Pila yi u le sadisa dibundu dienu

Mu gifudji gi kima, hadu engi gibeni a gusambilanga Yehowa mu gieshi mu mabundu m’Ambangi a Yehowa mengi gibeni. M’agusepelanga yi malongi kega ludwadisu lu’agusendanga, kega a gukalanga mu gieshi mu gusadisa mabundu mu mapila mengi. Ayi kega u gukalanga mu gieshi mu gusadisa dibundu dienu?

1. Pila yigi du le hangila dangu kega ngolu jedu mu gusadisa dibundu?

Edu’akima du le sadisa dibundu. Mumbandu, apangi ega mu dibundu dienu ena minunu to ena y’ifu mu mwila? U le gu’asadisa mu gwenda gu malugudaganu to gu’asadisa mu mambu mega ma funu mumbandu gu’asadisa mu gusumba yima to gu’ahangila yisalu yi nzu? (Danga Yakobo 1:27.) Du le hana kega miogu mu gisalu gi gusa ukedji ke guyidiga Nzu yi Gifumu yedu. Lō gwena ata mudu u gudupusanga mu ngolu mu guhanga mambu ma. Zola diedu mumwila yi Nzambi kega mumwila yi apangi edu di gudupusanga mu “gudihana mu luzolu [lwedu beni].”—Nkunga 110:3.

Ambangi a Yehowa o agasenda mbodjiga, a le sadisa dibundu mu mapila mengi. Apangi amala o agulungisanga mambu ma gulombanga Bible, a le guma asadi a gisalu kega gu dima a le guma ankuluntu. Apangi amala yi agonusa a le hanga mu gieshi gisalu gi (pionie) mubagi mbuga. Ambangi a Yehowa ega a le hana miogu mu gisalu gi gudunga yihani yi lusambu to gwenda gihani gio dibundu di moshi diena yi funu yi lusadisu mu mapila mega.

2. Pila yigi du le hangila mbongu to yima yedu yi gisuni mu gusadisa dibundu?

Du le “gumisa Yehowa yi yima [yedu] yi talu.” (Bingana 3:9) Dwena kala mu gieshi mu guhana mbongu to yima yega mu gusadisa dibundu to guhana miogu mu gisalu gi gulonga sangu ji pimbu mu gifudji gi kima. (Danga 2 Bakorinto 9:7.) Magabu medu ma gusadisanga kega mumwila mu gusadisa apangi a bwila pashi. Ambangi engi a “gusweganga ndambu yi mbongu” mumwila mu guhananga magabu. (Danga 1 Bakorinto 16:2.) Du le sa mbongu mu makesi ma magabu mo m’agusanga mu yihani yi du guhanganga malugudaganu to mu internet mu donate.jw.org. Du gumonisanga mbi mu duguzolanga Yehowa mbi mu dubahangila mbongu kega yima yedu yega mumwila mu gusadisa dibundu.

WISHIYA KEGA MAMBU MENGI

3. Du le hangila yima yedu yi gisuni

Yehowa yi Yezu a guzolanga hadu o’aguhananga mu gieshi. Mumbandu, Yezu ma gashigishidi mugonusa mu moshi u mufwidi yo u gakedi sugami mumwila yi luzolu lwendji lu pimbu lu guhana magabu. Dangenu Luka 21:1-4, gu dima hanenu mamvudu mu miwu mi:

• Gugulombanga kaka mbi duhani magapu mengi mumwila mu gusepedisa Yehowa?

• Pila yigi Yehowa yi Yezu a gwifanga mbi mu dubahana magabu mu gieshi?

Mu gwishiya pila organizasio di Yehowa di guhangilanga magabu medu, dalenu VIDEYO. Gu dima hanenu mvudu mu muwu u laba:

VIDEYO: ‘Gabu gu miogu mumwila yi Yehowa’ (4:47)

• Pila yigi organizasio di Yehowa di guhangilanga magabu medu mumwila yi mapimbu ma dibundu mu gifudji gi kima?

4. Du hani lusadisu mu luzolu lu kima

Mu dangu di tunda, asadi’a Yehowa a gahanganga yikesa yi ngolu mumwila mu gudanina yihani yowu yi lusambu. Gadula guhana mbongu, ma gahanganga kega mambu mega. Dangenu 2 Bansangu 34:9-11, gu dima hanenu mvudu mu muwu wu:

• Pila yigi hadu’akima a Izraele a gahananga miogu mumwila mu guyidiga Nzu yi Yehowa to gihani gi lusambu?

Mumwila mu gudala pila Ambangi a Yehowa a gulabanga mbandu yi asadi’a Nzambi a dangu di tunda, dalenu VIDEYO. Gu dima hanenu mamvudu mu miwu mi milaba:

VIDEYO: Dudanini yihani yedu yi lusambu (3:31)

• Mumwilegi gwena funu mbi Nzu yedu yi Gifumu yikadi dangu di kima ukedji kega yiguyidiga pimbu?

• Yigi u le hanga mu guhana miogu mu yisalu yi?

5. Apangi amala, hangenu yikesa mumwila mu gusenda mikumba

Bible di gulombanga apangi’amala mu guhanga yikesa yi ngolu mu gulungisa mambu mo Bible di gulombanga mumwila mu gusenda mikumba mu dibundu. Mumbandu, dalenu VIDEYO. Gu dima hanenu mvudu mu muwu wu u laba:

VIDEYO: Apangi amala—kalenu yi nzala yi gusenda mikumba mumwila yi gisalu gi pimbu (5:19)

• Pila yi dudala mu videyo di, pangi Ryan a gahangidi yigi mu guguma gusadisa dibundu ngolu?

Bible di guhoshilanga mambu mo apangi amala a fe lungisa mumwila mu guguma asadi’agisalu to ankulutu. Dangenu 1 Timoteo 3:1-13, gu dima hanenu mamvudu mu miwu mi:

• Mambu megi apangi amala a fe lungisa mumwila mu guguma asadi a gisalu to ankulutu?

• Mambu megi hadu’amabuda mowu a fe lungisa?—Dala maverse 4 yi 11.

• Mapimbu megi apangi’akima a dibundu a gusendanga, mbi apangi amala maba lungisa mambu ma magulombanga Bible?

MU KUFI

Yehowa a gusepelanga ngolu mbi mu dubahangila dangu, ngolu, kega yima yedu yigisuni mumwila mu gusadisa dibundu.

Mvudugilu

• Pila yigi du le hangila dangu kega ngolu jedu mu gusadisa dibundu?

• Pila yigi du le hangila yima yedu yi gisuni mumwila mu gusadisa dibundu?

• Danga mwa mambu ma u le hanga mumwila mu gusadisa dibundu?

DALA KEGA

Dala mumwilegi Nzambi lo’agulombanga kega asadi endji mu guhana dime.

“Bible di guhosanga yigi mu mambu ma dadila dime?” (Disolu dio diena mu jw.org)

Dala mbi mangogu “guzola guguma” mu dibundu gu ba dendula yigi.

“M’uguzolanga ‘guguma’?” (Nzozulu ya Nkengi 15/9/2014)

Dala yikesa yo Ambangi a Yehowa ega a guhanganga mumwila mu guneyila apangi’owu Akristu miganda.

Pila yi a guneyanga miganda: Congo

Ambangi a Yehowa a guzwanga mbongu ji guhangila yisalu yowu pila mabundu mega ma guzwanga?

“Mbongu jo Ambangi a Yehowa a guhangilanga yisalu yowu ji gugaduganga kwi?” (Disolu dio diena mu jw.org)