kadi Davidi wakamba ne: “Bana betu kanuena ne bua kuenza nunku ne bintu bidi Yehowa mutupeshe to. Uvua mutulame ne mufile tshisumbu tshia benzavi tshivua tshilue kutuluisha mu tshianza tshietu.+ 24 Nnganyi udi mua kutua ku tshienu mu bualu ebu? Muntu uvua muye ku mvita neapete bintu bungi bua muomumue ne muntu uvua mushale ne mabuki.+ Bonso nebapete bintu pamue.”+ 25 Kutuadijila anu dituku adi, bualu ebu buakalua mukenji ne dîyi dia kulonda mu Isalele too ne lelu.

26 Pakapingana Davidi ku Sikelaga, wakatumina bakulu ba mu Yuda bavua balunda bende ndambu wa bintu bivuabu banyenge, wamba ne: “Edi ndipa* dienu dia mu bintu bituvua banyenge bena lukuna ba Yehowa.” 27 Wakabitumina bavua mu Betele,+ bavua mu Lamota wa mu Negebe,* bavua mu Yatî,+ 28 bavua mu Aloê, bavua mu Sifemota, bavua mu Eshetemoa,+ 29 bavua mu Lakala, bavua mu bimenga bia bena Yelamele,+ bavua mu bimenga bia bena Kene,+ 30 bavua mu Hôma,+ bavua mu Bô-ashana, bavua mu Ataka, 31 bavua mu Hebelone,+ ne miaba yonso ivua Davidi ne bantu bende bapitshile.

31 Mpindieu bena Peleshete bavua baluangana ne Isalele.+ Bantu ba mu Isalele bakanyema kumpala kua bena Peleshete, ne ba bungi bakakuluka bashipa pa mukuna wa Gileboa.+ 2 Bena Peleshete bavua anu benda balondakaja Shaula ne bana bende, kusemenabu pabuipi nabu bikole; bena Peleshete bakashipa Yonatana,+ Abinadaba, ne Maleki-shua, bana ba Shaula.+ 3 Mvita yakakolela Shaula bikole menemene, ne bedi ba mikete bakamona muaba uvuaye, bobu kumutapa bibi menemene.+ 4 Ke Shaula kuambila muntu uvua umuambuila bia mvita ne: “Tula muele webe wa mvita, uwuntue, bua bantu badi kabayi batengula aba+ kabalu kuntua muele ne kungenzela malu kakuyi luse.”* Kadi muntu uvua umuambuila bia mvita kakitaba to, bualu uvua ne buôwa bua bungi menemene. Nunku Shaula wakangata muele wende wa mvita, yeye kudishindilapu.+ 5 Pavua muntu uvua wambuila Shaula bia mvita mumone ne: Shaula uvua mufue,+ yeye pende wakadishindila pa muele wende wa mvita, kufuaye pamue nende. 6 Nunku Shaula, bana bende ba balume basatu, muntu uvua umuambuila bia mvita, ne bantu bende bonso bakafua pamue dituku adi.+ 7 Pavua bena Isalele bavua mu tshitupa tshia buloba tshia mu tshibandabanda* ne mu tshitupa tshia buloba tshia Yadene bamone ne: bantu ba mu Isalele bavua banyeme, ne Shaula ne bana bende bavua bafue, bakatuadija kunyema, bumbuka mu bimenga biabu;+ nunku bena Peleshete bakalua, kusombabu mu bimenga abi.

8 Dituku diakalonda, pavua bena Peleshete balue bua kuangata bintu bia bantu bavuabu bashipe, bakasangana Shaula ne bana bende ba balume basatu bafuile pa mukuna wa Gileboa.+ 9 Nunku bakamukosa mutu, kumukopolabu bia mvita biende, bobu kutuma mukenji mu buloba buonso bua bena Peleshete bua bamuangalaje lumu alu+ mu nzubu* ya mpingu yabu+ ne mu bantu. 10 Pashishe bakateka bia mvita biende mu nzubu wa bimfuanyi bia Ashatelota, bobu kulamakaja tshitalu tshiende ku tshimanu tshia Bete-shana.+ 11 Pavua bantu ba mu Yabesha-gilada+ bumvue tshivua bena Peleshete benzele Shaula, 12 bena mvita bonso bakajuka, kuyabu butuku butuku, kutululabu tshitalu tshia Shaula ne bitalu bia bana bende ba balume ku tshimanu tshia Bete-shana. Bakapingana ku Yabesha, bobu kubiosha kuntu aku. 13 Pashishe bakangata mifuba yabu,+ kuyijiikabu muinshi mua mutshi wa tamalise mu Yabesha+ ne bakajila biakudia matuku muanda mutekete.